मर्कूस 15

येशूला रोमी गेल्‍बो हाकिम पिलातस दोन्‍दु क्‍यालाते

(मत्ती २७:१-२,११-१४; लूका २३:१-५; यूहन्‍ना १८:२८-३८)

1थेमे नाम लाङाईताङ थेरू जम्‍मा ओङाते छ्ये छ्ये पूजारी, धर्मे गुरूओन थेमे यहूदीओनते ज्‍येनोङ छ्ये छ्ये मि गाङेकी था येशूला चुक खित्‍च्‍ये सिन बात डिक्‍पा खासुङ। थेमे थेला ठाकीन पिलातस ओत्‍सादु खेरगीन थे लाःक्‍तु सोम्‍पे खासुङ। 2थेरू क्‍याल्‍नामेकी पिलातसकी थेला “च्‍यि खो यहूदीओन गेल्‍बो ईन?” सिन ठिसुङ। थोक सिरजीन येशूकी “ङा यहूदीओन गेल्‍बो ईन सिन खुईराङ सासुङ,” सिन सिदुक। 3दिकी दोक दोक खासुङ सिन दोष लै खिन छ्ये छ्ये पूजारीकी येशूकी खाराङ माक्‍याबाते कामताङ बात खासुङ सिन पिलातसला लाःप्‍सुङ। 4थेबेकी थोक खानामेई पिलातसकी येशूला “दिबेकी खाबाते बात खुई माथोसुङाना च्‍यिन्‍दे? खो च्‍यिला खाराक्‍पा देत्‍कीते?” सिन सासुङ। 5थेकी थोक सिरजीनोङ थे खाराक्‍पाराङ देता थोङजीन पिलातसला अचम्‍ब लासुङ।

पिलातसकी येशूला सेत्‍च्‍येते हुकुम बिन्‍दाते

(मत्ती २७:१५-२६; लूका २३:१३-२५; यूहन्‍ना १८:३९-१९:१६)

6बातज्‍यीक च्‍यि सासीन निस्‍तार चाडगी बेलाला लोई ठाङमा पिलातसकी जेलदुकी कैदीज्‍यीकला तोङच्‍ये चलन ओतान। मिओनगी सुला ताङला नाङ सिका थेकी होथेलाराङ तोङा फाप्‍कीन ओतान। 7थेजीन थेरू बारब्‍बा सिराज्‍यीक मि थे खोरोङ र्‍वाओनताङ जेलदु देता ओतान। थेत्ताङ थे र्‍वाओनगी सारदु गोलमाल लाङगीन मि सेता ओतान। 8येशू पिलातस दोन्‍दु देता ओते बेलालाराङ मि काल्‍बेई रूकीन थेरू लेप्‍सुङ। थेमे थेबा गाङेकी पिलातसला “हजूर, खुई लोई ठाङमा खाबाच्‍योक खाला थोलोङ कैदीज्‍यीकला ताङला नाङ,” सिन सासुङ। 9थेमे थेकी थेबा गाङेला “लो ओना, ङा दि यहूदीओन गेल्‍बोला तोङामीन, ओङगो?” सिन सिदुक। 10मि काल्‍बा च्‍योक येशू छ्य्‌वापा लै खाबा थोङगीन छ्ये छ्ये पूजारीकी स्‍येदाङगी थाराङ थेला थेरू खुलाबाते ईन सिन छ्या स्‍येकीन थेकी थोक साबा ओतान। 11तर छ्ये छ्ये पूजारीकी मि गाङेला लुकीन “येशूला मेन, बारब्‍बाला थोङ सि,” सिन बात लाप्‍कीन बिन्‍सुङ। 12मिओनगीङ खोपरोङला सि साबा च्‍योकराङ सानामेई पिलातसकी “थोक ईन्‍सीन ख्‍योकोनगी यहूदीओन गेल्‍बो सिन साबाते दि मिलाचेन च्‍यि खिसे ओना?” सिन सिरजीन 13थेबा गाङेकी “दिला सेता फाप्‍क्‍यो, स्‍यिङगी थामला टाँए खाला सेत,” सिन कस्‍स्‍ये खाईन छेरा खासुङ। 14थोक खित्‍जीन पिलातसकी “ख्‍योकोन च्‍यिला दोक खाला छेरा खिते? दि मिकी च्‍यि मेलेबा काम खाला दुकारो?” सिन ल्‍वा चाल्‍सुङ। ईन्‍सीनोङ थे बातला नामज्‍योकराङ मेसेता खाईन थेबाबरी “दिला तोङा मेङगो। दिला स्‍यिङगी थामला टाँए खाला सेत,” सिनकामा झन मिता खाच्‍या खाला छेरा खिन फिराला स्‍यूसुङ। 15थे खोरोङगी जे खित्‍जीनोङ छ्याःङ सीप लै मिक्‍किच्‍या थोङगीन पिलातसकी मिओनला खुशी ज्‍वाप्‍ला बारब्‍बाला जेलदुई ताङसुङ। थेमे येशूलाचेन कोर्रा लै खाला च्‍याला स्‍यिङगी थामला टाँए खाला सेत सिन मिल्‍टेरीओनला बिन्‍गीन ताङसुङ।

