Tioni 6

Iesua muvelunu la'ilali xa'a tamitema 5000

1 Xe mune'e ili'i la Iesua mulai xalevile no kupa Xalili ane ualasou vilela lexe kupa Taiveliasi. 2Xe tamitema latala e latala mimulimulinu xo mimaisou sosovo so xavi mu'oxonu ane so mupaipoune'i tamitema mipipiena. 3La Iesua oli'a tatisaipeliou mitelai no la'olu vile la mitalupexa so mima'ila ne. 4Ioxe, la voxo so lavilelu noxi'a Taiuta e so Mualasi'a a mune'e alai. 5Iesua oli'a tatisaipeliou mixolu no la'olu xe anu musaxi loxo 'o la mumaisi'a tamitema latala e latala a ine'e noxou. Sila mutali'isou Pilipi lexe “Nenge talotonu xa'a tamitema ano'o la'ilali so i'ou a ne'ei?” 6Anu mutali'isou axone so lexe Pilipi ukolinu axova. Xo anu Iesua mulavusou lumamo lexe u'oxonu mi ma'i. 7La Pilipi mukolinu lexe, “Loxo nenge talotonu la'ilali no anu 200 kina la anu umomomoxa'a vilevilesi so ino'u utu'utuxusi uasi.”

8Ioxe, tisaipeliou vile ualasou lexe Anitilu e Saimoni Pita vimou, mune'enu molomolo vile noxou Iesua la muvikala lexe, 9“Pileti ta'uve ilou sinana soxu tamei a uai noxou aliku soxu 'o. Ia tamitema tapiena a ixolu laso la'ilali se 'o umomomosi'a axovae?”

10Xale lia ne laxalasisi, laso Iesua muvikalane'i tatisaipeliou lexe, “Ngavikalane'i tamitema lexe italupexa.” La tamitema ne tavu'alo e tavu'alo, navasi'a tamulusi loxo 5000. 11Xe ane'i mitalupexa mukalu la Iesua muno'u pileti ilou sinana soxu ne mo muvikala laixe noxou Mosinge. Mukalu la anu muvelunuxa'a tamitema mita'olu ne mukalusi. Muvelunu muvelunu la ane'i mi'ani xo mole mikalusou masaxa na'a avile. 12Ane'i mi'ani mukalu la Iesua mupalusi'a tatisaipeliou lexe, “Ngataxusou la'ilali matomatovinu xo mamu so pa'usou usu'a.” 13Laso ane'i mitaxusou matovinu la'ilali ane Iesua muxalixu no anu pileti ta'uve nesi kaio mitanu no ti'a. La la'ilali ane tamitema ikalusou uasi ne umomomo no anu ti'a 12.

14Ioxe, ane'i tamitema mimaisou sosovosou so xavi anene la ane'i mivikala lexe, “Ai manina misevile, ano'o ne Polopeti e Mosinge muvikala lexe upalusou une'e no lialia.” 15Ia Iesua mulavu lexe ane'i imasaxau so ikasou mo itulusou so ukingi noxi'a. Laso anu mulutu so muxexesi'a mo anu anusisi mulai no la'ola'olu.

Iesua mumuamua'i no kupa loxo 'o

16Xe anu so olovoxoe la tatisaipeliou Iesua milu'elai no kupa. 17Ane'i milu'elai la mitelo no anu pouti so ilai xalevile no kupa mo so ixali no tuala ne Kapeniamu. Ane'i milutu ia Iesua uxali noxi'a uao mo a olovoxo mukalu. 18Milutu mo no kupa lixinu la sivo toxoxu muxali mo mu'avutinoxu kupa mole xasi tatila. 19Xe ane'i mipulusou pouti mulai nopaxa sevile loxo 5 o 6 kilomita sila mimaisou Iesua a umuamua'i no lexa loxo'u. Mo anu a mune'e alai no anu pouti la ume mukasi'a. 20Ia Iesua muvikalane'i lexe, “A eni to. Eni axoxolu, nga'ume uasi.” 21Laso ane'i mi'osa so itelonu no anu pouti. Mutelo mukalu xe alaxu vilesisi sila mixali xalevile no apu ane mimasaxau ilai no anu.

Tamitema mikakamulinu Iesua

22Ioxe, no anu voxo loxo ne'iela la tamitema latala a mixolu xalevile no kupa olelesio. Ane'i milavu lexe loxo mei la pouti vilela uasi, vilesisi e tatisaipeli mitelo no anu so ane'isisi milai. Milavu lexe loxo Iesua la utelo noxi'a uasi, laso ane'i a ikakamulinu lai nesio. 23Mixolu xo la pouti se'i molu ne Taiveliasi mune'e muxali noxi'a no anu apu e Tatananenge muvikala laixesou pileti kaiou mi'ani'ani no anu. 24Ioxe, ane'i ikakamulinu Iesua xo xe milavu lexe uxolu lai ne uae, xe tatisaipeliou kalumo uasii, laso ane'i mitelotelo no anu pouti ne so ilailai ikakamulinu Iesua ne Kapeniamu.

Iesua anu pileti so tualasou Mosinge

25Ane'i milutu xe mixali xalevile no kupa sila mixalisou. Mixalisou la mitali'isou lexe, “Tisa, nexali lai 'o talu?” 26La Iesua mukoline'i lexe, “Eni avikalangengi manina e maninasi, ngingi ngemaisou sosovo so xavi ia laxu upalasi noxinge to uasi. Anene tava'u so ngakamulileli uasi. Ningi ngakamulileli xo nge'ou la'ilali mo ngepulapusi ane. 27Mamu so ngaxaxai so ngaxalisou la'ilali ane ukalu paleasi. Ngaxaxai so ngaxalisou la'ilali ane uxoxolu avile umomomo no anu mauli kaluxu uasi. La'ilali anene ngaxalisou noxou Itema ane molu noxou Mosinge, anu e Mosinge anu Maminge musosovosou lexe u'osasou.”

28Laso ane'i mitali'isou lexe, “Nexi ta'oxo xaixai ma'ia so Mosinge u'osasixexu?” 29La Iesua mukoline'i lexe, “Xaixai ane Mosinge u'osasou a so ngingi ngalopala noxou itema ane anu mupalusou.”

30-31Ioxe, ane'i milomu axone laso mitali'isou lexe, “La nini na'oxonu sosovo so xavi aloxova so nexi tamaisou mo talopalanu vaikalameni lexe manina? Tatei ta'ilusunexi mi'ou la'ilali mana no xale lia esi'esi, aloxo Mosinge vaikalaou ulemolu lexe, 'Anu mulosi'a pileti molu no tualasou Mosinge so i'ou.' Io', ta'ilusunexi mimaisou xavi noxou Mosinge axone, ia loxo nini la na'oxo to axovae?” 32La Iesua muvikalane'i lexe, “Avikalangengi manina e maninasi. Mosisi ulosinge pileti e molu no tualasou Mosinge uasi, anu Mamilo ne molu so ulosinge pileti maninasou ane molu no tualasou. 33Xo pileti noxou Mosinge ne, a anusi e molu no tualasou Mosinge mulu'e so ulosi'a tatemanu lialia mauli.” 34Laso mi'oxo lexe, “Ai Tatilao, nalosixe pileti anene utotomu ulai axone avilesi.”

35La Iesua muvikala lamana lexe, “Pileti so mauli ne a eni 'osi. Itema aneva une'e noxilo la usolixula uasi. Xe itema ane ulopala noxilo la usoliou lexala uasi. 36A loxo elemolu noxinge, iengi muno'ilo ia ngalopala to uasisi. 37Tamotu ta'ei mukalusi Mamilo upilixine'i noxilo la ane'i ine'e noxilosi ane. Xe loxo ine'e noxiloe la vote'i uasi e uasisi so akusai'ala. 38Eni elu'e no tualasou Mosinge so amulinu masaxa na'a xelimo uasi, eni ene'e so amulinu masaxa noxou anu ane mupalusilo ene'e 'osi. 39La masaxa noxou anu ane mupalusilo ene'e ne aloxo 'o. Ane'i mukalusi ane mupilixine'i noxilo la a'italonu soxu vile ka ulusi uasi, atetelisi'a xo mo uxali no anu kaluxusou voxo olele, la atulusi'a imauli mukalusi. 40Xo masaxa noxou Mamilo aloxo 'o. Tamitema mukalusi ta'ei isaxi noxou Olu kaio ilopala noxou la ixalisou mauli kaluxu uasi. Xe uxali no anu kaluxusou voxo la eni melo atulusi'a imauli.”

41Iesua muvikala axone ia Taiuta imunumunu ngato'o so ixililiou vaikalaou e lexe, “Pileti so mauli ane molu no tualasou Mosinge, a eni 'osi.” 42La mivikala lexe, “Ano'o ne Iesua, anu Iosepu olu tosi. Nenge telavusi'a momu olie nenu a. Laso axova so anu uvikala lexe anu molu no tualasou Mosinge mulu'e 'o?”

43Sila Iesua muvikalane'i lexe, “Mamu so ngamunumunu so ngaxililiou vaikalaxeli. 44Loxo itema anu molu la vote'i so une'e noxilo uasi. Ia loxo Mamilo e mupalusilo ene'e 'o ulapunu itema vile une'e noxilo laso ane, anu vote'i so une'esi. Xe loxo une'e la atulusou umauli no anu kaluxusou voxo. 45No anu lavukui'a tapolopeti la mikaukavunu vaikala aloxo 'o, 'Mosinge ulamananixa'a tamitema mukalusi.' Laso ane'i mukalusi ane ilomuxu vaikalaou Maminge mo ino'u lavulavu noxou la ine'e noxilosi.

