Mareka 4

Nguli ya mucali

(Mat 13.1-9; Luk 8.4-8)

1 # Luk 5.1-3 Jesu a kala ku luta hape fa munanga wa Lisa la Galilea. Kabakala buñata bwa batu ba ba til'o kubukana ku yena, a longana mwa mukolo, mi a ina mwateñi. Ba fuula hanyinyani, mi nyangela, yona, ya siyala fa likamba. 2Kiha s'a ba luta ze ñata ka linguli, mi mwa tuto ya hae a li ku bona.

3“A mu teeleze! Mulimi yo muñwi n'a ile ku y'o cala. 4H'a nz'a hasa peu mwa simu, peu ye ñwi ya wela mwa nzila, mi ya ciwa kapili ki linyunywani. 5Ye ñwi ya wela mwa macwe mo ne ku si na mubu o muñata. Peu ya mela kapili, kakuli ne ku si na mubu o muñata. 6Kono lizazi ha li pahama, mitungo ye melile ya letuka, mi kakuli mibisi n'e si ka kena hahulu mwa mubu, ya oma kapili. 7Peu ye ñwi ya wela mwa mikakani, mi mikakani ha i hula, ya i yowelisa, mane peu ya palelwa ku beya. 8Kono peu ye ñwi ya wela mwa mubu o munde. Ya tunguka, ya hula mi ya beya lico ze ñata. Ye ñwi ya beya mashumi a malalu, ye ñwi mashumi a silezi, ye ñwi mwanda.”

9Jesu kih'a li, “Ya na ni lizebe, a utwe!”

Mulelo wa linguli

(Mat 13.10-17; Luk 8.9-10)

10Jesu ha s'a siyezi a nosi, ba bañwi ba nyangela hamohocwalo ni ba lishumi ka ba babeli ba t'o buza litaluso za linguli. 11A li ku bona, “Mina, mu filwe ku ziba likunutu za Mubuso wa Mulimu. Kono ba bañwi, ba ba sa li kwande, ba bulelelwa lika kaufela ka mukwa wa linguli feela, 12#Isa 6.9-10 ili kuli,

‘Kwa ku bona, ba bone,

kono ba si ke ba bonisisa,

ni ku utwa, ba utwe,

kono ba si ke ba utwisisa.

Kabesicwalo ne ba ka swana ba sikuluhela ku Mulimu,

mi a ba swalela!’ ”

Jesu u talusa nguli ya mucali

(Mat 13.18-23; Luk 8.11-15)

13Mi Jesu a li ku bona, “Kana ha mu utwisisi taluso ya nguli yeo ya mucali? Mu ta utwisisa cwañi linguli ze ñwi kaufela? 14Mucali yo, ki ya luta linzwi la Mulimu. 15Batu ba bañwi ba swana ni nzila mo ku calwa linzwi. Ba man'o li utwa, Satani u pakisa ku t'o zwisa linzwi le mwa lipilu za bona. 16Kamukwaocwalo, batu ba bañwi ba swana ni mubu o kopani ni macwe, mi ha ba utwa linzwi ba pakisa ku li amuhela ka tabo. 17Kono, ba li tokwisa sibaka sa ku tiya hande mwa lipilu za bona, kakuli ha ba na mutundamenyi. Ha ku taha matomola kamba manyando kabakala linzwi la Mulimu, ba tuhela kapili! 18Ba bañwi hape, ki ba ba swana ni mubu mo ku melile mikakani, ili bao ba utwile linzwi. 19Kono maswenyeho a bupilo, ku yembululwa ki bufumu ni mifuta-futa ya litakazo, za kena ku t'o yowelisa linzwi, mi ba palelwa ku beya miselo. 20Kono ba teñi ba bañwi ba ba swana ni mubu o munde. Ba utwa linzwi, ba li amuhela, mi ba beya miselo. Ba bañwi ba beya mashumi a malalu, ba bañwi mashumi a silezi, ba bañwi mwanda.”

