Halloo 40
40
Yooseefi Cucheti Asheenaꞌochi Gumon Biisho
1Ebi mooyoyee gubb, Gibitsee taatoochi xoofechinaꞌo ukkiroonaa kochi kachiyechinaꞌo ukkiroona taatoon ayinikkiibeeti mooyon tuniiheete. 2Farooni ebi ukkireenaꞌo toommooch oogeton ippee kaarehe. 3Ebich Yooseefi cucheꞌi beeti, taatoo quyee naayinaꞌochi iraashoo kexooch daamaa boonoshi cucheyemmoyich tuniihe. 4Taatoo quyee naayinaꞌochi iraashoo Yooseefichi kishooch boonoshin guudiihe. Yooseefiyoo boonoshich qaawiibeeti mooyona boonoshin gaachee beehe. Boonoshiyoo cuyee kexooch meeti aaboon koteheete.
5Ebi cucheti, Gibitsee taatoochi xoofechinaꞌo ukkiroonaa koshon kachiyechinaꞌo ukkiroona ikke xumoon boonoshi qelli qellee gumon gummiyeete. Boonoshi gutti gumo barbariti mooyon yechiti gumone.
6Bi dechara maaddoona Yooseefi boonoshi waan bi giyimmona, ayinii tuummiꞌi beetinaꞌon danehe. 7Yooseefiyoo boonoshin ishichii echehe: “Hanaach ittoshi aafo aafichoommon bireyaanoon ittoshi ayiniibeeto, amoyichiye?” iye.
8Boonoshiyoo “No qelli qellee gumon gummehone; tunebaani ebi gumon biishiree nooch gettemmi ashoon muccehone” iyeete.
Yooseefiyoo “Gumon biichi ariyoon ashich immiibeeto Yeerine. Ebich ittoshi gummiti gumon taach getote” iye.
9Uyee qoomechinaꞌochi ukkiroo bi gumon ishichii Yooseefich maacciye: “Gumona ta aafooch ikke woyinee qomboo beetaa beeggoye. 10Ebi woyinee qomboo keejje atechone; nollii waajjeꞌi bekkech bungiye; aafee yuunjiꞌi gaangiye. 11Faroonichi uyee xoofoo ta kishooch beetone; ebi woyinee aafoon daammaa Faroonichi xoofooch hiiccaꞌa, bi kishooch immehoye” iye.
12Yooseefiyoo ishichiye: “Hini gumo ebine: Keejje woyinee qombee ato geto, keejje qemo getone. 13Keejje qemi daggooch Farooni cuyee kexoochee neen kichemmone; aafi ne ukkirittinee xaaꞌooch neen wochemmone. Ebiyee aaf xoofechinaꞌochi ukkiroo tunaꞌa beebee ne tuniyaa beetoommon, Faroonichi uyee xoofoon bi kishooch immemmo neene. 14Illa gaawe mooyo neech tunehooba, taan gabiree gaaweton taach tuniibe. Ta mooyon Faroonich getiree hini cuyee kexoochee ta kechemmoyich tuniibe. 15Hibiree showoochee ta waato, giidoona yesheenane. Hiniich wotta cuchaꞌa ta beeto, ta shuuneti amee gondolla aallooniye” iye.
16Kochi kachiyechinaꞌo ukkiroo woyinee xoofechinaꞌo ukkiroo gumo gaaweti gommona bi biichoon waayeꞌi, Yooseefich ishichiye: “Tawoo wotta gumon gummoye. Keejje gemoona koshon ta qellooch shaaggaꞌa beehoye. 17Toommeexi gemooch Faroonich kachiti baribare kosho beetone. Gaceenaꞌo ta shimbeexi gemooch beeti koshoochee maa beeheete” iye.
18Yooseefi ishichiye: “Hini gumo ebine: Keejje gemoo geto, keejje qemo getone. 19Keejje qemi daggooch Farooni cuyee kexoochee neen kichemmone; ne qettoonoo kuxiree ne dubenoon mixooch yooddemmone; gaceenaꞌoo ne meenon maayemminaꞌone” iye.
20Keejjinnee qemooba Farooni bi shiijjee aabee baarooba, gifiroo geddiꞌi, bi iraashoo bullin ceekkiihe. Uyee qoomechinaꞌochi ukkiroonaa koshon kachii beetinaꞌochi ukkiroonon cuyee kexoochee kichiiꞌi, iraasheenaꞌo aafooch boonoshi neexemmon tuniihe. 21Aroochee xoofechinaꞌochi ukkiroon aafi bi ukkirittinee xaaꞌooch wochiye; biyoo wochinnoon uyoon Faroonich qoomooch giyiye. 22Tunebaani kochi kachiyechinaꞌochi ukkiroon yooddiye. Boonoshi gumo Yooseefi biichitoommon tunehe.
23Tunetaa xoofechinaꞌochi ukkiroo Yooseefin battehani, ciroona shalligaanoone.
လက္ရွိေရြးခ်ယ္ထားမွု
Halloo 40: KBRC
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
SIM International, 2020.