Luke 11

Jesu ediya ngekwe ntembezelo

(Matewu 6:9-13; 7:7-11)

1Limwe zhuba Jesu wakabe etembezela mu gumwe bugalo, ngono kati epedza, mmwe we badiyiwa babe kati kunli, “She, mutidiye kutembezela, sa Johani akadiya badiyiwa babe.”

2Kati ku bali, “Ha mutembezela muti,

“ ‘Tate,

zina lenyu ngaliyengamadziwe,

bushe gwenyu ngaguzhe.

3Mutipeni zhuba ne zhuba zojiwa zwedu zwe zhuba.

4Mutizwiibhatigwe zwibi zwedu,

ngobe naswibo tobazwiibhatigwa bose banotithamila milandu.

Musitilonge mu kulikwa.’ ”

5Ipapo Jesu kati ku bali, “Ndiupi wenyu ungayenda ku nzwalani uwe, pakati kwe busiku eswika eti ‘Nzwalani, undiadzime zwiwunga zwitatu, 6ngobe nzwalani wangu umu gwendo wazha pandili, koga andina tjandingampa,’ 7koga ekon'dabila eti, ‘Usinditshonyonge, nkoba wazhaligwa imi ne bana bangu tayizela. Andingamuke akupa tjimwe kene?’ 8Ndomubudza nditi, ne asingake kamuka kampa tjiwunga, ngobe ali nzwalani uwe, koga nge moyo nlefu wa iwoyu nlume, unowomuka kampa kose kwaanoshaka.”

9“Ndizo ndomubudza nditi, kumbilani mowopiwa; shakani mowowana; kokodzani mowozhuligwa. 10Mmwe ne mmwe unokumbila unoamutjila, na iye unoshaka unowana, kakale ne unokokodza, unowozhuligwa. 11Ndiupi mu muli imwi botate, ungati mwana uwe ekumbila hwobe, kampa nyoka mu bumo gwe hwobe kene? 12Kene ungati ekumbila bumbulu, kampa gungubudza? 13Ha imwi babi, muziba kupa bana benyu zwipo zwakanaka, kukulu kungapani Tate benyu ba kudzimu kwabanowopa Meya yakayengemala ibabo banobakumbila!”

Jesu na Bheelizebhuli

(Matewu 12:22-30; Mako 3:20-27)

14Jesu wakabe edusa meya mbi we mbebebe. Kukati meya mbi yabhuda, nlume we mbebebe kalebeleka, ngono bathu bakakaabala. 15#Matewu 9:34; 10:25Koga bamwe babo bakati, “Unodusa meya mibi nge simba la Bheelizebhuli, she we meya mibi.”

16 # Matewu 12:38; 16:1; Mako 8:11 Bamwe bakanlika nge kukumbila tjilakidzo tjinodwa kudzimu. 17Koga Jesu, ngobe eziba njalakang'wa dzabo kati ku bali, “Bushe gumwe ne gumwe gwakazwithubukanya, gowokolomoka ne nsha mmwe ne mmwe wakathubukana, unowopalala. 18Ha Satani akathubukana, bushe gugwe gungasima tjini kene? Hwuti ndoleba saikoku ngobe mukati ndodusa meya mibi nge simba la Bheelizebhuli. 19Ngono ha ili kuti ndodusa meya mibi nge simba la Bheelizebhuli, bana benyu banoidusa nge simba la ani? Ndizo banowobe basumikilisi benyu. 20Koga ha ili kuti ndodusa meya mibi nge simba le Ndzimu, bushe gwe Ndzimu gwatjiswika mu muli.”

21“Ha nlume wakasima akabhata zwibhayano, akalisa ng'umba iye ye bushe, thundu iye yakatjengeteka. 22Koga ha mmwe wakasima kumpinda angan'nginilila kankunda, unotolela zwibhayano ne zwivikili nlume iwoyu zwaabe ali gelebgwe, ndizo ekokoba tjaatapa.”

23 # Mako 9:40 “Iye usimile nami unonyanyayidzana nami, na iye usingakubunganye nami, unopaladza.”

Meya mbi inobgwilila mu magalo awo

(Matewu 12:43-45)

24“Ha meya mbi ibhuda mu nthu, inopinda mu magalo akawoma ishaka kunyaluluka, koga isingakuwane. Ipapo inoti, ‘Ndowobgwilila ku ng'umba yandakadwa ku ili.’ 25Ha iswika, inowana ng'umba iyeyo yakatshwayigwa ili mbuyanana kakale yakalulwamisiwa. 26Ipapo inoyenda inotola meya mimwe ili kutendeka mibi kuupinda, ngono yose inongina ikagala mukati, ndizo tjimo tje nthu iwoyo tje bupelo tjobipa kupinda tje kutanga.”

Kukombolegwa kwe malebeswa

27Kukati Jesu atjaleba zwithu izwezwi, mmwe nkadzi pakati kwe mbunga we bathu kamilidza hwi kati, “Kwakakombolegwa nkadzi wakakuzwala na iye wawakamwa munli.” 28Koga Jesu kadabila eti, “Koga kwakakombolegwa ibaba banohwa dama le Ndzimu bakalilondolodza.”

