लुका 19
19
तिरो उठालाहार जखायस
1येसु यरिहो सहर पोसिकुन उछिकमाटे जइतिन् रहत। 2उछिका जखायस नाउ भइल एक जेना धनि मानुस रहइ। उसे तिरो उठालाहारसब मद्धेयँ बड्क हाकिम रहइ। 3जखायसेइ येसु कोनो हखत कइकुन चाँइके खोज्ते रहइ, तर भिडेइ कर्तेखनाइ उहाइ देखिके नइजेसक्ल किकेकने उसे पुड्को रहइ। 4उहइगुनेइ येसुके चाँइके लागि उसे दुघ्रतिन आघु जइल र पायड नजिकइ एक्टा नेभाराक रुखयँ चढ्ल। किकेकने येसु उहइ पायड भइकुन् जाइके लाग्लरहत। 5जब येसु उछिका पुगिकेभइल, उप्रपट्टि चाहिकुन जखायसके कहिकेभइल, “ए जखायस छिट्टो हेठ झरिकुन आउक्! आजु मोइ तेर घरयँ बास बोसिके पोर्ल बाटइ।”
6हसे जखायस तुरुन्तइ रुखकमाटे झरिकुन खुसि भइतिन् येसुके मान कर्ल। 7इसे देखिकुन उछिका भइल सभइ मानुसेइ “इसे मानुस त पापिक घरयँ बास बोसिके जाइके लाग्ल!” कहतिन् गनगन करिके लाग्ल।
8तर जखायसेइ प्रभुक आघु ठोडेइकुन कहल, “प्रभु, सुनिकेहबखाइ, मेरासे भइल धन-सम्पतिक आधा भाग गरिबसब्के बाटिदेतम र कख्राहुके ठगिकुन केहाउ लेल बाटम् कने मोइ उख्राके चार गुना फिर्ता करिदेतम।”
9हसे येसुइ उख्राके कहिकेभइल, “आजु इसे घरक मानुससबेइ मुक्ति पाउल बाटत, किकेकने जखायस पुनु अब्राहामकइ सन्तान हखइ। 10किकेकने मानुसक छावा परमेसोरसे टाढो भइल मानुससब्के खोजिके र बाचाइके अइल हखत।”
सोनक सिक्काक काथा
(मति २५:१४-३०)
11मानुससबेइ इसे कुरा सुन्तिनखना येसुइ उसब्के एक्टा काथा कहिकेभइल। किकेकने ओनेन् यरुसलेमक नजिकइ आइपुग्ल रहत हसे मानुससबेइ परमेसोरक राज्जे आबे चाँडइ नइ अइतिन् बाटइ कइकुन सम्झल रहत, 12“एक जेना खानदानि मानुस आफ्न देसक राजा बनिकुन फर्किकुन अइतम् कइकुन टाढो देसयँ जइल। 13जइलारकते आघु उहाइ आफ्न नोकरसबमद्धेय दस जेना नोकरसब्के बोलाइकुन् एक्टा-एक्टा सोनक सिक्का#१९:१३सोनक सिक्का उसे बेलाके सोनक एक्टा सिक्काक मोल १२० दिनक कमाइ मान्तेरहइ दिकुन कहल, ‘जख्निसमन मोइ फर्किकुन नाआम् इहइ पइसाइ बेपार करुक्।’ 14तर आफ्न देसक मानुसेइ चाहिँ उख्राके मन नइजे परातेरत, र उसबेइ उक्र पाछु-पाछु यस्के कइकुन समचार पुरेलार मानुस पाठाल, ‘हाम्राके इसे मानुस राजा नाचाहोइ।’
