Matius 5
5
YESU MUPATURO: I MUNGKU (pasalaꞌ 5-7)
Kamaupaꞌang ung tongang
(Luk. 6:20-23)
1To na hele‑mo Yesu ti tau ung dang makàdaꞌ bosona, làngang‑mo mao i mungku. Tòna mesong‑mo, mindùkuꞌ‑i dasse: ho mesong. 2MarraranNa‑mi mupaturo: moa teꞌ,
3“Maupaꞌ ti tau ung mangàna: kalaena mase-mase i heleꞌna Puang,
sàbaꞌ dea‑mi se ti ung mangkoraia kadatuang suruga, na rara i latenna.
4Maupaꞌ ti tau ung masussa,
sàbaꞌ nipakatanai: se.
5Maupaꞌ ti tau ung i hoiꞌ pinanaha,
sàbaꞌ mampumanaꞌa lino ung màle.
6Maupaꞌ ti tau ung burorang pang ung mangkahara i katongangang,
sàbaꞌ nipatosàngi: se.
7Maupaꞌ ti tau ung mampulemu padanna,
sàbaꞌ nipulemua‑da ho.
8Maupaꞌ ti tau ung mabusa: pinanahanna,
sàbaꞌ mangìsànga Puang.
9Maupaꞌ ti tau ung mambaha kadameang,
sàbaꞌ nikonaia anakàna Puang.
10Maupaꞌ ti tau ung nisolàngi sàbaꞌ mampukauꞌ pampuinahanna Puang,
sàbaꞌ mangkoraia kadatuang suruga.
11U maupaꞌ se ìna u nisalai: se, nisolàngi, pang ìna nasang ung kadetu nipantannaꞌ‑ingko se sàbaꞌ Koi:. 12Sàbaꞌ nabi-nabi ung ara, to ha ara‑mo: se, nisolàngi‑da ho. Jadiꞌ, parallu u haka: se teng pang masannang, sàbaꞌ lammuꞌ ti kamaupaꞌangmu i suruga.”
Sia pang masilao:
(Mrk. 9:50, Luk. 14:34-35)
13“Dio se ung mangulaꞌ‑Maꞌ niala rampeang sianna lino. Hampoꞌ ìna miluhali matahaꞌ ti tàmiꞌangna, niakaa ti mampumasia pole? Hari:‑da hura: buaꞌna, sangadinna nitibe pang na ida-idaka tau.
14Pang u niala se ho rampeang masilaona lino. Hari:‑da ung hela manghuni lipu: ung one: iaho mungku. 15Pang hari:‑da ho tau ung mampahùrong pallita, màli: na patauꞌi‑i. Sangadinna, na patumenneng i kaoneang iaho mangking massilaoi: nasang tau i laling rasang. 16Mène: ho ti masilaomu, parallu tumpana: i heleꞌna tau, mangking na ita‑i se ti pingkuheoꞌ-heoꞌmu ung belo:, pang nai anto mampaiaho‑i se Amammu i suruga.”
Pipaturo: mampatu: atorang aluku tu Yahudi
17“Hau moa se teꞌ Ku bùruꞌ mai massangki atorang-atorang Musa pang Suraꞌ Nabi-nabi. Ku bùruꞌ mai ha massangki‑Kaꞌko, sangadinna Ku mangkannaꞌi. 18Sàbaꞌ matantu te ung Ku pusua: matung e teꞌ Ìna ara maang ti langiꞌ pang lino, besa hurup dea‑raka titiꞌ ung kàle: supi:‑i i laling suraꞌ to, hang hùlìngi:‑da, i da tikannaꞌ‑mi nasang. 19Deanna‑mo to, isai-sai ti ung mantengkai: nai besanna atorang to, moi ung kàle: supina‑i, pang mampaturo: tau sintàna: mampukauꞌ ung sibali, miluhalia ung kamìnang i hoiꞌ i kadatuang suruga. Hampoꞌ isai-sai ti ung mantoroꞌi atorang to pang mampaturo: tau sintàna: mampukauꞌ ung sibali, miluhalia ung iaho i kadatuang suruga. 20Jadiꞌ, Ku pusua: matung teꞌ, Ha helao: se mintama i kadatuang suruga i dang milàbi‑i nai ung si manarangna i aluku pang tu Parisi ti kamahuloangmu se i laling mampukauꞌ pampuinahanna Puang!”
