लूका 1
1
1परमेश्वरगी ङुरूङ नाङ चुक चुक काम खासुङा, च्यि च्यि ओङसुङा सिरच्येते बात मि काल्बेईकी टिबा ओत। 2थेबेकी टिबाते बातचेन नाम चुक ओङाते ईन्दे, चुक्ते ईन्दे सिन शुरूमेई थोङकान्तेताङ थोकान्ते मिओनगी साबाते बात ईन। खोपरोङगी थोङातेताङ थोबाते बातओन थेबेकी ङुरूङलाङ लाप्कीन बिन्दा ओत। थे मिओनचेन होदि बातओन लोपालाराङ खटे खाबाते ईन। 3थेमे ङालाङ दि बातओन टिक्पा फाप्क्यो सिराच्योक लासुङ। थोगी दि गाङे बात नाम नाम खापा चुक ओङाते ईन्दाका सिन ङे लेमु खाईन छ्या स्येबा चालाप। ङाराङगी लेमु खाईन छ्या स्येनामेई था ङा थियोफिलस खुई लाईदु दि बातओन टिगीन ओत। 4खोल्ला ज्येन ज्येनगी लाप्कीन बिन्दाते दि बातओन सत्यते दुका सिन लेमु खाला छ्या स्येस्यीत सिनराङ ङे दि गाङे बात टिबाते ईन।
यूहन्ना केइओ सिन साबाते बात
5च्यि सासीन यहूदिये लुङबादु हेरोद गेल्बो राज्य खिन ओते बेलाला थेरू जकरिया सिराज्यीक पूजारी ओतान। थे अबिया सिराते पूजारी हूलगी मि ओतान। जकरिया च्योकराङ थे फेम्मे एलीशिबाङ पूजारी हारून सन्तानराङ ओतान। 6थेबा जाप्राङ ङिकाराङ प्रभु परमेश्वर नियम गाङे लेमु खाला ङेन्गीन ओतान। दोक खाला थेबा ङिबोचेन परमेश्वरला मन परे खित्च्येते काम खिन ओतान। 7एलीशिबेते फिजा मायाङेकी खित्सादु गान्दा गाम्मा डो डोसाकोङ थेबेते फुज्युङ फुमु ओङा मेतान।
8पूजारीओन हूल हूल खाला दाक्पोन दाक्पोन पालोला परमेश्वर मन्दिरदु काम खिन ओतान। थोक खित्जीन दि बाजिचेन पूजारी जकरियाताङ थे र्वाओन पालो फापा ओतान। 9थेबे नाङ धूप सुई पोरच्ये सिन चिट्ठा देक्च्ये चलन ओतेकी चिट्ठा देक्जीन ङीमाई प्रभु परमेश्वर मन्दिरदु स्यूला धूप पोरच्येते चिट्ठा जकरियाला फाप्सुङ। 10थेमे थे नाङने स्यूकीन धूप पोरे बेलाला थेरू वाबाते मिओनचेन फिनामाराङ परमेश्वरला प्रार्थना खिन ओतान।
11थे धूप पोरगीन ओते बेलाला धूप पोरच्येते थानगी सामे छ्य्वापा थेकी प्रभु परमेश्वर दूतज्यीक लाकीन देताते थोङसुङ। 12परमेश्वर दूतला थे खोरोङ दोन्दुराङ थोङजीन थे च्यि सिराला वाताका सिन जकरिया आउदी खाईन ज्यीबा खासुङ। 13थेमे थे दूतकी थेला “जकरिया, खो ज्यीबा माकेत। खुई सन्तान ओङ च्युत्ला नाङ सिन खाबाते प्रार्थना परमेश्वरगी थोबा ओत। था खुई फेम्मेकी फुज्युङज्यीक केइओ। खुई थे फिजे मिन यूहन्ना सिन स्योक। 14थे केनामेई परमेश्वरगी चुक अचम्बे काम खासुङा सिन खो आउदी गा खिओ। थोकराङ खाला ज्येन ज्येन मिङ आउदी खुशी ओङगो। 15च्यिला सासीन प्रभु परमेश्वरगी थेला छ्येज्यीक काम खित ज्युत्क्यो। थेकी छ्याङ रक्सी सिराते नोमुङ थुङा मेङगो। थे केजीनमेईराङ परमेश्वर आत्मेकी खाङाते मि ओङगो। 16थेकीचेन ख्योकोन इस्राएलीओन काल्बेई सेम प्रभु परमेश्वर छ्य्वापा ग्युर ज्युत्क्यो। 