येशूला मिल्‍टेरीओनगी खिस्‍यी खाबाते

(मत्ती २७:२७-३१; यूहन्‍ना १९:१-३)

16थे मिल्‍टेरीओनगी थेरूकी येशूला पिलातस खाम्‍बादु खेरसुङ। थे खाम्‍बाला प्रेटोरियम सिन ओतान। थेमे थेरू ओताते ज्‍येन मिल्‍टेरीओनलाङ गाङेला थेरू काताङसुङ। 17थेमे थेबेकी येशूला लाक्‍तु खोन्‍च्‍येते मोर्मुज्‍यीक खोलाक कोन्‍सुङ। थोकराङ खाईन चाङगी बुटे श्रीपेज जोकीन गोःला कोन्‍गीन बिन्‍सुङ। 18थेमे से खिन “यहूदीओन गेल्‍बो काल्‍बासाक सोन्‍स्‍यीत, खुईते जय जय ओङस्‍यीत,” सिन खिस्‍यी खिताला स्‍यूसुङ। 19थेमे फेर्केकी गोः लाकनामाराङ गोः लाकनामा देइन छ्यिम्‍तोर ग्‍याप्‍सुङ। गेल्‍बोला खिताच्‍योक मान खित्‍जुम खिन गुर्बु खाईन थेला से खासुङ। 20थोक खाईन खिस्‍यी खाईन सिन्‍नामेकी थेबेकी थेला कोन्‍दाते मोर्मुते खोलाक टोल्‍गीन थे खोरोङ खोलाकराङ कोन्‍गीन बिन्‍सुङ। थेमे थेरूकी थेला स्‍यिङगी थामला टाँए खाला सेताला खेरसुङ।

येशूला स्‍यिङगी थामला टाँए खाबाते

(मत्ती २७:३२-४४; लूका २३:२६-४३; यूहन्‍ना १९:१७-२७)

21येशूला टीला डुइन डुइनलाराङ लामला मिल्‍टेरीओनगी युलनापेई सारनापा ओङगीन ओताते शिमोन सिराते मिला ठेत्‍सुङ। थेचेन साइरेनीपे मि ओतान। थे अलेक्‍जेन्‍डरताङ रूफसबे आबा ओतान। थेमे मिल्‍टेरीओनगी थेलाराङ जुम्‍गीन येशूला टाँए खाला सेत्‍च्‍येते स्‍यिङगी थाम जबरजस्‍ती कुरगीन खेरसुङ। 22थोक खाईन थेबेकी येशूला गलगथा सिरसादु क्‍याल्‍सुङ। गलगथा साबाते खप्‍पर ठाउँ साबाते ईन। 23थेरू ख्‍योल्‍नामेकी थेबेकी लट्टे खित्‍स्‍यीत सिन येशूला मूर्र स्‍येबाते अंगूर छ्याङ थुङ सिन बिन्‍सुङ। तर थेकी माथुसुङ। 24थेमे थेबेकी थेला लाक्‍पा काम्‍बाला काँटी ग्‍याप्‍कीन स्‍यिङगी थामला टाँए खाईन लाङसुङ। थोक खानामेई थेबेकी येशू खोलाक सु सुला खाङ खाङ फाप्‍च्‍या ईन्‍दाका सिन चिट्ठा ग्‍याप्‍कीन गोकीन खासुङ। 25थेला थोक खाला टाँए खित्‍जीन ङोमु नौ बजे खाबा ओतान। 26थेला च्‍यिला सेताते ईन्‍दे सिन स्‍यिङगी पाटीज्‍यीकला “दि यहूदीओन गेल्‍बो ईन” सिन टिकीन ज्‍याक्‍पा ओतान। 27थेमे मिल्‍टेरीओनगी डाँका मेरा ङिलाङ येशूला च्‍योकराङ खाईन थे फारताङ छुरला स्‍यिङगी थाम रेरेला टाँए खासुङ। 28थेला डाँकाओनताङराङ टाँए खानामेई “थेलाचेन मिओनगी डाँकाओनला च्‍योकराङ खिओ,” सिन परमेश्‍वर बातला गोमाका टिबाते बात साबा च्‍योकराङ ओङसुङ।#यशैया ५३:१२

