लुका 18
18
बिधुइनि र न्यायधिसक काथा
1सद्देहुन पार्थाना करिरहुस र निरास झुनभउस कइकुन येसुइ चेलाके बुझाइके एक्टा काथा कहिकेभइल, 2“एक्टा सहरयँ परमेसोरसइ नइजेडारालार र मानुसके पुनु मान नइजेकर्लार एक जेना न्यायाधिस रहइ। 3हसे उसे सहरयँ एक्टि बिधुइनि पुनु बस्तेरहि। उसे घरिघरि न्यायधिसकलघि जाइकुन कतेरहि, ‘मेर र मेरासइ झग्रा कर्लारक माझयँ न्याय करिदेओ!’ 4धेरइ पल्टसमन बिधुइनिक कुरा उहाइ नइजेमान्ल, तर पाछेसे आफ्न मन-मनइ यस्न सोच्ल, ‘मोइ परमेसोरक डर नामानम् र कोलोउ मानुसके मान पुनु नाकरम्। 5तर इसे बिधुइनिक न्याय नाकर्नेपार त, घरिघरि आइकुन मेराके दुख देइत बुरु उक्र कुराके न्याय करिदेतम!’”
6हसे प्रभुइ कलखनाइ, “सुनउ, उसे अधर्मि न्यायाधिसेइ किति कहित। 7ओसिनकरिकुन नइ परमेसोरेइ छान्ल ओनेन्क सभइ मानुसेइ दिन-रात पार्थाना करित् कने, ओनेन् आफ्नेन्क मानुसके न्याय नाकरत् र? किति ओनेनेइ तिनेन्क लागि साघाइके ढिलो कर्ताहात् र? 8मोइ तेउह्राके कहतम्, ओनेनेइ तिनेन्क चाँडइ नइ न्याय करिदेताहात्। तर मानुसक छावा पिर्थिबियँ अइते किति उहाइ बिस्वास कर्लाहार भेटाइत र?”
फरिसि र तिरो उठालारक काथा
9हसे येसुइ, आफुके मत्रइ धर्माति हखम कलाहार र अरु मानुसके हेला कर्लारके इसे काथा सुनालखनाइ, 10“मन्दिरयँ पार्थाना करिके दुइ जेना मानुस जइल, एक जेना फरिसि र अर्क चाहिँ तिरो उठालारइ। 11उसे फरिसि अस्करइ ठोडेइकुन मनमनइ यस्के पार्थाना कर्ल, ‘हे परमेसोर, मोइ तेउह्राके धन्यबाद चाढातम् किकेकने मोइ अरु मानुसजस्न ठग्लार, बइमानि र बेबिचार निजकर्लबाटम। इसे तिरो उठालाहार मानुसजस्न पुनु मोइ नइजे। 12मोइ हप्ताक दुइ पल्ट उपास बस्तम हसे मोइ पाउल र कामाल सभइ कुराक दस भागक एक भाग तेउह्राके देतम।’ 13तर टाढोहिँ ठोडेइकुन तिरो उठालाहार मानुसेइ चाहिँ सोर्गपटि चाँइके आटसमन पुनु नकरिकुन आफ्निक छाति पिट्तिन् कहल, ‘हे परमेसोर, मोइ पापि हखम, मोइ पापिउप्र दया करउ!’” 14येसुइ कुरा टुङ्गेतिन कहिकेभइल, “मोइ तेउह्राके कहतम्, उसे फरिसि नइजे बुरु तिरो उठालाहार मानुसचाहिँ परमेसोरक नजरयँ धर्माति भइकुन् घर फर्कल। किकेकने जोनेइ आफइके बड्क मानुस हखम कइकुन सोचित, उसे मानुसचाहिँ नान्हि भइत तर जोनेइ आफ्निके मोइ त नान्हि हखम कहित उसे मानुस बड्क भइत।”
येसुइ नाउनि नानिबाबुके आसिक देताहात्,
(मति १९:१३-१५; मर्कुस १०:१३-१६)
15येसुइ आफ्न हात राखिकुन आसिक देउस कइकुन मानुसेइ आ-आफ्न छावा-छाहिके ओनेन्कलघि आन्ल, तर इसे सभइ देखिकुन चेलासबेइ उसब्के हप्काल। 16येसुइ नाउनिबाबुसब्के आफ्नलघि बोलाइकुन चेलासब्के कहिकेभइल, “मेरलघि आइके देओ, उसब्के नारोकिके किकेकने परमेसोरक राज्जे यस्नइसब्क लागि नइ हखइ। 17मोइ साच्चिकइ तेउह्राके कहतम्, परमेसोरक राज्जेके नाउनिबाबुइ जस्नइ ग्रहन निजकर्लसमन कोलोउ पुनु परमेसोरक राज्जे भितर कइह्याउ पोसिके नापाओइ।”
धनि मानुस
(मति १९:१६-३०; मर्कुस १०:१७-३१)
18उछि एक जेना यहुदि सासकेइ येसुके यस्के पुछ्ल, “हे राम्र गुरु, अजम्बरि जिबन पाइके मोइ किति करिकेपोरित?”
