Wepélisiananu 30
30
1Rasɛl a ye an wo léé, é ’ka né yaana Jakɔb lɛ lo, é ’é buru ma maawo yé é lé Jakɔb lɛ léé: ’I né nɔ an lɛ, dé ’bɛ kaan lo, an gaan. 2Jakɔb bli fli Rasɛl ma yé é léé: Maa a Bale nya yé an né yaale yi ga i lee? 3É léé: An wuozan Bila lo; ’i go yi gyɛ a va yé é né yaa an boro la yé maa anzé négɔnénu ye ’bɛ ma. 4Yé é wuozan Bila nɔ Jakɔb lɛ a na nya yé Jakɔb yi gyɛ a va. 5Bila bɔn si yé é né yaa gɔné nya Jakɔb lɛ. 6Rasɛl léé: Kazambale anlé we ble, é an dére ’ma yé é négɔné nɔ an lɛ. Bɛwemalé é a tɔ pa Dan. 7Rasɛl wuozan Bila bɔn si é ziin yé é négɔné fiézan yaa Jakɔb lɛ. 8Rasɛl léé: Bale bɔ an va yé an guli dan an buru va yé guliwuo vo an lɛ. Yé é a tɔ pa Néfitali.
9Léa a ye aan wo léé, é daan né yaale ma, yé é wuozan Zilpa si yé é a nɔ Jakɔb lɛ a na nya. 10Léa wuozan Zilpa né yaa Jakɔb lɛ gɔné nya. 11Léa léé: We néné lo. Yé é a tɔ pa Gad. 12Léa wuozan Zilpa négɔné fiézan yaa Jakɔb lɛ. 13Léa léé: An gi nana é baba. Lomu é dan maa laa lɛ ginanazan. Yé é a tɔ pa Azɛɛ.
14’Sagyɛbléyi va Rubɛn go bwi gi yé lia lé wa laama mandragoo, é a ye. É goan é bu Léa lɛ. Rasɛl lé Léa lɛ léé: Ilé zanté, i be lé mandragoonu bɛ, ’i anzé nɔ. 15Léa lé a lɛ léé: An zana sile an lee a bii gi we sɛné nya, amalé i an be lé mandragoonu sié é ziin? Rasɛl léé: É béli ’ko é dan yi gyɛ lɛ i va i be lé mandragoonu lé we ma. 16É nyanadi Jakɔb a sina féi aan wo, Léa go a si lɛ zia yé é léé: Maa va lé i dan. Maa i lɔ an be lé mandragoonu nya. ’Bɛlé béli, é yi gyɛ a va. 17Bale Léa dére nyi si, yé é bɔn si yé é négɔné soruzan yaa Jakɔb lɛ. 18Léa léé: Maa an wuozan nɔ an zana lɛ, amalé Bale an gooli pa. Yé é a tɔ laa Isakaa. 19Léa bɔn si é ziin yé é négɔné suiɛdozan yaa Jakɔb lɛ. 20Léa léé: Bale blɛ zima kɛlɛ an lɛ. Sin, an zana é dan vo lɛ an va, anlé négɔné suiɛdo yaale a lɛ lé we ma. Yé é a tɔ pa Zabulɔn. 21A zuo é né yaa le nya yé é a tɔ pa Dina.
22Rasɛl sele dɔ Kazambale gi yé é a dére nyi si yé é a kɛlɛ néyaazan nya. 23É bɔn si yé é né yaa gɔné nya yé é léé: Bale yaragyɛwe si an ma. 24Yé é a tɔ pa Jozɛfu yé é léé: Gakelebale ’é a taa pa négɔné do nya ma.
