Luke 9
9
1နောက်လောင်နော့် စောင့်ယေရှုလ အောင်းတပဲ့မွန်းဆစ်(ပ်)ဆောင်(န်)ကော့် ဟောင့်ဆီ ဟစူးရောင့်(ဝ်) အောင်းဖီမနီးမငမ်းလေ စဟော့်အောက်၊ အောင်းကွန်းရောဂါရောင်းလေကော့် ဟပေါစမ်ရား အစွမ်းလေ ဟောင့်(ဝ်)ကော်ဝိုက်။ 2နောက်လောင်နော့် မွန်းန အောင်းစမနော် ဟပေါနဲ့ဟော အကြောင်းသာသနာတော်စောင့်ဖလားတောင်း ဟပေါနဲ့ရား အနာရောဂါလေ မှိန်းမန့်တော်ပေါစောက် ပွယ်ကော်ဝိုက်။ 3စောင့်ယေရှုကော့် အောင်းမနော် "တောင်းမဆူတောင်း အဟောင်းကော့် ပီအောင်း(ဝ်)ကော် ခေါန့်တောင့်၊ ထုန်(ဝ်)၊ ခေါင်ကျဉ်း၊ ငွန်း၊ ဆေဖအောင်းပိုလေ ပီအောင်း(ဝ်)ကော်။ 4ရာဟုန်းထောကော့်ခရောင့်(ဝ်) မဆူဟောင်ပေါခေါင့်(ဝ်)ကော်လော့် ဆီမေရာဟောန့် တော်မဆူအောက်ပေါက်မားပွန့် ရာဟုန်းဟောန့် ဆောင်း(ဝ်)ဟင်းကော်။ 5တော်နယ်ကော့် ဟုန်းအောင်းမဟပ်အောင်းမဆူ၊ နဲ့ပေါမစော် မှိန်းအောင်းမဟပ်အောင်းမဆူလေကော့် ဆီမေမှိန်းဟောန့် ပေါတအောက် ဖွန်အောင်းရောင်းရာတဉ်းမဆူ ဆောန်ဝေဆီ လောင်(ဝ်)ပြားဝိုက်ကော်"ဆီ ဝါကော်ဝိုက်။ 6တပဲ့မွန်းစောင့်လေကော့် အောက်ဟင်းမားကော်ဆီ တောင်းမန့်မန့်တောင်းမှိန်းမှိန်း တော်ပေါစောက် ကွာဟင်းဆီ နှုတ်ကပတ်တော်စောင့်ဖလားလေ လောင်(ဝ်)ပြားဟင်းကော်ဝိုက်။ အောင်းကွန်းစောင့်ပေးရောဂါလေကော့် ဟပေါဟိုင် ရားဟောင့်(ဝ်)ဟင်းကော်ဝိုက်။ 7စောင့်ခွန်ဟော်ငွန်းဂါလိလဲ ဟေရုဒ်ကော့် နယ့်ဟဉ်းသတင်းစောင့်ယေရှုကော်လော့် ကြာပါဟင်းကော်ဝိုက်။ ဟေဟောင်းပေါဝါလော့် ကွန်းကန့်ဖောင်လေန "ဆရာဗတ္တိဇံယောဟန်လ ခွန်းပေါက်မား"ဆီ ဝါဟင်းကော်ဝိုက်။ 8အောင်းကမ့်ဖောင်ပေါဝါလော့် ပရောဖက်ဧလိယကြွမားကော် နဲ့ပေါမစော် မေစောင့်(ဝ်)ပွန့် အောင်းရောင်းမားန ပရောဖက်ပညာရောင်းပါးနိမ် ခွန်းပေါက်မားကော်"ဆီ ဝါဟင်းကော်ဝိုက်။ 9တော်နယ်ကော့် ဟေရုဒ်လ "ကော အောင်းဟိုယောဟန် တက်(ပ်)မားရောင့်(ဝ်)ကော်၊ အောင်းကောနယ့်ဟဉ်းသတင်းလေ အောင်းအောက်လ ဖောတပေး"ဆီ ဝါဆီ အောင်းစောင့်ယေရှုလ အိုက်ခခေါက်(ပ်)ကော်ဝိုက်။ 10တပဲ့လေ ဆီမေခရီးပေါက်ဟင်းမားလော့် အောင်းစောင့်ယေရှု အောင်းမနော်ဟေမားလေ လောင်(ဝ်)ပြားဟင်းကော်ဝိုက်။ နောက်လောင်နော့် စောင့်ယေရှုလ အောင်းတပဲ့မွန်းလေ တောင်းမွန်းတောင်း ဟောင့်ကော်ရာမန့်ဗက်ဇဲဒဆီ ရိန်းစမ့်စမ့်အင် ကွာဟင်းကော်ဝိုက်။ 11တော်နယ်ကော့် ကွန်းတောင်းလုန်နာ့ အောင်းအကြောင်းဟိုင့်လေ ဟုညော့ စောင်း(မ်)ဟင်းမားခလောင်စောင့်ယေရှုဟင်းကော်ဝိုက်။ မွန်းစောင့်ယေရှုကော့် အောင်းစမနော် ဟပ်ထဆီ အကြောင်းသာသနာတော် စောင့်ဖလား လောင်(ဝ်)ပြားဆီ အောင်းကွန်းရောဂါခဟိုင်လေကော့် ဟဟိုင်ကော်ဝိုက်။ 12အချီန်ဝမ်းစိုင့်မားကော်လော့် တပဲ့ဆစ်(ပ်)ဆောင်(န်)ကော့်လ မားရာမွန်းစောင့်ဆီ "ရာဟိုင့်န တောင်းကွန်းလေတောင်းကိုင်းညော့ အောင်းစကွန်းဖွန် ရာမန့်အောင်းရောင်းရာခန့်ဟိုင့်လေတောင်း ရာခနောဝ်လောက်နားလေ ပွယ်ကော်။ အောင်းစမနော် အောင်းစဆောင်း(ဝ်)တောင်း အောင်းစကျဉ်းလိုစောင့်"ဆီ ဝါကော်ဝိုက်။ 13တော်နယ်ကော့် မွန်းစောင့်န "မဆူ အောင်းမနော် ခေါင်ကျဉ်းတူးနိမ်ဟောင့်(ဝ်)ကော်"ဆီ အောင်းတပဲ့လေ ဝါကော်လော့် မနော်ကော့် "ရာဟော ခေါင့်(ဝ်)မွန်းအောင်းဆေး ဟာ့ဟွေတောင်း ပါးဆောင်(န်)တူးနဲဟော်ရောင်းဟော ပေါတလိမ့်အောင်းကွန်းဟိုက်လေပေါလော့် ခေါင်ကျဉ်းလေ တနယ့်ကွာဆေ့အွန်"ဆီ ဝါကော်ဝိုက်။ 14ခနောဝ်ဖွန်ကွန်းလေန ကော့်စိုင်းဟူကော့်မွန်း ဟာ့ဟိန်တရောင်းဝိုက်။ မွန်းစောင့်ကော့် အောင်းတပဲ့မွန်းလေ "ကွန်းရေမွတ် ဟာ့ဆစ်(ပ်)စူးဆီ ဟအူကော်"ဆီ ဝါကော်ဝိုက်။ 15တပဲ့လေကော့် နောင်မွန်းစောင့်ဝါညော့ ဟေဟင်းကော်ဝိုက်။ ကွန်းတောင်းလုန်ကော့် နောင်နယ့်ညော့ နောင်ဟင်းကော်ဝိုက်။ 16မွန်းစောင့်ကော့် ခေါင့်(ဝ်)မွန်းဟာ့ဟွေတောင်း ပါးဆောင်(န်)တူးအောင်း(ဝ်)ဆီ တော်နိဗ္ဗာန်ပွန့်မျှော်ဆီ အောင်းဂုဏ်တော်စောင့်ဖလားလေ ချီးမွမ်းကော်ဝိုက်။ နောက်လောင်နော့် တောင်းမေးမွန်းစောင့်တောင်း အောင်းခေါင့်(ဝ်)မွန်းလေတောင်း