PAMUNGKAAN 47
47
1Jadi dioban si Josep ma lima halak kahangginia i laho mangadop tu raja i. Ning ia ma, “Ma lalu da amangnami i dohot angka kahanggingki sian Kanaan; dioban halahi do angka hambeng, biri-biri dohot lombu dohot sude sinadongan ni halahi. Saonnari, di Luat Gosen do halahi.” 2Bulus dipatandahon ia ma angka kahangginia i tu raja i. 3Disapai raja i ma halahi, “Aha dehe karejomunu?”
Dialusi halahi ma, “Parmahan do anggo hami laing songon angka ompungnami, rajanami. 4Na giot maringanan di luat on do hami umbaen na ro hami, dibaen santakna haleon na masa di Kanaan, jabat nada adong be ruput panganon ni angka pahan-pahanannami i. Paloas ma hami da rajanami maringanan di Gosen.” 5Jadi didok raja i ma tu si Josep, “Dibaen madung lalu tuson amanta dohot angka kahangginta i, 6jadi dohot ma halahi nampuna tano Mesir on. Padiar ma da maringanan di Luat Gosen halahi, on ma lunggu-lunggu na dumenggan di luat on. Jana betak sai adong sian halahi angka na malo, baen ma halahi gabe pangurus ni pahan-pahananku.”
7Dioban si Josep muse ma amangnia i laho patandahonsa tu raja i. Dipasupasu si Jakob ma raja i, 8jana disapai raja i ma tusia, “Ma marumur sadia ma hamu?”
9Dialusi si Jakob ma, “Saratus tolu pulu taon ma au na mangolu i songon pardalan-dalan. Gok hasusaan do angka taon na hubolus i, tapi i santongkin dope i martimbangkon angka taon na nidalanan ni na umpompar au.” 10Dung i dipangido si Jakob ma pasupasu di raja i, i ma hata horas-horas, laho marsirang jana kehe ma halahi sian i. 11Sai diurupi si Josep ma amangnia dohot kahangginia i dung maringanan di Mesir. Dilehen ia ma tano gabe nampuna ni halahi sandiri, di bagian na dumenggan di luat i donok tu Ramses, songon na nitonahon ni raja i. 12Jana dipasingkop si Josep ma haporluan ni balanjo di amangnia, di angka kahangginia dohot di sude koum sisolkotnia lopus tu na umposo pe.
Haleon potir
13Hara ni santakna haleon i sanga na di dia nada adong be panganon. Gabe gale-gale ma halak Mesir dohot halak Kanaan hara ni na malean. 14Ganop manobusi eme halahi, dipalagut si Josep ma hepengna i jana ditaruhon ia ma tu bagas godang ni raja i. 15Dung abis hepeng di Mesir dohot di Kanaan, marroan ma halak Mesir mandapotkon si Josep jana didok halahi ma, “Lehen ma panganon di hami! Ulang ma padiar hami mate. Sanga na bia ma baenonmu! Ma abis hepengnami.”
16Dialusi si Josep ma, “Muda abis hepengmu, pahan-pahananmi na lehen; hulehen pe di hamu sipanganon.” 17Jadi dipasahat halahi ma pahan-pahanan ni halahi tu si Josep jana dilehen ia ma panganon tu halahi songon gonti ni kudo, biri-biri, hambeng, lombu dohot halode ni halahi i. Di na sataon i, pahan-pahanan ma songon panggarar ni panganon dibaen si Josep tu halahi.
18Di taon na mangihut muse, ro ma halahi tusia mandok, “Nada pola bunihononnami tu tuan i na dung abis hepengnami, jana angka pahan-pahanannami pe madung gabe tuan i nampunasa. Nada adong be diha-dihanami na tarlehen hami tu tuan i, asing sian dirinami dohot tanonami. 19Ulang padiar mate hami. Baen ma sanga na aha! Ulang padiar gabe gariang tanonami. Tobusi hamu ma hami dohot angka ladangnami i jana eme pe panggararna. Padiar ma gabe naposo ni raja i hami jana ia nampuna tanonami i sude. Lehen ma eme di hami paudut ngolunami jana laing lehen ma dohot same sisaburonnami di ladangnami!”
20Jadi ditobusi si Josep ma sude tano na di Mesir baen di raja i. Tarpaksa ma digadis halak Mesir i tano ni halahi hara ni santakna haleon potir i; jadi gabe raja i noma nampuna tano i sudena. 21Gabe naposo ma sude rayat ni Mesir i dibaen si Josep. 22Hum tano ni angka malim noma na so ditobusi ia. Nada jabat manggadis tano halahi, angke dapotan pangurupi do halahi tongtong sian raja i songon gaji ni halahi sipakeon ni halahi di ngoluna. 23Didok si Josep ma tu rayat i, “Ligi hamu bo, ma hutobusi hamu dohot tanomunu di raja i. On ma same sisaburonmunu di ladangmunu i. 24Muda sabion, angkon mangalehen ma hamu tu raja i saparlima ni suhana i. Lobina i ma sipakeonmunu gabe same dohot panganonmunu dohot keluargamunu.”
25Dialusi halahi ma, “Songon i ma dengganna dibaen tuan i tu hami, madung dipalua tuan i hami; rade ma hami gabe hatoban ni raja i.” 26Jadi dipahot si Josep ma pangalaho i gabe aturan ni Luat Mesir; saparlima sian suha ni karejo angkon gabe raja nampunasa. Lopus saonnari laing mardalan do aturan i. Hum tano ni malim ma i na so raja nampunasa.
Pangidoan ni si Jakob na parpudi
27Songon i ma dalanna gabe laing maringanan halak Israel di Mesir, i ma Luat Gosen. Mur kayo ma halahi jana magabe. 28Mangolu dope si Jakob disi pitu bolas taon nari, lopus marumur ia saratus opat pulu pitu taon. 29Di na mur donok hatihana marujung ngoluna, dipiohon ia ma si Josep anaknia i, didok ia ma hatania, “Baen ma tanganmi tu holang-kolang ni hae-haengkon jana sumpahon ma na so kuburkononmu au di tano Mesir on. 30Giotku, angkon di inganan ni angka daompung do au dikuburkon; oban hamu ma au sian Mesir on jana kuburkon hamu ma au di kuburan ni daompung i.”
Jadi dialusi si Josep ma, “Hupatulus pe songon na nidok ni amang i.”
31Didok si Jakob ma, “Sumpahon ma paboa na tutu patulusonmu songon i.” Disumpahon si Josep ma, jana mandok tarimakasi ma si Jakob di podomannia i.
လက်ရှိရွေးချယ်ထားမှု
PAMUNGKAAN 47: LAIAKB
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Indonesian Bible Society