लुका 17
17
पाप र छेमा
(मति १८:६-७,२१-२२; मर्कुस ९:४२)
1येसुइ आफ्नेन्क चेलाके कहिकेभइल, “मानुसके पापयँ फासालार कुरा त अबस्से नइ आइत। तर धिक्कार पापयँ फासालार मानुसके! 2ओस्न मानुसके पइला नइ घिन्टियँ जातोक पाटा झुन्डाइकुन समुन्रयँ घुघाइदेइके उक्र लागि राम्र भइताहाइ, ताकि इसे नान्हि केटकेटिसबमद्धे एक्टाके पुनु पाप करिके लागाइके मउका नापाउलारइ। 3उहइगुनेइ होस करिसाइ!
“तेर भाइर पाप कर्ल बाटइ कने उख्राके सम्झाउक, यदि उहाइ आफ्नि कर्ल पाप मानिकुन आइत कने उख्राके माफ करिदिक। 4यदि उहाइ एकदिनयँ सात पल्ट तेर बिरोधयँ पाप करिकुन्, उहाइ सातइ पल्ट तेरलघि फर्किकुन आफ्निक पापके मानिकुन माफ मागित कने उख्राके माफ दिक्साइ।”
बिस्वास
5बाह्र जेना चेलाइ प्रभुके कहल, “प्रभु, हाम्र बिस्वास बाढाइदेओ।”
6प्रभुइ जबाफ देइकेभइल, “यदि तेउह्रासब्के बिस्वास एक्टा तोरिक बिया जब्ड बाटइ कने इसे किम्बुक रुखके ‘उख्निकुन तोइ समुन्रयँ रोपिके जाउक्’ कनेपार पुनु उहाइ मानित।
नरम सोभाबक नोकर
7“तोहेसबमद्धे कोनेइ आफ्न नोकरके खेत जोतिकुन या भेडा चाराइकुन खेतकमाटे अइनेपार ‘छिटो आइकुन खाइके बोसुक्’ कहित र? 8बुरु यस्न कहित, ‘भन्सायँ जाइकुन मेर लागि खइलाहार कुरा पाकाउक, तब लुगा फेरिकुन मेराके खाइके देउक्, र मोइ खाइके-पिइके निजसक्लसमन मेर सेवा करुक्, उपाछु मत्रइ तोइ खाउक।’ 9किति आफ्नि आह्राल काम कर्लगुनेइ उहाइ नोकरके धन्यबाद देइत र? 10ओसिनकरिकुन तोहेसब पुनु आफुके आह्राल सभइ काम पुरा करिसक्नेपार यस्न कओ, ‘हामे त साधारन नोकर हखिहि, आफुइ करिके पोर्लाहार कामसब मत्रइ कर्ल बाटिहिँ।’”
दस जेना कोररोग लाग्ल मानुस निक भइल
11येसु यरुसलेम जइतेखना सामरिया र गालिलक सिमाना भइतिन् जाइकेभइल। 12कोलोउ एक्टा गाउयँ पोस्तेखना दस जेना कोररोग लाग्ल मानुससाङ ओनेन्क भेट भइल। 13उसब टाढोहिँ ठोडेल हसे चिच्चेइकुन कहल, “हे प्रभु येसु, हाम्राके दया करउ!”
