Halloo 41
41
Yooseefi Taatoochi Gumon Biisho
1Gutte nato beshetoyee gubb, Farooni gumon gummiye. Gumona Abbaayi aachi gashooch neexee bi beetaa, 2diqqich qeddi gaawe aangechi, shabaatte miiminaꞌo aacoochee kechiꞌi, aachi gasheexi mocoon maa beeheete. 3Boonoshi hillooch wotta boonoshi qeddo shixxiiti, dallii muujjiti, bare shabaatte miiminaꞌo aacoochee kechiꞌi, aachi gashooch beeti aafi aangechinaꞌo gaꞌooch neexeheete. 4Ebi boonoshi qeddo shixxiiti, dallii muujjiti, shabaatte miiminaꞌo ohe boonoshi qeddo gaaweti, aangechi, shabaatte miiminaꞌon billbillayii boonoshi maa beetaa, Farooni beeggiye. Ebina tokketoochee tiyiye.
5Farooni wochinnoon tokketoo biin daamaa tokketehe; wotta bare gumon gummiye. Ebi gumona ikke maayi tuppooch aaf uuroo tuneti, gaawe shabaatte yilleenaꞌo kechiyeete. 6Aroochee barahoochee yongeebeeti gaame yongo shuuꞌiito shaahiibeeti, taxxiti, bare shabaatte yilleenaꞌo kechiyeete. 7Ebi taxxiti shabaatte yilleenaꞌo ohe gaawe shabaatteenaꞌon qooxxiyeete. Farooni tokketoochee tiyiꞌi gumon bi gumon ariihe.
8Bi dechara Farooni oogeton keqqii xuuxehe. Ebich Gibitsee showoo bulliich beeti kaayechinaꞌonaa yiiteenaꞌo bullinon ceekkiiꞌi, bi gummiti gumon boonoshich maacciye; tunebaani ebi gumon biisho hakkito koniyoona aallehe.#Daan. 2:1-3
9Arooba xoofechinaꞌochi ukkiroo Faroonich ishichiye: “Ta doonocho, ta gondoon hanaach shalligiyoye. 10Ikke wottoon taannaa kochi kachiyechinaꞌo ukkiroonochi toommooch kaaraꞌa, taatoo quyee naayinaꞌo iraashoochi kexooch noon ne cuchiihooba, 11ikke xumoon no guttoo gumon gummehone. Ebi no gumo baribare mooyon yechiti gumone. 12Ebiyooba taatoo quyee naayinaꞌo iraashoochi guuno tuneti, ikke Hibiree gurimaashoo noonna tookkii arooch cucheꞌi beehe. No gumon biich no maacaa, nooch biichiye. 13Mooyo bi biichitoommon tunehe. Tawoo aafi ta ukkirittinooch wottehoye; kochi kachiyechinaꞌochi ukkiroo yoodaa qitiye” iye.
14 Farooniyoo Yooseefin boonoshi deebemmoyich gettiye. Cuyee kexoochee afaafinikkiꞌi deebiyeete. Yooseefi bi qelloon cakkee, bi tahoon shaddiꞌi, Farooni aafooch giddehe.
15Farooniyoo Yooseefich “Gumon ta gumaa, ebi gumon biishon hakkimmi ikke asholla aallehe. Tunebaani gumon neech maacigaata, biichi hakkoo neech beemon waayeto taane” iye.
16Yooseefiyoo Faroonich “Ta doonocho, taach biichi hakkoo aalloone; tunebaani neech gaaweti gommona Yeeri biichemmone” iye.
17Ebiyee gubb, Farooni bi gummiti gumon Yooseefich ishichii maacciye: “Abbaayi aachi gashooch neexaa beehoye. 18Qeddi gaawe aangechi, shabaatte miiminaꞌo aacoochee kechiꞌi, aachi gasheexi mocoon maa beeheete. 19Boonoshi hillooch wotta boonoshi qeddo shixxiiti, dallii muujjiti, shabaatte miiminaꞌo kechiyeete. Ebiyoommi shixxiiti miimon Gibitsee showoo bulliich ciroona beeggaa ariyaache. 20Shixxiiti, dallii muujjiti, miiminaꞌo, shiichiꞌi kechiti, aangechi shabaatte miiminaꞌon billbillayii maaheete. 21Boonoshi maatoyee gubb, aafi boonoshi dalloochee baraaneenaꞌo boonoshi tunetoyich, koniyoona boonoshi mamon ariyoon hakkaache. Ebina tokketoochee tiyoye.