15“तर उसे मानुस राजा भइकुन् नइ फर्कल। उपाछु आफ्नि पइसा देल नोकरसब्के बोलाइकुन्, बेपार करिकुन् कत्का नाफा कर्ल कइकुन पुछ्ल। 16पइलाक नोकरेइ आइकुन यस्के कहल, ‘मालिक, तोहे देल एक्टा सोनक सिक्काइ मोइ दसोटा सोनक सिक्का कामाइकुन आन्ल बाटम्।’ 17राजाइ उख्राके कहल, ‘स्याबास तोइ राम्र नोकर रलसाइ! तोइ नान्हि कुरायँ बिस्वासिलो भइतेखनाइ, मोइ तेह्राके दस सहरयँ सासन कर्लाहार अधिकार देतम।’ 18दोस्रो नोकरेइ आइकुन यस्के कहल, ‘मालिक, तोहे देइकेभइल एक्टा सोनक सिक्काइ मोइ अरु पाँचोटा सोनक सिक्का कामाइकुन आन्ल बाटम्।’ 19राजाइ उख्राके कहल, ‘तोइ पुनु पाँच सहरक अधिकार पाउतस।’ 20अर्क नोकरेइ आइकुन कहल, ‘मालिक, चाओ, तेउह्र सोनक सिक्का इछिका बाटइ, इसे मोइ रुमालयँ पोको पारिकुन लोकाल रहम। 21मेराके तेउरासइ डर लाग्ल, किकेकने तोहे कठोर मानुस बाटउ। तोहे त आफुइ लगानि नइजेकर्ल ठाउकमाटे पुनु नाफा खोज्ताउ र आफ्नि जिति नइजेबोइकेभइल उहइ बालि काटिकुन लेताहाउ।’ 22उपाछु राजाइ नोकरके कहल, ‘ए बद्मास नोकर, तेरइ मुहुसे निस्कल बोलिइ कर्ते मोइ तेर न्याय कर्तम। मोइ कठोर मानुस बाटम्, मोइ लगानि नइजेकर्ल ठाउकमाटे नाफा खोज्लाहार र नइजेबोउल बालि काटिकुन लेलाहार कइकुन तेह्राके थाहाइ रलाहाइ। 23ओसेकने तोइ मेर पइसा किति करिके ब्याजयँ नइजेलागाल त? ब्याजयँ लागाइदेल भइने मोइ फर्किकुन अइते ब्याज सहित पाउलारम्।’ 24राजाइ उछिका ठोडेलके कहल, ‘उख्रासे उसे सोनक सिक्का लेइकुन दस सिक्का भइलाहारके दिक।’ 25हसे उसबेइ कहल, ‘मालिक, पइलासे नइ उख्रासे त दसोटा सोनक सिक्का बाटइ नि!’ 26राजाइ कहल, ‘मोइ तेउह्राके कहतम्, जख्रासे बाटइ उख्राके अझइ बढि देताइर, तर जख्रासे नइजेबाटइ उख्रासे भइल चुत्कि पुनु आछ्राइत। 27आबे मेराके राजा भइल नइजेचाहालार मेर सत्तुरसब्के इछिका आनिकुन उसब्के मेरइ आघु मारुक’!”
यरुसलेमयँ येसु जाइकेभइल
(मति २१:१-११; मर्कुस ११:१-११; युहन्ना १२:१२-१९)
28येसुइ इसे काथा कहिकेभइलपाछु उनेहेन चेलासब्क आघु-आघु यरुसलेमपट्टि जाइकेभइल। 29हसे येसु बेथफागे र बेथानिया गाउक नजिकइ जइतुन कलाहार डाँडायँ आइपुगिके भइलपाछु, ओनेनेइ आफ्न चेलासब मद्धेयँ दुइ जेनाके यस्न कइकुन पाठाइकेभइल, 30“अगाडिक गाउयँ जाओ, र भितर पस्तेखनाइ तोहेसब बाधिराख्ल गधाक एक्टा बछेडा भेट्ताहाउ, जख्रउप्र यखनसमन कोलोउ मानुस नइजे चढ्लातइ। बछेडाके फुचाइकुन इछिका आनउ। 31यदि अरुइ ‘किके बछेडाके फुचाल?’ कइकुन पुछ्ल कने, ‘प्रभुके इक्र खाँच बाटइ’ कउक।”
32येसुइ कहिकेभइल जस्नइ उसे दुइ जेना चेला गाउयँ जइल र गधाक बछेडा बाँध्ल भेट्ल। 33हसे बछेडाके फुचाइके लाग्तेखना बछेडाक मालिकेइ उसब्के पुछ्ल, “तोहेसब इसे बछेडा किके फुचाल हँ?”
