Tioni 5
5
Iesua mupaipounu itema vile no kupa Veteseta
1Xe mune'e ili'i la voxosou lavilelu noxi'a Taiuta a muxalila laso Iesua mulutu mulai ne Ielusalemo. 2Ioxe, ne Ielusalemo la anu kupa vile uxolu alai no aitenga vile no anu vimelusou taoni. Aitenga ne ilemolu lexe tasipisipi aitengasi'a. Xe loxo kupa ne la ilemolu no anu vaikala Ipilu lexe Veteseta. Mo loxo no pa'umolu kupa la lavalata ta'uve a mutulu ne. 3Xe no lavalata ne tamitema latala e latala a mita'olu. Ane'i mukalusi ne mitavulenu tu'umaxu no vasime'a iouiou loxo ie'i mutomu o tava'a mukilikalu so imua'i uasi o xixine'i musoisoli. Ane'i mita'olu ne so ixomaiou lexa ukunikuni sevile. 4Mukunikuni xo voxo vilevilesi angelou Tatananenge mulu'e no anu kupa loxo'u so ukunoxu. Ukunoxu xe loxo itema aneva u'una tei no anu lexa ne la laixenu avile no anu tu'umaxu ma'ia muxolu noxou.#5.4 Tamitema so lavulavu se'i ixavutala lexe Tioni molu ukaukavunu vaikala ane uxolu no anu telexu 5:3 xe vaikala no anu 5:4 uasi, itema vilemo masi mukaukavunu.
5La itema vile muxolu ne mutavulenu tu'umaxu no vasimolu mumomomo no anu tau ie 38 a mukalu 'oe. 6Ioxe, Iesua mune'e xe mumaisou itema ne a muai la mulavu lexe voxo so tu'umaxu muxolu no vasimolu ne maxuveni misevile. Laso mutali'isou lexe, “Namasaxau lexe laixenenisi?” 7La itema musiki ne mukolinu lexe, “Tilao, no voxo so lexa ukuni la itema vile so uxalixilo no anu uasi. Eni melo atotovonu ia apulelisi xo eni alulu'esio la utotomu leviani ixali tei noxilo.” 8La Iesua muvikala noxousi lexe, “Natulu nano'u mi so ai'aisine ka namuamua'ixene nalaisi.” 9Sila alaxu vilesisi itema ne vasimolu laixenusi, laso muno'u mi so ai'aisou kaio mumuamua'i mulaisi.
La no voxo anene anu Voxo so Ma'ila. 10Laso loxo tatiatila noxi'a Taiuta mimaisou itema e laixenu ne la mivikalanu lexe, “Ai, ano'o Voxo so Ma'ila, mamu so natatavulenu mi so ai'aisine axone.” 11Ia anu mulivuxa'a lexe, “Anu e mupaipoleli molu muvikalaleli lexe atulu ano'u mi so ai'aisilo mo amua'ixo alaisi.” 12La ane'i mitali'isou lexe, “Itema ena'ei muvikalaneni lexe nano'u mi so ai'aisine mo namuamua'i to ne?” 13Ia itema e laixenu ne ulavulavu la uae xo tamotu tavu'alo a mipita no apu ne la Iesua mupolo se'isisi no taine'i mole mulai avile.
14Ioxe, ili'i la Iesua muxalisou itema anene nonano no vimelusou tasou Mosinge la muvikalanu lexe, “Nalomu. Nini a laixeneni ne, laso nasusula uasi mo so mi vile mutu'umaxula uxalisine uasi.” 15Mukalu la itema ne mulai muvikalane'i tatiatila noxi'a Taiuta lexe, “Anu e mupaipoleli a Iesua.”
16La no voxo ne tatiatila noxi'a Taiuta misoko'u so mixililiou Iesua xo tava'u a so mu'oxonu mimi axone no anu Voxo so Ma'ila. 17Ia anu mulivuxa'a no anu vaikala lexe, “Mamilo ulavusou uxaxai xo mo muxali no anu voxo vaimomo 'o, la eni kalumo axaixai axonesi.” 18Anu tei la tatiatila noxi'a Taiuta opone'i tu'umaxuou xo muxola'u lavuloto noxi'a so Voxo so Ma'ila. Xe no anu e mulemolu lexe Mosinge anu Momu mu'isalili la laxu lexe anu iou vilesisi noxou Mosinge. Milavusou laxu vaikalaou axone laso xavine'i avile so ikamulinu vote'i so ivau usoli.
Mosinge mulosou Olu xavi so u'oxonu xaixai
19La no anu vaikalai'a tatiatila noxi'a Taiuta ne la Iesua mukolinu aloxo 'o, “Eni avikalangengi manina e maninasi, Mosinge Olu umomomo so u'oxonu mi vile no anu masaxa na'umo uasi. Anu u'oxonu mi ane usaxisou Maminge u'oxonu xo mi ma'ia Maminge u'oxonusi la Olu umulinu u'isalilisi. 20Xo Maminge usexelaxu Olu laso mimi mukalusi u'oxonu la upalasinoxu noxousi. Xe anu upalasinoxu xaixai se'i toxotoxoxula so u'oxonu. La uua'ulixu ane mu'oxonu mukalu mole ngingi tangengililiou avile. 21Maminge anu mosou e so utulusi'a tamitema no anu soli sika ulosi'a maulisi. La anu axonesi noxou Olu xo loxo umasaxa la ulosi'a tamitema mauli kalumo. 22Xe xaixai no anu tiasi so tilovosi'a tamitema la Maminge molu u'oxonu uasi, a mupilixinu noxou Olu so anu utilovosi'a tamitema mukalusi. 23Mu'oxonu axone mo so tamitema mukalusi itaxanu ualasou Olu iou vilesisi aloxo ane'i itaxanu ualasou Maminge. Maminge molu mupalusou Olu laso loxo itema utaxanu ualasou Olu uasi la anu utaxanu ualasou Maminge uasi ane.
