Wepélisiananu 31
31
Jakɔb Kanaan zi sia
1Laban benu a gun gyɛna yé Jakɔb a ’ma; wa fena léé: Jakɔb ko ti leefɛnu faa si é lee; ko ti lé fɛnu nya lé é fua ble bɛ. 2Yé Jakɔb a ye léé, Laban yara ’ka é vazia bélé é vinin zé zo lo.
3Yé Gakelebale lé Jakɔb lɛ léé: ’I nɔla i tinu lé tɛrɛ la, i yaafla la, yé maa dan kɛlɛ lɛ i va. 4Rasɛl valé Léa a féi Jakɔb lé trubɛnu va, yé Jakɔb we pa wo lɛ zia léé, ’wo da. 5É lé wo lɛ léé: Maa ka ti yara ye, yé é ’ka an vazia bélé é vinin zé zo lo; naa, an ti lé Bale a an va. 6Kabozen a gi dɔɔ léé, an nyanama pa ka ti va anlé plɛplɛ faa nya. 7Ka ti dabli kɛlɛ an lɛ yé é an banwofɛ tavɔɔ gɔnɔ vu, naa, Kazambale ’ka zi nɔ lɛ a lɛ léé, é wenyané kɛlɛ an lɛ lo. 8Dé é a fe léé: A kɔlɛ vɔɔlenu é dan kɛlɛ lɛ i ban nya, ’té ’blanu faa a né yaana ’wo kɔlɛ vɔɔlenu nya. Dé é a fe léé: A nyɔɔ pɔrɔpɔrɔnu é dan kɛlɛ lɛ i ban nya, ’té ’blanu faa a né yaana ’wo kɔlɛ nyɔɔ pɔrɔpɔrɔnu nya. 9Kazambale ka ti lé trubɛ si a lee yé é a nɔ an lɛ. 10Bléyian va lé ’blanu a vɔna wo ke ta, an yara nwa yé maa ye nyɛ fla léé, ’blagɔnénu lé woo vɔa ’blanu ta, wo kɔlɛ nyɔɔ a pɔrɔpɔrɔ valé é vɔɔle valé golegole nya. 11Yé Kazambale lé lanje we fe maa lɛ nyɛ fla yé é léé: Jakɔb. Maa léé: Maa lo. 12É léé: ’I yara nwa yé bé gini. ’Blagɔnénu faa lé wa vɔna ’blanu ta, wo kɔlɛ nyɔɔ a pɔrɔpɔrɔ valé é vɔɔle valé golegole nya. We faa lé Laban a kɛlɛ i lɛ, maa a ye. 13Maa a Bétɛl Bale nya, fɛana lé i nyɔnɔ zén weseledɔmigifɛ ta, fɛana lé i bale kun, maa a ana Bale nya. Sin, ’i nwa, ’i si tɛrɛ ’ko la yé ’i nɔla tɛrɛ lé wo i yaa a ta, ana.
14Rasɛl valé Léa lé a lɛ léé: Kolé fɛ valé kozé zarafɛ a é ziin ko ti lé kɔn gii? 15Ko ’ka a yuɛ gi bɛnnu zo loo? É ko dan yé é ko ma gɔɔli ble. 16Fua faa lé Kazambale a si ko ti lee, é a ko valé kolé nénu zé nya. We faa lé Kazambale a fe i lɛ, bé kɛlɛ sin.
17Jakɔb nwa yé élé nénu valé é nanu vɔ nyɔgɔménu punu. 18Alé trubɛ faa koo, fɛnu faa lé é ke a lee koo, trubɛ lé é a ye Padan‐Aram koo, é wo faa si yé é go é ti Izak vazia, Kanaan tɛrɛ la. 19Laban a ’élé ’blanu kyɛɛ bɔina aan wo Rasɛl é ti lé miyiliné si kyeen nya, 20yé Jakɔb dabli kɛlɛ Aramézan Laban lɛ yé é ’ka zi laa lɛ a lee lo. 21É vɔ fli gi, yee valé élé fɛnu faa nya. É nwa yé é yuu kini yé é go Galaad gɔ vazia.