29थोक खाईन येशूला स्‍यिङगी थामला टाँए खाबाते थोङगीन थेरू ओङकान डोकानगीचेन खोल्‍ला ठोकस्‍यिङ सिराच्‍योक खिन “ए खोनी परमेश्‍वर मन्‍दिर राम्‍ला च्‍याला ङीमा सुमला ज्‍वा थुप्‍क्‍यो सिन सिरकान्‍तेराङ मेनरो? 30लो खो थे स्‍यिङगी थामदुकी देमा फाप्‍ला वाला खोरोङला सोन्‍दा खि। लोते ओना खो खजोते ईन्‍दाका,” सिन खिस्‍यी खासुङ। 31थोकराङ खाईन छ्ये छ्ये पूजारीताङ धर्मे गुरूओनगीङ “दिला तोना, दिकी ज्‍येन ज्‍येनलानी सोन्‍दा खासुङ। तर थे खोरोङला सोन्‍दा खिता थुपाते खोइ? 32दिकी थे खोरोङला परमेश्‍वरगी तोङगो साबाते ख्रीष्‍ट ईनलो। लो दि पक्‍काराङ इस्राएलीओन गेल्‍बोराङ ईन्‍सीन था दि स्‍यिङगी थामदुकी सानामा फाप्‍ला थे खोरोङला सोन्‍दा खित्‍स्‍यीत। थोक खासीन ङुरूङ दिला थेराङ ईन्‍दा दुका सिन पत्ते खिताप,” सिन खिस्‍यी खितासम्‍म खासुङ। थेत्ताङ ङ्योम्‍बुराङ टाँए खाबाते डाँका ङिबोकीङ येशूला खाला थेन्‍दा जति मनपरी सासुङ।

येशू स्‍याप्‍ते बात

(मत्ती २७:४५-५६; लूका २३:४४-४९; यूहन्‍ना १९:२८-३०)

33थेमे ङीम्‍मु बाह्र बजेमेकी तीन बजेसाक लुङबा खाङ मुन्‍दाक जिङी गाल्‍सुङ। 34थेमे तीन बजेला येशूकी कस्‍स्‍ये खाईन “इलोई, इलोई, लामा सबखथनी?” सिन सासुङ। दोक साबाते “ए परमेश्‍वर, ए परमेश्‍वर, खो ङात्ताङ थाल्‍ला च्‍यिला ठाले?” साबाते ईन। 35थेकी थोक साबा थोकीन च्‍यि साताका सिन लेमु खाईन माखोबेकी थेरू थेला च्‍यि च्‍यि ओङगीका सिन ताकीन देता ओताते कोई कोईकीचेन “उ तोना, तो। दिकीनी एलियालाका कातोङाला स्‍यूसुङ,” सिन सासुङ। 36थेमे थेबे नाङ दोक्‍पोईकीचेन छ्य्‌वाकीन गाल्‍गीन खोलाक टालोज्‍यीक किर्बुते छ्याङगी नाङ न्‍वाकीन बागी टुप्‍पोला ठील्‍गीन येशूला थुङा बिन्‍सुङ। थोक खित्‍जीनराङ थेकी “दिला स्‍यिङगी थामदुकी पाप्‍ला सोन ज्‍युताला एलिया खजो ओङच्‍या ईन्‍दाका, तेइसो,” सिन सिदुक। 37थेमे येशू लोईन कस्‍स्‍ये खाईन छेरा खाईन ग्‍याङ स्‍यिसुङ।

