Yuuẖanna 9
9
Yasuuⓐ gwigeto kwijo momaŋ gwina gwiliŋinu gwiro ŋwudhibaŋ
1Dina madhinu Yasuuⓐ, ŋwaŋa kwijo gweta gwina gwiliŋinu kari ganu gwiro ŋwudhibaŋ. 2A calmiz juŋun othaije galo, alaici, Muⓐallim gwai, ei gwiro gwina gwapo ŋida ŋina ŋike, kwiji ibigwa, i baboŋa nana gwai luŋun, ŋwubiliŋina gwiro ŋwudhibaŋ? 3Al Yasuuⓐ aicinu, Kwiji ibigwa gwati gwapo ŋida ŋina ŋike no, i baboŋa nana gwai luŋun; abi ŋiro ŋa Kalo ŋaji ŋaŋini dugun. 4Aram nyi gwapai ŋiro ŋa ŋeda gwina gwukejiny, nanaŋ kalo gwuro ganu; kalo gaji garo gile, a kwiji gweda gwati gwuthi ŋoma gwapai ŋiro no. 5Ŋinena nanaŋ jiny kidhila, nyi gwiro fure gwadhi gidhila. 6A dina muŋwabiŋi minoŋ, ŋwugwoinya galo kwiyaŋ, ŋwurgaŋ ŋidoro ŋwoiny ŋwai, ŋwulmaije gi je ja kwiji gwina gwiro ŋwudhibaŋ. 7Ŋwaicinu, Idhi, ŋuni gi libuŋ lina lan Siluwaam (lina lan Gwukejinu). Ŋwela, ŋwuni, ŋwubaura, ŋwure je ganu. 8A liji lina limaijil galo, a lina laŋadhi kwereny gwiro ŋwudhibaŋ, alabiŋi, alarnu, Kwiji ibigwa gwati gwiro gwina gwathijalo athuŋwbupa lijo ŋida na? 9A coŋ arnu, Ŋeda gwiro; a liter arnu, Gwiro ŋinena ŋeda. Ŋwubarnu, Nyi gwiro. 10Alaicinu, Ŋa gwuro je ganu akwai? 11Ŋwulabiŋaijo, ŋwulaici, Kwiji gwina gwan Yasuuⓐ gwirigedhi ŋodoro, nyilmaije gi je, nyaici, Idhi gi libuŋ lina lan Siluwaam, ŋanuni; nyibela, nyuni, nyure gi je. 12Alabiŋaijo, alaici, Ŋeda gwada? Ŋwarnu, Nyi gwati gwiliŋidhi no.
13Alodha kwijo gwilaŋ gwiro ŋwudhibaŋ gi Farriisiyiin. 14A lamun la Sabith liro lina lirigedhi lai Yasuuⓐ ŋidoro, ŋwuriye gi je. 15A Farriisiyiin othaije galo manaŋ dhuŋun dhai dha dhure je ganu. Ŋwulaicinu, Gwimaijiny ŋidoro gi je, nyibuni, nyidaŋa galo. 16A Farriisiyiin coŋ arnu, Kwiji ibigwa gwa Kalo gwutu no, ŋinena athuŋw nejo lamun la Sabith no. A liter arnu, Kwiji gwina gwike gwuthi ŋoma gwapai ŋiro ŋina ŋipiŋipa akwai? Alurudhini ganu. 17Alaici kwijo gwina gwiro ŋwudhibaŋ manaŋ nu, Ŋa gwarakwai ŋinena ŋeda gwai gwina gwureaŋa gi je? Ŋwarnu, Gwiro nebi. 18Athibi Yahuud uminyu darnu ŋeda gwiro ŋwudhibaŋ kwereny, ŋwubure je ganu no, kwereny nanaŋ lati lurnio babuŋw gwuŋun a nana gwuŋun no. 19Allothaije galo, allaici, Ŋari ŋalo ŋiro ibiŋa ŋina ŋaranya ŋai ŋiliŋinu ŋiro ŋwudhibaŋ a? Ŋimure gi je ŋinena akwai? 20Al baboŋa nana gwai luŋun aicinu, Anaŋa liliŋidhi darnu ŋari ŋuri ŋiro ibiŋa, ŋiliŋinu ŋiro ŋwudhibaŋ. 21Abi ŋima daŋa galo ŋinena akwai, anaŋa lati liliŋidhi no; i gwina gwurio gi je gwati gwiliŋidhana no. Othaijul galo; gwurun; ŋeda gwuthi ŋoma gwabiŋi gwiren. 