Laban wo zuo bin
(LvS 105:13–15)
22A yi yaazan nya wa fe Laban lɛ léé, Jakɔb vɔ fli gi. 23Yé Laban é zuanénu pa é va yé wo go Jakɔb zuo yi sɔrafié ta nya, yé wo bɔ a ma Galaad gɔ nwiin. 24Kazambale da Aramézan Laban va nyɛ fla é béli yé é lé a lɛ léé: ’I yuɛ pa ibo va, dé wezin léoo, dé wenyané léoo, té bé fe Jakɔb lɛ lo. 25Laban bɔ Jakɔb ma, ’té Jakɔb élé sɔkɔn dɔ gɔ nwiin. Laban ézé dɔ é ziin é zuanénu va, Galaad gɔ nwiin.
26Laban lé Jakɔb lɛ léé: Bé kɛlɛ bɛ kaa? Mɛmalé i dabli kɛlɛ an lɛ yé i go an lunu nya bélé luunu lé wo wo si gwɔun nya, wo zoo? 27Mɛmalé i vɔ fli gi kyeen nya yé i dabli kɛlɛ an lɛ yé i ’ka i fwiwe fe lɛ an lɛ loo? Dé é a bélé bé fe an lɛ kɔɔn, ’té maa ’ka zi nɔ lɛ i lɛ yé maa i dɔ zia ginanale koo, lɛrɛvɔle koo, poo valé kɔnɔ gyɛle koo, wo nya loo? 28I ’ka boenwo zi nɔ lɛ an lɛ an we an benu valé an lunu va lo. Bé kɛlɛ ’tu nya. 29An bɛ a plɛplɛ, an bɔaléé an wenaané kɛlɛ i lɛ, naa, i ti zé Bale lé an lɛ yese léé, an yuɛ pa anbo va, dé wezin léoo, dé wenyané léoo, té maa wo do fe Jakɔb lɛ lo. 30I ti lé kɔn lɔrɔ a i gyɛna sin, amalé i go, naa, mɛmalé i anlé balenu kyeenwoo?
31Jakɔb lé Laban lɛ léé: An kana léé, dé i dan i lunu si lɛ an lee? 32Naa, dé i ’ilé balenu ye mian va, ’bɛzan ’é ga ma. ’I anlé fɛnu nagini ko bwenu yuɛ va ’ko, dé i fɛan ye izé nya an va, bé si. Jakɔb ’ka a gi dɔɔa léé, Rasɛl wo kyeenwo lo. 33Laban wɔra Jakɔb lé sɔkɔn koo, Léa lé sɔkɔn koo, nyanamapa lomu fié lé sɔkɔn koo, wo gi, yé é ’ka fɛ do ye lɛ ’bɛna lo. É bɔra Léa lé sɔkɔn gi yé é wɔra Rasɛl lé sɔkɔn gi. 34Rasɛl miyilinénu si kɔɔn, yé é wo pa nyɔgɔmé punu nyanalafɛ wuo yé é nyana a ta. Laban sɔkɔngi?-?fɛnu faa gi fwi, yé é ’ka fɛ do ye lɛ lo. 35Rasɛl lé é ti lɛ léé: Té anzan bli é fli lo ma; an vɔ lomu va amalé an ’ka bɔa nwale lɛ i lɛ lo. É a gini, yé é ’ka miyilinénu ye lɛ lo.
