Luke 19

Jesu na Zakeyo

1Ngono Jesu kangina mu nzi we Jerikho kaupalama. 2Ipapo kwakabe kuna nlume unoyi Zakhayosi, ali nkhethisi nkulu, kakale akafuma. 3Wakabe eyemula kubona kuti Jesu ndiani, koga nge bufupi gugwe, kasitubule, ngobe esitigwa nge mbunga we bathu wakabe uli ipapo. 4Ndizo Zakhayosi kalabukila mbeli, kanotatha nkuyu, kuti abone Jesu ngobe wakabe enopinda ndi ipapo. 5Kukati Jesu eswika pa nti iwoyo kalinga pezhugwi ngono kati kuna Zakhayosi, “Zakhayosi, deluka ulibilidza, nasi ndi mwezi uwo.”

6Zakhayosi kadeluka elibilidza, kaamutjila Jesu nge kushatha kukulu. 7Bathu bakati bebona, bakang'ong'ola beti, “Wayenda kunobe mwezi we ntjinyi.”

8Zakhayosi kamilika kati kuna She Jesu, “Bonani She, ndotola ntome kwe thundu yangu ngwenu ndikobela bashayi. Kene kuna wandakatjebela, ndombuzila kanna kwe tjimwe ne tjimwe tjandakantolela.”

9Jesu kati kunli, “Nasi jidzo laswika mu nzi iwoyu, ngobe naiyebo, u nkololo wa Abhurahama. 10#Matewu 18:10Ngobe Nkololo we Nthu wakazhila kuwoshaka ne kutjidza bakalashika.”

Tjifaniso tje maloso e golide akayi azwadziwe

(Matewu 25:14-30)

11Kukati batjakahwilila zwithu izwezwi, Jesu kadwilila ebabudza tjifaniso, ngobe se akabe ali pejo nge Jerusalema bathu bakabe bekumbula kuti bushe gwe kudzimu gowoswika tjinyolotjo. 12Ndizo kati, “Mmwe nlume wakabe ali nkugwana abe pejo ngoyenda ku shango ikule kule kunopiwa bushe ekowobgwilila ku shango ya kanyi kwabo. 13Kadana balanda babe bali gumi kabapa maloso e golide#19:13 maloso e golide: loso ling'ompela lakabe lakalizana ndipo ye mimwedzi mitatu. ali gumi, kati ku bali, ‘Zwadzani maloso iyawa kudzina ndizha.’ 14Koga bathu be shango iye bakabe bebenga, ndizo bakatuma bathu shule kukwe beti, ‘Atitoshaka kuti nlume iwoyu atibuse.’

15“Kati ebuya asinoamutjila bushe, kadana balanda ibaba baakapa maloso eshaka ziba sekwa bakaazwadza. 16We kutanga kazha kati, ‘Tetshi, maloso enyu e golide akazwala mamwe maloso e golide ali gumi.’ 17Mambo kati kunli, ‘Kubuyanana, nlanda wakalulwama. Ngobe unogagwabgwe mu zwithu zwitukununu. Unowobe ne simba pezhugwi kwe mizi ili gumi.’ 18We bubili kazha kati, ‘Tetshi maloso enyu e golide akazwala mamwe maloso e golide ali mashanu.’ 19Mambo kati kunli, ‘Nawebo, ibe ne simba pezhugwi kwe mizi ili mishanu.’

20“Mmwe nlanda kazha kati, ‘Tetshi, bonani, loso lenyu le golide eli. Ndakalipetela nge jila, ali biganya. 21Ngekuti ndakabe nditja imwi, ngobe muli nlume nkukutu. Motola pamusakabiga, mukavuna pamusakadzwala.’ 22Mambo uwe kadabila eti, ‘Ndowokusumikilisa nge matama awo, nlanda mbi ndiwe. Wakabe uzibazo kuti ndi nlume nkukutu, ndotola pandisakabiga, avuna pandisakadzwala. 23Ini ngono usakabiga maloso angu mu dula le mari, kuti nditi ndibuya ndiatole azwala?’

