YouVersion လိုဂို
ရွာရန္ အိုင္ကြန္

Mak 13

13
Jizọs Nnị Tamunoopuwarị Ma Kaá Gulugulu Ma Gbolomanyẹ Dughom
(Mat 24.1,2; Luk 21.5,6)
1Jizọs Tamunoopuwárị ma warịsoarị sáá ori gbẹ́rẹ́ ọḅụduaḅọ dughom, <<Dighi Nyẹ́dieḅọ! Mịị tọ́rọ́fịnị ḅụ́gbérépuma dapịrị na pịghị tọ́rọ fịnị wárị!>> 2Jizọs pagharam, <<Ọ kọkọ mị opuma dụḅa wárị ma árị? Gbẹ́rẹ́ dapịrị sọ kiri kọọbịgha anị parị fịnịkiri; n nyẹ gonyẹ́ gonyẹ́ suma gbibẹm.>>
Ḅụḅáláḅálá Na Tọ́rụ́siarị
(Mat 24.3-14; Luk 21.7-19)
3Jizọs Olivu Tụ́ndụ ma ḅụ kpọrọfịnịarị sa Tamunoopuwarị ma na dama dama ngaa anịị Pita Jems Jọn na Anduru ḅọghu ḅara pa ọ damaḅo nyẹ. 4Si ọ ḅẹ́, <<Dugho wa pịrị, Mịma tẹ́ sáá kiriakị bẹ? Pịghị dugho wa pịrị pághá bẹnyẹ si die ḅẹ sáá ma lámam mịnanyẹ mamgba kiriakị bẹ sáá.>>
5Jizọs n ḅẹm, <<Ọ ḅụ ẹbị, ọ pịghị minima sị gbẹ́rẹ́ḅọ sọ oḅori pa ọ sị. 6Tọghaapụ ị́yẹ́ ẹ́rẹ́ ḅụ ḅobẹm, ḅẹẹ bẹapụ ḅẹ́, <Irị anịị ori,> nnị pịghị oḅori pa tọghaapụ sịbẹm. 7Ḅụḅáláḅálá pa ọ ḅụ pịrịma, ọ saghị ọmụ́ ọwụ náa bẹ sa kikia angaá na pịghị ọ́mụ́ gbolomanyẹ náa ḅọlọ́nga ḅụ. Mịnanyẹ mamgba kiriakịbẹm mịma dughogha ḅẹ́ kunema ma lámam. 8Gbẹ́rẹ́ sẹ owu pa jẹ́ sẹ pághámabẹm, gbẹ́rẹ́ ásẹ́mẹ́kiri owu pa jẹ́ ásẹ́mẹ́kiri pághámabẹm. Tuminikiri ma jighebẹm ngaamamgba ḅụ, ḅuruḅa pịghị fịnịbẹm. Mịma anịị ọ́rụ́ḅọ tụ́wọ yii ḅụakụ ḅụ fịnị ḅara anịị anị fịnị ḅara.>>
9<<Ọmịnị sọ, ọmịnị ọ ḅụ ẹbị. Nnị okubẹm sị ọ pa ḅẹ́rẹ́kọ sịrị mubẹm. Nnị o fombẹm nna kobiri yọ ḅụ, nnị o mịẹbẹm sị ọ sẹ táarịapụ na ámányánáapụ tórúku i sịbị go, sị ọmịnị ibi oku ma dugho wásáma bẹ ḅara. 10Kụ́ma ọ parị ibi oku ma dugho wásáma kị́nị́mamgba pịrịbẹm, anịsáa anịị kunema ma ḅo bẹnyẹ. 11Nnị oku si ọ pa ḅẹ́rẹ́kọ siri mú sáá, ọ báláma sị saghị kóróma parị ọ dugho bẹnyẹ; sáá ma láa maẹrẹ ọ bịpịbie sọọnyẹ gonyẹ́ gonyẹ́ dugho, ọ kọọ bẹ ẹ́gẹ́rẹ ma ọmịnị angaá nyẹ́gha; Tọ́ntọ́ Tẹ́mẹ́ ma ḅara anịị anị saghị ḅo bẹnyẹ. 12Mịná owiapụ nna jẹ́ mịná owiapụ dẹrịfị pa fịị bie suabẹm, daapụ anị gbẹ́rẹ́ ḅara ma pa nna awọ mịẹbẹm. Awọamaapụ tọ́rụ pịghị nna daapụ na nna nyingiapụ dáabẹm si árị ḅẹ́ nnị n ḅáa. 13Kị́nị́mamgba o dighi ḅụ akụbẹm i sịbị gosi. Kụ́ma inema nyána mú kunema láa ḅo anịị dụaḅọ́rọ́ma nyána bẹḅọ.>>
Sáá Ma Sii Sa Tumḅọ
(Mat 24.15-28; Luk 21.20-24)
14<<Ọ saghị túminị́ <Árị na ibighaa nyẹ ma árị sáá> anị fịnị na ibighaa angaá (goo ḅo ḅụ́kọ́rọ́ma akanyaḅo) Anịsáa Judiya ḅụ fịnịapụ mangị tụ́ndụ ọgọnọ muu. 15Wárị osu ḅụ fịnịḅọ sáá ngúmá ma ḅẹ́ n ḅọ kóró muunyẹ biibẹm n ḅo pa muu bẹnyẹ. 16Duakiri ḅụ fịnịḅọ wárị ḅoo ma ḅẹ́ n ḅọ gbẹbịtẹ akị́dọghum. 17Anị éné ma anị tọ́rọ fịnị ḅáláfáma nyẹ dighi fura ẹ́rẹ́ na káláawọ ọlọ ẹ́rẹ́ámáapụ pịrịbẹ! 