युहन्ना 21

तिबिरियासो झीलो मेरे चेला पोओ प्रगट ओवयु

1ऐ गोठीई फासाडी येशु स्वतःहा तिबिरयास समुद्राआ मेरे शिष्या पोओ प्रगट उव्यु अने ई रितीवाही प्रगट उव्यु. 2शिमोन पेत्र, थोमा (जो दिदुमुस कोयो ओते), गालीलामे काना इही नतनएल, जब्दिई पोऱ्ये अने तियाआ चेलापैकी दिहरे बेन जोओ ओ एकठे एकटा ओतलू, 3शिमोन पेत्राई तियाहा कोयु, आय मासे तोईलाकाज जात होय, ते तियाहा कोयु, आमाहा पण ताआरी आवीत होय, तेहलाम ते त्याआरी गोये अने नावूमे जात बोह्ये परंतु तियाअ राती ते किबी तोहू सेकेले नाहा. 4ओमेजा वेगीई उवी ओती तोयो येशु किनारावपो उबु रोला परंतु शिष्यांनी तियाहा ओलखे नाहा का तो येशु होय. 5फासाडी येशु लेतजा तियाहा कोयु, “पोरयां, तुमापोओ किबी मासे होय? तिये उत्तर आप्लु नाहा.” 6फासाडी तिये कोयु, “नावेए बागडयी भागुम जाडू टाका ताहा तुमामे किबी जोडीत” तेहलाम तिये जाली टाक्यी परंतु जाखो मासावांही ते जालाहा फासी त्याआरोत खेच्ये जात निमिले. 7फासाडी येशुउ गोमनारू प्रिय शिष्य पेत्राई कोयु, “ओ ताहा प्रभू होय, जांहा शिमोनाआ ओ होमल्यु का तो प्रभू होय तेहलाम तिये आपाआ बारथे कापडे काल्ये अने पाअयोम उडी माइहि काहाके तो उघडा ओतु.” 8पोन दिहरे शिष्य नाव पोओ मासावाही जालो पुईत खेचित किनारावपो आव्ये (काहाके ते धरतीपोरोत सेटे निमिले ते होव मीटर सेटेज ओते). 9तेहलाम ते किनारावपो आव्ये तिये तियाअ जागापो पेटीत होयतो कोल्याआ इंगालो पालील्यो, त्यापो मासे अने भाकर पुजिला कोअता मेक्ल्ये ओते. 10येशु तियाहा कोयु, “तुमु जे ओमे मासे तोअल्यो होय, तीयामरोत किबी घेऊन आव.” 11शिमोन पेत्र नावेपो गोल्यो अने त्रेपन वोडो मासांवाही पोअल्यी जालो किनारावपो खेच्यी बालीत एहलो मासे ओते तेबी जाडू फाट्ये नाहा. 12येशु तियाहा कोयु, “इही आव, अने रोटू को” तियाआ चेलापैकी कोडाआ ए धाडस आवयू नाहा का तियाहा फुसजी, तू कोडू होय? काहाके तिये ओलख ओते का तो प्रभू होय. 13येशु आगाडी गोल्यो अने तिये भाकर लेदि अने तियाहा आप्यी अने ऐहलेच मासे पण आप्लु. 14ओमेजा ए तिसरी वेल ओती जोयों येशु मोल्यानंतर जिवंत उवेताहा आपाआ शिष्यांआगाडी तो प्रकट ओवयू.

