Hechos 6

Jaꞌ Yet Jix Sicꞌle El Ebꞌ Jujwan Diácono

1Jaꞌ yet jun tiempoal tuꞌ, yelcꞌulal tol jix chꞌibꞌ sbꞌisil ebꞌ creyente. Jal pax ebꞌ creyente chi kꞌanabꞌ yin Griego, jix scajle a sbꞌa ebꞌ yetoj ebꞌ chi alon Hebreo, yutol jaꞌ yet chi akꞌle low ebꞌ mebꞌa junjun cꞌu, man tzꞌajanoj chi akꞌle tet ebꞌ ix ix camnajxa yichamil xol ebꞌ Griego tuꞌ. 2Yuxan jix yambꞌale oc masanil ebꞌ creyente yu ebꞌ lacawan ẍejabꞌ Jesús. Jix yalon ebꞌ tet jaxca tiꞌ:

—Ian wal cꞌamxa cu tiempo kalon el skꞌane Dios, yutol asanxane loꞌo tiꞌ chi kakꞌ cuenta. 3Yuxan, jex wuẍtaj, che satnewej oc jujwanoj winaj cu xol tiꞌ, catuꞌ che yaon oc yopiso ebꞌ yilon jun mulnail tiꞌ. Jujwanoj tol watxꞌ sbꞌeybꞌal, catuꞌ chi naꞌcha el yet Dios yu ebꞌ, sowalil tol caw eyoc Santo Espíritu yin ebꞌ. 4Jaon tiꞌ xin, oj cu oc cꞌal yin txa, catuꞌ oj kalon el skꞌane Dios, ẍi ebꞌ lacawan tuꞌ.

5Caw jix tzala a ebꞌ masanil yu jun kꞌane tuꞌ, yuxan, jaꞌton sbꞌi ebꞌ jix sicꞌ el ebꞌ tiꞌ: Esteban, jun naj caw eyoc scꞌul yin Dios sicꞌlebꞌil, catuꞌ caw eyoc Santo Espíritu yin, yetoj Felipe, Prócoro, Nicanor, Timón, Pármenas, cꞌal jun naj chi yij Nicolás a Antioquía. Jaꞌ naj Nicolás tiꞌ, ocnaj xa taꞌ yin scuybꞌanil ebꞌ Israel yet yalantoj. 6Yet jix sicꞌle el ebꞌ, catuꞌ jix iꞌletej ebꞌ sattaj ebꞌ ẍejabꞌ Jesús tuꞌ. Jix txali ebꞌ. Catuꞌ jix yaon oc skꞌabꞌ ebꞌ tuꞌ yibꞌan sjolom ebꞌ.

7Jix cꞌal sajlemtoj skꞌane Dios xol ebꞌ ánima. Yuxan jix cꞌal a sbꞌisil ebꞌ creyente bꞌey Jerusalén tuꞌ. Jaꞌ ebꞌ yakꞌomal xaambꞌal ebꞌ Israel tet Dios, ecꞌal ebꞌ jix oc yin creyenteal.

Jaꞌ Yet Jix Mitxꞌle Naj Esteban

8Jaꞌ naj Esteban, miman swatxꞌcꞌulal Dios chabꞌil yu. Caw chi oc cꞌal Dios yetoj. Yuxan, ecꞌal milagro* jix el xꞌoxon naj xol ebꞌ ánima. 9Ey pax wan ebꞌ Israel chi syambꞌa sbꞌa bꞌey jun snail sculto jun bꞌulan ebꞌ Israel chi yij: “Ebꞌ Yet Xa Sbꞌa.”#6:9 “Ebꞌ Yet Xa Sbꞌa”, tejan jaꞌ ebꞌ yicꞌaal wan ebꞌ a Israel tol jix iꞌletoj preso bꞌey Roma, catuꞌ jix txonle el ebꞌ yin chejabꞌwomal, jix jajle cꞌal el ebꞌ. Ey pax wan ebꞌ a conobꞌ Cirene, cꞌal wan ebꞌ a conobꞌ Alejandría, yetoj wan ebꞌ a Cilicia, cꞌal wan ebꞌ a Asia. Jix apni ebꞌ tiꞌ scꞌatan Esteban tuꞌ, jix cꞌoli steelen sbꞌa ebꞌ yetoj. 10Ma pax yakꞌ ganar ebꞌ, yutol jaꞌ sjelanil Santo Espíritu chi yakꞌbꞌalne naj yet chi kꞌanabꞌ naj tuꞌ. 11Jix cꞌal yil ebꞌ jaxca tuꞌ, catuꞌ jix smanon jaywan lekꞌtiꞌ testigo ebꞌ tuꞌ. Jix akꞌle scꞌul ebꞌ, yet watxꞌ chi yal ebꞌ jaxca tiꞌ:

—Jix kabꞌ sbꞌuchwa Esteban tiꞌ yin kichmam Moisés, cꞌal yin Dios, ẍina ebꞌ.

12Queytuꞌ jix yute yakꞌon a somna conobꞌ ebꞌ, yetoj ebꞌ ichamtaj winaj, cꞌal ebꞌ cuywam yin sley Moisés. Yuxan jix tit jucna ebꞌ yin Esteban tuꞌ, jix smitxꞌon ey naj ebꞌ. Jix yiꞌontoj naj ebꞌ sattaj yaaw tuꞌ. 13Jix lawi tuꞌ xin, jix seyon jaywanxa mac chi aon oc stzꞌajil kꞌane ebꞌ yibꞌan Esteban tuꞌ. Jix apni cꞌal ebꞌ, jix yalon ebꞌ tet ebꞌ yaaw tuꞌ jaxca tiꞌ:

—Jaꞌ Esteban tiꞌ, caw cꞌam chi sbꞌej niꞌoj sbꞌuchwa yin stemplo Dios, tol yet cꞌal Dios yei. Catuꞌ chi bꞌuchwa pax yin sley Moisés. 14Jix kabꞌ yalon jaxca tiꞌ: “Jaꞌ Jesús a Nazaret, oj yuchey stemplo Dios. Oj sqꞌuexbꞌone wan cu bꞌeybꞌal akꞌbꞌil can ey jon yu Moisés.” Queytuꞌ jix yute yaloni, ẍi ebꞌ chi tzꞌaj yalon ebꞌ.

15Catuꞌ jix oc tꞌanan ebꞌ yaaw yin Esteban tuꞌ, cꞌal jantaj masanil mac chotan ecꞌoj. Jaꞌ yet jix oc tꞌanan ebꞌ yin sat, caw laan yili sat tuꞌ jaxca junoj ángel.*

നിലവിൽ തിരഞ്ഞെടുത്തിരിക്കുന്നു:

Hechos 6: knj

ഹൈലൈറ്റ് ചെയ്യുക

പങ്ക് വെക്കു

പകർത്തുക