MATHAI 4
4
Jesuh Zaepacunghaih
(Mrk 1:12,13; Luk 4:1-13)
1Topacoengah Pakhra mah Jesuh to Diabol mah zae pacung ah oh hanah praetanghaeng ah a caeh haih.#Heb 2:18; 4:15 2Ni quipalito thung qum thun buh hoiaiah a oh pongah Jesuh loa zok amhlam boah. 3Topacoengah Diabol loa anih khaeah angzoh moa, “Nang hae Sithaw Capa tangtang ah na oh nahaeloa hlungnawk hae takaw ah coengsak ah,” tiah a naa pae.
4To-e Jesuh mah, “Cabu Kacai mah, ‘Kami hae takaw khueh hoiah hing thai ai, to-e, Sithaw pakhaa thung hoitoah ka tacawt lok hoi khueh ni loa a hingh,’ a ti,” tiah a naa pae.#Deut 8:3
5Topongah Diabol mah Jesuh to kacai Jerusalem vangpui ih Tempal imphu ah caeh haih moa, 6Anih khaeah, “Nang loa Sithaw Capa tangtang ah na oh nahaeloa longpung tathuk ah, kawmawtiah Cabu Kacai mah,#Sam 91:11-12
‘Sithaw mah angmah ih
vanminawk to nang hanah lokpaek tih,
anihcae mah a ban hoiah tapom tahang ueloa;
na khok to hlung pongah na daeng mak ai,’ tiah a oh,” a naa pae.
7Jesuh mah loa, “Cabu Kacai mah ‘Angraeng na Sithaw to tanoek tacak hmah,’ a tih to loa,” tiah pathim.#Deut 6:16
8Topacoengah Diabol mah Jesuh to mae kasang parai maeto khaeah a dawh haih moa longprae boih hoi a lensawkhaih boih to a hnuksak moa, 9Diabol mah, “Khokkhu samkrawn moa kai na bok nahaeloa hi boiboih hae kang paek han,” tiah a naa pae.
10Tona-ah Jesuh mah pathim moa, “Setan, caeh ving ah! Cabu Kacai mah, ‘Angraeng na Sithaw to bok aloa angmah ih tok khueh to sah ah,’ a tih bae,” tiah a naa pae.#Deut 6:13
11Topacoengah Diabol mah Jesuh to a caehtak, vanminawk to angzoh moa abom ahlom o.
Jesuh Galili Ah Toksak Amtong
(Mrk 1:14-15; Luk 4:14-15)
12Jesuh mah Johan to thongim ah pakhrak o tito a thaih na-ah Galili prae ah a caeh.#Mat 14:3; Mrk 6:17; Luk 3:19-20 13Anih loa Nazareth vang ah om aiah Kapernaum vang ah oh hanah a caeh. Kapernaum vang loa Zebulun hoi Naftali caengnawk ih prae thung Galili Tuili taeng ih kaom vang ni.#Jhn 2:12 14Hitiah ohhaih ih loa tahma Isaiah mah a thuih sut ih to acunghaih hanih ni. Isaiah mah,
15“Zebulun hoi Naftali prae,#Isa 9:1-2
tuiculi bang caehhaih loklam, Jordan tuiva yaeh ah ka om,
Gentelnawk ih prae Galili!
16Vinghaih thungah kaom kaminawk mah
aanghaih kalen parai hnuh o tih.
Duekhaih kaving prae thungah ka omnawk nuiah
aanghaih to tacawt tih,” tiah a thuih.
17To tue kazit hoiloa Jesuh mah, “Van Poenghaih loa a hnaih boah pongah na zaehaih to caehtak oah,”#Mat 3:2 tiah tamthang lok to thuih amtong.
Tangaa Tamaa Longpalito A Kawk
(Mrk 1:16-20; Luk 5:1-11)
18Jesuh loa Galili tuilitaeng ah linglong thuk tahang nathuemah tangaa ka naehkung naukamza Simon (Piter naa pae ih) hoi amnauk Andru hnit, tuili ah palok hoiah tangaa ka haeng to a hnuk. 19Jesuh mah to hnit khaeah, “Kai hnukah bang hoi ah, kami naehkung ah coengh hanah kang patuk han,” a naa pae. 20Anih hnit loa paloknawk to caeh hoi tak sut moa a hnukah bang hoi roep.
21To hoitoah a caeh moa kalah naukamza hnit, Zebedi capa Johan hoi Jakob to a hnuk. Anih hnit loa ampa Zebedi hoiah nawnto palong thungah oh o moa palok to pading o. Jesuh mah to hnit to a kawk. 22Anih hnit loa ampa hoi palong to caehtak moa a hnukah baang hoi roep.
Jesuh Mah Patuk, A Thuih, A Hoihsak
(Luk 6:17-19)
23Jesuh loa Galili prae bum boih ah caeh moa sinakok#4:23 Sinakok hae Sithaw bokhaih han, ca amtukhaih han, khosak lok aramhaih han, lumlai thuihhaih hanah acu amkhuenghaih im ni. kruekah a patuk pae moa Van Poenghaih Tamthang Kahoih to a thuih moa ngoinathaih hoi nathaih congca ka pauepnawk to a hoihsak.#Mat 9:35; Mrk 1:39 24Anih ih tamthang loa Siria prae bum boih ah amthang moa ngannanawk, ngoinathaih hoi raihaih congca ka pauepnawk, taqawk mah naeh ihnawk, a tuetue na-ah kadueh sutsutnawk, khokban kamprawk kaminawk boih to angzoh o haih moa a hoihsak boih. 25Galili prae hoi Vang Hato naa pae o ih prae, Jerusalem hoi Judea prae hoi Jordan tuiva yaeh bang hoitoah kami katingai angzoh o moa anih hnukah baang o.
നിലവിൽ തിരഞ്ഞെടുത്തിരിക്കുന്നു:
MATHAI 4: AKNT2023
ഹൈലൈറ്റ് ചെയ്യുക
പങ്ക് വെക്കു
പകർത്തുക
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fml.png&w=128&q=75)
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Asang Khongso New Testament in Eastern Khumi © Bible Society of Myanmar, 2023.