येशुउ पतरसोरी बातचीत

15फासाडी जाहा त्याआं रोटू उवे तेहलाम येशु लेतजा पेत्राहा कोयु, “योहानाआ पोऱ्या शिमोना, जेवडे प्रेम ओ मापो कोअता नाहाकोत तू त्यांआपेक्षा जाखा प्रेम मापो कोअत्लू? पेत्राई येशुहू कोयु, होय, प्रभू, ताहु मालूमे होय का तापो प्रेम कोअत्लू येशु लेतजा पेत्राहा कोयु, माआ कोकरे चोर.” 16तो तियाहा दिहरी कावा कोयु, योहानाआ पोऱ्या शिमोना, नाहाकोत तू मापो प्रेम कोअत्लू? पेत्राई येशुहू कोयु, होय प्रभू, ताहु मालूमे होय का तापो प्रेम कोअत्लू येशु लेतजा पेत्राहा कोयु, “माआ मेंढाआ राखवाली को.” 17येशु पेत्राहा फासी कोयु, योहानाआ पोऱ्या शिमोना, कि तू मापो प्रेम कोअत्लू? तेहलाम पेत्र जास्तीज नाराज ओवयू का येशु तियाहा तिसरीवेले फ़ुस्ल्याआ, नाहाकोत तू मापो प्रेम कोअत्लू? तेहलाम पेत्राई येशुहू कोयु, “ओ प्रभू, ताहु आखे किबी मालूमे होय?” ताहु मालूमे होय का आय तापो आय प्रेम कोअत्लू येशु लेतजा तियाहा कोयु, “माआ मेंडाहा सार” 18आय ताहु खोरो कोत्लू, जांहा तू जुवान ओतु तेहलाम तू आपाआ कोमरुई रुमाल बांधीत जीही इच्छा ओती त्याजागे जात ओतु परंतु जांहा तू डायू उवे तेहलाम आथे सेटू कोअनारू अने कोडु दिहरु ताआ कमरुहू रुमाल बांधीत ज्याजीजागे तू जानारू ने ओतू तियाअ जागापो ताहु घेऊन जानारू. 19(तिये ओ दर्शविण्याकोअता कोयु का तो केहला प्रकारे मोईत परमेश्वरो गौरव कोअनारू) एहलो कोत तिये तियाहा कोयु माआ फासाडी आव.

येशु अने तियाआ प्रिय चेलू

20पेत्राई फासाडी वोलीत पालील्यो का जो शिष्य ज्यापो येशु प्रेम कोईत ओतु तो तियाआ फासाडी आवीत होय ओ तोज ओतु जीआ रोटू कोईत ओतलू येशुउ सातीपो टूगुवोलीत फ़ुस्ल्याआ ओते ओ प्रभू तो कोडू होय? जो ताहु धोकावांही तोआडयो तो? 21जाहा पेत्राई तियाहा पालील्यो, तेहलाम तो येशुहू कोयु, ओ प्रभू, ह्याआ नाहाकोत उवे? 22येशु तियाहा कोयु, “जर माआ इच्छा होय तोपोरोत तिये इहीजा रोहुजोवे ताहा ताहु तियाआ नाहाकोत? तू माआ फासाडी आव.” 23ह्याप्रमाणे ए गोठी पाहीमे एहला प्रमाणे प्रकारे प्रचार ओवयू का तो शिष्य देही नाहा येशु ओ कोयु नाहा का तो देही नाहा परंतु ओ कोयु ओते, का जर माआ ईच्छा होय ताहा जोपोरोत आय फासी आविलो, ओ इहीजा रोअलो ताहा ताहु तियाआ नाहाकोत?

उपसंहार

24ओच तो शिष्य होय जो तिया गोठी विषयी साक्ष आपोहो अने जिये ओ लेखिलो होय आमाहा मालुम होय का तियाआ साक्ष खोरी होय. 25येशु लेतजा फासी जास्तीज काम कोअयी होय जर एक-एक कोईत ते आखे लेखिलो ओते ताहा आय विचार कोअत्लू का ते पुस्तक एहलो उवे ओते का आखे धोरतीपो तेए नि होमाती.

നിലവിൽ തിരഞ്ഞെടുത്തിരിക്കുന്നു:

युहन्ना 21: NOINT

ഹൈലൈറ്റ് ചെയ്യുക

പങ്ക് വെക്കു

പകർത്തുക