प्रेरितो काम 2

पवित्र आत्माआ उतरिलोओ

1जाहा पिन्तेकुस्त आ दीह आयु ते आखे एक जागा पोओ टोलवात गोये. 2अचानक जुगोमोरत वोडा वाराआ सुसाटया सारिखा शब्द आवयू, अने तियआ आखे को जीही ते बोह्ये ओते, कोंडीत लेधलो. 3अने तियाहा आगीई जीभा फाटीलावेले देखल्या अने तीयामरोत हर एक जानाथोओ आविलो पोड्यी. 4ते आखे पवित्र आत्माआ पोईत गोये, अने ज्या प्रकारे आत्मावांहि तियाहा गोगीलाआ सामर्थ्य आप्लु, ते जोर अलग भाषा गोगू लागाडीत. 5जुगोओ ऐढली हर एक जातीमे भक्तिमान यहुदी यरूशेलेमा रोत ओतु. 6जांहा ओ शब्द ओवयू ताहा गोर्दी जोम्यी अने मांहे घाबरील्यो गोये, काहाके हर एक जोह ओच उनालू आवीत ओते का काहाके हर एक जनास ओच होमला आवीत ओते का ओ माआ भाषम गोगीत होय. 7ते आखे आश्चर्य अने नवल कोईत कोइत्लु लागाडीत, “पाला, ओ जे गोगीत होय नाहाकोत आखे गालीली नाहा? 8ताहा काहा आमामेरोत हर एक जोओ आपाआ-आपाआ भाषा होमलित? 9आमाहा जे पार्थी अने मेदि अने एलामी अने मेसोपोटामिया अने यहुदीया अने कप्पदुकियाआ अने पुन्तुस अने आसिया, 10अने फ्रुगीया अने पंफूलीया अने मिसर अने लीबूवा देश जो कुरणेआआ आस पास वालो होय, आव आखे देशामेहे रोणारे अने रोमी प्रवासी, 11म्हणजे यहुदी अने यहुदी महत्कमे धारण कोअनारे, क्रेतीय अने अरब पण, पण आपाआ-आपाआ भाषाम तिये देवोओ वोड़े-वोड़े कामाला चर्चा होमलित.” 12अने ते आखे आश्चर्यचकित उवे अने घाबरील्यो एकमेकाआ कोइत्लु लागाडीत, “ओ नाहाकोत उवनारा होय?” 13पण दिहरावाही मजाक उडाडीत कोयु, “ते ताहा नाहा मंदीराआ नगेती चूर उवे”.