Pipaturo: ung mampatu: kalalàkang
(Luk. 12:57-59)
21“U sàding‑mo se ara nipipaturo:‑ing mao i ampe-ampeta nai lùlung teꞌ, ‘Hau mupatei. Isai-sai mupatei parallu niesòngi pang nihukung.’*#5:21 Kel. 20:13, 21:12, Ul. 17:8-9. 22Hampoꞌ Ku pusua: matung teꞌ, Isai-sai ung lalaka salalona mao i sola: dalangna, parallu niesòngi pang nihukung. Pang isai-sai ti ung mangkonai: mao i sola: dalangna teꞌ, ‘Tau ung dang ara buaꞌna,’ parallu niesòngi pang nihukung i heleꞌna Ung si Nipiama:. Pang isai-sai ti ung mangkonai: mao i sola: dalangna teꞌ, ‘Bebe,’ parallu nitibe mao i api naraka.
23Deanna‑mo to, ìna arammu se ung mambaha pinomba mao i pantunuang pinomba, pang u kalehai teꞌ ara tau ung mipanaꞌ pinanahanna mao i dio, 24baꞌ palii:‑kai: dolung ti pinombammu to i heleꞌna pantunuang pinomba pang nao:‑kang sikabeloi: tau to. Ladu to, mading‑mo u sumule: pole pang mampinomba‑ing pinombammu mao i Puang.
25Mène: ho i ari: sikara-karammu, sidame‑ko se masàraꞌ to u tarrang se maang i pammulaoang mampatu: pengadilang, mangking hang na patùrung‑i ti mambaha‑ko mao i haking, pang haking to mampehea‑ko mao i polisi, pang u na patama i putarungkuꞌang. 26Sàbaꞌ matantu te ung Ku pusua: matung e teꞌ Ha helao:‑do sòhong nai putarungkuꞌang i dang nu bayaꞌ‑kai: nasang ti kasalaangmu.”
Pipaturo: ung mampatu: ung malahang
27“U sàding‑mo se ara nipipaturo:‑ing teꞌ, ‘Hau malahang.’*#5:27 Kel. 20:14. 28Hampoꞌ Ku pusua: matung teꞌ, Isai-sai ti ung manghele bahine pang na kapelai:, tau to malahang‑mo mao i bahine to i laling pinanahanna. 29Deanna‑mo to, ìna mènena mata konangmu mampahùling‑ko, kalèteke malai pang tibe! Sàbaꞌ belo:‑da sule: u kaloꞌ, nai none: kànaꞌ ti kalaemu hampoꞌ nitibe mao i naraka. 30Pang ìna mènena kangkang konangmu mampahùling‑ko, lengkeꞌi pang tibe. Sàbaꞌ belo:‑da sule: u tuho: sammaliang‑i kangkangmu, nai none: kànaꞌ ti kalaemu hampoꞌ mintama i naraka.”
Pipaturo: ung mampatu: kasiholiang
(Mat. 19:9, Mrk. 10:11-12, Luk. 16:18)
31“Nipipaturo:‑ing ho mène: tee, ‘Isai-sai ti ung mangholi bahinena, parallu manghengi‑ing suraꞌ kasiholiang mao i bahinena.’*#5:31 Ul. 24:1. 32Hampoꞌ Ku pusua: matung teꞌ, Isai-sai ti ung mangholi bahinena pambàtiꞌ bahine to ha malahang‑i, mantumang bahine to malahang ìna kimuane pole. Pang isai-sai ti ung mampubahine bahine ung niholi to, malahang‑da ho.”