အောင်းပါးလေကမ်းဆီ ဆီမေတပဲ့မွန်းလေ အောင်းကွန်းလေ ဟမိုင်ဟောင့်(ဝ်)ကော်ဝိုက်။ 17ကွန်းတောင်းလုန်ကော့် တော်ပေါအိဉ်(မ်)တော်ပေါတေမ်း ကျဉ်းဆီမကား အောင်းမနော်ကျဉ်းကျန်လေ တပဲ့လေကျေ(ပ်)ကော်လော့် ဟူမွန်းဆစ်(ပ်)ဆောင်(န်)မွန်းပွန့်ကျန်ဝိုက်။ 18ဝမ်းနိမ်လော့် မေစောင့်ယေရှုကော်နိမ်အင်ရောန်းဆုလ တပဲ့မွန်းလေ ထီန်မားကော်လော့် မွန်းစောင့်ကော့် အောင်းမနော် "ကွန်းလေဝါအဟောင်း အောင်းအကြောင်းကော"ဆီ ထန်(မ်)ကော်ဝိုက်။ 19မနော်လေကော့် "အောင်းကန့်ဖောင်လ အောင်းမောစောင့် ဆရာရေနှစ်မင်္ဂလာယောဟန်ဆီ၊ အောင်းကန့်ဖောင်လေကော့် ဧလိယဆီ၊ ပရောဖက်ပါးနိမ်ခွန်းပေါက်မားဆီ ဝါဟင်း"ဆီ လောင်(ဝ်)ပေါက်ကော်ဝိုက်။ 20မေနယ့်လော့် မွန်းစောင့်ကော့် "မဆူပဲ အောင်းကော ဖောဆီခဝါ"ဆီ ထန်(မ်)ကော်ဝိုက်။ မေနယ်လော့် ပေတရုလ "မောစောင့်လ ကွန်းစောင့်ဖလားပွယ်မား စောင့်မေရှိယ"ဆီ ဝါပေါက်ကော်ဝိုက်။ 21မွန်းစောင့်ကော့် အောင်းအကြောင်းဟိုက် အောင်းဖောကော့် ပီကော်လောင်(ဝ်)ဟင်းဆီ ဝါကော်ဝိုက်။ 22မွန်းစောင့်ကော့် အောင်းတပဲ့မွန်းလေ "ဟိုဘာသာရေးဂျူးလေ၊ ဘာသာရေးဂိုဏ်းချုပ်လုန်လေတောင်း ဆရာကျမ်းစမ်လေန အောင်းလူ့သားတော် တနိစတ်ဟင်းနော့်။ ကွန်းဟောန့်လေန အောင်းစမွန်းစောင့် တအောင်း(ဝ်)သိုင်းဟင်းနော့်။ တော်နယ်ကော့် ဆမ်ဝမ်းပေါထိန့်ကော် မွန်းတခွန်းပေါက်မား"ဆီ ဝါကော်ဝိုက်။ 23နောက်လောင်နော့် မွန်းစောင့်ကော့် အောင်းမွတ်ကွန်းလေ "တော်နယ်ကော့် မဆူပေါခပေး တပဲ့ကော အောင်းအလိုမဆူလေ တနယ့်ဝေ။ လက်ဝါးကပ်တိုင်မဆူလေ အောင်းမဆူတောင်းမဆူ တနယ့်ဟမ်ဆီ ခလောင်ကော ကူဝမ်းကူဝမ်း တနယ့်ပေးကွန်းစောင်း(မ်)ပဲ့ဟင်း။ 24အဆတ်မဆူ ဟောင်ပေါခဟကယ် ဘဝအောင်းအတ္တလေဝေဟင်းကော်။ တော်နယ် ကောပ့်အောင်းစကောစောင့်တောင်း ဘဝစောင့်ကောင်(ဝ်) ဟောင်ပေါဝေ အဆတ်မွန်းအောင်းကယ် တနယ့်ခမ်ဟင်း။ 25မဆူလ ကမ္ဘာလုန်တောင်းဟွေဟွေပိုင်မေကော့် ဘဝမဆူပျတ်ဆီ အဆတ်လေ ပေါဆွန်း(မ်)ကော်လော့် အကျိုးတရောင်းအွန်လေး။ 26မဆူလေန ကောပ့်ကောတောင်း ပေါနီးအိုင်း လူ့သားတော်ကော့် အစွမ်းစောင့်ဖလား၊ တောင်းဖီလေတောင်း မေကြွမားကော့် တနီးအိုင်းကော့်ဆဲ။ 27အောင်းမဆူ ကောဟောင်နယ့်ဝါအောင်းစော်ပေါဝါလော့် ကွန်းစိန်ရာနေရာဟိုင့် အောင်းကမ်ဖောင်လေန သာသနာစောင့်ဖလား အောင်းပျံ့ကော် မဟောန်ကောင်(ဝ်)ခွေတ် တနယ့်သိုင်းအွန်မစော်"ဆီ ဝါကော်ဝိုက်။ 28နောင်ခနေဟောန့်ဝါညော့ ပက်ဝမ်းဟူကော်လော့် မွန်းစောင့်လ အောင်းပေတရုရယ် အောင်းယောဟန်တောင်း၊ ယာကုပ်ရယ် ဟောင့်ဆီ ဟပေါနယ့်ရောန်းဆု ကြွကော်ခနေနွဲဟင်းကော်ဝိုက်။ 29မေမွန်းစောင့်ရောန်းဆုလ ဟန်မွန်းစောင့် ပြောင်းကော်ဆီ ဆေမွန်းလေန ပေးအောင်းခေါင်(ဝ်)ဆီ အရောင်လိမ်းမားကော်ဝိုက်။ 30ချရှ်ချန်း မောရှေတောင်းဧလိယကော့် ပေါ်မားဆီ တောင်းမွန်းစောင့်တောင်း တန့်ခွမ်းဟင်းကော်ဝိုက်။ 31မနော်လေကော့် အစွမ်းမွန်းစောင့်လေ လိမ်းအောက်မားရောင့်(ဝ်) ရာမှိန်းဂျေရုဆလင်ဟောန့် အကြောင်းမွန်းစောင့် အောင်းတနယ့်သိုင်း တန့်ဟင်းကော်ဝိုက်။ 32ပေတရုတောင်း အောင်းကျန်သာဝကဆောင်(န်)ကော့်လ နွမ်းနောက်ဟင်းကော်ဝိုက်။ မနော်လုမားလော့် ချရှ်ချန်း အစွမ်းလေတောင်း အောင်းစောင့်ယေရှု မနော်နယ့်ဟောန်ကော်ဝိုက်။ မနော်ကော့် အောင်းတောင်းစောင့်ယေရှုတောင်းတန့်တော်ဟင်း ကွန်းဆောင်(န်)ကော့်ပါ နယ့်ဟောန်ကော်ဝိုက်။ 33မောရှေတောင်း ဧလိယအောက်ကော်လော့် ပေတရုလ အောင်းမွန်းစောင့် "စောင့်၊ ရာဟိုက်လ ခနီးခအူအင်စောင့် အောင်းစမောစောင့် ထိန်ထိန်နိမ်၊ အောင်းဧလိယ ထိန်ထိန်နိမ်၊ အောင်းမောရှေကော့် ထိန်ထိန်နိမ် ဟောခ ဟနယ့်တောင့်ဟောင့်(ဝ်)အီ့အွန်"ဆီ ဝါကော်ဝိုက်။ တော်နယ်ကော့် မွန်းလ အောင်းမွန်းတောင်းမွန်း တန့်အဟောင်းကော်ဝါလ မဟုဝိုက်။ 34မေပေတရုဝါနောင်နယ့်ကော်လ ချီဖတောင်းလုန် ခနေမနော် အုဝိုက်ကော်ဝိုက်။ မနော်လေကော့် ချီဖလုန်အုဝိုက်ခနေမနော်ညော့ အိုက်နီးကိုးဟင်းကော်ဝိုက်။ 35မေနယ့်လော့် ဆီမေချီဖ "မွန်းန ပေးလုစိုင်းကော။ မွန်းန လအောင်အောင်းကောလိတ်ဝိုက်။ ခွမ်းမွန်းထောင်(မ်)ဟင်း"ဆီ ဆိန်ဆိန်နိမ် အောက်မားကော်ဝိုက်။ 36ဆိန်ဟောန့်အောက်ရောင့်(ဝ်)လော့် ပေတရု၊ ယောဟန်တောင်း ယာကုပ်လ အောင်းစောင့်ယေရှုပါးနိမ်နဲဟော် နယ့်ဟောန်ဟောဝိုက်။ မနော်လေကော့် အကြောင်းမနော်ဟောန်လေ အောင်းဖောကော့် မလောင်(ဝ်)ဆီ ရိန်းစမ့်စမ့်အင် အူဟင်းကော်ဝိုက်။ 37နောက်လောင်ဝမ်းနိမ်လော့် မွန်းစောင့်တောင်းတပဲ့မွန်းဆမ်ကော့်လ ဆီမေခနေနွဲ လုန်းမားဆီ ခေါက်(ပ်)အောင်းဖွန်ကွန်းကော်ဝိုက်။ 38ခနောဝ်ဖွန်ကွန်းဟောန့်လ ကွန်းကော်နိမ်လ "စောင့်၊ အောင်းလုစိုင်းကောခ ဟပေါအူနီး ဟေဟောင့်(ဝ်)အိ။ မွန်းန ပေးလုစိုင်းကော်နိမ်ဟောခအော။ 39အောင်းမွန်း ဖီမနီးပူးညော့ တွန်ဆီဟယ်ဆီ စေဝိုက်။ တောင်းတိုးတိုးဆောန်ဆီ ဆီမေပါတ်ကော့် ပန့်ပိုလေ စန်အောက်မားစောင့်။ ဖီမနီးဟောန့်လ အောင်းစမွန်း ဟပေါမွယ် ဟပေါစေဟေရောင့်(ဝ်)မှ အစောင်အောက်စောင့်။ 40ကောလ အောင်းတပဲ့မောစောင့်လေ တောင်းပန်ဆီ ဟဟော့်ဝေကော့် အောင်းဖီမနီးဟိုက် မနော်မဟော့်အောက်ပဲ့"ဆီ ဝါကော်ဝိုက်။ 41မွန်းစောင့်ကော့် အောင်းတပဲ့မွန်းစောင့်လေ "မဆူလေန အောင်းယွန်(မ်)လေမရောင်းဟင်း ကောလ တောင်းမဆူတောင်း ခလောပွန့်ဟူဟူ အူဆီ အောင်းစမဆူ တနယ့်တည်းခံနောင်နူး"ဆီ ဝါကော်ဝိုက်။ နောင်နယ့်ရောင်(ဝ့်) မွန်းစောင့်ကော့် "အောင်းလုစိုင်းမော ဟောင့်စူးမားရာကော"ဆီ ဝါကော်ဝိုက်။ 42မေဟောင့်မားအောင်းလအောင်ဟောန့်န ဖီမနီးလ ပူးအောင်းမွန်းဆီ တောင်းတိုးတိုး ဆောန်ဟောဝိုက်။ မွန်းစောင့်ကော့် အောင်းဖီမနီးဟောန့် ဟအောက်ကော်လော့် ရပ်ကော်ဝိုက်။ မွန်းစောင့်ကော့် အောင်းကော့်စိုင်းဟောန့် ရားဟောင့်(ဝ်)ဆီ အပ်ပေါက်အောင်းပေါ် ကော့်စိုင်းဟောန့်ကော်ဝိုက်။ 43ကွန်းတောင်းလုန်န နယ့်ဟောန်အစွမ်းစောင့်ယေရှုကော်လော့် အမ်းဟင်းကော်ဝိုက်။ အောင်းစောင့်ယေရှုဟေလေ မေကွန်းတောင်းလုန်အမ်းဟင်းနာ့ မွန်းစောင့်ကော့် အောင်းတပဲ့မွန်းလေ 44"အောင်းကောဝါပြား အောင်းမဆူလေန နီးနီးငမ်းငမ်း ထောင်(မ်)ဟင်း။ အောင်းလူ့သားတော် မနော်တအပ် ခနောဝ်မေးကွန်းမနီးကော့်"ဆီ ဝါကော်ဝိုက်။ 45တော်နယ်ကော့် တပဲ့မွန်းစောင့်လေန အောင်းမွန်းစောင့်ခဝါနောင်နူးဝါလ မဟုဟင်းဝိုက်။ အဓိပ္ပာယ်လေတောင်းလုန် လောက်ဆဉ်ဝိုက်ညော့ မနော်မဟုထောင်(မ်)ဆီ ခထန်(မ်)မေကော့် မနော်နီးကိုးဟင်းဝိုက်။ 46အချီန်စောင်နိန်ဟူကော်လော့် သာဝကမွန်းစောင့်လေကော့် ခနောဝ်မနော် ဖောအောင်းချဉ်းရောင်(ဝ်)ဝါလ ထိန်တော်ဟင်းကော်ဝိုက်။ 47အောင်းမနော် ထိန်တော်ဟင်းလ မွန်းစောင့်ဟုဝိုက်။ ကောပ်နယ့်ညော့ အောင်းလအောင်ကော်နိမ် ရာဟဉ်းမွန်းစောင့် ဟမားစိန်ဝိုက်ကော်ဝိုက်။ 48မေနယ်လော့် မွန်းစောင့်ကော့် အောင်းတပဲ့လေ "ကောပ့်အောင်းကောတောင်း မဆူန အောင်းလအောင်အင်ဟိုက်ကော်နိမ် ဟောင်ပေါဟောက် နောင်မဆူဟောက်အောင်းကောကျဉ်းနော့်။ ဟောင်ပေါဟောက် အောင်းကောကော့် နောင်မဆူဟောက် ကွန်းစောင့်ပွယ်မားအောင်းကောကျဉ်းနော့်။ ခနောဝ်မဆူ အောင်းစောင့်ကောင်(ဝ်)တောင်းကောင်(ဝ်) ကွန်းအောင်းစန်နှိမ်လ တပေးကွန်းအောင်းချဉ်းမြတ် "ဆီ ဝါကော်ဝိုက်။ 49နောက်လောင်နော့် ယောဟန်ကော့် "စောင့်ယေရှု အောင်းနာမယ်မောစောင့်တောင်းဆွန်းဆီ အောင်းမဖီနီး ကွန်းစောင့်ဟော့်အောက် ကွန်းကော်နိမ် ဟောခေါက်(ပ်)မားစောင့်"ဆီ ဝါကော်ဝိုက်။ မွန်းန ခနောဝ်မွတ်ဟောမစော်ညော့ အောင်းမွန်း ဟောဆီးမားအွန်"ဆီ ဝါကော်ဝိုက်။ 50တော်နယ်ကော့် မွန်းစောင့်ကော့် "အောင်းမွန်းပီကွာဆီးဟင်း အောင်းမဆူပေါမခါဖစ် ကွန်းထောက်ခမ်အောင်းမဆူကျဉ်းနော့်"ဆီ ဝါကော်ဝိုက်။ 51မွန်းစောင့်လ ဟပေါနယ့်ခွန့် ရာနိဗ္ဗာန် မဟူကော့်ညော့ စောင့်ယေရှုလ တကွာမှိန်းဂျေရုဆလင်ဆီ ဆုံးဖြတ်ကော်ဝိုက်။ 52နောက်လောင်နော့် မွန်းစောင့်ကော့် အောင်းတပဲ့မောင်းဖောင် ရာမန့်ရှမာရိလ ဟကွာထခနာ့ဆီ အောင်းစမွန်းစောင့် ဟကွာမဲထကော်ဝိုက်။ 53တော်နယ်ကော့် မွန်းစောင့်န ကွာမန့်ဂျေရုဆလင်ညော့ ကွန်းမန့်ရှမာရိလေန အောင်းစမွန်းစောင့် မဟမားဟင်းဝိုက်။ 54မေနယ့်လော့် ယာကုပ်တောင်းယောဟန်လ ဟောန်အောင်းအဖြစ်ပျက်ဟောန့်ကော်လော့် "စောင့်၊ ဆီမေစောင့်ဖလား ရောန်းဆီ ဆီးမေနေဖ ဖိုင်းလေတော်ပေါတိုမား ဟောခ တနယ့်ဟေကော်လေး အောင်းမနော်လေ ဟောခ တနယ့်ဆောက်(န်)ဖိုင်းကော်လေး "ဆီ ထန်(မ်)ဟင်းကော်ဝိုက်။ 55တော်နယ်ကော့် မွန်းစောင့်လ လှည့်ပေါက်ဆီ အောင်းမနော် အကြောင်းအောင်းဖစ် ဆုံးမကော်ဝိုက်။ 56မနော်လေကော့် အောက်ကွာမန့်တန်းတီကော်ဝိုက်။ 57မွန်းစောင့်တောင်းတပဲ့မွန်းလေ ရာခွန်တန်းကွာဟောန့် ကွန်းကော်နိမ်လ အောင်မွန်းစောင့် "ကောခလ ရာမောစောင့်ကွာလ တစောင်း(မ်)"ဆီ ဝါကော်ဝိုက်။ 58မွန်းစောင့်န "မာနဉ်းလေန ခွန်(မ်)မွန်းရောင်း၊ နုတ်လေကော့် ဟမ်းမွန်းရောင်း တော်နယ်ကော့် လူ့သားတော်လ ဟုန်းမရောင်း"ဆီ ဝါကော်ဝိုက်။ 59မွန်းစောင့်လ အောင်းကွန်းကော်နိမ် တောင်းမွန်းတောင်း စောင်း(မ်)မားဆီ ဟောင့်ကော်လော့် "စောင့်၊ အောင့်အောင့်အင်ထအိ။ အောင်းပေါ်ဟောခ ကွာဆီခဖောင်အောင်းတိုင်းအွန်"ဆီ ဝါပေါက်ကော်ဝိုက်။ 60မေနယ့်လော့် မွန်းစောင့်န "အောင်းကွန်းတိုးသိုင်းဟိုက် ကွန်းစောဝ်သိုင်းလေ တဖောင်ကော်ကျဉ်း။ မောန အကြောင်းသာသနာတော်စောင့်ဖလားနဲဟော် တနယ့်ဟောဟော"ဆီ ဝါကော်ဝိုက်။ 61အောင်းကျန်ကွန်းကော်နိမ်ကော့် "စောင့်၊ ကောခလ တစောင်း(မ်)ခလောင်မောစောင့်။ တော်နယ်ကော့် အောင့်အောင့်အင် ပေါက်ဟုန်းကော်ဆီ တောင်းစောင့်ဟုန်းဟောလေတောင်း ဟနယ့်နှုတ်ဆက်အီ့အွန်"ဆီ ဝါကော်ဝိုက်။ 62မွန်းစောင့်ကော့် "ထိုင်(ယ်)ကမ်းဆီ ကွန်းစမ်လှည့်ပေါက်ပါ့ခလောင်လ တောင်းသာသနာတော်စောင့်ဖလားတောင်း မတန်"ဆီ ဝါကော်ဝိုက်။
നിലവിൽ തിരഞ്ഞെടുത്തിരിക്കുന്നു:
Luke 9: ttpv-rv
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
This translation of the TaiLaing Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
