Halloo 42
42
Yooseefichi Maneenaꞌo Maayoon Kemeya Gibits Hamo
1Yaaqobi Gibits maayo beemon waayeꞌi, bi bushiishoyich ishichiye: “Amoyichiye ittoshinaa ittoshina ciineeꞌi koteebeeto? 2Gibits maayo beemon waayeto taane. Shaacoona no qitaachemmoyich, desh Gibits hamiree maayoon aroochee keme deebote” iye.
3Ebich Yooseefichi aashire maneenaꞌo maayoon kemeya Gibits kindiyeete. 4Tunetaa Yaaqobi Yooseefichi indee shiyeto tuneti Biiniyaami toommooch “Ikke mooyo tunemmone” ii bi shattitoyich, bi maneenaꞌona tookkii daachiyaanoone. 5Kanaanee showoochoo shaacoo giyitoyich, Israꞌeelichi bushiisheenaꞌo bare asheenaꞌona tookkii maayoon keme deeba Gibits hammiyeete.
6Ebiyooba Yooseefi Gibitsee iraashoone. Bare showoo bulliichee waabeeti asheenaꞌoyich maayoon kemmiibeeto, biine. Yooseefichi maneenaꞌo shaggiꞌi, showooch guufee biich goyinneheete. 7Yooseefiyoo bi maneenaꞌon beeggiꞌi, bekkech ariihe; tunebaani ariyaanoon shaahiꞌi, “Amoocheeniye ittoshi waato?” ii kaaroona echehe.
Boonoshiyoo “Maayoon keme daamma Kanaanee showoocheeniye no waato” ii wochiyeete.
8Yooseefi bi maneenaꞌon ariihe; tunebaani boonoshi biin ariyaaneenaꞌone. 9Ebiyooba ebiyee aaf bi maneenaꞌochon bi gummiti gumon gabiye.#Hal. 37:5-10 Boonoshichoo ishichiye: “Qiiddecho#42:9 Qiiddecho, ii beeton ikkikke asheenaꞌo, “Maaccecho” ii beetinaꞌone. ittoshine. Ittoshi waato, no showoo aabiichaa gimoyich kaamoo bi gaata qiidi beeggane” iye.
10Boonoshiyoo ishichiyeete: “No doonocho, ebi toonoone. Ne guuno no, maayoon kemeree daammane no waato. 11No bulli ikke nihoo bushiishoo noone; ne guuno no, gibeneeti asho noani, qiiddecho toono noone” iyeete.
12Yooseefi wochiꞌi, “Toonoone; ittoshi waato, no showoo aabiichaa gimoyich kaamoo bi gaata qiidi beeggane” iye.
13Boonoshiyoo wochiꞌi, “Ne guuno no, Kanaanee showooch beeti ikke uroochi bushiishoo, aaraa gutte manaamanoo noone; guuche ciiro no nihoo waaniye bi beeto; ikkoo aalletone” iyeete.
14Yooseefiyoo boonoshich ishichiye: “Qiiddecho ittoshine ta geto iberoone. 15Gibeneeto ittoshi tuno bi arichemmo ebinane: Guuche ciire ittoshi manoo waataanoon, hiniichee shuuraachemmo ittoshi tunoon, Faroonina wogehoye. 16Iberoon yibbaateebeeto ittoshi tunegaata, ittoshi iberittino bi arichemmoyich, ittoshi daggoochee ikkoon ittoshi wochetaa, hamiree ittoshi guuche manoon deꞌi wobe; echeti ittoshi cuyee kexooch beeyemmo ittoshine; tunebaani ittoshi gettitoommon tuno bi qayigaata, Faroonina wogehoye; iberoon ittoshi bulli qiiddecho ittoshine” iye. 17Ebina boonoshi bullin cuyee kexooch geddii keejj qeejjiye.
18Keejjinnee qemooba, Yooseefi boonoshich ishichiye: “Yeerin ta shattaa beetoyich, ebin tuniiree ittoshi kashoon wodiibote. 19Gibeneeti asho ittoshi tunegaata, ittoshi daggoochee ikkoo hiniich, cuyee kexooch beetaa, echeti ittoshi, shaacoona beeti ittoshi kechi asheenaꞌoyich maayoon keme daambote. 20Tunebaani ittoshi guuche manoon yeshireeshiye ta waan ittoshi woyemmo. Ebina ittoshi yibbaateti yibbaatoo iberoo bi tuno manjemmone. Ittoshiyoo ebina ittoshi kashoon wodiyemmo ittoshine” iye. Boonoshiyoo ebin ceechoyich deꞌa iyeete.