17थे परमेश्वर बात खित्कान्ते एलिया च्योकराङ ओङगो। एलियाताङ चुक्ते शक्ति ओताने होथे शक्ति थेत्ताङ ओङगो। प्रभु परमेश्वर दुरू ओङा भन्दा गोमा वाला थेकी दाक्पोन फुज्युङ फुमुताङ डिक्पा माथुपाते आबातेबाला लोक्ला थेबाताङ डिक ज्युत्क्यो। परमेश्वरगी साबाते मेङेन्कान्ते मिओनलाङ थोक खिन देता लेमु मेन सिन छ्या स्ये च्युत्ला परमेश्वरगी खि साबा साबा च्योकराङ खित ज्युत्क्यो। थेकी थोक खानामेई तिरी प्रभु परमेश्वर ओङे बेलाला मि गाङेराङ था परमेश्वर ओङगो सिन गुला देत्क्यो,” सिन सिदुक।
18थे दूतकी थोक सिरजीन जकरियेकी “ङ्योकोन दोक गान्दा गाम्मा गाले मितेङ चुक खाला फिजा केइते? दोक बादोङ ङे चुक खाला पत्ते खित्च्ये?” सिन सिरजीन 19थे दूतकी “ङे मिन गब्रिएल ईन। ङा परमेश्वर दोन्दु देत्ला थेकी कोताते काम खित्कान्ते दूतज्यीक ईन। ङाला परमेश्वरगीराङ दि लेमुते लोन खोल्ला लोप सिन ताङाते ईन। 20ङे साबा च्योकराङ खुईते फुज्युङ साँच्चीराङ केइओ। तर ङे थाल्ला साबाते बात खुई पत्ते माक्याबेकी खुई फुज्युङ माकेथुप खोल्ला बात मेथेनो,” सिन सिदुक।
21जकरियाला मन्दिर नाङने थोक ओङजीन फिनामा आशी सेताला गुकीन देताते मिबरी थे च्यिला दोक काल्बासाक फिनामा मेथेन्का च्यि ओङताका सिन छक्क परे खाबा ओतान। 22थे तिरी जकरियेकी फिनामा थेन्गीन मिओनताङ छ्याःङ बात खिता माथुप्सुङ। थेते खानामेकी ङोरो माथेन्देकी खित्सादु थेकी थेबाला खालि लाक्पे चालगीकामा आशी बिन्सुङ। थेमे थे मिओनगी मन्दिर नाङने परमेश्वरगी थेला मिलाम खित ज्युताच्योक खाईन खइँदा बात छ्या स्ये च्युताक्वा सिन छ्या स्येसुङ।
23थेमे मन्दिरदु थे खोरोङ काम खित्च्येते पालो सिन्नामेकी जकरिया यरूशलेमदुकी खाँपा गाल्सुङ। 24थेमे टिक्पी तिरी फेम्मेते एलीशिबेकी फुज्यीमा खुरसुङ। थोक ओङनामेकी एलीशिबा दावा ङासाक खापाङ युक मोन्डोबा खाईन खाम्बादुराङ देत्सुङ। 25थेमे थेकी गा खिन “प्रभु परमेश्वरगी ङे दुक्पा थोङगीन ङाला थोई लेमु खासुङा। थे चुक छ्ये ईन्दाका। थानी सुङगीङ ङाला अपुताले सिरा मेङेदो,” सिन सासुङ।
येशू केइओ सिन साबाते बात
26-27एलीशिबेकी फुज्यीमा खुराते दावा ङा छाङगीन ठुकला स्यूबा ओतान। थे बेलालाराङ परमेश्वरगी थे खोरोङ दूत गब्रिएलला कर्नेते फेम्मे फिजाज्यीक ओत्सादु लोनज्यीक लाःपाला ताङसुङ। थे फेम्मे फिजा गालील अञ्चलते नासरत सिराते सारदु देत्कीन ओतान। थे मिन मरियम ओतान। थेला यूसुफ सिराते मिला नाङ खाबा ओतान। यूसुफचेन दाऊद गेल्बो सन्तान ओतान। 28थेमे मरियम दोन्दु लेप्कीन थे दूतकी “फुमो, प्रभु परमेश्वरगी खोल्ला लेमुज्यीक कामगी लाईदु छाने खाबा ओत। थेकी खोल्ला लेमु खाला तेइओ,” सिन सिदुक। 29थे दूतकी थोक सिरजीन मरियम ज्यीबा खिनकामा आबिई दिकी ङाला च्यि बात खासुङा, दिकी दोक साबाते च्यि ईन्ताका सिन छक्क परे खासुङ। 