22“Ebiyoommon wotta wochinnoon tokketoo taan daammitoyee gubb, bare gumon gummoye. Ikke maayi tuppooch aaf uuroo tuneti, gaawe shabaatte yilleenaꞌon beeggoye. 23Aroochee bare maayi tuppooch barahoochee yongeebeeti gaame yongo shuuꞌiito shaahiibeeti, taxxiti, yiingitte shabaatte yilleenaꞌo kechiyeete. 24Yiingitte shabaatte yilleenaꞌo gaawe shabaatte yilleenaꞌon qooxxiyeete. Ebinoo kaayechinaꞌoyich gettoye; tunebaani koniyoona taach biishon hakkaanoone” iye.
25Yooseefiyoo Faroonich ishichiye: “Ebi gutte ne gumo ikkoone. Yeeri bi tuniiya ii beeti mooyoniye neech bi bekkiito. 26Gaawe, aangechi shabaatte miiminaꞌo geto, shabaatte nato getone; gaawe shabaatte yilleenaꞌo geto, shabaatte nato getone. Ebi gutte gumo ikkoonaa shaahoonane. 27Boonoshi hillooch kechiti, boonoshi qeddo shixxiiti, dallii muujjiti, shabaatte miiminaꞌo geto, shabaatte nato getone. Wotta taxxiti, barahoochee yongeebeeti gaame yongo shuuꞌiito shaahiibeeti shabaatte yilleenaꞌo geto, shaacoo tunemmi shabaatte nato getone.
28“Shiichaꞌa neech ta gettetoommon, Yeeri tuniiya bi ii beeti mooyon neech bekkiitone. 29Gibitsee showoo bulliich beddii echeti maayo shagaa, oogeti miyo tunemmi shabaatte nato woyemmone. 30Wotta ebiyee gubb, shabaatte nati shaacoo woyemmone. Ebi shaacoo ebiyee aafi shabaatte miyi naton battiito tunemmone. Shaacoo showoo bullin yexxemmone. 31Miyi natinaꞌo hillooch woyemmi shaacee natinaꞌo oogeti kuppheenaꞌo boonoshi tunoochee tiyitona, shiichiꞌi besheti miyi natinaꞌon ciroona battiyemminaꞌone. 32Ebi gumo guttaa bi bekketo, mooyo Yeer waanaa maacheto bi tunetoyichiye. Ebinoo Yeeri katini aabee daggooch ceechemmone.
33“Illa mullechonaa shalligechona tuneti ashoon qaawiree, Gibitsee showooch iraashiibe. 34Ebiyoommon shabaatte miyi nati daggooch daneebeeti maayoochee uuchoochee ikke beeroon kicemmi ukkireenaꞌon ukkiriibe. 35Boonoshiyoo woyemmi miyi natinaꞌo daggooch daneebeeti maayo bulliichee kicibeete. Katemi katemoona maayoon gotoona boonoshi kicemmonaa boonoshi quyemmonoyich, boonoshich ukkirittinoon imbe. 36Ebi kiceyemmi maayo Gibitsee showooch gubb woyemmi shabaatte shaacee natoobich, asheenaꞌoyich tunemmone. Ebiyoommi gommona Gibitsee asheenaꞌo shaacoona qitoochee muriccemminaꞌone” iye.
Yooseefi Gibitsee Iraashoo Tuno
37Ebi Yooseefi gettiti mooyo Farooninaa bi iraasheenaꞌona aafooch gaaweto tuneꞌi bekkehe. 38Ebich Farooni bi iraasheenaꞌoyich “Iberoon Yeerichi Ayaano bi toommooch beeti, ebiyoommi ashoon danoon hakkehone?” iye.
39Farooniyoo Yooseefin “Yeeri ebi bullin neech gaxxii bi bekkiitoyich, neenoommi mullechonaa shalligechona tuneti asho aalloone. 40Ta taatittinee showooch iraashebe. Ta asho bulli neech hajjeebe. Neyee ta beshemmo, ta taatee qeenona baachiye” iye.
41Aroochee Farooni Yooseefin “Gibitsee showoo bulliich neen iraashiito taane” iye. 42Farooniyoo bi kisheexi axxaammittee maatemoon kichii, Yooseefichi kishooch geddiye; muttee tuppoochee shippeti tahoon tajjiye; bi qettooch aachee sansalatoon tippiye. 43Bi hajjee guttinnee gaariich kotiihe. Taatoo quyee naayinaꞌo bi aaf shiichiꞌi hammiibee, “Goyinnebote; goyinnebote!” ii cookii beeheete. Yooseefiyoo Gibitsee showoo bulliich bi iraasheto ebiyoommi gommonane.#Daan. 5:29
44Wotta Farooni Yooseefich ishichiye: “Ta Farooni taane; Gibitsee showoo bulliich beeti asho bulli ne daaggaani ikke mooyinona tuniyaaye” iye. 45Farooniyoo Yooseefin, Tsafinaat Faneehi ii shigiihe. Ebiyoommon wotta Heliyooti katemeexi qeeshoo Phoxifeerichi#41:45 Phoxifeeri, Heeli katemooch beeti, asheenaꞌo aabeyich goyinneebeeti yaafee kexooch maddeebeeti qeeshoone. bushee Asenaatin Yooseefich shaakkiihe. Ebiyoommi gommona Yooseefi Gibitsee showoo bulliich iraashehe.
46Yooseefi Gibitsee taatoo aafooch neexeꞌi maddooch bi giyiyooba, shaashe nati ashoone. Yooseefi Farooni aafoochee kechiꞌi, Gibitsee showoo bullin guuddiye. 47Shabaatte miyi nati daggooch maayo gaawichii shaggiye. 48Ebi shabaatte miyi nati daggooch Gibitsee showooch shaggiti maayo bullin Yooseefi kiciiꞌi, katemi katemoona gotiihe. Ikkikke katemee guudoochee daneebeeti maayoon are katemooch bi kiceyemmoyich tuniihe. 49Yooseefi ebine, getaa haddoo hakkeyaani maayoon kiciihe; ebi maayi woddoochee tiyitona, qeellee haddoo hakkeyaano bi tunetoyich, qeellemmon qajjiye; baharee gasheexi qacee woddoommon woddetone.
50Shabaatte shaacee nato gimoyee shiichiꞌi, Yooseefi Heliyooti katemeexi qeeshoo Phoxifeeri bushee Asenaat waanee gutte anaami bushiishoon shiyihe. 51Yooseefiyoo “Yeeri ta iritoo bullin, ta nihoo kexonoo ta battemmoyich tuniitone” iꞌi bi gutenee bushoon, Minaasi ii shigiihe. 52Ebiyoommon “Iritoon ta beeggeti showoochaa Yeeri taan aafiite” iꞌi bi hilloon Efreemi iye.
53Gibitsee showooch tuneti shabaatte miyi nato beshehe. 54Shiichiꞌi Yooseefi gettitoommon, shabaatte shaacee nato giyiye. Bare showoo bulliichoo shaacoo giyitone; tunebaani Gibits maayo beetone. 55Gibitsee showoo bulliich shaacoo giyimmona, asheenaꞌo Faroonich “Maayo nooch ichebe” ii cookiyeete.
Farooniyoo Gibitsee asheenaꞌo bullin “Yooseef waan hambote. Ittoshich bi gettimmonoo tuniibote” iye.
56Shaacoo Gibitsee showoo bullin yexxii yexxii bi hamaa, shaacoo ashoon oogeton bi yexxitoyich, Yooseefi goteenaꞌo bullin qechiiꞌi, maayo Gibitsee asheenaꞌoyich bi kecheyemmoyich tuniihe. 57Shaacoo bare showoo bullinoo bi yexxitoyich, bare showoo bulliichee asheenaꞌo Yooseef waanee maayoon kemeya Gibits waaheete.
လက္ရွိေရြးခ်ယ္ထားမွု
Halloo 41: KBRC
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
SIM International, 2020.