22Baboŋa nana gwai luŋun labiŋu dhuŋuna ibidha ŋinena dhenyilo Yahuud; ŋinena aicaijiyo Yahuud gi dhuŋun dhetipo, alarnu, Ada kwiji gweta gwimateje galo darnu Yasuuⓐ gwiro al Masiiẖ, gwaji gwarucini majmaⓐ. 23Ŋinena ar baboŋa nana gwai luŋun nu, Gwurun; othaijul galo. 24Alurnie kwijo gwina gwiro ŋwudhibaŋ ŋwamun ram, alaicinu, Urthudhi Kaloŋa; anaŋa liliŋidhi darnu kwiji ibigwa gwiro kwiji gwina gwike. 25Ŋwulabiŋaijo, ŋwulaici, Ada gwimaro gwike, gwati gwiliŋidhiny gwai no; nyi gwiliŋidhi dhuŋuna dhetipo darnu, kwereny nyi gwiro ŋwudhibaŋ, abi ŋinena nyi gwimadaŋa galo. 26Alabiŋaijo manaŋ, alaici, Gwuraŋa akwai? Gwuri aŋa gi je akwai? 27Ŋwulaicinu, Nyi gwimajabiŋaijo di athanyabi diŋinu no. Kworaŋ nyabi bupe dari ladiŋini manaŋ? Nyaŋa lara laro calmiz juŋun ko a? 28Alilo, alarnu, Ŋa gwiro thilmiz dhuŋun; abi anaŋa liro calmiz ja Muusa. 29Anaŋa liliŋidhi darnu Kalo gabiŋaijo Muusuŋw; abi are ibigwa gwati gwiliŋidhana gwai kaloŋa gina gidhuŋwuna no. 30Al kwiji abiŋaijo, ŋwulaici, Dhuŋun ibidha dhina dhalijaje galo dir gwati gwiliŋidhanya gwai kaloŋa gina gidhuŋwuna no, abi gwiminy ureye je ganu. 31Alŋa liliŋidhi darnu Kalo gati gathideŋinaijo lijo lina like no; abi ada kwiji gweda gwimorthadha Kaloŋa, athuŋwapai dhuŋuna dhina dhibupuŋw, athi Kalo deŋinaijo. 32Ro dina gitinina gidhila liji lati lidiŋinu kwijo gweda gwina gwurio kwijo je ganu gwina gwiliŋinu gwiro ŋwudhibaŋ no. 33Ada kwiji ibigwa gwati gwina gwurii gwa Kalo no, gwati gwuthi ŋoma gwapai dhuŋuna dheda no. 34Alabiŋaijo, alaici, Au gwiliŋinu ŋidi ŋai peth ŋina ŋike, ŋa bari gwijalimiye akwai? Algatho por.
35A Yasuuⓐ diŋini darnu gwiguthilo por; a dina muŋwbuje, ŋwaicinu, Au gwuminyu Ŋare ŋa Kalo a? 36Ŋwabiŋaijo, ŋwaici, Ei gwiro, Kweleny gwai, dinyuminyi? 37A Yasuuⓐ aicinu, Gwina gwaŋadhaŋa, a gwina gwabiŋaŋa gwai ŋeda gwiro. 38Ŋwaicinu, Kweleny gwai, nyi gwuminyu. Ŋworthadha. 39A Yasuuⓐ arnu, Ŋinena jo ẖukm nyibuladha kidhila ibiga, a lina lirima gi je alure je ganu; a lina luro je alrimi gi je. 40A Farriisiyiin coŋ lina lidhilai diŋini dhuŋuna ibidhe, alaicinu, Anaŋa lirima gi je ko a? 41Al Yasuuⓐ aicinu, Ada nyaŋa lina lirimu gi je, nyaŋa lati laiuthi ŋida ŋina ŋike no; abi ŋinena nyaŋa larnu, Anaŋa lathidaŋa galo; abi ŋidi ŋina ŋike ŋalo ŋoma ŋathije.
നിലവിൽ തിരഞ്ഞെടുത്തിരിക്കുന്നു:
Yuuẖanna 9: HBN
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
First published by the British and Foreign Bible Society in 1966.