14येसुइ उसब्के देखिकुन कहिकेभइल, “तोहेसब पुजेहेरिलघि जाइकुन आफइके देखाओ।” हसे उसब पइडायँ जइतिन्-जइतिन् निक भइहाल्ल।
15कोररोग लाग्ल मद्धेयँ एक जेनाचाहिँ आफ्नि निक भइल देखिकुन, बड्क सोरेइ परमेसोरक प्रसम्सा कर्तिन फर्कल। 16हसे येसुक गोडयँ घोप्टो पोरिकुन धन्यबाद देल। उसे चाहिँ यहुदि नइजे, सामरि जातक रहइ। 17हसे येसुइ पुछिकेभइल, “किति निक भइल दसइ जेना नइजे र? अरु नउ जेना चाहिँ कुछिका बाटत? 18इसे सामरि जातक मानुस बाहेक अरु चाहिँ परमेसोरके धन्यबाद चाढाइके किति करिके निजअइल?” 19हसे येसुइ उख्राके कहिकेभइल, “आबे उठिकुन जाउक्। तेर बिस्वासेइ तेह्राके निक पार्ल हखइ।”
परमेसोरक राज्जे आइत
(मति २४:२३-२८,३७-४१)
20जब फरिसिसबेइ परमेसोरक राज्जे कह्या आइत कइकुन येसुके पुछ्ल तब येसुइ उसब्के कहिकेभइल, “परमेसोरक राज्जे आखिइ देख्लार करिकुन् नाआओइ। 21‘चाओ, परमेसोरक राज्जे इछिका बाटइ’ अथबा ‘उछिका बाटइ’ कइकुन मानुससबेइ कहिके नासकइ किकेकने परमेसोरक राज्जे त तेउह्रसब्क माझयँ बाटइ।”
22उपाछु येसुइ आफ्न चेलासब्के कहिकेभइल, “यस्न बेला पुनु आइत, जोख्निके तोहेसब ‘मानुसक छावाक राज्जेक एक दिनके भइनेपुनु देखिके पाउने भइलारइ’ कइकुन कताहाउ, तर तोहेसब देखिके नाइपाओ। 23मानुससबेइ तेउह्रासब्के कताहात् ‘चाहुक्, उसे उछिका बाटइ!’ अथबा ‘चाहुक्, उसे इछिका बाटइ।’ तर उसे बेला उसब्क पाछु नाइलागिके, 24किकेकने जस्के बिजुलि चम्कतेखना आकासक एक छेउकमाटे अर्क छेउसमन नइ उजुङ बानाइत, मानुसक छावा अइलाहार दिनयँ पुनु ओस्नइ भइत। 25तर ओस्न भइलारकते आघु मोइ मानुसक छावाइ धेरइ दुख भोगिके पोरित हसे इसे जुग्क मानुससबेइ मेराके इन्कार कर्ताहात्। 26नोआक बेलायँ भइल जस्नइ, मोइ मानुसक छावा अइलाहार बेलायँ पुनु ओस्नइ भइत। 27नोआ पानिजाहाजभित्र पस्लार बेलासमन पुनु, मानुससबेइ भोज-भतेर खाइके, पिइके र बिहाबारि करिके ब्यस्त रहत, उहइबेलायँ बाढि आइकुन सभइके सखाप पार्ल। 28ओसिनकरिकुन लोतक बेलायँ पुनु ओस्नइ भइल रहइ। मानुससब खइलार-पिउलार, किनबेच कर्लाहार, बालि लागालाहार र घर बानालाहार कामयँ लागिराख्ल रहत। 29तर जोनो दिन लोत सदोम सहरकमाटे निस्कल, उहइ दिन नइ सोर्गमाटे आगि हसे गन्धक झरिकुन उसब सभइके सखाप पार्देल। 30मोइ मानुसक छावा पुनु फेरि देखार पोर्लाहार दिनयँ यस्नइ भइत।
31“उसे दिनयँ जोनो घरक छतउप्र भइताहात्, आफ्न मालसामान घरभितर बाटइ कने पुनु सामान लेइके तर झुनझरुस। ओस्नइ करिकुन खेतयँ भइलाहार पुनु घर फर्किकुन झुनआउस। 32#उत १९:२६लोतक दुलिहिक पाछु चाइकुन नुनक खाबो भइलि कुराके सम्झुक! 33जोनेइ आफ्न जिबन जोगाइके खोजित, उहाइ आफ्न जिबन गुमाइत; तर आफ्न जिबनके गुमालार चाहिँ आफ्न जिबनके जोगाइत। 34मोइ तेउह्रासब्के कहतम्, उसे रातयँ एक्टाइ ठावायँ सुत्ल दुइ जेना मानुस मद्धे एक जेनाके लेज्तात् र अर्कके चाहिँ छाडिदेतात्। 35फेरि साङसाङ जातो पिसिराख्ते दुइ जेना बेटिमद्ध्ये एक्टिके लेज्तात् र अर्किके चाहिँ छाडिदेतात्। 36[हसे खेतयँ दुइ जेना मानुस भइताहात्। एक जेनाके लेज्तात् र अर्कके चाहिँ छाडिदेतात्।”]
37इसे सुनिकुन चेलासबेइ येसुके पुछ्ल, “हे प्रभु, इसे कुछिका भइत?”
येसुइ जबाफ देइकेभइल, “जुछि सिनो भइत, उछि गिद्ध थुप्रित।”
നിലവിൽ തിരഞ്ഞെടുത്തിരിക്കുന്നു:
लुका 17: DRY
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2024 (Active), Mother Tongue Translators Society and Wycliffe Bible Translators, Inc. All rights reserved.