24“Kati kuna ibabo bamile ipapo, ‘Muntolele maloso awe e golide, muape iwoyu una ali gumi.’ 25Ngono bakati kunli, ‘She, una mamwe ali gumi kale!’ 26#Matewu 13:12; Mako 4:25; Luke 8:18Mambo kadabila eti, ‘Ndomubudza nditi, iye una tjaanatjo unowopaphidzigwa, koga iye usina ne tjitukununu tjaanatjo unowotjitolegwa. 27#Matewu 25:14-30Koga izwezo zwita zwangu zwakabe zwisingashake kuti ndizwibuse, muzwizhise ngeno muzwibulaye mbeli kwangu.’ ”

Kuamutjigwa kwa Jesu mu Jerusalema

(Matewu 21:1-11; Mako 11:1-11; Johani 12:12-19)

28Ngono kukati Jesu aleba ikoku, kadwilila mbeli etathila ku Jerusalema. 29Kati esedzela ku Bhetifage ne Bhetani pa dombo linodang'wa Dombo le Mitoba, katuma babili be badiyiwa babe eti ku bali, 30“Yendani ku nzi umbeli kwenyu, mowoti mungina muuli, mowowana donkana yakasungiligwa ipapo, isina wakatongo itatha. Muisunungule muizhise ngeno. 31Ha mmwe emubhuzwa eti, ‘Moisunungulilani?’ Mun'dwe muti, ‘She banoishaka.’ ”

32Ndizo ibabo bakabe batumwa bakayenda, bakawana kwakajalo sekwa ababudza. 33Ngono bakati batjasunungula donkana, beni bayo bakati, “Ini musunungula donkana iyeyi?”

34Bakadabila beti, “She banoishaka.” 35Bakaizhisa kuna Jesu, bakawala hazu dzabo pezhugwi kwe donkana, bakatathisa Jesu mu donkana. 36Kukati eyenda akatatha donkana, bathu bakawala hazu dzabo mu zila.

37Kati eswika pejo ne pathu zila painokunguluka mu hwunde ne Dombo le Mitoba, mbunga wose we badiyiwa ukatangisa kupululudza bakashatha ne kukudza Ndzimu nge mahwi apezhugwi ngekwe mishingo yose inotjenamisa yabakabe babona beti, 38#Njimbo 118:26“Kwakakombolegwa iye mambo unozha mu zina la She! Ngakube ne kunyalala kudzimu, gudzo alibe pezhugwi zhugwi!”

39Bamwe Bafarasi pakati kwe mbunga bakati kuna Jesu, “N'diyi, tjemela badiyiwa babo!”

40Jesu kadabila eti, “Ndomubudza nditi, nenguba banganyalala, mabgwe iwo nge kwawo anowomimila.”

Jesu unolilila nzi we Jerusalema

41Jesu kati esedzelela nzi we Jerusalema eubona kaulilila, 42kabe eti, “Dzene nasi wabe uziba zwithu zwingakuzhisila kunyalala! Koga ngwenu wazwisumbikigwa. 43Ngobe misi inowokuzhila inowoti zwita zwizo zwikathama matathilo pa bhakasa lilo zwikupoteleka, kakale zwikukombeledza. 44Zowokupkhwanyila pasi, iwe ne bana bamukuli. Akuna bgwe lazwinowosiya lakatiliyana ne limwe mukuli, ngobe auzoziba nsi we kumbiwa kuko.”

Jesu ediya ku Ng'umba ye Ndzimu

(Matewu 21:12-17; Mako 11:15-19; Johani 2:13-22)

45Kudwapo kangina mu Ng'umba ye Ndzimu, katangisa kutatila kuzhe bakabe betengesa. 46#Isaya 56:7; Jeremiya 7:11Kabadwa kati, “Kwakakwagwa kuyi, ‘Ng'umba yangu inowobe ng'umba ye ntembezelo,’ koga imwi maithama guwu le batoleli.”

47 # Luke 21:37 Wakabe ediya mazhuba wose mu Ng'umba ye Ndzimu. Bapirisiti* bakulu ne badiyi be nlayo ne batungamili be bathu bakabe begwisa kumbulaya. 48Koga abazowana zila yabangakushinga ndiyo, ngobe bathu bakabe beteedza kwazo matama awe.

നിലവിൽ തിരഞ്ഞെടുത്തിരിക്കുന്നു:

Luke 19: KBTP

ഹൈലൈറ്റ് ചെയ്യുക

പങ്ക് വെക്കു

പകർത്തുക