30थेमे थे दूतकी “मरियम, खो ज्यीबा माकेत, ज्यीबा खिता माफाबो। परमेश्वरगी खोल्ला दया खाईन लेमु खाबा ओत। 31था खोल्ला च्यि ओङगीते सासीन खुई फुज्यीमा खुरला फुज्युङज्यीक केइओ। थे मिन येशू सिन स्योक। 32थे आउदी छ्येज्यीक मि ओङगो। थेला गाङे भन्दा छ्येते परमेश्वरगी थे खोरोङ फुज्युङ ईन सिओ। प्रभु परमेश्वरगी थेला थे खोरोङ ज्युज्यु दाऊद गेल्बो राज्य बिन्ला च्याला छ्येज्यीक गेल्बो जोइओ। 33थेमे थेकी याकूब सन्तान इस्राएली गाङेला राज्य खिओ। थे राज्य नोमुङ मोतोरो,” सिन सिदुक।
34थे दूतकी थोक सिरजीन मरियमगी थेला “ङा सुङ ख्योओ मित्ताङ नोमुङ ङ्योम्बु देता मेत। ङा कर्ने मिला चुक खाला दोक ओङा थुप्कीते?” सिन ठिजीन 35थे दूतकी “था खुई परमेश्वर आत्मा ङेत्ला गाङे भन्दा छ्येते परमेश्वर शक्तिकी खित्सादु फुज्यीमा खुरग्यो। थोगी खुई केबाते थे फिजाला सेमला पाप सिराते छ्याःङ मेताते थेमे परमेश्वर फुज्युङ ईन सिन सिओ। 36थेमे याङराङ खुई मि फाप्च्येते एलीशिबा थोक गाम्मा मिकीङ फुज्यीमा खुराते बातनी खोल्ला छ्याराङ ओतासीन। थोङला थेला गाङेकी थारीमाकामा सिन ओतान। परमेश्वरगी आशी बिन्देकी थरिङोलानी थेकी फुज्यीमा खुराते दावा ङा छाङगीन ठुकला स्यूबा ओत। थेकी था फुज्युङराङ केइओ। 37थोगी परमेश्वरगी खिता मुथुप्च्येते दुरू छ्याःङ मेत,” सिन सिदुक। 38थे दूतकी थोक सानामेकी मरियमगी “लो ओना प्रभु परमेश्वरगी जे खासीनोङ ङाला खुशीराङ ओत। खुई ङाला प्रभु परमेश्वरगी खिओ साबाते बात साबा च्योकराङ खित्स्यीत,” सिन सिदुक। थेमे परमेश्वर दूत थेरूकी गाल्सुङ।
मरियम एलीशिबाला ठेता खित गालाते
39थेरूई टिक्पी दिन तिरी मरियम लामला रकस्यिकोङ मेदेता खाईन यहूदिये अञ्चलदु फाप्च्येते युलज्यीकने गाल्सुङ। 40थेने लेप्कीन जकरिये खाम्बे नाङ स्यूकीन थेकी एलीशिबाला से खासुङ। 41थोक खाला से खित्जीन एलीशिबे सुबाला ओताते फिजा बुटुक बुटुक खाईन चले खासुङ। थेमे एलीशिबेकी परमेश्वर आत्मे छ्य्वापेई दोक सिन मरियमताङ बात खिताला स्यूसुङ। 42थेकी गा खिन कस्स्ये खाईन “ओहो, फेम्मे मि गाङे नाङ खो चुक भाग्यमानी ईन्दाका। थेमे खुई सुबाला ओताते फिजा छेत परमेश्वर आशी ङेताते ज्येन सुङ मेत। 43खो परमेश्वर फुज्युङ आमा ईन। थेराङ ङे प्रभु ईन। खो थे आमा ईन्सीनोङ ङा च्योक्ते मिलाङ दुक्पा खाईन ठेता खित वादुक। दिनी आउदी अचम्बे बात ओङसुङ। 44ङाला से खिते बेलाला खुई ङोरो थोकीन ङे सुबाला ओताते फिजाङ गाकी बुटुक बुटुक खिन फिरसुङ। 45प्रभु परमेश्वरगी थे खोरोङ दूत ताङगीन खोल्ला साबाते बात थेकी साँच्चीराङ साबा च्योकराङ खिओ सिन खुई पत्ते खाबेकी खो आउदी भाग्यमानी ईन,” सिन सिदुक।
मरियमगी परमेश्वरते जय जय खाबाते