19येसुइ उख्राके कहिकेभइल, “तोइ मेराके किति करिके राम्र कतस? परमेसोरकते कोलोउ पुनु राम्र नइजे। 20परमेसोररइ देइकेभइल आग्या त तेह्राके थाहाइ बाटइ, ‘बेभिचार नाकरिके, मानुसके नामारिके, झुठोक साछि नादेइके हसे उइया-बुबाके मान करिके’।”#प्रस्था २०:१२-१६; बेब ५:१६-२०
21“इसे सभइ आग्या त मोइ नानिहिँसे मान्तिन अइल बाटम्” कइकुन उहाइ जबाफ देल।
22इसे कुरा सुनिकुन् येसुइ उख्राके कहिकेभइल, “तोइ अझइ एक्टा काम करिके बाँकि बाटइ। तेरासइ भइल सभइ धन-सम्पति बेचिकुन गरिबसब्के बाट्दिक र तेह्राके सोर्गयँ धन-सम्पति पाउतस, आउक् मेर पाछु लागुक।” 23तर यस्न कुरा सुनिकुन् उसे यहुदि सासक एक्दम दुखि भइल, किकेकने उसे एक्दमइ धनि रहइ।
24हसे यहुदि सासक दुखि भइल देखिकुन येसुइ कइलखनाइ, “देख्लसाइ त, धन-सम्पति भइल मानुस परमेसोरक राज्जे भितर पोसिके कस्न अस्कार भइते रलाहाइ। 25किकेकने धनि मानुसके परमेसोरक राज्जेयँ पोसिकेकते त बुरु उट कलाहार जनवारके सुइक दुलोकमाटे छिरिके सजिल भइत।”
26इसे कुरा सुन्लार सभुनि ओनेन्के पुछ्ल, “ओसेकने कोनेइ मुक्ति पाइके सकित त?”
27येसुइ उसब्के जबाफ देलखनाइ, “जोनो काम मानुसेइ करिके नासकिहिँ, उसे काम चाहिँ परमेसोरेइ मत्रइ करिके सक्ताहात्।”
28हसे पत्रुसेइ कहल, “चाओ, हामे घरबारइ छाडिकुन तेउह्र पाछु लाग्ल बाटिहिँ।”
29येसुइ उसब्के कलखनाइ, “साच्चिकइ मोइ तेउह्राके कहतम्, जोनेइ परमेसोरक राज्जेक लागि आफ्निक उइया-बुबा, दाजुभाइ, दुलहि, छाहोक-छाहिके र घरबार छाडित, 30उहाइ इहइ जिबनयँ नइ उकते बढि पाइत, हसे अइलाहार जुगयँ चाहिँ अजम्बरि जिबन पाइत।”
येसुइ आफु मोरिके पोर्लाहार बारेयँ फेरि भबिस्यबानि कर्लखनाइ
(मति २०:१७-१९; मर्कुस १०:३२-३४)
31येसुइ मुक्खे बाह्र जेना चेलाके छुट्टइ लेजिकुन कलखनाइ, “सुनउ, हामे यरुसलेम जइतिन् बाटिर, अगमबक्तासबेइ मानुसक छावाक बारेयँ लेख्ल सभइ कुरा पुरा भइत। 32किकेकने उख्राके अरु जातक हातयँ जिम्मा देताहात्, उक्र बिजेत कर्ताहात्, निजराम्र बेबाहार कर्ताहात् र थुथेताहात्। 33उसब उख्राके कोर्राइ हान्ताहात् र मार्तात्, तर उसे तिन दिनयँ फेरि मोर्लकमाटे बाचित।”
34तर चेलासबेइ इसे कुरासब एक्टाउ पुनु नइजेबुझ्ल। इसे कुराक अर्थ उसब्के निजकल रहइ, उहइगुनेइ ओनेनेइ कहिकेभइल कुरा उसबेइ बुझिके नइजेसक्ल।
येसुइ भिख माङ्लार अन्धाके देख्लार बानाइकेभइल
(मति २०:२९-३४; मर्कुस १०:४६-५२)
35यरिहो सहरक नजिकइ येसु पुगिकेभइल। उछिका एक जेना अन्धा भिक माङिकुन पइडाक छेओ बोसिरल रहइ। 36धेरइ मानुसक भिड उक्र छेउकमाटे जाइराख्ल सुनिकुन् “नइजे, किति भइतिन् बाटइ हँ?” कइकुन भिक माङ्लार अन्धाइ पुछ्ल।
37भिक माङ्लार अन्धाके मानुससबेइ कहल, “नासरतक येसु इछिनकमाटे जइतिन् बाटत।”
38इसे सुनिकुन् भिक माङ्लार अन्धाइ चिच्चेतिन् कहल, “हे येसु दाउदक छावा, मेराके दया करउ!”
39आघु-आघु जइलारइ उख्राके चुप्लाक कइकुन हप्काल, तर उसे झन बड्क सोरेइ कहल, “हे दाउदक छावा, मेराके दया करउ।”
40येसु हिड्तिन-हिड्तिन टक्क अडिकुन कहिकेभइल, उख्राके मेरलघि आनुक् कइकुन आग्या देइकेभइल। अन्धाके नजिकइ लेज्लपाछु ओनेनेइ उख्राके पुछ्लखनाइ, 41“तोइ किति चाहातस? मोइ तेर लागि किति करिके सक्तम?”
उहाइ कहल, “प्रभु, बिन्ति कर्तम मोइ देखिके सकउ।”
42येसुइ उख्राके कहिकेभइल, “तोइ देख्लाहार भइहाल। तेर बिस्वासेइ तोइ निक भइलबाटस्।”
43हसे उहाइ तुरुन्तइ आँखि देख्लाहार भइल, र परमेसोरक प्रसम्सा कर्तिन उसे येसुक पाछु लाग्ल। इसे देखिकुन सभइ मानुसेइ परमेसोरक प्रसम्सा कर्ल।
നിലവിൽ തിരഞ്ഞെടുത്തിരിക്കുന്നു:
लुका 18: DRY
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2024 (Active), Mother Tongue Translators Society and Wycliffe Bible Translators, Inc. All rights reserved.
