Halloo 43
43
Yooseefichi Maneenaꞌo Biiniyaamin Yechii Gibits Wottee Hamo
1Giidechi shaacoo andoo Kanaanee showooch beehe. 2Yaaqobi kechi asheenaꞌo Gibitsee kemetaa waati maayoon maa boonoshi ciichitoyee gubb, boonoshi nihoo Yaaqobi “Eke wochinnoon Gibits kindiree, giisheche maayoon keme deebote” iye.
3Tunebaani Yihudi ishichiye: “Are uro ‘Ittoshi guuche manoon yechii ittoshi womo qayigaata, guttinnoon ta aafoona danoon hakkaachemmo ittoshine’ ii manjii nooch gettitone. 4No manoo noonna tookki bi hammemmoyich ne daaggigaata, hamiree maayoon keme neech deebemmo noone. 5Tunebaani are uro ‘Ittoshi guuche manoon yechiꞌi ittoshi womo qayigaata, guttinnoon ta aafooch shagaachemmo ittoshine’ bi itoyich, Biiniyaamin daachiyaachemmo ne tunegaata, arooch hamaachone” iye.
6Israꞌeeliyoo boonoshich ishichiye: “Aakkiya are uroyich ‘Bare manoo nooch beetone’ iꞌi ebi shaahe iritoon ta toommooch deebiyote?” iye.
7Boonoshiyoo ishichiyeete: “Are uro noonnaa no kechi asheenaꞌonochon manjii echehe. Wotta daakkiꞌi, ‘Ittoshi nihoo batt kashoona beete? Bare manoo ittoshich beete?’ ii noon echehe. Nowoo bi echeton wochiyone. Ishigaata, ‘Ittoshi manoon yeshiree wobote’ gettemmo bi tunoon no ariyesho, aabichireeshiye?” ii wochiyeete.
8Yihudiyoo bi nihoo Israꞌeelich ishichiye: “Newoo, nowoo, no bushiishoo wodemmoyich, no qitaachemmoyich, bushoon taanna tookki daachiibe. Nowoo tiyiree hambone. 9Ta ebi bushoyich buushaaroo taane. Bi toommooch shaggimmi mooyoyich ta echeyemmo taane. Bushoon diggoona wochii deebo ta qayigaata, ne aafooch neechoo ta qayigaatoo, bulli yemeenoon neen xuqqeto tunebona. 10Ebi shaahoon no yagaan gaata, ebi gaata, guttaa wottesho noone” iye.
11Arooba boonoshi nihoo Israꞌeeli boonoshich ishichiye: “Mooyo ebi tunegaata, ebin tuniibote; hini showooch daneebeeti, beshe gaawe mooyoochee giisheche huuteebeeti attoon, giisheche eeyon, shittoon, hareboonaa hini showooch daneebeeti michi aafoonoochee ittoshi mollexxooch gedote. Mattaayoon tuniiree are uroyich daami imbote. 12Ittoshi mollexxoochee daneti gijjoon daammii wochoo ittoshich qaawiibeeto bi tunetoyich, gutte kishee gijjoon yeshote. Are ittoshi mollexxoochee daneti gijjoo diqqich battoona giyito tunemmone. 13Guuche ittoshi manoon yeshiree are uro waan wochinnoon hambote. 14Ittoshi manoo Simooninaa Biiniyaaminon ittoshina tookki wochi bi deejjemmoyich, Beshe Hakkechi Nuggishoo bi mullooch ariqqoon gede. Illa ta bushiishoon ta muccegaata, muccee qayoyee besh amoon halloo hakkehote” iye.
15Israꞌeelichi bushiisheenaꞌo getteeti mattaayoonaa gutte kishee gijjoonon, Biiniyaaminoo yechii tiyiꞌi desh Gibits kindiyeete; shaggiꞌi Yooseefi aafooch neexeheete. 16Yooseefi Biiniyaamin bi maneenaꞌona tookkii ciinniꞌi, bi kechi ukkiroyich “Ebi asheenaꞌon kexooch daami giijjibe. Hanaach aabee qellayooch maayoon tookkiree no maayemmoyich, ikke maaꞌoon bashiree maayoon qanniibe” iye.