24A avikalangengi manina e maninasi. Loxo itema ulomuxu vaikalaxeli mo ulopala noxou anu ane mupalusilo ene'e 'o la uxalisou mauli kaluxu uasi. Xe no anu voxo so tilovo olele la vaikala so mamulo usu'asou uasisi xo anu muvula mula no anu xoluxolu so soli mo a mu'unalai no anu mauli mukalu.
25Eni avikalangengi manina e manina aloxo 'ola. Voxo a unene'e mo a muxali 'oe so tamitema ane ixoxolu no anu solisi la ilomusou xolinu Mosinge Olu. Ilomusou xe ta'ei noxi'a ilomuxu la imaulisi. 26Xo Maminge anu tava'u mauli xe mulosou Olu tanixu anenesi so anu kalumo uxolu tava'u mauli. 27Anu ne Itema ane molu noxou Mosinge, laso Maminge mulosou xavi no anu tanixu e so utilovosou kaio ukolinu susu noxi'a tamitema. 28Ngingi tangengililiou vaikalaxeli 'o uasi. Voxo a unene'e la tamitema mukalusi e no lamatimati la ilomusou xolinu Olu. 29Ilomusou laso ane'i ilala no lamatimati. Ioxe, ane'i ane so ilixo laixe la itulutulu ka i'una no anu mauli. Io ane'i ane so ilixo masua la itulu kalumo, ia so ixalisou lakolisou susu noxi'asi.”
Ane'i leviani so mipala'anixu lexe Iesua ne ena'ei
30Ioxe, Iesua musolonu aloxo 'ola, “Loxo eni melo la umomomo so a'oxonu mi vile vitanisi uasi. No anu vote'i so atilovo la alomu noxou Mamingesi. Laso tilovo noxilo ulapusi xo taleli u'oxoxu masaxa na'axelimo uasi, u'oxoxu masaxa noxousi e mupalusilo ene'e 'o.
31Loxo eni enisisi alanu vaikala so apala'anixilo la tamitema masi ilomuxu lexe manina uasi. 32Ia anu vile uxolu so uvalaxo no anu vaikala so upala'anixilo mo eni alavu lexe vaikalasilo e ulalanu ne, anu maninasi. 33Eni elavu lexe mala'o ngingi ngepalusi'a tamitema se'i milai mitali'i noxou Tioni la mulemolu vaikala manina so muvalaxo no anu. 34Ia axova, alivunoxu xavutalamengi no anu xo eni alopalanu vaikalaou itema axonesi so uvalaxo? Uasi, ia alemolu mo so ngingi masi tangengiou kaio ngaxalisou pamauli. 35Tioni ne anu muxolu loxo lalamo ane mukaka mo muieieisinge. La voxo ataxu sesi ngingi nge'osasou lamana ane mulosinge ne.
36Ia vote'i so eni melo apala'anixilo la uua'ulixu vaikalaou Tioni e mulemolusilo. Xo mi ma'ia Maminge mupilixinu noxilo so axalixu, a mimi e axaxalixu 'o, anu so uvalaxo lexe Maminge molu mupalusilo ene'e 'o. 37La Maminge e mupalusilo ne, anu molu mulanu vaikala so upala'anixilo. Ia ngingi, la ngalomusou xolinu sevile uasi mo ngamaisou iou lexe axova uasisi. 38Mo vaikalaou uxolu no tangengi uasi xo ngingi ngalopala noxou anu ane Maminge mupalusou to uasi.
39Ngingi ngalavusou ngaititi so ngakakamuli nonano no anu lavukuou Mosinge xo nge'oxo lexe anene so ngaxalisou mauli kaluxu uasi no anu. La lavukuou nesi so upala'anixilo 'o, 40ia ngingi opongengi u'osa to uasi so ngane'e ngaxalisou mauli noxilo.
41Eni opoleli ututulu lexe tamitema i'itinu ualasilo uasi. 42Ia eni alavusinge lexe sexelasou Mosinge uxolu no tangengi to uasi. 43Eni ene'e no anu ualasou Mamilo io ngingi nga'osa so nga'unaleli noxinge uasi. Ia loxo itema vile une'e no anu ualasoumo la ngingi nga'unanu kenasi. 44Ngingi nga'osa so nga'itinu ualasinge ngato'omo, ia no anu vote'i e so Mosinge anu vilesisi molu u'itinu ualasinge la ngaxavutalanu uasisi. Laso ngingi ngalopala axovae?
45Mamu so ngaxavutala lexe eni melo ato'omenge no iou Maminge. Anu ane so uto'omenge a Mosisi, mosou e ngalavusou ngalopalanu lexe usu'ulingengi. 46Xo loxo ngalopalanu vaikalaou Mosisi maninasou la anene ngelopalaleli ane, xo vaikalaou ma'ia mukaukavunu ne anu so silosi. 47Ia loxo ngalopalanu vaikala e mukaukavunu uasi, la vote'i axova so ngalopalanu vaikalaxeli alalanu 'o?”
നിലവിൽ തിരഞ്ഞെടുത്തിരിക്കുന്നു:
Tioni 5: ATA
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Copyright 1999 New Tribes Mission, Sanford, FL 32771-1487
