लूका 11

प्रार्थना गा शिक्षा

1म्या दिन यीशु म्या जगा गेन प्रार्थना दडा लक्के डा, जब डीचनी प्रार्थना डाके मेना, मेटे दियागा चेलाकू तलाटे म्याखोम दियाटे मंडीके, “हे गुरु, जैसा यूहन्ना बपतिस्मा जिऊमिठाच नी हेजा चेलाकूके प्रार्थना दडा इथूकेकु, डेनोगोका आलेके भी आम इथूकोम।” 2एठा यीशु नी दिकुटे मंडीके, जब आपे प्रार्थना दडा, मेटे मांडे, “हे आलेगा स्वर्गीय बाटे गा रुपोन आमेन आदर घाटायु।” अमा राज्य हेयु, 3आलेगा दिनभोर गा आटा हर दिन आलेके जिऊ लक्कू। 4“एठा आलेगा पापो के मापोकी, चोयाकी आलेभी आलेगा हार म्या अपराधी के मापोएबा होय, एठा आलेके अंदाजो बाकी सा, पेनो बुराई टे बचातिंजकोम।”

आसी लाक्कू

5-6यीशु नी दिकुटे मंडीके, मनतिंजेकी आपे तलाटे तुनिका म्याखोम आडी रातोन म्या सोपती गा उरान ओले एठा आफाई सोकळा उदार आसी चहतावा होय। “चोयाकी नका अमा म्या सोपती मिलातिंजू हेन होय एठा इंजा मेरान डीचके चचारा घल्जी चोचकाभी बाऊ होय। 7आपेगा सोपती उरा गा तलाटे जवाब जेबा होय, इंज्के ताखलिफ बाकी जिऊ, इंज्नी इंजा दराजोके बंदोके होय एठा इंजा चफनीकू बिंदीलेन गिटीच लक्के होय। इनिघल्जी इंज बिटटे आमके बान जिऊ। 8इंज आपेटे साच्चो मंडीवा, अगर देटेन अमा सोप्तीभी मका अमा घल्जी बिट बाने एठा जिऊ बाने, फिरभी अमा जिद्दो टे आसी गा वोजीटे डीच बिट्बा एठा अमा जरुरत रोंगो आमके जेबा। 9इंज आपेटे सच्चो मंडीवा मेना, आसे मेटे आपेके जेबा, घाटाए मेटे आपेन घाटाऊवा, ठोट-ठोटडे मेटे आपे घल्जी खुल्लायेवा। 10चोयाकी जो जेकाभी आसिवा होय, दियेन घाटाऊवा होय, जो घगाटावा होय, देटेन घाटाऊवा होय, एठा जो ठाट-ठाडेबा होय, दिया घल्जी खुल्लाएबा। 11आपे तलाटे येनोगो जे बाटे होंगा कि जब दिया कोंटे सोकळा आसी टासो, मेटे डीचके घोटा जेबा, या काकू आसी टासो, मेटे काकू बेदला डीचके बिंजके जेबा? 12अगर अक्कोम आसिकी मेटे डीचके किडींजके जेच्बा? 13इनिघल्जी जब आपे बुरा आरुटे, अमा चफनीकुके अच्छा चीजो जिऊ हाडाई टासो, मेटे आपेगा स्वर्ग गा बाटे हेजा आसी मिंकूके पवित्र आत्मा चोया बान जिऊ।”

यीशु एठा भूतोकु गा राजा

14डाबोलटे यीशु नी म्या गुं गा कोरो टे भूतोके ओटकेनेच, जब भूतो दियाटे ओटजे। मेटे डी गुं गा कोरो मंडी लज्जे, एठा कुरकू इनी हैरानजे। 15पेनो दिकु तालाटे चोटोकु मंडीके, डीच भूतोकु गा मुख्या, शैतान गा शक्तीटे भूतोकुके कोलाकुवा होय। 16दूसराकु नी अंदाजोएच घल्जी दियाटे स्वर्ग गा म्या अचम्बो कामय घाले। 17पेनो डीचनी, दियागा मना गा बातो मालूमटे दिकुके मंडीके, “जो-जो देशो गा कुरकू इकु-इकुका लाडाई टासो मेटे दिकुगा देशो नशोऊबा। एठा अगर म्या सगाकु गा कुरकू एक-मेग गा खिलाफबेन जे टासो, इनी सगाकु म्या सेंग्गोन बान थंदळ।” 18एठा अगर शैतान हेजाका खिलाफबेन लाडाई डाये टासो, मेटे दियागा राज्य चोथान टे आरु थंदळवा? चोयाकी आपे इंजा विषय गेन मंडीवा होय, कि येटेन शैतान गा सारा टे भूतोकुके ओठकु डा। 19अगर इंज शैतान गा मदत टे भूतोकुके कोखाला टासो, मेटे अमागा कोण जेगा मदत टे कोलाकुवा? इनिघल्जी डीचका आपेगा फैसला दडामिठाच डाएवा। 20पेनो अगर इंज परमेश्वर गा शक्तीटे भूतोकुके कोखाला मेना? मेटे परमेश्वर गा राज्य आपेगा मेरान हेन पोचातींजे। 21मेटे ताखातदार कोरो गा हथियार टोलके मिनी आपना गा उराके जागली मिठाच होय, मेटे दियागा जापाए बचातिन्ज थंदळवा होय, 22पेनो मेटे डीचके खाटटे जेका एठा ताखातदार पेळेचटे डीचके डी हथियार जे लिंजेन दियागा भरोसा डा, रुटेवा होय एठा दियागा डामा लुटातिंजेबा खातींजेवा होय, 23जो इंजागा सेंग्गोन बाऊ, देटेन इंजागा खिलाफबेन होय, एठा जो इंजागा सेंग्गोन बान कखाटिंज देटेन पासरुबा।

