लूका 14

सब्त दिह बिमारोहो हाजु कोअयु

1एकवा शब्बाथआ तेदीही मुख्य परुशीमधून कोईएक अधिकारी कोअमे येशु खाअलाकाजे गोल्यो त्याजागे ते वोडो नजरोवाही तियापो डोआं मेकीत ओते. 2त्याजागे आगाडी जलोदर रोग उवलो एक माहहू ओतु. 3येशु यहुदी-धर्म शास्त्री अने परुसी यांहा फ़ुस्ल्याआ, “शब्बाथ तेदीही कोडाआ हाजो कोअला योग्य होय का नाहा?” 4परंतु ते ठावकू रोल्या याकोअता येशुई तियाअ माअहुहू हाजो कोईत आप्लु अने काबी मोकलित आप्लु, 5फासाडी तिये तियाहा फ़ुस्ल्याआ, “जर तुमा मेहेरोत कोडापो आपाआ पोऱ्या होय नेते बोलोद होय तो वेईम पोडीत जात्लू ताहा नाहाकोत शब्बाथआ तेदीही तुमु तियाहा लागेज बारथे काडनारू नाहा?” 6यापो ते तियाहा उत्तर आपुहू सेकेले नाहा.

पावणाआ स्वागत

7काहाके येशुई ओ पालील्यो का हादाडल्यो मांहे आपाहा बोहीला पुरो मानपान जोवे जागू होडीत ओते, तेहलाम तिये तियाहा एक दृष्टान्त कोयू, तो बोलतुल्यो, 8जांहा तुमामे वेहवालोम रोटाहा हादाडये ताहा तियाअ जागापो मुख्य जागापो बोअहू नाहा काहाके एहलो उवहु सेकोहो का त्याजागे तुमापेक्षा जाखा वोडू माहहू तीयावाही हादाडल्यु गोल्यो होय, 9फासाडी तुम्हाआ बेनुहू हादनारो तुमाआ जागे आविलो कोअही, “आपाआ ए जागू याआ माअहुहू आप”, अने फासाडी लाजवाईत ताहु निसरयु जाग्तली बोहजी लागे. 10जांहा तुमामे हादाडये जाहो तेहलाम तुमु आखाम निसरयु जाग्तली बोहा याकोअता का जांहा तुमामे आमंत्रित कोअनारू आवे तेहलाम तो कोय, “ओ दोस्ता, उठ उसे बोह” फासाडी तिया आखा आगाडी जे ताआरी हादाडल्यो मांहे रोही तीइही ताआ सन्मान वोद्नारू. 11काहाके जो कोडु स्वतःहा उचो कोअही, तियाहा झुकाड्यो जाइअलो अने स्वतःहा झुकाडीलो तियाहा उचो कोअलाआ आवे.

प्रतिफल

12फासाडी ज्याहा तिये हादाडल्यो कोल्यु ओते तो तियाहा बोलतुल्यो, जांहा कोयो तू कोडनीबि तेदीही काहाके राती रोटू आपी तेहलाम आपाआ हेगांति, आपाआ पाही, आपाआ होगवाड्यो काहाके श्रीमंत जागरयु यांहा आदहु नाहा काहाके तियाअ बदलावाही ताहु हादीही अने ह्याप्रमाणे ताहु तियाआ फोल मिलित जाइअलो. 13पोन जाहा तू रोटू आपी तेहलाम गरीब, दुखी, लेगडू, लेगडे अने आंदले यांहा हादे. 14काहाके फासाडी त्याजागे ताहु फासी कोइला कोअता किबी नाहा, तेहलाम ओता कोअता धन्य बोनल्यो ह्याआ आखोज फोल ताहु नीतिमान मांहे जिवंत उवेताहा आप्लु जाइअलो.

वोडा भोजोओ दृष्टांत

(मत्ती 22.1-10)

15फासाडी त्याआरी रोटू कोईत ओतल्या माहुमेरोत एकाने ओ होमलिलो नंतर येशुहू कोयु, “हर एक तो माहहू धन्यवादित होय जो परमेश्वरोओ राज्याम रोटू कोईत रोतो.” 16तेहलाम येशु तियाहा कोयु, “एक माहहू कोडलो तेबी वोडो जेवणावळीई तीयारी कोईत ओतु, तिये जाखो माहुंहु याविषयी कोयु ओते.” 17फासाडी रोटाआ टायमोमें ज्याहा कोयु ओते, पावरोहो मोकलित ओ कोयु, “आव, काहाके रोटू तीयार होय” 18ते आखे हारखोच निम्मित कोहू लागाडीत, पेल्लो तियाहा कोयु, “आय एक खेत वेसातो लेधलो होय, माहु जात ते पालीलो होय, आय तुमामे विनंती कोअत्लू, माहु क्षमा को” 19फासाडी दिहरु कोयु, “आय पाच जोडी बोलोद लेधलो होय, आय तियाहा तापासुहू जात्लू, आय तुमामे विनंती कोअत्लू माहु क्षमा को” 20एक फासी जोओ कोयु, “आय वेहवाल कोल्यु होय, याकोअता आय आवहू शकत नाहा” 21जाहा तो सेवक फासि आवयु तेहलाम तिये आपाआ मालकाहा वर्तमान कोयु, यापो कोआआ मालिक जास्तीज खोत लाग्यी अने आपाआ सेवकोहो कोयु, नगराआ गल्लीम, वातेम जा अने गरीब, दुखी, लेगडू, आंदले अने लेगडे यांहा इही हादीत लेतआव. 22दास तियाहा ईजि कोयु, ओ मालिक तुमाआ आज्ञा पुरो कोअयी होय परंतु ओमेभी जागू निसे होय. 23फासाडी मलीकाने नोकराहा कोयु, सडकावर अने खेताआ वाडीहीजा जा अने त्याजागेरोत माहुंहु आग्रह कोईत इही घेऊन आव याकोअता का माआ को पाअये जालो. 24अने आय तुमामे कोत्लू जे पहीले हद्येहे गोये ओते तीयामरोत एकाहभी माआ रोटू चाखिलो न जोळे.

कोड़ो येशुउ चेलू बोणित सेकत्लू?

(मत्ती 10.37-38)

25येशुआरी वोडो लोकसमुदाय जात ओते, तो त्याआरोत वोलीतआव्यू अने कोयु, 26जर मा आहने कोडोबी आवीत होय अने आपाआ याह्हीही, बाहापो लाडी अने पोऱ्ये, आपाआ पाही अने बोईहही अने इहिंजा का आपाआ जीवनाहा मांपोरोत जाखा प्रेम कोअत्लू, ताहा तो माआ शिष्य ओवुहू शकत नाहा, 27जो आपाआ क्रूस न विसित माफासाडी आवत्लू तो माआ शिष्य ओवुहू शकत नाहा. 28जर तुमामोरोत कोडु बुरुज बांदीला इच्छा ओतलू तो आगाडी बोहित अने खचाआ आंदाज कोईत आपारी तो पुरो कोईला एतो लायकी होय का नाहा ओ पालीत नाहा? 29नहाते कदाचित पायू पेअल्या फासाडी तियाहा जर तो पुरो कोअता आवयू नाहा ताहा पालणारे आखे मांहे तियाआ मजाक कोआ अने कोत, 30अरे आव माहुई बांदालाआ सुरवात ताहा कोल्यु, परंतु ओ पुरो कोहू शकला नाहा? 31काहाके कोडु राजा एहेलू होय जो कोडनीबि दिहरा राजाहा विरोधा मेहे लोढाई कोईलाकाजे गोल्यो अने पहीले बोहित विचार कोअयु ने ओयताहा आपाआ दहा हजार सिपायडा आरी नाहाकोत तो वीस हजार शिपाय होय त्याआरी लोडाई कोहू गोयो का नाहा? 32अने जर तो लोडाई कोहू शकत नाहा ताहा तिया विरोध कोनारो ओमे वातीमेज होय तोयोज तो आपाआ वकिलाहा मोकलित ठावकू रोनाराआ प्रस्ताव कोअही. 33दिहरे फासाडी ऐह्कोईत तुमा मेहेरोत कोडोबी जो आपाआ आखे धनदौलत त्याग कोईत नाहा तो माआ शिष्य ओवुहू शकत नाहा.

बिनहवादो खारो

(मत्ती 5.13; मरकुस 9.50)

34खारो हाजो होय पण जर खाराआ खारोपोनाआ गोल्यो ताहा तियाआ चोव किहांवाही लावता आवे? 35ते जमीनोम काहाके उखीवाडोहा ए कामोओ नाहा मांहे तियाहा ऐहलेच बारथे टाकीत आपत्ले, “ज्यापो ऐकावयास कान होय, तो होमले.”

നിലവിൽ തിരഞ്ഞെടുത്തിരിക്കുന്നു:

लूका 14: NOINT

ഹൈലൈറ്റ് ചെയ്യുക

പങ്ക് വെക്കു

പകർത്തുക