21Boonoshinaa boonoshinoo “No manoo toommooch no tuniiti xuꞌee naboyich naxeyaaniye no beeto; bi xuuxoon beeggaabee, bi kasheen wodiiya noon bi qolletaa, waayeyaano noone. Ebi iritoo no toommooch bi shaggito, ebichi naboonane” iyeete.
22Roobeeli wochii boonoshich ishichiye: “Arooba ‘Ebi bushoo toommooch gondoon shuuneyaahote’ iyaa ittoshich getaano taane?#Hal. 37:21-22 Tunebaani ittoshi ta getteton waayeyaano ittoshine. And ebeegote, bi damoo no kishoochee qaawee beetone” iye. 23Yooseefi boonoshin bi yibbaatiibeeto wokkeellechona bi tunetoyich, boonoshi yibbaatee beeton waayeebeeto boonoshich shaahaanoone.
24Yooseefi boonoshi aafoochee badd hammiꞌi eeppiye. Aroochee boonoshi waan wottee waaꞌi boonoshich yibbaatehe. Simoonin barii kichiꞌi, boonoshi ciinnii beetaa, cuchiihe.
Yooseefichi Maneenaꞌo Kanaan Wotto
25Boonoshi mollexxi mollexxoona maayo ceechaa, boonoshi bulli gijjoo are boonoshi mollexxi mollexxooch wochaa geddeyemmoyich, boonoshi gommoyichoo shoho ichemmoyich, Yooseefi gettiye. Ebiyoo boonoshich geddehe; 26boonoshiyoo boonoshi kemeti maayoon kureenaꞌooch xaaniꞌi, gommon qaxiriyeete.
27Boonoshi qeyiti xaaꞌoochaa boonoshi daggoochee ikkoo bi mollexxeexi maayoochee bi kuroyich imma biichiꞌi, mollexxee noonoochee bi gijjoon danehe. 28Biyoo bi maneenaꞌoyich “Ta gijjoo taach wottetoche! Ebeegote; ta mollexxoochee danete” iye.
Boonoshiyoo keqqoona qitii qeweebee ciineeheete. Aroochee “Yeeri no toommooch bi deebiti ebi mooyo amoone?” iyeete.
29Kanaanee showooch beeti boonoshi nihoo Yaaqob waan shaggiꞌi, boonoshi toommooch shaggiti mooyo bullin ishichii gettiyeete: 30“Gibitsee iraashoo tuneti uro boonoshi showoon qiidda hammeti ashoon noon shaahiiꞌi, no toommooch kaaroona yibbaatehe. 31Tunebaani no ishichiyone: ‘No, gibeneeti asho noani, qiiddecho toono noone. 32Ikke nihoo bushiishoo tuneti, aaraa gutte manaamanoo noone. Ikkoo aalletone; guuche ciiro no nihoona tookkii Kanaanee showooch beetone’ iyone.
33“Arooba are showee iraashoo tuneti uro ishichiye: ‘Gibeneeti asho ittoshi tunoon ta ariyemmo ebinane: Ittoshi daggoochee ikkoon ta waan echiichi, shaacoona beeti ittoshi kechi asheenaꞌoyich maayoon yeshiree hambote. 34Guuche ciire ittoshi manoonoo yeshiree wobote. Ebiyoobane qiiddecho tuneyaanoon, gibeneeti asho ittoshi tunoon ta ariyemmo. Ittoshi manoonoo wochiree ittoshich immemmo taane. Ittoshiyoo no showee daggooch shaꞌe giixemmo ittoshine’ iye” iyeete.
35Boonoshi mollexxi mollexxoon biichii maayoon boonoshi tebbemmona, boonoshi ikkikkoochi mollexxee daggoochee boonoshi immiti gijjoo qulli qulleeꞌi bi beetona kechiye. Boonoshinaa boonoshi nihoona ebi gijjoon beeggiꞌi, keqqiyeete. 36Boonoshi nihoo Yaaqobi ishichiye: “Bushaallo taan echiyane ittoshi ii beeto? Yooseefi aalletone; Simooni aalletone; and wotta Biiniyaamin daammane ittoshi qaawiibeeto. Amee wonoone ta toommooch waabeeto” iye.
37Arooba Roobeeli bi nihoyich “Biiniyaamin ta kishooch imbe. Wochaꞌa deebo ta qayigaata, ta gutte anaami bushiishoon wuxibe. Ta neech wochiree deebemmo taane” iye.
38Tunebaani Yaaqobi ishichiye: “Ta bushoon ittoshina tookkaa daachiyaache. Bi manoo gaata, qititone; bi indeechi bushiishoochee echeto bi ikkeeto baachiye. Gommoochaa ikke amo bi tunegaata, geenoochaa muushenoona maash taan daachiyane ittoshi ii beeto” iye.
လက္ရွိေရြးခ်ယ္ထားမွု
Halloo 42: KBRC
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
SIM International, 2020.