25Rasɛl Jozɛfu yaa an wo, Jakɔb lé Laban lɛ léé: ’I zi nɔ an lɛ ’an go ko va, anlé tɛrɛ la. 26An nanu valé anlé nénu lé, an nyanama pa i va wolé we ma, ’i wo nɔ an lɛ ’an goan. Nyanama lé maa a pa i va, bé dɔɔ. 27Laban lé a lɛ léé: ’I an ye mi zin nya ma. Maa a ye é zima léé, Gakelebale an drɔɔ vo ilé we ma. 28’I ban ’léé fe an lɛ yé maa dan a nɔ lɛ i lɛ. 29Jakɔb lé a lɛ léé: Fɛan zo lé maa nyanama pa i va koo, ilé trubɛnu kɛlɛ fɛan zo an va koo, bé gi dɔɔ. 30Fɛ kiéné ɛ ke i lee an dale ’lɛ, é fan, yé Gakelebale i drɔɔ vo an dale zuo. Sin, maa anbo zé nyanama paan mɛ yi laa? 31Laban léé: Maa mɛ fɛ nɔ i lɛɛ? Jakɔb lé a lɛ léé: Té i fɛ do nɔ an lɛ lo. We lé maa dan a fe lɛ i lɛ, dé bé nyi si, maa dan fɛblele nɔ lɛ ilé trubɛnu lɛ yé maa dan wo tabin lɛ é ziin. 32Maa dan gié lɛ ilé trubɛnu faa zuo kyɔ. ’Blanu va ’blanénu lé wo kɔlɛ ke é vɔɔle koo, wo lé wo kɔlɛ ke golegole koo, ’blané tinu faa koo, bolinu lé wo kɔlɛ ke é vɔɔle koo, wo lé wo kɔlɛ ke golegole koo, maa wo paan é yɛrama. ’Bɛnu ’é kɛla an ban nya. 33Dé i da tɛlɛ an banwofɛnu nagini lɛ, anlé we tegele é dan anzé fe lɛ. Boli lé a kɔlɛ ’ka é vɔɔle lo valé yee lé a kɔlɛ ’ka golegole lo koo, ’blanénu lé wo kɔlɛ ’ka é ti lo koo, dé bé ye wo va, ’té kyeen lé maa wo. 34Laban léé: ’Bɛ a é zima; ’é kɛlɛ i dére yɛrama ma. 35Yi duo ta, boligɔné kɔlɛ nyɔɔ pɔrɔpɔrɔnu valé golegolenu koo, bolida kɔlɛ nyɔɔ vɔɔlenu valé golegolenu koo, koɛnu faa lé wo kɔlɛ fu ke koo, ’blanu va ’bla tinu faa koo, Laban wo si trubɛnu va yé é wo pa é benu lee. 36A zuo é yee valé Jakɔb worona kɛlɛ yi yaa tawole nya, yé Jakɔb vo fɛblele nɔna Laban lé trubɛ pɔnénu lɛ.
37Pupliéyili bɛ drɔɔdrɔɔnu koo, amandéyili bɛ drɔɔdrɔɔnu koo, plataneyili bɛ drɔɔdrɔɔnu koo, Jakɔb wo bɔi yé é wo ma nyɔɔ gyɛ yé yilibɛnu ma bɔra fu. 38A zuo, yilibɛnu lé é wo ma nyɔɔ gyɛ bɛ, é wo pla trubɛnu lé ’yiminina lé wa kɛlɛ, ana, trubɛnu lé woo dan ’yi mini lɛ, wolé a yele we ma, wo vɔle wo ke ta we gi ’bɛna. 39’Blanu vɔ wo ke ta yilibɛnu sɔnɔ, yé wo né yaa ’wo kɔlɛ nyɔɔ pɔrɔpɔrɔnu koo, vɔɔlenu koo, golegolenu koo, wo nya. 40Jakɔb ’blanénu vabo, yé wonu lé wo kɔlɛ ke ’é nyɔɔ pɔrɔpɔrɔnu nya, wo valé kɔlɛ tizannu nya Laban lé trubɛnu va, é wo zén ékeva; naa, é ’élé trubɛnu pa é yɛrama yé é ’ka wo zén lɛ Laban lé trubɛnu va lo. 41Yifaama dé ’bla fuuatazannu a vɔna wo ke ta, Jakɔb éé yilibɛnu plaan trubɛnu lé ’yiminina, ’blanu yuɛ va, wo vɔle wo ke ta yilibɛnu sɔnɔ we gi. 42Dé ’blanu fuu ’ka wo ta lo, é ’ka yilibɛnu plaan ana lo. A zo lé a kwéélenu kɛlɛ Laban zé nya, yé a fuuatazannu kɛlɛ Jakɔb zé nya.
43Gɔné ’ko lé fuablele gi gyɛ; trubɛnu koo, a wuomunu valé a wuolomu koo, nyɔgɔménu koo, sokofalenu koo, wo kɛlɛ a lee di.
നിലവിൽ തിരഞ്ഞെടുത്തിരിക്കുന്നു:
Wepélisiananu 30: GOURU
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Alliance Biblique de Cote d'Ivoire 1979