38येशू स्‍यापज्‍यीकताङराङ चुक ओङसुङा सासीन परमेश्‍वर मन्‍दिर नाङदु क्‍योराते पर्दा ईनेकी मिमासाकराङ टुक्रा ङि गाल्‍गीन राल्‍सुङ। 39येशू स्‍यिजीनसाक थेला स्‍युङाला देत्‍कान्‍ते मिल्‍टेरी क्‍याप्‍टेनगी थे थोक खाईन स्‍या थोङगीन “दिनी साँच्‍चीराङ परमेश्‍वर फुज्‍युङराङ दुका,” सिन सिदुक। 40थेरू फेम्‍मे मिओनोङ येशूला च्‍यि च्‍यि ओङच्‍या ईन्‍दाका सिन आदो थारीलाराङ देत्‍ला तेइन ओतान। थेबे नाङ मरियम मग्‍दलिनी, कान्‍छाते याकूबताङ योसे आमा मरियम थेमे सलोमी ओतान। 41थेबेकीचेन येशू गालील अञ्‍चल नाङला युक्‍जीन थेत्ताङराङ ख्‍याम्‍गीन थेला गोच्‍येते मद्धत तेरगीन वाबा ओतान। थेरू ओताते ज्‍येन फेम्‍मे मिओनोङ दिबा च्‍योकराङ थेत्ताङ ङ्योम्‍बुराङ यरूशलेमपा वाबा ओतान।

येशूला सासगास खाबाते

(मत्ती २७:५७-६१; लूका २३:५०-५६; यूहन्‍ना १९:३८-४२)

42थेमे थे छोमु नाम स्‍योबा खाबा ओतान। ङारो च्‍योक्‍तेचेन सन्‍चारी फाप्‍कीन ओतान। सन्‍चारी छोमु काम खिता मेङच्‍येते ईन्‍देकी ङारो च्‍योक्‍ते काम थे छोमुराङ खाला सिन्‍दा फाप्‍च्‍या ओतान। थोगी येशू रो थे छोमुराङ दिक्‍पा फाप्‍क्‍यो सिन 43यूसुफ सिराज्‍यीक मि रोमी गेल्‍बो हाकिम पिलातस ओत्‍सापा गाल्‍सुङ। यूसुफचेन अरिमाथियापे मि ओतान। यहूदीओन छ्ये छ्ये मि नाङ थेङ दोक्‍पोई ओतान। थेला मिओनगी लेमु मि ईन सिन मान खिन ओतान। था परमेश्‍वर राज्‍य नाम ओङगीताका सिन थे गुकीनराङ देता ओतान। पिलातस ओत्‍सादु लेप्‍नामेई थेकी छ्याःङ ज्‍यीबा मिक्‍किता खाईन येशू रो खेरा नाङ सिन बिन्‍ती खासुङ। 44थेकी थोक सिरजीन येशू दोक छिटो चुक खाईन स्‍यिताका सिन पिलातसला अचम्‍ब लासुङ। थेमे थेकी थे मिल्‍टेरी क्‍याप्‍टेनला काताङगीन “च्‍यि साँच्‍चीराङ थे स्‍याप्‍ते ईन?” सिन ठिसुङ। 45थेकी “ईन, थे स्‍यिसुङ,” सिन सानामेई पिलातसकी यूसुफला “येशू रो खेरसीन ओङगो,” सिन सिदुक। 46थेमे यूसुफकी गाल्‍गीन कार्मुते खोलाक ङ्योसुङ। थेमे येशू रो स्‍यिङगी थामदुकी थेन्‍गीन थे खोलाककी ठील्‍गीन फुकज्‍यीक्‍तु खेरगीन ज्‍याक्‍सुङ। थे फुक स्‍याप्‍ते मि ज्‍य्‌वाबाला ठाःक ठुकीन जोबा ओतान। येशू रो ज्‍याक्‍नामेई थेकी जोदाज्‍यीक दो रिल्‍गीन थे फुगी गो टाले खाईन ज्‍याक्‍सुङ। 47मरियम मग्‍दलिनीताङ योसे आमा मरियमगी थेला चुक खाईन खापा ज्‍याक्‍सुङा सिन गाङे ताबा ओतान।

നിലവിൽ തിരഞ്ഞെടുത്തിരിക്കുന്നു:

मर्कूस 15: JUL

ഹൈലൈറ്റ് ചെയ്യുക

പങ്ക് വെക്കു

പകർത്തുക

നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക

जिरेल നെക്കുറിച്ച് കൂടുതലറിയുക