मर्कूस 16
16
येशू सोम्बो लोक्पाते बात
(मत्ती २८:१-१०; लूका २४:१-१२; यूहन्ना २०:१-१०)
1सन्चारी छोमु काम खिता मेङच्येते बेला सिन्गीन नाम स्योनामेई मरियम मग्दलिनी, याकूब आमा मरियमताङ सलोमी येशू रोला कुताला आउदी स्यीम्बुई बास्ना चले खित्च्येते पाउडर ङ्योर गाल्सुङ। 2थेमे आदेरी छोमु ङोमुका ङीमा स्यारासात्तु थेबा सुमबो येशू रो ज्याक्पाते फुकनापा गाल्सुङ। 3थेपा डोजीन थेबा “था चुक खित्च्ये? फुगी गोदु ज्याक्पाते दो ङुरूङला सुई थेन्ला बिनोङा?” सिन बात खिन गाल्सुङ। 4थे दो आउदी जोदाई ओतान। तर थेपा लेप्ला ताजीन थेबेकी थे दो थेरूई थेन्दा ओता थोङसुङ। 5थेमे थे फुगी नाङदुराङ स्यूला ताजीन थेबेकी खोलाक कार्मुई खोन्दाज्यीक स्याराज्यीक मिला खोपरोङ सामे छ्य्वापा देताते थोङसुङ। थेला थोङजीन थेबा आउदी खाईन ख्यारसुङ। 6थेमे थे मिकी थे फेम्मे मिओनला “ख्योकोन छ्याःङ ज्यीबा माकेत। ख्योकोनचेन स्यिङगी थामला टाँए खाईन सेताते नासरतपे येशूला छोलाला दुरू वाबाते ईन सिन ङाला छ्या ओत। थेनी दुरू मेत। थे स्यिसादुकी सोम्बो लोक्पा ओत। लो तो, येशू रो ज्याक्पाते ठाउँ दिराङ ईन। 7था ख्योकोन दुरूई येशू चेलाओन ओत्सापा ग्युक। गाल्ला थेबाला थेमे काल्बा च्योक्तेचेन पत्रुसला ख्योकोनगी च्यि सिसे सासीन येशूकी गोमाका खोपरोङला साबा च्योकराङ खाला थे थेबा भन्दा गोमा गोमा गालीलपा डुइओत्लो। थेमे थेबेकी थेला थेपाराङ ठेत्क्योत्लो सि,” सिन थेरूकी ताङसुङ। 8थे मिकी थोक सानामेई थे फेम्मे मि सुमबो फुकदुकी थेन्गीन ज्यीबेकी दारगीनकामा छ्य्वासुङ। ज्यीबेकी खित्सादु थेबेकी सुङलाङ छ्याःङ बात माक्यासुङ।
सोम्बो लोक्नामेई येशूकी मिओनताङ ठेताते बात
9येशू आदेरी छोमु ङोमुका सोम्बो लोक्पा ओतान। सोम्बो लोक्नामेई गाङे भन्दा गोमा थेकी मरियम मग्दलिनीला ठेता खासुङ। थेकी गोमा थे फेम्मे मिदुकी ल्हन्डीक दुईन तेन्गीन ताङा ओतान। 10येशूला ठेत्नामेई मरियम मग्दलिनी येशू चेलातेबा थेमे थेत्ताङ ख्याम्कान्ते ज्येन मिओन रूकीन देत्सादु थे बात लाःप गाल्सुङ। थेजीन थेबाबरीचेन येशू स्यिसुङ सिन सेम सेत्कीन आउदी पीर खिन ङुइन देता ओतान। 11मरियम मग्दलिनीकी थेबाला “येशू सोम्बो लोक्तुक। ङे थेला ठेत्सुङ,” सिन सिरजीन थेबेकी थे बात बान्दा पत्ते माक्यासुङ।
12थे छोमुराङ थेबे नाङ मेन्दा ङि मि यरूशलेमदुकी युलनापा डुइन ओतान। लामला डोजीन येशूकी थेबा ङिबोलाङ ठेता खासुङ। थेकी थेबाला ठेत्सीनोङ ठेताईताङ थेबा ङिबोकी थेला ङो मास्येसुङ। 13थे येशू दुका सिन छ्या स्येनामेई थेबा यरूशलेमपा ग्युरगीन गाल्गीन येशू चेलातेबा थेमे थेबाताङ ङ्योम्बु ओताते मि गाङेला “येशूनी सोम्बो लोक्तुक। ङ्योकोनगी थेला ठेत्सुङ,” सिन लाःप्सुङ। तर थेबा ङिबो बादोङ थेबेकी पत्ते माक्यासुङ।
येशूकी चेलातेबाताङ ठेत्कीन बात खाबाते
14थे तिरी थे खोरोङ चेलातेबा च्युच्यीक ङ्योम्बुराङ साप सेइन ओते बेलाला येशू थेबा ओत्सादु ख्योल्सुङ। थेमे थे खोरोङ सोम्बो लोक्तुक, थेला ठेताप सिरकान्तेबे बात पत्ते माक्याबेकी थेकी थेबाला “ख्योकोनगी ङा सोम्बो लोक्तुक सिन च्यिला पत्ते माक्याबे? ज्येनगी ङाला ठेत्सुङ सिरजीन च्यिला मेन्दे बात ईन साबे? ख्योकोन चुक विश्वास मिक्किकान्तेन्दे ईन्दाका,” सिन थाप्सुङ। 15थेमे थेकी थेबाला “लो थाचेन सा लुङबा खाङ गाङेपा गाल्ला गाङेपे मिला गा लाङच्येते बात लोप। 16दि बात ङेन्ला ङाला विश्वास खाला बप्तिस्मा लिन्कान्ते मिला परमेश्वरगी पापकी सजायदुकी डेल्ग्यो। दि बात मेङेन्कानताङ ङाला विश्वास मिक्किकान्तेलाचेन परमेश्वरगी पापकी सजाय तेरग्यो। 17ङाला विश्वास खित्कान्तेबेकी चुक चुक्तेन्दे अचम्बते काम खिता थुप्कीते सासीन थेबेकी ङे मिन लाला ल्हन्डीक तेन्ला तोङा थुप्क्यो, खोपरोङगी छ्या मास्येबाते भाषाला बात खिता थुप्क्यो। 18थेबेकी रूल जुम्सीनोङ थेबाला रूलगी मोथोगो, विष सोसीन थुसीनोङ थेबा मिस्यिओ थेमे थेबेकी नाबाते मिओन लाक्तु लाक्पा ज्याक्ला ठाक्पा खिता थुप्क्यो,” सिन सिदुक।
19थोक खाईन चेलातेबाताङ बात खाईन सिन्नामेकी प्रभु येशूला परमेश्वरगी स्वर्गने खेरसुङ। थेचेन परमेश्वर सामे छ्य्वापा देता ओत। 20थोक खाईन थे स्वर्गने गाल्नामेकी चेलातेबेकी गाङेपा गाल्गीन गा लाङच्येते बात मिओनला लोपाला स्यूसुङ। थोक खित्जीन प्रभु येशूकी थेबाला स्येतताङ बुद्धि बिन्सुङ। थेमे थेबेकी लापाते बात सत्यते ईन सिन मिओनगी छ्या स्येस्यीत सिन थेकी थेबाला अचम्बते कामओन खित च्युत्सुङ। आमेन।
നിലവിൽ തിരഞ്ഞെടുത്തിരിക്കുന്നു:
मर्कूस 16: JUL
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 1992 Wycliffe Bible Translators Inc. All rights reserved.