46थेरूई मरियमगीङ “प्रभु परमेश्वरते जय जय ओङस्यीत सिन ङा थेला सेमदुकीराङ छ्ये जोइओ। 47पापताङ दुक्पादुकी डेल्कान्ते थेराङ ईन्देकी ङाला आउदी गा लाङगीदुक। 48थे दोन्दु ङा छ्याःङ च्योक मेन्दा ईन्सीनोङ थेकी ङाला आउदी लेमु खासुङ। थेकी दोक खाबेकी था पुस्ता पुस्तासाकराङ गाङेकी ङाला परमेश्वर आशी ङेताते मि ईन सिन सिओ। 49छ्येज्यीक शक्ति ओताते परमेश्वरगी ङे लाईदु आउदी छ्येज्यीक काम खासुङ। थे मेलेबा सिराते छ्याःङ मिक्किकान्ते ईन। 50थे खोरोङला माने खित्कान गाङेला थेकी पुस्ता पुस्तासाकराङ दया खिन देत्क्यो। 51ङा ङाराङ ईन सिराच्योक खित्कान्तेबाला थेकी थे खोरोङ छ्येज्यीक शक्तिकी थेबा खोपरोङ खोपरोङ नाङराङ डिक माच्युत्कीन थेबेकी खिता चालाते काम खित माच्युत्सुङ। 52थेकी गेल्बोओनताङ छ्ये छ्ये मि लाःक्तुकी थेबे राज्य ठ्वाकीन ज्येनगी दिबाङ सु ईन्देरो सिराच्योक ठाने खाबाते मिओनलाचेन छ्ये जोसुङ। 53त्वाबेई स्याप खाबाते मिओनला थेकी वालछ्येल ओङच्या खाईन साप थुङा बिन्सुङ। थेमे छ्युक्पुतेबालाचेन लाक्पा तोङबाराङ जोकीन ताङसुङ। 54थेकी थे खोरोङगी छाने खाबाते इस्राएलीओनताङ गोमा खाबाते जमान टोक मेज्येता खाईन थेबाला लेमु खिनराङ दुक। 55थेबाला लेमु खित्च्येते नोमुङ मोतोङो सिन थेकी ङुरूङ ज्युज्यु अब्राहाम थेमे थे सन्तानओनताङ जमान खाबा ओतान,” सिनकामा परमेश्वरते जय जय खासुङ। 56थेमे मरियम एलीशिबा ओत्सादुराङ दावा सुमजो देत्कीन तिरी थे मोरोङ खाम्बामा ग्युरसुङ।
यूहन्ना केबाते बात
57थेमे दावा छाङनामेई एलीशिबेकी फुज्युङज्यीक केसुङ। 58प्रभु परमेश्वरगी छ्येज्यीक दया खाबेकी खित्सादु थेकी फिजा केदुक्लो सिरा थोकीन युल्बाओन थेमे खोपरोङ मि फाप्च्येतेबाङ गाङेराङ आउदी गा खासुङ। 59थे फिजा केबाते ङीमा गेतकी छोमु थेते जीउला खतकी चिनु ज्वा फापा ओतान। थे लाईदु थेबा गाङेराङ थेरू वाबा ओतान। थेमे खोपरोङ चलनला ओता च्योकराङ खाईन थेबेकी थे फिजे मिन जकरिया सिन ज्य्वाबा चाल्सुङ। 60थोक खिता छोल्जीन आमातेकी “मेन मेन मेङगो, दिला यूहन्ना सिरा फाप्क्यो,” सिन सिरजीन 61थेबेकी “च्यिला दोक सिन मिन ज्य्वाच्ये? खेराङ मि नाङनी दोक्ते मिन सुङगीतेङ मेत,” सिन सिदुक। 62थेमे फिजे आबातेला लाक्पे चाल खाईन “फुज्युङ मिन च्यि ज्य्वाच्ये?” सिन ठिसुङ। 63थेमे थेकीङ टिक्च्येते खइँदा नाङ सिन लाक्पे चालराङ खासुङ। थेमे फुज्युङते मिन यूहन्ना सिन टिकीन तेन्सुङ। थोक थोङजीन च्यिला दोकस्यिक मिन ज्याक्सुङा सिन थे मिबरीला अचम्ब लासुङ। 64फुज्युङते मिन टिला तेन्दासात्तु जकरिया लोक्ला खाला बात थेन्च्या गाल्गीन परमेश्वरला छ्ये जोइन बात खिताला स्यूसुङ। 65थोक ओङजीन थेरू वाबाते मि गाङेराङ छक्क परे खासुङ। दोक दोक ओङाते बात यहूदिये अञ्चल खाङ युल युललाङ फैले खाईन गाङेपे मिकी थे बातकामा खिताला स्यूसुङ। 66दि बात थोकान गाङेकी दि बात च्यि ईन्ताका थेमे थे फिजा चुकस्यिक ओङगीताका सिन खोपरोङ खोपरोङ सेमदु गुने खासुङ। च्यिला सासीन प्रभु परमेश्वर साँच्चीराङ थे फिजाताङ ओत सिन गाङेकी छ्या स्येबा ओतान।
जकरियेकी परमेश्वरते जय जय खाबाते
67थेमे थे फिजे आबेकी परमेश्वर आत्मे छ्य्वापेई बात खिताला स्यूसुङ। दोक खाला परमेश्वरगी सिर च्युताते बात खिन थेकी 68“था ङुरूङ इस्राएली गाङेराङ प्रभु परमेश्वरते जय जय खिइ। थेचेन थे खोरोङगी छाने खाबाते मि ङुरूङला दुक्पादुकी टाल्ला लेमु खित्कान्ते ईन। 69ङुरूङला पापताङ दुक्पादुकी डेलाला प्रभु परमेश्वरगी छ्येज्यीक शक्ति ओतातेला ङुरूङ ओत्सामा ताङा ओत। थेला थेकी थे खोरोङला माने खित्कान्ते गेल्बो दाऊद सन्तान नाङदुईराङ छाने खाबा ओत। 70-71शत्रु लाःक्तुकी थेमे ङुरूङला मिगी थोङसार्मु खित्कान्तेबा गाङे लाःक्तुकी डेल्ग्यो सिन परमेश्वरगी थे खोरोङ बात खित्कान्ते मिओनला गोमाकाराङ सिर च्युता ओतान। 72दोक खिओ सिन थेकी ङुरूङ ज्युज्यु पुर्खाताङ खाबाते जमान टोक मेज्येता खाईन साबा च्योकराङ खिताला स्यूसुङ। 73दोक खिओतराङ सिन थेकी ङुरूङ ज्युज्यु अब्राहामताङ ना क्याल्गीन जमान खाबा ओतान। 74चुक सासीन शत्रुओनताङ ज्यीबा मिक्किता खाला थे खोरोङला माने खिन देता थुप्स्यीत सिन परमेश्वरगी ङुरूङला थेबे लाःक्तुई डेल्ग्यो। 75थोक खानामेई ङुरूङगी जुनी खाङराङ थेकी खि साबा साबा ङेन्ला थेला मन परे खित्च्येते काम खिन देता थुप्क्यो सिन अब्राहामताङ बात खाबा ओतान।
76थेमे दि ङे फुज्युङलाचेन गाङे भन्दा छ्येते परमेश्वरगी थे खोरोङ बात खित्कान्ते मि ईन सिन सिओ। च्यिला सासीन था दिकीराङ प्रभु परमेश्वर ओङगो सिन मिओनला लाप्ला बिन्ला थे ओङाला जेसुकै ठीक खिओ। 77दिकी चुक खिते सासीन प्रभु परमेश्वरगी थे खोरोङ मि सिन छाने खाबातेबाला था थेबेकी खाबाते पाप माफ बिन्ला पापकी सजायदुकी डेल्ग्यो सिन लोप्क्यो। 78परमेश्वर साँच्चीराङ आउदी दया खित्कान्ते ईन। था थेकी मुन्दाकदुकी डेल्कान्तेला स्वर्गनेकी ङुरूङ ओत्सामा तोङगो। थे देमा वानामेईचेन ङीमा स्यारा च्योकराङ ओङगो। 79थेकी वाला परमेश्वरताङ ठाल्गीन थे लाईदु स्याप छेतराङ गाला ओताते मिओनला दि पापताङ लोभकी खाङाते मुन्दाकते ठाउँदुकी डेल्ग्यो। दोक खाला थेकी ङुरूङला छ्याःङ ज्यीबा मिक्किता खाला जुनीकाल्बा क्योङ ज्युत्क्यो,” सिन सिदुक।
80थेमे यूहन्ना छारगीन गाल्सुङ, थेला बुद्धिङ स्यूसुङ। थेमे परमेश्वरगी इस्राएलीओन ओत्साला थे खोरोङ बात खित माताङथुप थे रीला गाल्गीन देत्सुङ।
നിലവിൽ തിരഞ്ഞെടുത്തിരിക്കുന്നു:
लूका 1: JUL
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 1992 Wycliffe Bible Translators Inc. All rights reserved.