18Ọ Tamuno tẹ́ghẹ̄ ḅẹẹ, mịnanyẹ ma kiriakịbịgha fọ́ngụ bie! 19Anịsáa biri ma ḅụḅáláḅálá siḅaá Tamuno tuminikiri tẹ́mẹ́ sa éné éné anị árị ma ḅụḅáláḅálá nẹ́ngịbẹm, akị muu anị gbẹ́rẹ́ sáá ma láa. Ọkọfịnị jẹ́nyẹ mịnị jẹ́ pa kiriakịbịgha. 20Kụ́ma Kị́nị́nyánáḅọ anị éné ma mịẹ gbulumamam, ọ ḅọ́rọ́ ọkọ mịẹgha, gbẹ́rẹ́ḅọ so dụaḅọ́rọ́ma nyánábịgha, ọ sẹ́lẹ́ ọ ḅụ pịrịapụ ma gosi anị fịnị ḅara fịnị ḅara ori éné ma mịẹ gbulumamam.
21<<Anịsáa, ḅọ́rọ́ tumḅọ i ḅẹ́ ḅẹẹ, <Dighi, mịị Mesaya ma!> Anịgha, <Dighi, ori anị angaá imii!> Minini ma. 22Tegó iruo Messaya na iruo ikiakoroapụ págháḅobẹm. Nnị tọgha ḅụ́gbérépuma fịrị nwángịbẹm sị n pa oḅori pa Tamuno sẹlẹakịapụ ma sị ḅọ́rọ́ nnị ine inee. 23Ọmịnị ọ ḅụ karakáráma, a tórúku ḅoarị nyẹ gonyẹ́ gonyẹ́ dugho ọ pịrịmam.>>
Tumḅọ Yii Tụ́wọ Ma Ḅoo
(Mat 24.29-31; Luk 21.25-28)
24<<Ḅáláfámáarị éné ma ḅo ḅọ́rọ́ sáá,
<< <ịrụa ma ḅoo kánákánábẹm,
akalụ́ sọ mịnị biabịgha,
25ḅálōló sọ sobie saghị sóórókóróbẹm
ọgọnọ bie fịnị kụ́rọ nyẹ ma nnị anị deesibẹm nna kiri ḅụ.>
26<<Anịsáa Tumḅọ yii Tụ́wọ ma ọ ḅụ diebẹm oḅuto ma bie saghị ḅoarị opu kụ́rọ na opu ipine ḅụ. 27Ori sookumuapụ ma fịrịma tuminikiri ínia ọkọlọbị ma muubẹm, sị n muu Tamuno sẹlẹakịapụ ma kobiri tuminikiri ma gbẹ́rẹ́ kunema ngaa akị mú jẹ́ kunema ngaa láa.
Kúru Sị́ Ma Ḅụ Dawọ Ḅoo Bẹnyẹ
(Mat 24.32-35; Luk 21.29-33)
28<<Kúru sị ma nyẹ pa o die, kúru sị ma biamaẹrẹ o nimim ḅẹ́ ẹ́rẹ́kụra kikiamam. 29Anị gbẹ́rẹ́ ḅara ma, ọ mịị nyẹ ma árị si anị kiriakịarị sáá, o nimi ḅẹ́ sáá ma kikiamam, anị saghị bẹ sáá. 30A tụ́manyẹ ma dugho ọ pịrịm, mị ḅụ́ọ́apụ ma fịịfamabịgha akị mú mịnanyẹ mamgba kiriakị sáá láa. 31So na kiri na ḅọ́rọ́ famabẹm, kụ́ma ị́yẹ́ ẹ́gẹ́rẹ́ jẹ́ éné jẹ́ éné ḅọ́rọ́bịgha.
Gbẹ́rẹ́ḅọ Sọ Éné Ma Anịgha Sáá Ma Nimigha
(Mat 24.36-44)
32<<Gbẹ́rẹ́ḅọ sọ nimigha anị éné ma anịgha sáá ma ḅoo bẹ sáá sobie fịnị sookumuapụ ma sọ nimigha, Tụ́wọ ma sọ nimigha; Daḅọ ma ngéré anịị nimiḅọ. 33Tọ́rụ findi kúru ḅụ fịnị, tẹ́lẹ́ma kuruu, tegó o nimigha sáá ma láa bẹ sáá. 34Anị fịnị bẹ ḅara anịị warị wáriso sị nyẹ muu owitụ́wọ sị wárị kóróma ori ómóniapụ pịrị, anịị ọ fịrị pa ọ́rụ́ḅọ ọ́rụ́ḅọ pịrị so máare, n ḅọ mịẹbẹnyẹ, pịghị ḅụ́pọ́ kuruḅọ ma ḅẹẹ ọ ḅụ́pọ́ kuruu. 35Anịgo kuruu, tegó ị nimigha wárị nyánáḅọ ma ḅoo bẹ sáá, ori ine ḅupiri ḅoobẹm anịgha dii ogbo anịgha ḅáásó anịgha dedefụfụ. 36Ọ ḅụnimigha ḅụ ḅoo ḅo, minima si ori ị́yẹ́ arịị ḅẹẹ, ị múnoarị. 37A dugho ọ pịrịnyẹ, anịsáa a dugho kị́nị́mamgba pịrịm, ọ tọ́rụ findi si kuruu!>>

လက္ရွိေရြးခ်ယ္ထားမွု

Mak 13: IBY

အေရာင္မွတ္ခ်က္

မၽွေဝရန္

ကူးယူ

None

မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