46Xo itema vile usaxisou Maminge uasi, anu ane molu noxou Mosinge a anusisi musaxisou Maminge. 47Avikalangengi manina e maninasi, ena'ei ane ulopalasi la uxalisou mauli kaluxu uasi. 48A enisisi a pileti so mauli. 49Ane'i ta'ilusungengi e mi'ani'ani no anu la'ilali mana no xale lialia esi'esi la misoisoli tateimo. 50Ia pileti ane molu no tualasou Mosinge mulu'e 'o la iou vilemo, xo loxo tamitema i'ani noxou, la isolila uasi. 51La pileti umamauli e molu no tualasou Mosinge mulu'e ne a eni 'osi. Loxo itema ena'ei u'ani no anu pileti ano'o la uxolu umauli kaluxu uasi. Pileti ane apilixinu so uxalisou mauli no anu ne a vasimelo 'osi. Xe loxo apilixinu la anene vote'isi'a tatemanu lialia mukalusi kalumo so ixalisou mauli.

52Xe Taiuta milomu axone la mipelesou anaxa'asou, xo mi'oxo lexe, “Itema to ano'o ulosinge vasimolu so ta'ani no anu axovaio?” 53Laso Iesua muvikalane'i lexe, “Avikalangengi manina e maninasi. Loxo nga'ani no anu vasimolu Itema ane molu noxou Mosinge uasi mo ngaie no anu sialuxu uasi la mauli uxolu noxinge uasisi. 54Ia itema ane u'ani'ani no vasimelo mo uiie noxilo la mauli kaluxu uasi uxolu noxou xe no anu kaluxusou voxo eni atulusou umaulisi. 55Xo vasimelo anu ani'aningenge u'isalilisi xe sialuxo anu mi so ngaiexu u'isalilisi. 56Loxo itema u'ani'ani no anu vasimelo xe uiie no anu sialuxo la anu utalupexa nonano noxilo xe eni atalupexa nonano noxou. 57Maminge anu tava'u mauli a mupalusilo ene'e mo amamauli 'o xo a noxousi. La anu axonesi noxou itema aneva u'ani'ani noxilo xo anu kalumo umamauli la tava'u a noxilosi. 58Anu ane, anu ano'osi pileti e molu no tualasou Mosinge mulu'e 'o. Ane'i ta'ilusunenge mi'ani'ani no anu pileti kaini vile ka misoisoli tateimo. Ia pileti ano'o iou vilemo xo itema aneva u'ani'ani no anu la uxolu umauli kaluxu uasi.” 59Vaivaikala ano'o Iesua mulemolu loxo muxolu muvotovoto no tasou lavuloto ne Kapeniamu.

Vaikala so mauli maninasou a uxoxolu noxou Iesuasi

60Ioxe, tatisaipeli latala e mimulimulinu Iesua milomusou vaikalaou axone la tavu'alo noxi'a mi'oxo lexe, “Ai vaivaikala ano'o ialuxu moe, tano'u axovae?” 61Ia Iesua mulavu no oponu lexe tatisaipeliou mimunumunu ngato'o so mixililiou vaikalaou axone. Laso anu mutali'isi'a lexe, “Axova, vaikala ano'o uvila'isou opongengi so ngamulilelila uaio?” 62Xe loxo ngamaisou Itema ane molu noxou Mosinge ulivu utelai no tanixu e muxolu no anu tei laso axovae? 63Mauli anu tava'u noxou Ulenu Mosingesi, xavi uxolu no anu vasime'a tamitema so ixalisou mauli uasisi. Vaikala e elemolu noxinge 'o ne anu vote'i so Ulenu uxolu noxinge mo anu vote'i so ngamaulisi. 64Ia ane'i mose'i noxinge ilopala to uasi.” Mulemolu axone xo loxo mala'o musoko'u xaixai noxou la mulavusi'a ane'i ane so ilopala uasi xe anu ane so upilixinu no avo'a tauluaou. 65Mo musolonu lexe, “Anene tava'u vaikalaxeli lexe loxo Maminge u'oxonu vote'isou itema vile uasi la umomomo uasi so une'e noxilo.”

66Iesua mulanu vaikala axone mukalu xe ili'i la tavu'alo noxi'a tatisaipeliou mi'italonu mo milivulivu mole oli'a ixixao ikeila uae. 67Laso Iesua mutali'isi'a tatisaipeliou 12 olele lexe, “Axova, ngingi ngaxexesilo ngalailai kalumo?” 68Ia Saimoni Pita mulivuxu lexe, “Tatananexi, xo axone la talai noxou ena'eio? Vaikala so mauli kaluxu uasi a uxolu noxine 'osi. 69Xe nexi telopala mo texalisou lavulavu mukalu lexe nini ninisisi ane malemalenga mene noxou Mosingesi.” 70La Iesua mukoline'i lexe, “Eni melo eiloungengi ngingi 12 'o ia vile no taingengi anu noxi'a ta'angelo tamasuamo.” 71Anu mutotokalasou Iutasi e Saimoni Isikalioti olu xo anu vile noxi'a tatisaipeli 12 olele mo anu mosou e so upilixinu Iesua no avo'a tauluaou ili'i.

നിലവിൽ തിരഞ്ഞെടുത്തിരിക്കുന്നു:

Tioni 6: ATA

ഹൈലൈറ്റ് ചെയ്യുക

പങ്ക് വെക്കു

പകർത്തുക