Wepélisiananu 15
15
Kazambale é gi pa do Abram va
(Rom 4)
1We ’konu bɔle zuo, Gakelebale we fe Abram lɛ yuɛzi gi, yé é léé: Abram, té i kana pelo. Maa a i takuunfɛ nya, yé maa dan i gooli pa lɛ blɛn. 2Abram lé a lɛ léé: Anzan, Gakelebale, mɛ fɛ lé i dan a nɔ lɛ an lɛɛ? Maa a gona, ’té anlé né do kpen ’ka lo, yé an zarablezan lé ke Damas mi Éliézɛɛ nya. 3Yé Abram lé é ziin léé: Bé ye, i ’ka né nɔ lɛ an lɛ lo, yé mi lé wa yaa anlé kɔn gi, yee ɛ dan kɛlɛ lɛ an zarablezan nya.
4Yé Gakelebale é dére fe a lɛ léé: Mian ’bɛ é kɛla i zarablezan nya, ’bɛ ’ka ’bɛ nya lo. Mi lé i dan a yaa lɛ, yee ɛ dan kɛlɛ lɛ i zarablezan nya. 5É go a nya béera yé é léé: ’I lagi gini, yé ’i monénénu nɔnɔ, dé i bɔa wo nɔnɔle lɛɛ? Yé é lé a lɛ léé: I kulu é dan kɛlɛ lɛ bélé wo zo. 6Abram bli vo Gakelebale dére lɛ, yé ’bɛ kɛlɛ a ma we tegele nya.
7Gakelebale lé a lɛ é ziin léé: Maa a Gakelebale nya. Maa i si Uu, Kaldé tɛrɛ la, tɛrɛ ’ko nɔle i lɛ izé nya we gi. 8Abram lé a lɛ léé: Anzan, Gakelebale, mɛ fɛ ma lé maa dan a dɔɔ lɛ léé, é dan kɛlɛ lɛ anzé nyaa? 9Yé Gakelebale lé a lɛ léé: Winu lé wo lɛɛ bɔ yaa, ’i wo si; diridané a do, boligɔné a do, ’blagɔné a do; ’i wo si, yé i plala valé plawuo boroné pa wo va. 10Abram wi ’konu faa sia yé é wo faa fee bo é méléna tegele, yé é wo pla é ke yɛrama bale fié. É ’ka mianénu fee bo lɛ lo. 11Yé wiblemianénu wo po pla yee winu ’ko ta, a siale we ma, yé Abram wo bin.
12Yiri vɔle tɔɔn, yé yi blɛn Abram kun, yé bé ye, kana blɛn zén a gi, yé gunu dɔra tiritiri. 13Yé Gakelebale lé Abram lɛ léé: ’I we ’ko dɔɔ ma, i kulunu é dan kɛlɛ lɛ bɛnnu nya, tɛrɛ lé é ’ka wozé nya lo, a ta. Wo dan kɛlɛ lɛ bɛnnu wuozannu nya, yé bɛnnu é dan yaa lɛ wo ta lɛɛ wuru fié gi. 14Bɛn lé é dan pla lɛ wo nwiin bɛ, maa dan alé we ble lɛ, yé i kulunu é dan si lɛ ana fua blɛn nya. 15Yé bii é dan go lɛ drɔɔ i tinu va; i dan kwa gyɛ lɛ gi nanale nya, ’bɛ zuo yé wo dan i pa lɛ. 16Wo néné zi néné ziɛnzan nya wo dan nyana lɛ ’ko é ziin. Naa, Amoré munu lé wenyané ’ka tan fan lɛ lo. 17Dé yiri vɔ, gunu dɔra tiritiri, yé bé ye, kyɛ blɛn bɔra ana é goi nya, yé winu lé Abram wo fee bo bɛ, kyɛnéné vo giéna wo méléna.
18’Bɛ yi la Gakelebale gi pa do Abram va, yé é léé: An tɛrɛ ’ko nɔ i kulu lɛ; a péli é sia Éjipiti yuu blɛn ma, yé éé goo fɔɔ yé é bɔ yuu blɛn lé wa laama Yufrat, a ma. 19Kéni munu koo, Kénizi munu koo, 20Kadimon munu koo, Éti munu koo, Férézi munu koo, Réfaim munu koo, 21Amoré munu koo, Kanaan munu koo, Giigazi munu koo, Jébusi munu koo, wolé tɛrɛ lé maa dan a nɔ lɛ i kulu lɛ.
നിലവിൽ തിരഞ്ഞെടുത്തിരിക്കുന്നു:
Wepélisiananu 15: GOURU
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Alliance Biblique de Cote d'Ivoire 1979