खराबो आत्मान उराके घगाटा

24मेटे भूतो मुके कोरो टे ओटबा होय, एठा मेटे बान घाटाऊ कि मंडीवा होय कि इंज इंजगा डीका महिनान तोटे टे ओट डा हिराबा होय, 25ओसो हेजेवा डो डीचके भला-बुरा एठा बेमातलाब कोरो होय, 26मेटे देटेन हेजेवा डो आपना मिन्कुटे एठा बुरा सात भूतोकुके आपना गा का गेल्ला हेजेवा होय, एठा दिकु डेन सुनते मुवा होय, एठा 27जब यीशु इनी बातो मंडीका लक्के डा, मेटे गर्दी गा टे तुनिका जापाएनी खट्टेका मंडीके, “धन्य होय देटेन जापाए डीचनी आमके जनम जीके एठा आमके दिडोम आनुके।” 28डीचनी मंडीके, “हेन इनी सच्चो होय, पेनो धन्य दिकु होय जो परमेश्वर गा वचन आजोम्बा एठा पलान दडावा होय।”

स्वर्गीय नमस्कार गा आसी

29मेटे खाट म्याखठ्ठाऊ डा, मेटे देटेन मंडी लज्जे, कि इनी जामाना गा कुरकू बुरा होय; दिकु चिन्हा घगाटावा होय, पेनो परमेश्वर कोनेटे मंडीमिठाच योना गा चिन्हा के आराटे तुनिका दूसरा चिन्हा दिकु बान जिऊ, 30जैसा योना नीनवे गा कुरकू गा घल्जी चिन्हा आरुके डेनोगोका कोरो गा कोण भी इनी जमाना गा कुरकू गा घल्जी आरुयेवा। 31दक्षिण गा रानी न्याय गा दिन इनी टेमो गा कोरो गा सेंग्गोन बिटजे डो, दिकुके दोषी आरुवा, चोयाकी देटेन सुलैमान गा ज्ञान घल्जी भेबाव लेंक्कीटे हेन, येटेन देटेन होय जो सुलैमान टे भी खाट होय, 32नीनवे शहर गा कुरकू गा दिनेन इनी टेमो गा कुरकू सेंग्गोन टेगेंजेडो, दिकुके आनोवा टोकाएवा, चोयाकी दिकुनी योना गा खाबोर आजुमटे, मन बादलाके एठा डोगे, येटेन देटेन होय, जो योना टे भी खाट होय।

कोम्बोर गा दिवा

33तुनिका कोरो म्या दिवा जुलटे म्या टोपला इटान बान दोडो, पेनो म्या कोंडाळन डोएवाकी उरा गा तलान हेजे मिंकून उजाला घाटाऊवा। 34मेट कोम्बोर घल्जी म्या दिवा रोंगो होय, इनिघल्जी अगर अमागा मेट अच्छा टासो, मेटे अमागा सेबाई कोम्बोर उजालाऊबा। पेनो मेटे देटेन बुरा होय, मेटे अमा कोम्बोर भी आन्धरा होय, 35इनिघल्जी ध्यान टे थंदळे, कि जो उजाला आमेन होय, देटेन अंधरायु बाकी। 36इनिघल्जी अगर अमा सेबाई कोम्बोर उजाला होय, एठा डेगा तुनिकाभी भागो अंधरान बाऊ होय, मेटे सेबाई कोम्बोर येनेगो उजालाऊबा, जैसा म्या दिवा जुलू लठ्ठाका हेजा चमकातिंजू टे आमके उजाला जेबा होय।

