Luke 10
10
1နောင်နယ့်ရောင့်(ဝ်) မွန်းစောင့်လ တပဲ့အောင်းကျန်စေဆစ်(ပ်)ကော့် လိတ်ရောင့်(ဝ်) ဆောင်(န်)ကော့်စီဟတွဲဆီ အောင်းမွန်းစောင့်တကြွကော် တော်မန့်တောင်းလုန်၊ မှိန်းတောင်းလုန်ပွန့် ဟာကွာထခနာ့ကော်ဝိုက်။ 2မွန်းစောင့်လ အောင်းတပဲ့မွန်းလေ "ခနောဝ်လောက်နား မတ်မိုက်၊ မတ်တောက်လေ မကျေးလေမစော်ရောင်း။ တော်နယ် ကွန်းတပတ်၊ ကွန်းတကျေ(ပ်)မရောင်း။ ကောပ့်နယ့်ညော့ အောင်းကွန်းပတ်၊ ကွန်းကျေ(ပ်)လေ နမ်နမ်ဟပွယ်မားဆီ အောင်းစောင့်တုန်နား ကွာဝါကော်။ 3အစောင် ကွာကော်နူ။ တော်နယ့် ကောပွယ်အောင်းမဆူလ ခနောဝ်ဖွန်မာနဉ်းဟောန့် ပေးနောင်ပွယ်ပယ်ရာ့ကော်ညော့။ 4မဆူလေ ငွန်း၊ ထုန်(ဝ်)၊ ချက်(ပ်)တဉ်း ပီအောင်း(ဝ်)ဟင်းကော် ရာခွန်တန်းရပ်ဆီ အောင်းကွန်းလေနှုတ်ဆက်ဆီ အချီန်ပီဖြုန်းဟင်း။ 5မဆူဟောင်ပေါခေါင့်(ဝ်)ဟုန်းဟုန်းနိမ်လော့် 'ရာဟုန်းဟိုင့် ဟငြိမ်းချမ်းအီ့အွန်'ဆီ ဆုရောန်းဟောင့်(ဝ်)ကော်။ 6ကွန်းစောင့်အူရာဟုန်းဟောန့်လေန ကွန်းခအူနီးနီးငမ်းငမ်းလ မေတ္တာအောင်းမောဟောင့်(ဝ်) မနော်တနယ့်ခံစား။ တော်နယ့်ကော့် မနော်လ နီးနီးငမ်းငမ်းဟောင်ပေါခအူလော့် မေတ္တာအောင်းမောဟောင့်(ဝ်)လေ တထီန်ပေါက်မားရာမော။ 7မဆူလေန အူပါဟုန်းဟောန့်ဆီ အောင်းစောင့်ဟုန်းဟောန့်လိမ့်လ ကျဉ်းဟင်းကော်။ ဟေဟောင်းဝါလ ကွန်းစောင့်ဟေလောင်လ ကာအောင်းမွန်းဟေလောင်လေ တနယ့်နွိုက်ညော့။ ဟုန်းနိမ်ရောင့်(ဝ်)ဟုန်းနိမ် ပီကွာဟင်း။ 8တော်နယ်ကော့် အောင်းမဆူ ကွန်းရာမှိန်းလေ ဟောင်ပေါဟပ်ကော့် ကွာကော်။ အောင်းမနော်လိမ့်လ ကျဉ်းကော်။ 9အောင်းကွန်းမအူနီး ဟောင်ပေါရားဟောင့်(ဝ်)ရောင့်(ဝ်) "အချီန်သာသနာစောင့်ဖလားတထီန်ကောင့်(ဝ်)မားကော်ဝိုက်"ဆီ ဝါကော်။ 10တော်နယ်ကော့် ကွန်းရောင်းရာမှိန်းလေ အောင်းမဆူ ပေါမဟပ် ခနေခွန်တန်းအောက်ဆီ ဝါကော်နောင်နယ့်။ 11'ဟော အောင်းမဆူ ဖွန်အောင်းရောင်း ရာတဉ်းဟော ဆောန်ဝေဆီ ဆတိဟောင့်(ဝ်)ဝိုက်ကော်၊ သာသနာစောင့်ဖလားလ ရာဟိုက်တထီန်မားကော့်'ဆီ ဝါဝိုက်ကော်ဝိုက်။ 12အောင်းမဆူကောခဝါလ ဝမ်းစီရင်တလားန စားဆီမှိန်းဟာန့်မကား ကွန်းရောင်းရာမှိန်းသောဒုံနဲဟော်ဆာဆီ တဟာ့ဆတ်ဆာဟောဝိုက်။" 13"ကွန်းမှိန်းခေါရာဇိန်လေ မဆူနယ့်ခေါက်(ပ်)တောင်းဒုက္ခကော်၊ ကွန်းမှိန်းဗက်ဇဲဒလေကော့် နောင်နယ့်ကျဉ်းနော့်။ ဟေဟောင်းပေါဝါလော့် အောင်းမဆူဟေမားအောင်းထူးဆန်းလေ အစွမ်းလက္ခဏာလေန ရာမှိန်းတုရုတောင်း ရာမှိန်းဇိဒုန်ဟော် ဟောင်ပေါဟေမားလော့် ကွန်းမှိန်ဟောန့်လေန နောင်မေစောင့်ညော့ အောင်းဆေ့လုန်နွန်ဆီ ခနောဝ်ဖွန်တောင်နောင်ဆီ တနွိုက်နောင်တဟင်း။ 14တော်နယ်ကော့် အချီန်စီရင်တလား တုရုတောင်းမှိန်းဇိဒုန်န ဆာဆီမဆူမကား တဆတ်ဆာဝိုက်။ 15ကွန်းမှိန်းကပေရနောင်လေ မဆူလေန ရာနိဗ္ဗာန်ဟောန့် အောင်းမဆူ တချီးမြှင့်ဆီ ထန်ဟင်းလေး၊ မဆူလေန ကွန်းတနယ့်ကွာငလိုင်းလေ"ဆီ ဝါကော်ဝိုက်။ 16မွန်းစောင့်ကော့် အောင်းတပဲ့မွန်းလေ "ကွန်းထောင်(မ်)ခွမ်းမဆူလေကော့် နောင်ထောင်(မ်)ခွမ်းကောကျဉ်းနော့် ကွန်းလက်မခံအောင်းမဆူလေကော့် ကွန်းလက်မခံအောင်းကောကျဉ်းနော့် ကွန်းလက်မခံအောင်းကောကော့် နောင်လက်မခံ အောင်းစောင့်ပွယ်မားအောင်းကော အောင်းစောင့်ဖလားကျဉ်းနော့်ဝိုက်။ 17တပဲ့မွန်းစေဆစ်(ပ်)ကော့် ထီန်ပေါက်မားကော်လော့် မနော်လေန အိုက်စွုမ်းဟင်းဆီ "စောင့်၊ ဟောလေနာ့ အောင်းဖီမနီးလေ အောင်းနာမယ်မောစောင့်ဆွန်းဆီ ဟောဝါကော်လော့် မနော်လေ စောင်း(မ်)ဟေဟင်းစောင့်"ဆီ ဝါကော်ဝိုက်။ 18စောင့်ယေရှုကော့် အောင်းမနော် "ဆီမေခနေတောင့်ဖ နောင်ဖမက်ညော့ မာရ်နတ်ချားတိုမားလ ကောနယ့်ဟောန်မား။ 19ကောစောင့်လ အောင်းမဆူ ငူးမနီးလေ မိုင်းစလန်းလေ ယေ့(ပ်)ခွန်ဆီ ဟပေါနယ့်အောင်း(ဝ်)သိုင်းတောင်း အောင်းမာရ်နတ် အစွမ်းအောင်းပဲ့ ကောဟောင့်(ဝ်)ဝိုက်ရောင့်(ဝ်)ကော်။ 20တော်နယ်ကော့် မဆူလေန အောင်းဖီမနီးလေ ပဲ့မားအင်တောင်း ပီစွုမ်းဟင်း နာမယ်မဆူ ရာနိဗ္ဗာန်ဟောန့် အောင်းတင့်(မ်)ဝိုက် ဟောင်ပေါနယ့်ခမ်နဲဟော် စွုမ်းဟင်းဆီ ဝါကော်ဝိုက်။ 21မေနယ့်လော့် ခေါင်စောင့်ဖလားကော့် အောင်းမွန်းစောင့် ဟစွုမ်းကော်ညော့ မွန်းစောင့်ယေရှုကော့် "အောင်းကမ္ဘာလောကဟိုက်တောင်း ရာနိဗ္ဗာန်ဟောန့် အောင်းစောင့်ပိုင် စောင့်ဖလားခ။ စောင့်ဟိုင့်လ အကြောင်းအောင်းရောင်းရာနိဗ္ဗာန်ဟောန့်လေန ကွန်းပညာရောင်းလေ လောက်ဆိဉ်ဆီ အောင်းကွန်းပညာမရောင်းလေ တော်ပေါဟုထောင်(မ်) ပြားဟောင့်(ဝ်)ဝိုက်ညော့ အိုက်စွုမ်းစောင့်။ ပေးမားနောင်နယ့်ကော့် နောင်အလိုစောင့်ဖလားကျဉ်းနေ့ာ်စောင့်။ 22စောင့်ဖလားလ အောင်းစကော အောင်းရောင်းတောင်းလုန် ဟောင့်(ဝ်)ဝိုက်ရောင့်(ဝ်)ကော်။ လုစိုင်းန ဖောဝါလ စောင့်ဖလားပါးနိမ်နဲဟော် ဟုဟော။ စောင့်ဖလားန ဖောဝါလ လုစိုင်းတောင်း ကွန်းလုစိုင်းလိတ်ဝိုက်နဲဟော် အောင်းကျန်ဖောကော့် မဟု"ဆီ ဝါကော်ဝိုက်။ 23နောက်လောင်နော့် မွန်းစောင့်ယေရှုကော့် လှည့်ပေါက်ပါ့တပဲ့မွန်းဆီ "အစောင် အောင်းထိုင့်လေ မဆူနယ့်ဟောန်ကော်ညော့ အစော်နော့် မင်္ဂလာရောင်းကျဉ်းနော့်။ 24ကွန်းပညာရောင်းပရောဖက်လေတောင်း စောင့်ခွန်ဟော်ခမ်းလေကော့် အောင်းမဆူနယ့်ဟောန်မားလေ မနော်ခဟောန်ဟင်းဝိုက်။ တော်နယ်ကော့် မနော်လေန နောင်မဆူဟောန် မနယ့်ဟောန်၊ နောင်မဆူနယ့်ဟဉ်း မနယ့်ဟဉ်းဟင်း"ဆီ ဝါကော်ဝိုက်။ 25ဟာနိမ်လော့် ကွန်းကျမ်းစန်ကော်နိမ်လ အောင်းစမွန်းစောင့် လာထန်(မ်)ဆီ လုကော်ရောင့်(ဝ်) "စောင့်၊ အဆတ်နိစ္စထာဝရ ဟပေါနွိုက် တနယ့်ဟေနောင်နူး"ဆီ ထန်(မ်)ကော်ဝိုက်။ 26မွန်းစောင့်ယေရှုလ "ရာခနောဝ်လိကျမ်းန အဟောင်းလေတင့်(မ်)ဝိုက် မောအောင်ထိုင့်လေ ဟုထောင်(မ်)နောင်နူး"ဆီ ထန်(မ်)ကော်ဝိုက်။ 27ကွန်းဟောန့်လ "ရာကျမ်းဟောန့် အောင်းစောင့်ဖလား မဆူ တိုးပါစောဝ်ပါနှလုံးပါ ဝိုင်(ယ်)ဟင်းကော်။ အောင်းစကွန်းဟဉ်း(မ်)ဟုန်းမောလေကော့် နောင်ဟောက်အောင်းစောင့်ကောင်(ဝ်)ဆီ တနယ့်ဟောက်"ဆီ ဝါကော်ဝိုက်။ 28မွန်းစောင့်န အောင်းစမွန်း "အဖြေမောလ စော်"ဆီ ဝါကော်ဝိုက်။ "နောင်နယ့်ဆီ မောပေါဟေ" အဆတ်အောင်းမေနော်ကော့်မသိုင်းလ မောတနွိုက်"ဆီ ဝါပေါက်ကော်ဝိုက်။ 29တော်နယ်ကော့် ကွန်းကျမ်းစမ်န အောင်းစောင့်ကောင်(ဝ်)တောင်းကောင်(ဝ်) ကွန်းနီးဆီ ခပြားညော့ အောင်းစယေရှု "ကွန်းဟဉ်း(မ်)ဟုန်းကောန ဖော"ဆီ ထန်(မ်)ကော်ဝိုက်။ မွန်းလ အကြောင်းအောင်းမွန်းတန့် မွန်းခဟုဆီ ထန်(မ်)ကော်ဝိုက်။ 30မေနယ့်လော့် မွန်းစောင့်န "ကွန်းကော်နိမ်လ ဆီမေမှိန်းဂျေရုဆလင် ရာခွန်တန်းကွာမှိန်းယေရိခေါဟောန့် တောင်းဓါးပြလေတောင်းခေါက်(ပ်)ဆီ ပစ္စည်းအောင်းပါမား ရာမွန်းလေ အောင်းဟဉ်(မ်)နယ့်ခမ်ကော်ဝိုက်။ ဓါးပြလေကော့် အောင်းကွန်းဟောန့် တော်လာကောင့်(ဝ်)သိုင်းပွန့် မောင်း(န်)ဟင်းရောင့်(ဝ်) ဝိုင့်ဝိုက်ဟင်းကော်ဝိုက်။ 31ကမ်နီးဆီ ပုရောဟိတ်ကော်နိမ်န နောင်နယ့်ဆီပေးရောင့်(ဝ်)ကော်လော့် နောင်ခွန်တန်းဟောန့်အတိုင်း မားဟင်းဝိုက်။ ဟောန်အောင်းကွန်းလုမ့်ဟောန့်ကော်လော့် ကွာပါ့ခွန်တန်းပါ့နိမ်ကော်ဝိုက်။ 32နောက်လောင်နော့် ကွန်းပေါင့်(ဝ်)ကျောင်း အမျိုးလေဝိကော်နိမ်ကော့် ထိန်မားရာဟောန့်ဟွန်းကော်ဝိုက်။ အောင်းကွန်းလုမ့်ဝိုက် မနော်ဟောန်ဟင်းမေကော့် ကွာပါ့ခွန်တန်းပါ့နိမ်ဟင်းကော်ဝိုက်။ 33တော်နယ်ကော့် ကော့်စိုင်းရှမာရိကော်နိမ်လ အောက်ခရီးမားလော့် ထီန်မားဟွန်းရာဟောန့်ကော်ဝိုက်။ မွန်းလ ဟောန်အောင်းကွန်းလုမ့်ဝိုက်ဆီ စောဝ်မနီးပေးကော်ဝိုက်။ 34ကောပ်နယ့်ညော့ မွန်းန ကွာစူးရာကွန်းဟောန့်ကော်ဝိုက်။ အောင်းကွန်းမအူနီးဟိုက် တောင်းသံလွင်ဆီလေ စပျစ်ဝိုင်လေတောင်း ဆွတ်ဝေဆီ တောင်းဖာ့တောင်း မောက်ဟောင့်(ဝ်)ကော်ဝိုက်။ ပေါရောင့်(ဝ်) အောင်းကွန်းဟောန့် တန်ခွန့်မဆီ ဟောင့်ကော်ရာဟုန်းချိုက်ကော်ဝိုက်။ ထီန်ရာဟုန်းချိုက်ကော်လော့် အောင်းကွန်းဟိုက် နီးနီးငမ်းငမ်းအင် ဟေဟောင့်(ဝ်)ကော်ဝိုက်။ 35နောက်လောင်ဝမ်းနိမ် ဖလိန်းမားကော်လော့် မွန်းလ အောင်းစောင့်ပိုင်ဟုန်းချိုက်ဟိုက် ငွန်းဆောင်(န်)ဖတ် ဟောင့်(ဝ်)ဆီ "အောင်းကွန်းမအူနီးဟိုက် တွဲနွေ့အီ့အွန်။ ရားအောင်းမွန်းဆီ ငွန်းလေဟောင်ပေါလိုကော့် ကောဟောင်ပေါပေါက်မား ကောသမားဟောင့်(ဝ်)"ဆီ ဝါဝိုက်ကော်ဝိုက်။ 36နောက်လောင်နော့် စောင့်ယေရှုလ "ခနောဝ်ကွန်းဟောန့်ဆမ်ကော့်လ ကွန်းဟဉ်းဟုန်းအစစ် ကွန်းဓါးပြလေမောန်းလ ဖောတပေး"ဆီ ထန်(မ်)ကော်ဝိုက်။ 37ကွန်းကျမ်းစမ်ဟောန့်ကော့် "ခနေ ကွန်းမအူနီး ကွန်းဟေဟောင့်(ဝ်)စောင့်"ဆီ ဝါပေါက်ကော်ဝိုက်။ စောင့်ယေရှုလ "မဆူလေကော့် နောင်နယ့်ဆီ စောင်း(မ်)ဟေဟင်း "ဆီ ဝါကော်ဝိုက်။ 38စောင့်ယေရှုတောင်းတပဲ့မွန်းလေ တကြားဆက်ဆီကွာခရီးလ ထီန်ကော်ရာမန့်မန့်နိမ်ဝိုက်။ ရာမန့်ဟောန့်န မာသဝါလ ကော့်ယဉ်းကော်နိမ်လ အောင်းစောင့်ယေရှုတောင်းအောင်းတပဲ့မွန်းလေ ပန်းကော်ရာဟုန်းမွန်းကော်ဝိုက်။ 39ရာကော့်ယဉ်းဟောန့်လ မာရိဝါလ နောင့်ဆောင်(ဝ်)ကော်နိမ် ရောင်းဝိုက်။ မာရိလ ရာခတောင့်တဉ်းစောင့်ယေရှုနှောင်ဆီ ထောင်(မ်)တလားကော်ဝိုက်။ 40မာသလ စဟပ်အောင်းစောင့်ချိုက်လေတောင်း လောင်နမ်ဆီအူဝိုက်။ နောက်လောင်နော့် မွန်းလ ကောင်(ဝ်)စူးရာစောင့်ယေရှုဆီ "နောင့်ဆောင်(ဝ်)ကောလ အောင်းလောင်ကောလေ မစွယ်ဟေညော့ ကောကော်နိမ်အင်ဟော် နယ့်ဟေ၊ အောင်းနောင့်ဆောင်(ဝ်)ကော မောစောင့် အပြစ်မဟောန်လေး၊ အောင်းစကော မွန်းတော်ပေါမားစွယ်ဟေ လောင်(ဝ်)ဟောင့်(ဝ်)အွန်"ဆီ ဝါကော်ဝိုက်။ 41မွန်းစောင့်လ "မာသ မောလ အောင်းအမှုကိစ္စဟိုင့်လေတောင်း လောင်နမ်မေကော့် 42အစော်နာ့ အောင်းလိုတိုးနိမ်ရောင်းအွန်။ မာရိန အောင်းချဉ်းနီး လိတ်ရောင့်(ဝ်)ကော်။ ကောပ်နယ့်ညော့ အောင်းအနယ့်လ ဆီမေကော့်ယဉ်းဟိုင့် ဖယ်ဝေဆီ မနွိုက်ကော့်"ဆီ ဝါပေါက်ကော်ဝိုက်။
നിലവിൽ തിരഞ്ഞെടുത്തിരിക്കുന്നു:
Luke 10: ttpv-rv
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
This translation of the TaiLaing Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