Jesu unoleba ngekwe tjilakidzo tja Jona

(Matewu 12:38-42)

29 # Matewu 16:4; Mako 8:12 Kwakati mbunga we bathu ukula, Jesu kati, “Bathu ibaba bangwenu bathu babi. Banoshaka tjilakidzo tjinotjenamisa, koga akuna tjilakidzo tjabanowopiwa, kuzhe kwe tjilakidzo tja Jona. 30#Jona 3:4Sa Jona akabe ali tjilakidzo ku bathu be Ninive, Nkololo we Nthu na iye unowobe tjilakidzo ku bathu ibaba bangwenu. 31#1 Bomambo 10:1-10; 2 Zwiyitikalo 9:1-12Nfumakadzi we burwa unowoma ne bathu ibaba bangwenu mu nsi we kusumikilisiwa, ngono unowobabona nlandu, ngobe wakazha edwa ku phelelo dze shango kuwohwa butjenjedu gwa Solomoni, ngono bonani, nkulu pana Solomoni upano. 32#Jona 3:5Balume be Ninive banowoma ne bathu ibaba bangwenu mu nsi we kusumikilisiwa, koga banowobabona nlandu, ngobe bakashandukila ku Ndzimu mu kusumikila kwa Jona, ngono ngwenu bonani, nkulu pana Jona upano.”

Tjifaniso tje luvone

(Matewu 5:15; 6:22-23)

33 # Matewu 5:15; Mako 4:21; Luke 8:16 “Akuna unobhatidza luvone, ngono kagubiga mu magalo agunowosumbikika, kene kagufumika nge itundu. Koga unogubiga patjena kuti ndizo banongina babone tjedza. 34Zhisho lilo ndigo luvone gwe mbili uwo. Ha mesho awo akalulwama, mbili uwo wose uzhele tjedza. Koga ha zhisho lilo lisakalulwama, mbili uwo wose uzhele zhalima. 35Ngono ibe ne njele kuti tjedza tjimukuli tjisibe zhalima. 36Ndizo, ha mbili uwo wose uli zhele tjedza, kusina ndungululo iyo imu zhalima, unowopenya tjose, se tjedza tje luvone tjikupenyela.”

Jesu eti bapalala ka tathatu

(Matewu 23:1-36; Mako 12:38-40)

37Jesu kati atjalebeleka, mmwe we Bafarasi kankoka kunoja naye, ndizo kayenda kanoja naye. 38Ngono Nfarasi iwoyu katjenama ebona Jesu eja asangula. 39Ipapo She kati kunli, “Ngono ngwenu imwi Bafarasi mosuka kuzhe kwe nkombe ne kwe ndilo, koga mukati kwenyu muzhele bugovu ne bubi. 40Zwilengwe ndimwi! Apa iye wakathama kuzhe ate iyezwe wakathama mukati kene? 41Koga dusani zwimukati kwe ndilo dzenyu, zwili zwipo zwe basheti, ndizo tjimwe ne tjimwe tjowobe tjibuyanana kumuli.

42 # Zwipo 27:30 “Yee mme wee! Mapalala imwi Bafarasi, ngobe mopa Ndzimu tjebugumi* tje nvavani ne ruwe ne milibo yose, koga motjuluka kuthama ndulamo ne ludo gwe Ndzimu. Mobe muyita izwezwi koga musingalashe zwimwe.

43“Yee mme wee! Mapalala imwi Bafarasi, ngobe moda zwigalo zwipezhugwi mu ng'umba dze mitembezelo ne kulezwiwa mu matengeselo. 44Yee mme wee! Mapalala imwi, ngobe monga zwikumbu zwisakatjwayiwa,#11:44 zwisakatjwayiwa: Bajuta bakabe betjwaya zwikumbu nge kuzwizhodza butjena kuti ndizo zwiboneke, ngobe nthu wakabe ekumana nge ikumbu wakabe asingake kanamata Ndzimu nge bamwe kuswikila etjenapadziwa. zwinoti bathu bakayenda pezhugwi kwazo basingazibe.”

45Mmwe we badiyi be nlayo kan'dabila kati, “N'diyi, ha uleba zwithu izwezwi, naswibo unotituka.”

46Jesu kadabila kati, “Yee mme wee! Mapalalabo imwi badiyi be nlayo, ngobe mosengesa bathu mitolo inolema, koga imwi nge kwenyu amutoshaka kubabhatsha nenguba kuli kutukununu. 47Yee mme wee! Mapalala imwi ngobe mobaka zwikumbuludzo pa zwikumbu zwe balebesambeli, bakabulawa ndi bobatategulu benyu. 48Ndizo molakidza kuti modumana ne tjakashingwa ndi bobatategulu benyu, bakabulaya balebesambeli, ngono imwi mobaka zwikumbuludzo pa zwikumbu zwabo. 49Ndizo, butjenjedu gwe Ndzimu gwakati, ‘Ndowobatumila balebesambeli ne batumwa, ngono bamwe babo banowobabulaya, koga bamwe babo banowobadziyidza.’ 50Ndizo bathu ibaba ba ngwenu banowodabilila malopa e balebesambeli, iyawa akatebugwa kudwa mu kutangisa kwe shango, 51#Kutangisa 4:8; 2 Zwiyitikalo 24:20, 21kudwa mu lopa la Abele kunoti mu lopa la Zakhariya, wakabulayigwa pakati kwe tjibeso ne Ng'umba ye Ndzimu. Ee, ndomubudza nditi, bathu ibaba bangwenu banowodabilila kose ikoku.

52“Yee mme wee! Mapalala imwi badiyi be nlayo, ngobe makatola khiyi ye luzibo, koga mukasingine ngono makadzibila bakabe beshaka ngina.”

53Kukati Jesu edwa ipapo, Bafarasi ne badiyi be nlayo bakatangisa kunyanyayidzana naye nge bushongola, bembhuzwa bhuzo, 54beshaka kumbhatshila nge ndebo.

നിലവിൽ തിരഞ്ഞെടുത്തിരിക്കുന്നു:

Luke 11: KBTP

ഹൈലൈറ്റ് ചെയ്യുക

പങ്ക് വെക്കു

പകർത്തുക