मूसा गा नियम इथूमिंकू एठा फरीसि कुरकू गा कल्ला

37जब यीशु बातो लक्के डा, मेटे तुनिका फरीसि कुरकू दियाटे बिनती डावे, कि देटेन दियागा सेंग्गोन उरान आटाजोम सेने। इनिघल्जी देटेन तलान ओलेडो आटाजोम सुबानजे। 38फरीसि कुरकू इनी धोटे अचाम्बोएन मेना कि दिच्नी आटा जोमा गा पेला दिकु खराबो टी टे आटा चोया जोजोम्बा होय?, 39प्रभु नी दिकुके मंडीके, हे फरीसि कुरकू, आपे कोटोरा एठा थाळाके, मठा-मठा उरूडेबा पेनो आपेगा तला अंधरा एठा खीजो भेट्टी के होय, 40हे बेदिमाग, जो बल्ला गा भागो आरुके, चोच डीचनी तला गा भागो बान आरुडुका? 41पेनो हां, तलामिनी चीजो के दान जिकी, मेटे डोगे, सेबाई चोचकाभी अमा घांजी चोखरा युवा, 42“पेनो हे फरीसि कुरकू धिक्कार आपे लिंजेन? आपे पोदीने एठा सुदाब गा एठा सेबाई रोंगो गा पालक भाजी गा दान जिऊवा, पेनो न्याय के एठा परमेश्वर गा प्यार के बान आजोम होय, होना डा कि येनेन भी दडा होना, एठा दिकुके भी बान आरा। 43हे फरीसि कुरकू, आपे लिजेन हाय,! आपे आराधना जगा गेन कामय असान एठा हाटी गेन नमस्कार होना डा, 44धिक्कार आपे लिंजेन! चोयाकी आपे डी उखुके कब्रा गा रोंगो होय, डे लिंजेन कुरकू सेंद्रावा होय, पेनो बान मालूम।” 45मेटे म्या मूसा गा नियम गा गुरूजीनी डीचके जवाब जीके, “हे गुरु, इनी बातो गा मंडीटे आम आलेगा खिलाफबेन दडावा होय।” 46डीचनी मंडीके, हे मूसा गा नियम गा गुरूजी, आपे लिंजेन भी धिक्कार! दिकु कुरकू गा खाडान खांबाल ओझा सेगेवा होय, पेनो आपे डीके म्याधेळेन घल्जी म्या बोटो भी येंडा बाने। 47हाय आपे लिंजेन! आपे परमेश्वर गा कोनेटे मंडीमिठाच मिंकू गा कब्रा सुसीटीबा होय, दियेन आपेगा आजा-दादा नी गोगेजबा होय, 48अगर आपे गावही डाये, एठा आजा-दादाकु गा कामाय गेन सही का होय, चोयाकी दिकुनी मेटे दिकुके घोच्केकु एठा आपे दिकुगा कब्र के आरुवा होय? 49इनिघल्जी परमेश्वर गा दिमाग भी नी मंडीके होय, कि इंज दिया मेरान परमेश्वर गा कोनेटे मंडीमिठाच मिंकूके एठा यीशु गा कालामके चेलाकूके कुल्कुवा एठा दिकु तलाटे अदा कुरकू के घोचकुवा, एठा चोटोकु के सतातींज कुवा, 50ताकी जोभी परमेश्वर गा कोनेटे मंडीमिठाच गा पचना दुनिया ओटटे आडीके मेना होय,, सेबाईकु गा लेखा, इनिका टेमो गा कुरकू सेगेवा मेना होय! 51हाबिल गा गुजूटे साटे जकर्याह गा पचना टाएन जो बाली एठा यरूशलेम गा मंदिर गा तलान घोच्केनेच डा इंज आपेटे सच्चो मंडी बाकी, दियागा लेखा इनी टेमो गा कुरकू टे सेगेवा मेना। 52धिक्कार! आपे मूसा गा नियम गा गुरूजीकु लिंजेन! कि आपेनी ज्ञान गा कुंजी सैय्ये मेना, पेनो आमनी खुद मुडूका बाने, एठा न डेन मु मिंकूके भी रोकातिंजकुबा। 53जब डीचनी इनी बातो दिकुटे मंडीटे दिकु देटे ओटजे, मेटे मूसा गा नियम के इथूमिठाच एठा फरीसि कुरकू भेबाव बुरा खिजाटे दिकु टाऊ आटीका आरा डा एठा एखा लज्जे, कि देटेन घोनेच्का बातो बारेन दिकुटे प्रश्न एठा अमा-इंजा लज्जे। 54एठा दिकु इनी तकातिंजेनका डा, कि यीशु गा चाभु टे ओटके तुनिका बातो उठाटे डीचके दोषी ठहरातिंजटे फसातिंजकेच।

നിലവിൽ തിരഞ്ഞെടുത്തിരിക്കുന്നു:

लूका 11: GOKNT

ഹൈലൈറ്റ് ചെയ്യുക

പങ്ക് വെക്കു

പകർത്തുക