पिन्तेकुस्तो दिह पतरसोओ भाषण

14तेहलाम पेत्र तिया आकरा जना आरी उबु ओतु अने उचो शब्दामे कोइत्लु लाग्यू, “ऐ यहुदि अने यरूशलेमेहे आखे रोणारे, ओ होमजीत ल्या, अने कान लागाडीत माआ गोठी होमला.” 15जेहलो तुमु होमजाडीत होय, ओ मांहे नशाम नाहा होय, काहाके ओमे ताहा पहीले प्रहर होय. 16पण एती गोठी होय, जो योएल संदेष्टाआ व्दारे कोयु गोयी ओती. 17देव कोत्लू, का शेवटच्या दिहोम एहलो उवे का आय आपाआ आत्माआ आखे मआहाचो पाईपोडेहे कोअही, अने तुमाआ पोऱ्ये अने तुमाआ पोयरयी भविष्यवाणी कोअनारू, अने तुमाआ जुवानोहो दृष्टांतमेहे स्वप्ने पोडे. 18नाहा ताहा आय आपाआ दासास अने आपाआ दासिपो पण तियाअ दिहोम आपाआ आत्माआ पाईपोडेहे कोअनारू, अने ते भविष्यवाणी कोअनारू. 19अने आय उसे जुगोम अदभुत काम अने निसे धरतीपो चिंन्हे, म्हणजे रक्त अने आग अने धृम्ररूप एहलो देखाडनारू 20परमेश्वरोओ महान अने प्रसिध्द दीही आविलाआ पेल्लुज दिह अंधकारमय अने चंद्र रक्तमय उवे. 21अने जो कोडु प्रभूऊ नाव लेही, तियाआ तारण उवे. 22ऐ इस्राएल, ओ गोठी होमला येशु नासरेथ, एक मांहु ओतु ज्याकोईत देवापो ओनारो प्रमाण तियाअ अदभूत काम अने चिन्हानाकी प्रगट होय, जे देवूही तुमामे तियाआ व्दारे मेलीते देखाये जे तुमामे मालुम होय. 23तियाआ येशुहू, जे देवूही नेमित मेकल्या योजना अने पूर्वज्ञाना प्रमाणोओ धोल्योओ गोल्यो, तुमु अधर्माआ आताई वधस्तभवर खिलून माअये. 24पोन तीयाहा देवूही मोईला बांधित मेकल्यामरोत सोडवीत उठविले; काहाके ओ उवे अवश्य ओते का तो तियाआ होपित रोतलू. 25काहाके दाविद तियाआ विषयी गोगत्लू, आय प्रभूहु हरेक टेमे आपाआ आगाडी पालीत रोही काहाके तो माआ हाजावोगे होय, यकोअता का आय ढळू कायना कोईत. 26आव कारनो कोईत माआ मोनाहा आनंदीत उवे, अने माआ जीभ उल्लासीत उवी; नाहा ताहा माआ डील पण आशामे निवासाहा कोअही. 27काहाके तू माआ जीव अधोलोकात नाहा सोडविणारू; अने नाहा आपाआ पवित्र जोआहा सोडुहू देहि. 28तू माहु जिवनाआ मार्ग देखाल्यु होय; तू माहु आपाआ दर्शनाआ व्दारे आनंदाने पोईत आपी. 29“ऐ पाही, आय कुलधिआ दाविदाआ विषयी तुमामे प्रशस्तपणे कोत्लू का तो ताहा मोईत गोल्यो अने गाडल्यु पण गोल्यो अने तियाआ कबर आज पर्यंत आमा इही होय.” 30ओतो संदेष्टा ओतु, तियाहा मालुम ओते का देवूही माहु शपथ लेदि होय का आयताआ पोऱ्याहा होमला माअहुहू ताआ राजासनापो बोहाडअलू; 31तिये उवनारू गोठीही पहिलुच पालहु ख्रिस्ताच्या उठाडीला कोअता भविष्यवाणी कोअयी का नाहा ताहा तिया जीव अधोलोकोम मोकलील्या गोल्यो अने नाहा तियाआ डील सोडुहू आप्लु. 32तियाआ येशुहू देवूही उठविले होय, ज्याआ आमाहा आखे साक्षीदार होय. 33आवा प्रकारे देवाच्या हुदिवोल उचो पदी मिलवीत, अने बाह्हू त्यापोरोत ते पवित्र जोडयो कोईत ज्याआ प्रतिज्ञा कोअल्यो गोयी ओती तिये ओ ओतीत आप्लु होय जे तुमु पालल्ते अने होमलित. 34कोईत दाविद ताहा स्वर्गापो नाहा सोढयू; पण तो स्वता कोत्लू, परमेश्वराने माआ प्रभूहु कोयु, माआ हुदिवोल बोह, 35जांहुजा का आयताआ वैऱ्यी ताआ गुडाहा आसन कोए तांहुंजा. 36यास्तव ओमे इस्राएलाआ आखे कोअवालावाही निश्चयपूर्वक होमजीत न ओवो का देवूही तियाआ येशुहू ज्याहा तुमु वधस्तभपो खिळले ओते, प्रभू पण ठेरव्यू अने ख्रिस्तपण. 37तेहलाम माननारा अंत मोनाहा छेद ओवयू, अने ते पेत्रस अने इतर प्रेषिताला फुसुहू लागाडीत, “ऐ पाहीही, आमाहा नाहाकोत कोहू?” 38पेत्रस तियाहा कोयु, मोनफिरावा को, अने तुमाआ मायरोत हर एक जणाला आपाआ-आपाआ पापापो क्षमा कोअता येशु ख्रिस्ताच्या नावामे बाप्तिस्मे दया; ताहा तुमु पवित्र आत्मावाही दान मेलविनारो. 39काहाके ए प्रतिज्ञा तुमु, अने तुमाआ पोऱ्ये पोय्रा, अने ते आखे सेटे-सेटे माआहुकोअता पण होय ज्याहा प्रभू आमाआ देव आपाआ जागे हादनारो. 40तिये जास्तीज किबी गोठीही पण साक्ष आपित होमजाव्ये का आपाआ माह कुटील पीडी पोरोत वासाडा. 41यास्तव जिये तियाआ वचन ग्रहण कोल्यु तिये बाप्तिस्मे लेदो; अने तियाआ तेदीही तीन हजार मांहाहा लगभग तियाआमे मिलून गोये.

विश्वासीई साझा जीवन

42अने ते प्रेषितापोरोत शिक्षाम लेई, अने संगति मेकिलो अने रुटू तोडूहु, अने प्रार्थना कोइला कोअता तीयार रोत. 43अने आखे माहुंहु बी जोडयो उवे, अने जास्तीज अदभूत काम अने चिन्हे प्रेषिता प्रगट उवनारा ओते. 44अने आखे विश्वास कोअनारे ऐखटे रोत ओते, अने तियाआ आखे वस्तू एखटे ओती. 45ते आपाआ-आपाआ धनदौलत अने सामान वेसीत-वेसित जेहलो ज्याआ गोरोज उवनारा ओती, वाटीत लेत ओते. 46ते हर एक तेदीही एक मोन ओतगोयु मंदिरोम एकठे उवनारा ओते, अने कोआ-कोआ रोटा, तोडीत आनंद अने सालस मोनाकोईत ओन खायलो ओते, 47अने देवाची स्तुती कोईत ओते, अने आखे मांहे त्याआरी प्रसन्न रोत्लो अने, जो तारण जोडयो कोईत ओते, तियाहा प्रभू हर एक तेदीही तीयाम मिलवीत आपित ओतु.

നിലവിൽ തിരഞ്ഞെടുത്തിരിക്കുന്നു:

प्रेरितो काम 2: NOINT

ഹൈലൈറ്റ് ചെയ്യുക

പങ്ക് വെക്കു

പകർത്തുക