34दुइ जेना चेलाइ कहल, “प्रभुके इक्र खाँच बाटइ।” 35उसबेइ गधाक बछेडाके येसुलघि आन्ल, हसे आफ्न बाहार लागालाहार लुगा बछेडा उप्र ओछ्याइकुन् येसुके बछेडाक उप्र राख्ल। 36येसु आघु बढ्तिन् जइतेखना मानुससबेइ पुनु आफ्न लुगासब पइडायँ ओछ्यल।
37येसु यरुसलेमक नजिकइ जइतुन डाँडा ओह्रालोयँ आइपुगिकेभइल। येसुइ करिकेभइल सभइ सक्तिसालि काम सम्झिकुन, चेलासब्क बड्क भिड रामातिन चर्क सोरेइ परमेसोरके प्रसम्सा करिके थाल्ल। 38“प्रभु परमेसोरक नाउयँ आइकेभइलाहार राजाइ आसिक पाउस! सोर्गयँ सान्ति र परमेसोरक महिमा भउस्!”#भज ११८:२५-२६
39तर कोलोउ-कोलोउ फरिसिसबेइ मानुसक भिड्कमाटे येसुके कहल, “हे गुरुजिउ, तेउह्र चेलासब्के चुपलाइके कहउ।”
40हसे येसुइ जबाफ देइकेभइल, “मोइ तेउह्रासब्के कहतम्, यदि इसब चुपलाइकुन बस्नेपार पाथरसब नइ बोराइत।”
येसु यरुसलेमक लागि रउतात्
41जब येसु यरुसलेम सहरक नजिकइ आइपुगिकेभइल, तब उसे सहरके देखिकुन ओनेन् रोइकेभइल र यस्न कहिकेभइल, 42“सान्ति कोनो कुराइ आनित कइकुन तोइ आजु जान्ल भइने भइलारइ! तर आबे तेर आखिकमाटे इसे लोकाइसक्ल बाटइ। 43आबे यस्न दिन आइत, जब तेर सत्रुसबेइ तेर चारिओर बेह्रा लागाइदेइत्, तेह्राके चारइपट्टिकमाटे घेरिकुन थुनित्। 44तोइ र तेर भितर बोस्लाहार सन्तानके मासाइत। उसबेइ तेर चारइपट्टिक पर्खालकमाटे एक्टा पाथर उप्र अर्क पाथर पुनु बाँकि नाछाडत्, किकेकने परमेसोरेइ तेह्राके बाचाइके अइल बेलाके नइ तोइ चिनिके निजसक्लसाइ।”
येसु मन्दिरभितर
(मति २१:१२-१७; मर्कुस ११:१५-१९; युहन्ना २:१३-२२)
45उपाछु येसु मन्दिर भितर पोसिकेभइल, हसे ओनेनेइ मन्दिरयँ बेपार कर्लारके यस्न कहतिन् निस्काइकेभइल, 46र उसब्के कहिकेभइल, “धर्मक कितापयँ यस्के लेख्ल बाटइ, ‘मेर घर पार्थानाक घर भइकेपरित’ तर तोहेसब त इख्राके डाकुसब्क अड्डा बानाल बाटउ।”#यसइ ५६:७; यर्मि ७:११
47हसे येसुइ दिन-दिनइ मन्दिरयँ सिछ्या देतेरहत। बड्क पुजेहेरि, धर्मगुरु र मानुससब्क अरु अगुवासबेइ मिलिकुन ओनेन्के मारिके खोज्तेरहत। 48तर उसबेइ येसुके मार्लाहार केहाउ उपाय भेटिके नइजेसक्ल, किकेकने सभइ मानुससबेइ ओनेन्क सिछ्या एक्दमइ चासो दिकुन सुनिके मन परातेरत।
നിലവിൽ തിരഞ്ഞെടുത്തിരിക്കുന്നു:
लुका 19: DRY
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2024 (Active), Mother Tongue Translators Society and Wycliffe Bible Translators, Inc. All rights reserved.
