Luke 20

Ngekwe simba la Jesu

(Matewu 21:23-27; Mako 11:27-33)

1Limwe zhuba Jesu kati ediya bathu mu Ng'umba ye Ndzimu esumikila ndebo mbuya, bapirisiti bakulu ne badiyi be nlayo ne bakulu be Bajuta bakazha kunli, 2bakati, “Utibudze kuti unoshinga zwithu izwezwi nge simba lipi ndiani wakakupa simba ileli?”

3Kadabila eti, “Ndowomubhuzwabo bhuzo ing'ompela. Mundibudze, 4kudubika kwa Johani kwakadwa kudzimu kene mu bathu?”

5Bakalebeleka tje kwabo beti, “Ha tingati, ‘Kwakadwa kudzimu,’ unowoti, ‘Ini musakan'galamoyo munli?’ 6Koga ha tingati, ‘Kwakadwa mu bathu,’ bathu banowotikikithidza nge mabgwe, ngobe bose banogalamoyo kuti Johani wakabe ali nlebesambeli.” 7Ndizo bakashandula beti, abatoziba kwakwakadwa.

8Jesu kati ku bali, “Namibo andingamubudze kuti zwithu izwezwi ndozwishinga nge simba lipi.”

Tjifaniso tje balimi be nnda we mizhambi

(Matewu 21:33-46; Mako 12:1-12)

9 # Isaya 5:1 Jesu katangisa budza bathu tjifaniso etji, eti, “Mmwe nlume wakalima nnda we mizhambi. Kauhirisa ku bamwe balimi, ngono iye kayenda ku imwe shango tjibaka tjilefu. 10Kukati tjibaka tje zhambi tjiswika, katuma nlanda ku bahiri be nnda uwe kuti bampe mimwe mitjelo ye zhambi. Koga bahiri be nnda bakanloba bakantata kayenda akalembedza maboko. 11Mweni we nnda katuma nlanda we bubili ngono na iyebo bakanloba bakambhatisa shoni, bakantata kayendabo akalembedza maboko. 12Katuma we butatu, na iyebo bakanloba bakandusa mbonje bakanlashila kuzhe. 13Ipapo mweni we nnda we mizhambi wakati, ‘Ndowotini kene? Ndowotuma nkololo wangu, wandinoda, pamwe banowonteta.’ 14Koga kukati bahiri be nnda bembona, bakalangana beti, ‘Oyu ndiye n'gali thaka. Ngatimbulayeni, kuti ndizo thaka ibe yedu!’ 15Bakamposela kuzhe kwe nnda we mizhambi bakambulaya.

“Ngono mweni we nnda we mizhambi unowobatini kene? 16Unowozha kalobesa bahiri ibabo, ngono unowohirisa nnda iwoyo we mizhambi kuna bapoga.”

Kukati bathu behwa ikoku bakati, “Ikoku akungashingikale!”

17 # Njimbo 118:22 Jesu kabalingisisa, kababhuzwa kati, “Ngono kodwani ikoku kwakakwagwa kuyi

“ ‘Bgwe lakalambiwa nge babaki

ndilo lakabe bgwe linotambunudza mbako?’

18“Iye unowila pezhugwi kwe bgwe ilelo, unowovunikana kasala ali zwitibhutibhu, koga ha liwila nthu lowompkhwanya.” 19Badiyi be nlayo ne bapirisiti bakulu bakagwisa kumbhata ipapo, ngobe beziba kuti wabe elebeleka nge kwabo mu tjifaniso itjetji. Koga bakabe betja bathu.

Bhuzo ngekwe kulipa lukhetho

(Matewu 22:15-22; Mako 12:13-17)

20Ndizo bankanlalila ngono bakatuma shodzi dzakabe dzizwithama bathu bana malebeswa. Bakabe bekumbula kuti banowombhatshila muna tjaangaleba, kuti ndizo ban'yise ku nlayo ne mu simba le nlauli. 21Ngono shodzi dzakambhuzwa dziti, “N'diyi, toziba kuti moleba kakale mukadiya tjakalulwama amutoshalaula, koga modiya zila ye Ndzimu nge malebeswa. 22Apa kumu nlayo kene, kuti tilipe lukhetho kuna Kaisara Mambo we Roma kene aa?”

