PAMUNGKAAN 48
48
Dipasupasu si Jakob ma si Efraim dohot si Manase
1Dung adong sanga sadia honok, adong ma na ro paboahon tu si Josep, marnyae amangnia i. Jadi kehe ma ia mangaligi si Jakob dohot anaknia na dua i, si Manase dohot si Efraim. 2Dung dibege si Jakob na ro si Josep, dipahibul ia ma gogonia laho juguk di podomannia i. 3Didok si Jakob ma tu si Josep, “Madung dipataridahon Debata Na Markuaso i diriNa tu au di Lus na di tano Kanaan jana ma dipasupasu Ia au. 4Didok Debata tu au, ‘LehenonKu ma di ho bahat pomparanmu anso gabe bangso na bahat pomparanmi; lehenonKu ma di pomparanmu luat on gabe tano ni halahi ro di salolot-lolotna.’ ”
5Laing didok si Jakob dope, “Ale Josep, ia anakmu si Efraim dohot si Manase na sorang di Mesir on dompak so lalu dope au tuson, au do nampunasa; dakdanakku do halahi na dua dos songon si Ruben dohot si Simeon. 6Betak sai adong dope tamba dakdanakmu, nada etongon be i songon dakdanakku; si Efraim dohot si Manase do haroroan ni tean-teanan di halahi. 7Hara ni inangmu si Rahel do da hubaen songon i. Sun do arsak ni rohangku di parmonding ni inangmi di Kanaan, nada pola sadia dao sian Efrata, di pardalananku laho mulak sian Mesopotamia. Disi do ia dikuburkon, di topi ni dalan laho tu Efrata.” (Betlehem do diboto halak saonnari Efrata i.)
8Di na niida ni si Jakob anak ni si Josep na dua i, disapai ia ma, “Ise dehe dakdanak on?”
9“On ma dakdanakki na nilehen ni Debata tu au di Mesir on,” ning si Josep mangalusi. Didok si Jakob ma, “Padonok ma tu au anso hupasupasu halahi.” 10Ma rambon parnidaan ni si Jakob hara ni tobangna jana nada tangkas be diida ia. Dipadonok si Josep ma dakdanaknia i tu lambung ni si Jakob, dihaol ia ma dakdanak i jana diumma ia. 11Jadi didok si Jakob ma tu si Josep, “Inda huambang marsuo be au dohot ho, hape saonnari salang dohot dakdanakmu laing diloas Debata dope huida.” 12Dung i dibuat si Josep ma dakdanak na dua i sian ampuan ni si Jakob, jana tungkap ma ia marsomba di jolo ni amangnia i.
13Dung i dibaen si Josep ma anaknia sianggian i, i ma si Efraim sabola siambirang ni si Jakob jana si Manase anaknia siangkaan i sabola siamunnia. 14Tapi dipasuhar si Jakob ma tangannia jana dipayakkon ia ma tangan siamunnia i tu ulu ni si Efraim, jana tangan siambirangnia i dipayakkon ia tu ulu ni si Manase. 15Dung i dipasupasu ia ma si Josep, didok ia ma,
“Debata do na nisomba ni si Abraham dohot si Ishak,
laing ia do na manogu au lopus saonnari;
16Ia do Surusuruan na paluahon au sian sandok parmaraan.
Sai Debata i ma na mamasumasu dakdanak on.
Sai hot ma mangolu goarku dohot goar ni si Abraham dohot si Ishak hara ni angka dakdanak on!
Sai gabe ma hamu jana mur martamba bahat pomparanmu!”
17Nada sonang roha ni si Josep di na niidania amangnia i mamayakkon tangan siamunnia i tu ulu ni si Efraim, jadi digolom ia ma tangan ni amangnia paimbarkonsa sian ulu ni si Efraim tu ulu ni si Manase. 18Didok ia ma tu amangnia i, “Ulang ma songon i, amang. On do da anakku siangkaan; tangan siamunmi ma da baen tu ulunia i.”
19Dijua amangnia i do i, didok ma, “Huboto do da i amang, huboto do. Pomparan ni si Manase pe gabe bangso na godang do. Tapi laing gumodang dope kuaso ni angginia i ulang ia, jana pomparan ni angginia i gabe angka bangso na godang do.”
20Jadi laing dipasupasu ia muse dope dakdanak na dua i laing sadari i, ning ia ma, “Pakeon ni halak Israel ma goarmunu di na mamasumasu sanga ise halahi. Dokkonon ni halahi ma, ‘Sai dibaen Debata ma ho songon si Efraim dohot si Manase.’ ” Jadi anggo si Jakob, si Efraim do dipatujolo ia sian si Manase.
21Jadi didok si Jakob ma tu si Josep, “Songon na niidamu, donok noma da ajalku; tapi laing donganan ni Debata do hamu jana obanonNa mulak tu luat ni ompungmunu. 22Tu ho do, jana nanggo tu angka kahanggimu lehenonku Sikem, tano napu i na hurampas, sian halak Amori marhite podang dohot pana.”
လက်ရှိရွေးချယ်ထားမှု
PAMUNGKAAN 48: LAIAKB
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Indonesian Bible Society