36Jakɔb bli fli, yé é we sia Laban va, yé é lé a lɛ léé: Mɛ wenyané lé maa a kɛlɛ yé i an zuo bin i sɔbɛla nyaa? An saan kaa? 37Dé i anlé fɛnu faa gi fwi, mɛ fɛ lé bé ye wo gi ilé kɔngifɛ nyaa? Bé bɔra an bwenu valé i bwenu yuɛ va ’ko, yé wo kolé we ble. 38Bé ye, an lɛɛ yɔ do kɛlɛ i va. Ilé ’blanu valé ilé bolinu ’ka wo né do kpen sɛrɛ lɛ lo, yé maa ’ka ilé trubɛnu va ’blagɔnénu ble lɛ pelo. 39Maa ’ka da lɛ wi tuolenu nya i lɛ lo, maa a sɛrɛlenu banwo an boan. Yee lé wa kyeenwo an lee é yiéyi valé é béli, i wo laa an lee. 40Yiri an gyɛ é yiéyi yé dunu an gyɛ é béli yé an ’ka yi gyɛ lɛ lo. 41Bé ye, an lɛɛ yɔ do kɛlɛ i va, maa nyanama pa i lɛ lɛɛ vu ta ziɛn i lu fiénu we ma yé an nyanama pa lɛɛ suiɛdo ilé trubɛnu we ma. Yé i an banwofɛ tavɔɔ gɔnɔ vu. 42Dé maa ’ka kɔɔn an ti zé Bale ye lɛ anzé nya lo, ’té é ke Abraam zé Bale nya, ’té Izak kanaan a lee bɛ, ’té i an pa zia an lee koro nya é pla. Kazambale anlé nyanéblele valé an panyanama ye, yé yese é we ble i va.
43Laban lé Jakɔb lɛ léma: Nélomu ’ko a an lunu nya, yé nénu ’ko a alé nénu nya yé trubɛ ’ko a anzé trubɛ nya, yé fɛ faa lé bé ye, wa anzé nya. An lunu koo, nénu lé wo wo yaa koo, kyɔ an bɔa a kɛlɛle lɛ wo lɛ kaa? 44’I da, ko gi pa do, bii koo, maa koo, yé é kɛlɛ nayewe nya maa valé bii méléna.
45Jakɔb gɔlɛ do si yé é a dɔ weseledɔmigifɛ nya. 46Jakɔb lé é bwenu lɛ léé: ’Ka gɔlɛnu bié. Wo gɔlɛnu sia yé wa zun dɔ. Yé wo fɛ ble a ta bɛ. 47Laban a tɔ pa Jégaa‐Saaduta yé Jakɔb a tɔ pa Galɛd. 48Laban léé: Gɔlɛ zun ’ko kɛlɛ kyɔ wenayefɛ nya maa valé bii méléna. Amalé wa tɔ pa Galɛd. 49Laban léma: Dé ko ’ka ko ke sɔnɔ lo, Gakelebale ’é yuɛ pa maa valé bii ta ma, amalé wa tɔ pa é ziin Misipa. 50Dé i an lunu pa é naané, dé i le bɛnu si é ziin i na nya, mi ’ka ana yezan nya lo; ’i yuɛ pa ibo va é zima, Kazambale ɛ ke maa valé bii lé wenayezan nya. 51Laban lé Jakɔb lɛ léé: Gɔlɛzun ’ko, weseledɔmigifɛ lé maa a dɔ maa valé bii méléna, yee lo. 52Gɔlɛzun ’ko ’é kɛlɛ wenayefɛ nya ma; weseledɔmigifɛ ’ko ’é kɛlɛ wenayefɛ nya, té maa gɔlɛzun ’ko kini yé an go i va wenyané kɛlɛle i lɛ we gi lo ma; yé gɔlɛzun ’ko lé ke weseledɔmigifɛ nya ’ko, té bé kini yé i da an va wenyané kɛlɛle an lɛ we gi lo. 53Abraam valé Nakɔɔ zé Bale valé wo ti zé Bale, ’é kɛlɛ kolé weblezan nya ma. Naa, Bale lé Izak éé kanaan a lee, yee lé Jakɔb a ’nyɔɔn. 54Jakɔb Bale ban gɔ nwiin, yé é ’é bwenu laa fɛblele ma. Wo fɛ ble yé wo yii gɔ nwiin.
55Laban nwa bladi tutu yé é pwɛpwɛ vɔ é benu valé é lunu ma yé é wo drɔɔ vo. ’Bɛ zuo é zi sia yé é go élé fla.
നിലവിൽ തിരഞ്ഞെടുത്തിരിക്കുന്നു:
Wepélisiananu 31: GOURU
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Alliance Biblique de Cote d'Ivoire 1979
