युहन्ना 9

जन्मोसी आन्दलाहा दृष्टीदान

1तो तीहीरोत जातो ओतुताहा तीये एक माहू पाल्यु ते तो जोलोमक्युज आंदलू ओतु. 2तियाआ शिष्यांनी तियाहा फ़ुस्ल्याआ, “ओ गुरुजी, कोडु पाप कोल्यु ओते का ओ आदोलो जन्मला, आव माहुहुं कान याआ याह्ही-वडिलांनी?” 3येशुनी उत्तर आप्लु, “नाहा तिये पाप कोल्यु ओते नाहा तियाआ याह्ही-वडिलांनी पोन ऐ याकोअता उवे का देवोओ काम तीयाम प्रगट उवे. 4जिये माहु मोक्ल्यीत होय, आमाहा तियाआ काम दीही न दिहोम कारने गरजेए होय; ती रात आविलो होय ज्याम कोडु काम नाहा कोहू सेकेहे 5जोपोरोत आय जगात होय, तो पर्यंत जगाआ प्रकाश होय.” 6ऐ कोत तिये धरतीपो थुंकला, अने तियाअ थुकनाराआ गारू कोल्यु, अने ते गारू तियाअ आंदलाहा डोआहा लागाडी. 7तियाहा कोयु, जा शिलोहाआ तलावूमे तुवीत ले या अर्थ पाठविलेला तियाआ जात तुण्यो, अने पालीलो फासी आवयू. 8तेहलाम जागरयु अने जिये पालील्यो तियाहा भिक मागतले ताहा पाल्लये ओते कोअहु लागाडीत, “नाहाकोत ओतो नाहा, जो बोहित भिक मागित ओतु?” 9किबी कोकानी कोयु, “ओ तोज होय,” दिहरे कोयु, “नाहा” पोन तिया सारखु होय “तो कोयु, आय तोज होय.” 10तेहलाम ते तियाहा फुसिलो लागाडीत, “ताआ डोआं केहलो उगड्यो?” 11तिये उत्तर आप्लु, “येशु नावाआ एक माहुई गारू कोईत, अने माआ डोआहा लागाडी माहु कोयु, शिलोह मेहे जात तोवीत ले, आखरी आय गोल्यू अने तुण्यो अने पालुहू लाग्यू.” 12तिये तियाहा फ़ुस्ल्याआ, “तो का होय?” तो कोयु, “माहु नाहा मालुम.”

फरीसी द्वारा चंगायीई जांच-पड़ताल

13मांहे तियाहा जो पहीले आदोलो ओतु परुश्याकडे घेऊन आव्ये. 14ज्या तेदीही येशुनी गारू कोईत तियाआ डोआं उगड्यो ओते, तो शब्बाथाआ दीही ओतु. 15फासी परुश्याही पण तियाहा फ़ुस्ल्याआ का तियाआ डोआं कोडला रीतीवाही उगाडीत गोयी तो तियाहा कोयु, “तिये माआ डोआंपे गारू लागाड्ये, फासाडी मिती तुवीन लेधलो, अने ओमे पाल्तू.” 16यापोरोत किबी परुसी कोहू लागाडीत, “ओ मांहु देवापो नाहा, काहाके ओ शब्बाथाचा दीही नाहा मानीत.” दिहरावाही कोयु, “पापी मांहु एहलो चिन्ह केहलो देखाडहु शकतो?” आखरी तीयाम फुटी पोडीत गोयी. 17तिये तियाअ आंदलाहा फासी कोयु, “तिये ताआ डोआं उगड्यो होय तू त्याविषयी नाहाकोत कोत्लू?” तो कोयु, “तो संदेष्टा होय.” 18पोन यहुदीयाहा विश्वास नाहा ओवयू का तो आदोलो ओतु अने ओमे पालत्लू, जोपोरोत तियाआ-तियाआ डोआं उगड्यो ओते, याह्ही-वडिलांना हादीत 19तियाहा फ़ुस्ल्याआ, “नाहाकोत ओ तुमाआ पोऱ्या होय, ज्याहा तुमु कोअता का आदोलो जन्मूला ओतु? फासाडी ओमे तो केहलु पालीलो होय?” 20तियाआ याह्ही-वडिलांनी उत्तर आखे, “आमाहा ताहा मालुम होय का ओ आमाआ पोऱ्या होय, अने आदोलो जन्मूला आवयू ओतु; 21पण आमाहा ओ नाहा मालुम का ओमे केहलो पालीलो होय, अने ओ नाहा मालुम का कोडु तियाआ डोआं उगड्यो तो वयोम आवल्यु होय, तीयाहा फुसीत ल्या; तो आपा विषयी स्वताआ कोत आपी.” 22ए गोठी तियाआ याह्ही-वडिलांनी याकोअता कोयु काहाके ते यहुदियाहा बित ओते, काहाके यहुदी एकमोत बित ओते का जर कोडु कोअही का तो ख्रिस्त होय, ताहा मंदिरो आथोवाही काढ्या जानारू. 23या कारनोवांही तियाआ याह्ही-वडील कोयु, “तो वयोम आवयू होय, तीयाहा फुसीत ल्या.” 24तेहलाम तिये तियाहा मांहाहा जो आदोलो ओतु, दिहरा टायमोमें हादीत तियाहा कोयु, “देवोओ गौरव कोआहू ताहा मोलुम होय का तो मांहु पापी होय.” 25तियाआ उत्तर आप्लु, “माहु एक गोठी मालुम होय का तो पापी होय कोयो नाहा; माहु एक गोठी मालुम होय का आय आदोलो ओतू अने ओमे पालत्लू.” 26तिये तियाहा फासी कोयु, “तिये ताआ आरी नाहाकोत कोल्यु? अने कोडला प्रकारे ताआ डोआं उगड्यो?” 27तो तियाहा कोयु, आयताहा तुमामे कोत आप्लु, “अने तुमु नाहा होमलित; ओमे दिहराहा टायमोमें नाहाकोत होमलुहू होय? नाहाकोत तुमामे पण तियाआ शिष्य बोनीला होय?” 28तेहलाम ते तियाहा वाईट-हाजो कोत गोग्या, “तांहुज तिया शिष्य होय, आमुतेभी मोशेच शिष्य होय. 29आमाहा मालुम होय का देवूही मोशेआरी गोठी कोअयी ओती; पण आव मांहाहा नाहा उलखित्लू का कावालू होय.” 30तिये तियाहा उत्तर आप्लु, एताहा आश्चर्याआ गोठी होय का तुमामे नाहा मालुम का तो कावालू होय, तेबी पण तिये माआ डोआं उगाडीत आप्लु. 31आमाहा मालुम होय का परमेश्वराहा पापी महुअ नाहा होमलित्लू, पण जर देवाआ भक्ति होय अने तियाआ इच्छावाही चालते होय, ताहा तो तियाआ मानत्लू. 32जगाआ सुरवातीती ओ केधी उनीलाम नाहा आव्ये का कोडु तेबी जन्मापोरोत आंदलाआ डोआं उगड्यो. 33जर ओ माहहू देवापो नाहा ओतु, ताहा किबी नाहा कोहू शकत. 34तियाआ तियाहा उत्तर आप्लु, तू ताहा बिलकुल पापिमे जोल्मो लेदो होय, तू आमाहा नाहाकोत हिकाडत्लू? अने तिये तियाहा बारथे काढीत आप्लु.

आत्मिक आन्दलापन

35येशुनी होमलित का तिये तियाहा बारथे काढीत टाक्ये, अने जांहा तियाआ आरी भेट उवी ताहा कोयु, “नाहाकोत तू देवाच्या पोऱ्यापो विश्वास कोअत्लू?” 36तिये उत्तर आप्लु, “ओ प्रभुजी, तो कोडू होय, का आय तियापो विश्वास कोहू?” 37येशु तियाहा कोयु, “तुयें तियाहा पाल्लये तेबी होय काहा, अने जो ताआ आरी गोठी कोईत होय, तो तोज होय.” 38ओतो कोयु, “ओ प्रभुजी आय विश्वास मेकोहो.” अने तियाहा नमन कोयो. 39तेह्लाम येशु कोयु, “आय आव जगात न्यायनिवाडा कोइला कोअता आवयू होय, काहाके जो अने पालीत, अने जे पालल्ते ते आंदले होतगोयो जानारू.” 40परुश्यामरोत जे त्याजागे ओते तिये ओ होमलित तियाहा कोयु, आमाहाबी आंदले होये नाहाकोत? 41जे परुसी तियाआ जागे ओते तिये ए गोठी होमलित तियाहा कोयु, जर तुमु आंदले ओते ताहा पापी नाहा ठेरवीही जाहो; पण ओमे कोअते का आमू पालत्लू, याकोअता तुमाआ पाप बोणीत रोनारे.

നിലവിൽ തിരഞ്ഞെടുത്തിരിക്കുന്നു:

युहन्ना 9: NOINT

ഹൈലൈറ്റ് ചെയ്യുക

പങ്ക് വെക്കു

പകർത്തുക