Mareka 3

Jesu u folisa mutu wa lizoho le li omelezi

(Mat 12.9-14; Luk 6.6-11)

1Jesu a kutela hape kwa sinagoge. Mwateñi, ne ku na ni mutu wa lizoho le li omelezi. 2Ba ba ne ba li teñi, ne ba talimisisa Jesu kuli ba bone kapa n'a ka folisa mutu yo ka Lizazi la Pumulo, kakuli ne ba bata ku mu tama litaba. 3Jesu a bulelela mutu wa lizoho le li omelezi, a li, “Yema fapil'a nyangela.” 4Kih'a buza nyangela, a li, “Kana Mulao wa luna u lu lumelela ku eza sifi ka Lizazi la Pumulo, ku eza hande kapa ku eza maswe, ku pilisa mutu kapa ku mu bulaya?”

Kono ba kuza feela. 5Jesu a ba talima ka buhali. N'a swabile hahulu kabakala ku sa utwisisa kwa bona. A li ku mutu yo, “Otolola lizoho la hao?” A li otolola, mi la fola. 6Cwale Bafalisi ba zwa mwa sinagoge mi ba y'o kopana kapili ni ba sitopa sa Heroda. Ba lelisana ka mukwa o ba ka bulaya Jesu ka ona.

Buñata bu taha ku Jesu kwa Lisa la Galilea

7Jesu a ikela ni balutiwa ba hae kwa Lisa la Galilea, mi batu ba bañata ba mu latelela. Ne ba zwa kwa Galilea ni kwa naha ya Judea. 8Ne ba zwa mwa Jerusalema, kwa naha ya Idumea ni naha ye mwabuse bwa Jordani, ni mwa libaka ze fakaufi ni minzi ya Tire ni Sidoni. Buñata bo bwa batu bwa taha ku Jesu ka ku utwa z'a n'a eza. 9#Mar 4.1; Luk 5.1-3 Jesu a kupa balutiwa ba hae kuli ba mu lukiseze mukolo, nyangela i si ke ya mu pitihanyeza. 10N'a s'a folisize ba bañata, mi bakuli kamukana ne ba isundiliketa ku yena kuli ba mu ngunyute. 11Mi, kamita mioya ye maswe ha ne i mu bona, ne i welanga kwa mahutu a hae, i nze i huwa, i li, “Wena, u Mwan'a Mulimu!” 12Kono Jesu na i kalimelanga ka tata kuli i si ke ya mu zibahaza.

Jesu u keta baapositola ba lishumi ka ba babeli

(Mat 10.1-4; Luk 6.12-16)

13Cwale Jesu a kambamela fa lilundu. A biza batu b'a n'a tokwa kaufela, mi ba taha ku yena. 14Kih'a keta ba lishumi ka ba babeli, mi a ba fa libizo la baapositola. A ba bulelela, a li, “Ni mi ketezi kuli mu t'o ina ni na. Ni ta mi lumanga ni mina kuli mu y'o kutaza. 15Mi ni ta mi fa maata a ku leleka mioya ye maswe.”

16Ba lishumi ka ba babeli b'a n'a ketile ki bao. Ki Simoni mi Jesu a mu beya libizo la Pitrosi. 17Ki Jakobo ni munyan'a hae Joani, ili bana ba Zebedea mi Jesu a ba fa libizo la Bonanergesi, kikuli Batu ba Mushika. 18Ki Andreasi, ni Filipi, ni Bartolome, ni Mateu, ni Tomasi. Ki Jakobo mwan'a Alfea, ni Tadea, ni Simoni Mukanana. 19Mi ki Judasi Isikariota, ili yena ya kile a beteka Jesu.

Bahabo Jesu ba bata ku mu nga

20Cwale, Jesu a kutela kwa hae. Batu ba t'o kubukanela ku yena ka buñata, mane ba mu paleliswa ku ca lico, yena ni balutiwa ba hae cwalo. 21Bahabo Jesu ha ba utwa zeo, ba bata ku t'o mu nga kakuli batu ne ba li, “S'a lyangani!”

Jesu u alaba ba ba mu tama litaba

(Mat 12.22-32; Luk 11.14-23; 12.10)

22 # Mat 9.34; 10.25 Baluti ba bañwi ba Mulao, ba ba ne ba zwa mwa Jerusalema, ne ba li, “U mwa maata a mulen'a mioya ye maswe ye bizwa Beelzebule, ili yena Satani!” Hape ne ba li, “Ki yena ya mu fa maata a ku i leleka!”

23Cwale Jesu a biza batu, mi a ba bulelela ka linguli, a li, “Satani u kona cwañi ku iteleka ili yena? 24Mubuso ha u koni ku tiya, batu ha ba fapahani, mi ba lwanisana. 25Ba ndu i liñwi ha ba lwanisana, ndu yeo ha i na ku tiya. 26Kamukwaocwalo, Satani h'a itwanisa, mubuso wa hae ha u kauhana, ha u na ku ina. U ta fela.

27“Ha ku na mutu ya ka kona ku kena mwa ndu ya muhali kuli a sinye libyana za hae, ni ku ikungela zona, konji h'a kala pili ku tama muhali yo. Kihona a ka kona ku li nga.

28“Kaniti, na mi bulelela kuli batu ba kona ku swalelwa libi ni linyefulo za bona kaufela. 29#Luk 12.10 Kono mutu ufi kamba ufi ya ka nyefula Moya o Kenile, yo h'a na ku swalelwa kuya kuile, kakuli u ta ba ni mulatu wa sibi se si sa feli.”

30Jesu n'a bulela cwalo kakuli ne ba ize, “U na ni moya o maswe.”

M'ahe Jesu ni ba lubasi lwa habo

(Mat 12.46-50; Luk 8.19-21)

31M'ahe Jesu ni ba lubasi lwa habo ba fita. Ba t'o yema fande, mi ba luma mutu ku y'o mu biza. 32Batu ba bañata ne ba inzi, ba mu beile mwahali. Ba mu bulelela, ba li, “Bona, m'aho ni bahenu ki ba, fande, mi ba ku bata.”

33Jesu a ba alaba, a li, “Me ki mañi, mi bahesu ki bo mañi?” 34Kih'a talima ba ba mu tingulukile, a li, “Mwa utwa! Bona ba, ki bona bo ma ni lubasi lwa hesu! 35Ya eza se si latwa ki Mulimu, ki yena munyan'a ka, ni kaizel'a ka, ni bo ma!”

നിലവിൽ തിരഞ്ഞെടുത്തിരിക്കുന്നു:

Mareka 3: Lozi09

ഹൈലൈറ്റ് ചെയ്യുക

പങ്ക് വെക്കു

പകർത്തുക