Pipaturo: hau musumpa
33“U sàding‑mo se ho, ara nipipaturo:‑ing mao i ampe-ampeta teꞌ, ‘Hau tengkai: ti sumpammu, sangadinna aka ti ung nu pusumpa‑ming i heleꞌna Puang, parallu u kannaꞌi.’*#5:33 Im. 19:12, Bil. 30:2, Ul. 23:21-23, Kel. 20:7. 34Hampoꞌ Ku pusua: matung teꞌ, Hau musumpa se tungka, belo: mangola: suruga, sàbaꞌ suruga dea‑mo esòngang kadatuangna Puang, 35dea‑raka mangola: lino, sàbaꞌ lino dea‑mo pingidàkangNa,*#5:34-35a Hele i Yes. 66:1. Sitongangna, Puang, hari:‑da hatang kalaeNa. Hampoꞌ nirampe mène: datu: ung mangampu esòngang pang pingidàkang ung na kaonei: muparenta. dea‑raka mangola: Yerusalem, sàbaꞌ dea‑mo ti lipuna Datu: Baraꞌ.*#5:35b Hele i Mas. 48:3. 36Hau musumpa ho mangola: bakàmu, sàbaꞌ hari:‑do kuasammu mampumabusa: dea‑raka mampumalotong bahulakàmu, moi besa teng. 37Kànaꞌ teng u mangkonai:, ‘Ayyo,’ dea‑raka, ‘Hari:.’ Mangkonai: làbi nai anto, baꞌ bùruꞌ‑moda nai Ung bulituku.”
Pipaturo: hau mimbalaꞌ
(Luk. 6:29-30)
38“U sàding‑mo se, ara ho nipipaturo:‑ing teꞌ, ‘Mata nibalaꞌia mata, sise: nibalaꞌia sise:.’*#5:38 Kel. 21:24, Im. 24:20, Ul. 19:21. 39Hampoꞌ Ku pusua: matung teꞌ, Hau miàmaꞌ mao i tau ung mampukauꞌ ung kadetu matung, sangadinna isai-sai ti ung mantampeda: tammusu konangmu, hengi‑ing ho ti sammaliang. 40Pang ìna u na kapelai: na kara-kara tau sàbaꞌ mangkapelai: kayaꞌ i lalingmu, eloꞌna‑mo na ala‑i ho ti kayaꞌ i sòhongnammu. 41Pang isai-sai ti ampu parenta ung mamparuku‑ko mangkìling barangna besa kilo karaona, baha‑ing idua kilo karaona. 42Hengi‑ing mao i tau ung mampalau aka teng matung, pang hau mangkapìsiꞌi ho tau ung mangkapelai: mangindang aka-aka nai dio.”
Mampulemu poni:
(Luk. 6:27-28, 32-36)
43“U sàding‑mo se, ara ho nipipaturo:‑ing teꞌ, ‘Pulemu‑i ti solamu*#5:43a Im. 19:18. pang pukàrang‑i ti ponimu.’*#5:43b Hele i Mas. 139:19-22. 44Hampoꞌ Ku pusua: matung teꞌ, Pulemu‑i ti poni:-ponimu pang pusumbayang‑ing ti tau ung massolàngi‑ko, 45mangking u miluhali se mène: Amammu i suruga. Sàbaꞌ Dea‑da ti ung mampasoha: kùlaꞌ mao i tau ung làsi: pang mao ho i tau ung belo:, pang manguluꞌ urang mao i tau ung mahulo: pang mao ho i tau ung dang mahulo:. 46Sàbaꞌ, ìna u mampulemu se teng tau ung mampulemu‑ko, upaꞌ aka ti ung nu koraia se? Ha na pukauꞌ‑i dasse: ho naꞌ tupassima ti ung mène: to? 47Pang ìna u mangkamàtìki se teng sola:-solamu se, kauꞌ aka ti ung milàbi to? Ha na pukauꞌ‑i se naꞌ nasang tau moi ung dang dea ho tu Yahudi?
48Deanna‑mo to, pingkuheoꞌ-heoꞌmu se parallu hari: salaiangna, sibali Amammu i suruga hari: salaiangNa.”
നിലവിൽ തിരഞ്ഞെടുത്തിരിക്കുന്നു:
Matius 5: skx
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക