Wepélisiananu 14
14
Minwiinmunu lé gulidanwe
(1 Sam 30:1–31)
1Bléyian va lé Amrafɛl ke Sinéaa mununwiinzan nya, ’té Aajɔk ɛ ke Élasaa mununwiinzan nya, ’té Kédɔlaomɛɛ ɛ ke Élam mununwiinzan nya, ’té Tidéal ɛ ke Gojim mununwiinzan nya, 2’bɛ bléyi va wo guli dan mununwiinzannu bɛnu va; Sɔdɔm mununwiinzan Béra koo, Gɔmɔɔ mununwiinzan Biisa koo, Adima mununwiinzan Sinéab koo, Séboim mununwiinzan Sémébɛɛ koo, Béla mununwiinzan Soaa koo, woo lé.
3Fɛ lé wana laama Sidim, ’té é ke Wɛminiélɛ ’yi nya sin bɛ, munu lé wo wo tɔ nɔnɔ lao bɛ, wo zén ékeva ’bɛna, gɔnu worona. 4Lɛɛ vu ta fié gi, ’té wa é plale Kédɔlaomɛɛ wuo. A lɛɛ vu ta yaazan nya wo nwa a ma.
5A lɛɛ vu ta ziɛnzan nya, Kédɔlaomɛɛ valé minwiinzannu lé wo ke a va, wo zén tawole va, yé guli ’wuo vo wo lɛ. Guli Réfaim munu gyɛ Asétérɔ‐Kaanaim; guli Zuzi munu gyɛ Am; guli Émi munu gyɛ Savé‐Kiijataim; 6guli Ori munu gyɛ wolé gɔ lé wa laama Séii, ana, yé wo bɔ Paran lé fɛna dégélé na, yee lé é ke nyéné saa lé fɛna sɔnɔ. 7’Bɛ zuo wo nɔla, yé wo da é ziin An‐Misipat, ’té é ke Kadɛs nya, ana, yé wo Amalɛk munu gyɛ guli nya wo nyanana faa na, wo valé Amoré munu nya, ’té woo nyanaan Asasɔn‐Tamaa. 8Sɔdɔm mununwiinzan koo, Gɔmɔɔ mununwiinzan koo, Adima mununwiinzan koo, Séboim mununwiinzan koo, Béla lé ke Soaa nya, ana mununwiinzan koo, wo péli vɔ ékeva do yé wo guli dan munu koɛnu va, gɔ worona lé wa laama Sidim, ana. 9Élam mununwiinzan Kédɔlaomɛɛ koo, Gojim mununwiinzan Tidéal koo, Sinéaa mununwiinzan Amrafɛl koo, Élasaa mununwiinzan Aajɔk koo, woo lé; minwinnzan blɛn ziɛn ’ko, wo guli dan minwiinzan blɛn soru va.
10Gudrɔn guru kiɛre ana Sidim gɔ worona. Sɔdɔm mununwiinzan valé Gɔmɔɔ mununwiinzan vlan si yé wo vɔ gurunu gi, yé mi pɔnénu go vlan nya gɔ vazia. 11Guliwuo volɛmunu Sɔdɔm valé Gɔmɔɔ lé fuafɛnu faa si, ’bɛ valé wolé fɛblele faa nya, yé wo go wo nya. 12Yé Abram bwe be Lɔt lé ke é nyanale Sɔdɔm bɛ, wa si, yee valé élé fɛnu nya, yé wo go wo nya.
13Yé vlanburuzan do da yé é a zuo fe Ébru mi Abram lɛ. Mi ’ko a é nyanale Mamré lé sɛnéyilinu méléna. Mamré a Amoré mi nya. Yee koo, a bwe Esikɔl koo, a zuané Anɛɛ koo, wonu ɛ gi pa do Abram va. 14Abram a ’ma aan wo léé, wo é bwe be kun, tɔɔn, é élé nyanamapazannu wuru do yɔ soru wɔlɛ vu ta sɔraa si, ’té wolé nyana mini mi pɔnénu zé ta, ’té wo wo yaa alé kɔn gi bɛ, é wo si yé é gulidanfɛnu pa wo lee, yé wo go minwiinzannu zuo fɔɔ yé wo bɔ Dan. 15Yé Abram élé munu gi bɔi, munu koɛ gyɛle é béli we gi, yee valé élé nyanamapamunu nya; Abram wo gyɛ yé wo wo zuo bin fɔɔ wo bɔ Soba, ’té ’bɛ ke Damas bɛbolazia bɛ, ana. 16Yé é da fuafɛnu faa nya é ziin; a bwe be Lɔt koo, élé fɛnu koo, lomu koo, munu koo, é da wo nya é ziin é lee.
Mɛlkizédɛk lé we
(LvS 110:4; Ébr 7:1–18)
17Abram si aan wo Kédɔlaomɛɛ valé é va minwiinzannu kelena guli nya, Sɔdɔm mununwiinzan bɔra keena a nya Savé lé gɔworona, yee lé é ke minwiinzan blɛn lé gɔworona nya.
18Salɛm mununwiinzan lé wa laama Mɛlkizédɛk, é da buru valé nwɛ nya. É a Lagibale banzan nya. 19É Abram drɔɔ vo yé é léé: Lagibale, yee ɛ ke la valé tɛrɛzan nya, yee ’é i drɔɔ vo ma. 20Lagibale lé é i nyanémunu pa i lee, a drɔɔ ’é vo ma. Yé Abram fɛ faa vuzan nɔ a lɛ.
21Sɔdɔm mununwiinzan lé Abram lɛ léé: ’I minu nɔ an lɛ yé ’i fuafɛnu si izé nya. 22Abram lé Sɔdɔm mununwiinzan lɛ léé: Maa bɛ nwa lagi zia, Gakelebale vazia, yee ɛ ke Lagibale nya, yee ɛ ke la valé tɛrɛzan nya; 23fɛnu lé é ke izé nya, an ’ka we do kpen sié ’bɛ va lo, dé é a galewɔlɛ boen nyaoo, dé é a sawalabale do nyaoo, maa ’ka ’bɛ sié lo, dé i da fe léé, yee ɛ Abram kɛlɛ fua nya. 24An ’ka we do sié anzé nya lo, ’té dé é ’ka fɛ lé pɛniɛnu a ble, a nya lo, ’bɛ valé an béénu lé fɛnu nya; munu lé wo tawo an va, Anɛɛ koo, Esikɔl koo, Mamré koo, wo ɛ dan wozé fɛnu si lɛ ma.
നിലവിൽ തിരഞ്ഞെടുത്തിരിക്കുന്നു:
Wepélisiananu 14: GOURU
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Alliance Biblique de Cote d'Ivoire 1979