17Uroo Yooseefi gettiton tuniihe; asheenaꞌonoo Yooseefi kexooch daammiye. 18Uro Yooseefi kexooch boonoshin daammitoyich shattiyeete; ishichii gabiyeete: “Hiniich noon bi deebito, ebiyee aaf hini showooch waaꞌa no wottehooba, no mollexxooch wochaa giyiti gijjee naboyich tuno qayaache. Uro no toommooch ikke mooyon hallemmone; no kureenaꞌon boggemmone; noonoo giidoona guunon tuniyemmone” iꞌi shattiyeete.
19Yooseefichi kechi ukkiroo waan giddeꞌi, kechi kelloochaa uroona yibbaateheete; 20ishichiinoo iyeete: “No doonocho, ebiyee aaf maayoon kemeya hiniich waahone. 21Maayoon kemaa wottaabee, no qeyeti ikke xaaꞌoochaa no mollexxi mollexxoon biichaa no beeggemmona, no mollexxee noonooch no gijjoo bulli beeton danehone. Ebiyoche, ebi gijjoon wochaa deebeto noone. 22And maayoon keme no daammemmi bare gijjoonoo yechaꞌa waato noone. Arooba ebi gijjoon koni no mollexxi mollexxooch geddito gaata ariyaano noone” iyeete.
23Uroo “Keqqiyaahote; amoyichona shattaahote; ittoshi mollexxi mollexxee daggooch daneti gijjoon ittoshich immito, ittoshinaa ittoshi nihoonochi Nuggishoone. Ta gaata, ittoshi gijjoon arooba deqqeto taane” iye. Aroochee Simoonin kichii deebii boonoshina daniihe.
24Kechi ukkiroo asheenaꞌon Yooseefi kexooch giijjiye; baatee aacon bi giddiitaa boonoshi baatoon macheheete; boonoshi kureenaꞌoyichoo gaferoon immiye. 25Yooseefina tookki maayoon maayemminaꞌo boonoshi tuno shiichii boonoshich bi getteetoyich, aabee qellayooch, Yooseefi shagoyee shiichii, boonoshi deebiti mattaayoon imoyich qanniheete.
26Yooseefi kexooch giyimmona, deebii bi kexooch boonoshi giijjiti mattaayoon immiyeete; showooch guufee biich goyinneheete. 27Yooseefiyoo boonoshi diggoon echehe. Aroochee “Geene ittoshi nihoo beeto tunoon ebiyee aaf taach gettito ittoshine. Diggeebeete? Andoo kashoona beete?” iye.
28Boonoshiyoo “Ne guuno no nihoo diggoone; batt kashoona beetone” iyeete. Yittiꞌi biich goyinneheete.
29Yooseefiyoo bi indee shiyeto tuneti bi manoo Biiniyaamin ciinniꞌi, “Arooba ittoshi gettiti, ittoshi guuche manoo hinine?” ii echehe. Biiniyaaminoo “Ta bushoocho, Yeeri neen diiribe” iye. 30Yooseefiyoo bi manoon oogeton bi sharaatetoyich, bi maaco qewehe. Afaafinoona boonoshi aafoochee tiyii hammii, bi qeyiibeeti gatooch giyiꞌi aroochaa eeppiye.
31Aroochee bi aafoon macheꞌi, wottee waahe. Haaꞌii tooqqiꞌi, “Madoo giddebe” iye.
32Yooseefich badd giddehe; bi maneenaꞌoyichoo badd giddehe; ebiyoommon biinna tookkii maabeeti Gibitseenaꞌoyich wotta badd giddehe. Ebiyoo Gibitseenaꞌo Hibiree asheenaꞌona tookkii mamon eeꞌo tuniiꞌi boonoshi ciinnii beetoyichiye. 33Bi maneenaꞌo qaabboochee tiijjii guuche ciirooch beddaahaa, boonoshi shiijjee yaaroona bi ciinooch boonoshi kotemmoyich, Yooseefi getaa koteheete. Ebin bi tuniitoyich, worganoona boonoshinaa boonoshina ciineeheete. 34Yooseefi bi madeexi maayoochee boonoshi qoodi qoodoo ichemmoyich gettiye. Ebiyooba Biiniyaamich icheto, bareenaꞌo bullichoyee uuche kishoon beshoone. Boonoshiyoo boonoshi qettee wottoon maa uchiyeete. Ebiyoommi gommona Yooseefina tookkii emiriyeete.
လက္ရွိေရြးခ်ယ္ထားမွု
Halloo 43: KBRC
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
SIM International, 2020.