23Jesu kaziba bupitipiti gwabo ngono kati, 24“Mundilakidze loso ling'ompela. Tjifano tjaani itjetji, kakale kwakakwagwa nge kwaani mulili?”

Bakashandula beti, “Nge zwa Kaisara.” 25Kati ku bali, “Ndizo ipani Kaisara zwithu zwizwe, ngono mupe Ndzimu zwawo.”

26Bakasitubule kumbhatshila nge matama pakati kwe bathu. Kakale nge kutjenamisiwa nge dabilo dzidze, bakanyalala.

Kumuka kwe bafi

(Matewu 22:23-33; Mako 12:18-27)

27 # Mishingo 23:8 Ipapo Basadusi bamwe, ibo banoti akuna kumuka kwe bafi, bakazha kunli nge bhuzo, 28#Matama 25:5beti, “N'diyi, Mushe wakati kwalila eti, ‘Ha nlume efa esiya nkadzi asina bana, nnung'una uwe ngaan'gale thaka, athamile nkulu uwe bana.’ 29Kwakabe kuna thobeledzani dze balisana dzili kutendeka, ngono hwola yabo ikalobola, koga ikafa isina bana. 30Ipapo thobeledzo iye ikan'gala thaka, ngono ikafabo isina bana. 31We butatu katolabo tjilikadzi iyeyo ngono nge zila iyeyo, bose bali kutendeka bakafa basina bana. 32Bhelelo nkadzi kafabo. 33Ndizo ngwenu, mu kumuka kwe bafi, unowobe nkadzi waani muna bose bali kutendeka bakanlobola?”

34Jesu kabashandula eti, “Bathu be misi ino banolobola bakalobodziwa. 35Koga ibabo banowobe bakalizana kungina mu nsi ihwoyo we kumuka mu bafi, abatowolobola kene kuli kulobodziwa, 36Ngoti abangatjafe, ngobe banolizana ne batumwa be kudzimu kakale bana be Ndzimu, ngoti bali bana be kumuka mu bafi. 37#Kufuluka 3:6Mushe na iye unotjenesa mu ndebo ye denje linotshwa, kuti bafi banowomusigwa mu butjilo. Unoleba ngekwa She eti ndibo, ‘Ndzimu wa Abhurahama, Ndzimu wa Isaki ne Ndzimu wa Jakubo.’ 38Ndizo ate uli Ndzimu we bafi, koga nge we batjili, ngobe bose banoutjilila.”

39Bamwe badiyi be nlayo bakadabila beti, “Maleba zubuyanana, n'diyi!” 40Ngono bakasitjabhuzwe bhuzo dzimwe kakale.

Ngekwa Mesiya

(Matewu 22:41-46; Mako 12:35-37)

41Ipapo Jesu kati ku bali, “Banodwatjini ha beti Mesiya nkololo wa Dafite? 42#Njimbo 110:1Ngobe Dafite nge kukwe mu lukwalo gwe Njimbo unoti,

“ ‘She bakati kuna She wangu,

Gala ku luboko gwangu gwe luji,

43kudzina ndithama zwita zwizo

tjigalo tjaunobiga makumbo awo.’

44“Dafite unondana eti, ‘She.’ Ngono ungabe nkololo uwe tjini kene?”

Jesu unotjenjedza ngekwe badiyi be nlayo

(Matewu 23:1-36; Mako 12:38-40)

45Kukati bathu bose bakahwilila, Jesu kati ku badiyiwa babe, 46“Tjenjelelani badiyi be nlayo. Banoda yenda bakaambala hazu dze makubakuba, beda kudumiliswa pakati kwe bathu ne kugala mu zwigalo zwi pezhugwi mu ng'umba dze mitembezelo ne magalo a hwunde ne nkoki mu mizano ye zojiwa. 47Banotjebela tjilikadzi nge kudzitolela thundu dzadzo, bakayita mashungwa ndibong'we nge mitembezelo milefu. Bathu bakajali banowolobgwa shamu inogwadza kwazo.”

നിലവിൽ തിരഞ്ഞെടുത്തിരിക്കുന്നു:

Luke 20: KBTP

ഹൈലൈറ്റ് ചെയ്യുക

പങ്ക് വെക്കു

പകർത്തുക