Nguli ya lampi

(Luk 8.16-18)

21 # Mat 5.15; Luk 11.33 Mi Jesu a ba buza, a li, “Kana mutu ya tukisa lampi u ka i kwahela ka tubana, kapa ku i beya mwatas'a mumbeta? Kana h'a na ku i beya fa ngandaleza? 22#Mat 10.26; Luk 12.2 Se si patilwe kaufela si ta patululwa, mi se si kwahezwi si ta kwahululwa.

23Ya na ni lizebe, a utwe!”

24 # Mat 7.2; Luk 6.38 Jesu a ba bulelela hape, a li, “Mu teeleze ka tokomelo se mu utwa! Milao ye mu sebelisa ha mu atula ba bañwi, ni Mulimu u ta i sebelisa ku mina, ka tata mane ni ku fita h'a ka mi atula. 25#Mat 13.12; 25.29; Luk 19.26 Ya na ni se siñwi, u ka ekelezwa ku s'a sweli, kono ya si na u ta amuhiwa mane ni ka kanyinyani k'a na ni kona!”

Nguli ya peu mo i melela

26Hape Jesu a li, “Mubuso wa Mulimu u swana ni mo i bonahalela peu y'a cezi mutu mwa simu ya hae. 27Mutu yo, nih'a lobezi busihu kapa nih'a ka tona musihali, peu yona i sweli ya mela ni ku hula a sa zibi. 28Mubu ki ona o melisa mitungo ni ku eza makunka ni ku beya bubeke bo bunde. 29#Joel 3.13 Mi, mabele ha s'a buzwize, mutu u nga cekesi ni ku kala musebezi kakuli s'e li nako ya ku kutula.”

Nguli ya peu ya masitete

(Mat 13.31-32,34; Luk 13.18-19)

30Hape Jesu a li, “Mubuso wa Mulimu lu ka u swanisa ni nto mañi? Kapa lu ka u talusa ka nguli ifi? 31U swana ni peu ya masitete, ili peu ye nyinyani ku fita lipeu kaufela mwa lifasi, ha i calwa. 32Kono, ha i se i cezwi, i hula ku fita ze ñwi kaufela kwa butuna. Mi i mela mitai ye mituna hahulu, mane linyunywani li t'o yaletela mwa muluti wa yona.”

33Jesu n'a ba luta linzwi ka linguli ze cwalo ze ñata, ka mo ne ba konela ku utwisisa. 34N'a sa buleli ni bona a sa itusisi linguli, kono ha n'a li kwa mukunda ni balutiwa ba hae, n'a ba talusezanga litaba kaufela.

Jesu u kuzisa liñungwa

(Mat 8.23-27; Luk 8.22-25)

35Manzibwana a lona lizazi leo, Jesu a li kwa balutiwa ba hae, “A lu sileleñi mwabuse bwa lisa!” 36Ba sin'o siya nyangela, balutiwa ba longana ni Jesu mwa sisepe. Ne ku na ni lisepe ze ñwi fakaufi. 37Cwale kwa zuha liñungwa le lituna, mi mandinda a kala ku kenya mezi mwa sisepe, mane sa bata ku tiba. 38Jesu n'a li kwa litusi la kwa mulaho, a samile fa musamo, a lobezi. Balutiwa kiha ba mu zusa, ba li, “Muluti, kiñi ha u sa bilaeli niha lu bata ku shwa!”

39Jesu a zuha, mi a kalimela moya, a li, “Kuza!” Ni kwa mandinda a li, “Ombela!” Moya wa kuza, mi kwa ombela hahulu. 40Cwale Jesu a li kwa balutiwa ba hae, “Mu sabiswa kiñi? Kikabakalañi ha mu si na tumelo?”

41Bona ba saba hahulu, mi ba bulelisana, ba li, “Kanti yo, ki mañi, ya li moya ni mandinda kaufela za mu utwa?”

നിലവിൽ തിരഞ്ഞെടുത്തിരിക്കുന്നു:

Mareka 4: Lozi09

ഹൈലൈറ്റ് ചെയ്യുക

പങ്ക് വെക്കു

പകർത്തുക