Yuuẖanna 10
10
Gwora gwiŋir
1Titiganu, titiganu, nyi gwa gwacaijinu, Gwina gwati gwuni kour gi thigara ganu no, ŋwubalo gi dhai dhiter gwiro gwuram a gwijigwor. 2Abi gwina gwuni kour gwiro gwora gwa jaŋal. 3A gwina gwathethadhe our, ŋwigiijo; a jaŋal diŋini gwula gwuŋun; ŋwurnie jaŋala juŋun jiriny, ŋwulmadhinijo. 4A muŋwteye jaŋala juŋun, ŋwulmadhinijo, a jaŋal gwuje; ŋinena liŋidhilo gwula gwuŋun. 5Athil gwujo gwirina no, alabire; ŋinena athil liŋidhi gwula gwa lirin no. 6Odaije ibigwe gwina gwabiŋaijilo Yasuuⓐ; athil biliŋidhi dhuŋuna dhina dhabiŋaijuŋwulo no.
7Al Yasuuⓐ abiŋaijo manaŋ, ŋwulaici, Titiganu, titiganu, nyi gwa gwacaijinu, Nyi gwiro gibur ga jaŋal. 8Peth lina limadhinudhiny liro luram a lijigwor; athibi jaŋal deŋinaijo no. 9Nyi gwiro gibur; ada kwiji gweda gwimuni nyi gwai, gwagilaŋ, gwaji gwuni a gwutuya a gwabuje gidhogora. 10Gwuram gwathi iladha dapai ŋwuramai, a dirinya, a diŋirithe dogo; abi nyi gwiludhi dinyil midheye, a midhe gwegen iŋirani. 11Nyi gwiro gwora gwiŋir; gwora gwiŋir gweijo jaŋala juŋun. 12Abi gwina gwiro gwadimani, athuŋw rui gwora no, a jaŋal juŋun jati jiro no, ŋwaŋa kamarainyu diladha, ŋwugathani jaŋala, ŋwabire; al kamarainy umi, ŋwujidigir galo. 13Gwadimani gwabiro, ŋinena ruŋw gwadimani, athuŋw gitijo jaŋala je no. 14Nyi gwiro gwora gwiŋir, nyiliŋa jaŋala jiny, nyi jaŋal jiny liŋa. 15Gwiro ŋinena liŋidhiny Babo, a minoŋ ko nyiliŋa Babuŋw; nyeijo jaŋala. 16A nyi gwuthi jaŋala jiter jina jati juthi thigara ibidha no; aram jinyilapai ko, a jaji jadiŋini gwula gwiny; a lidoŋa laji laro letipo, a gwora gwetipo. 17A minoŋ Babo gwuminyiny, ŋinena uminyiny dai, nyi midhe manaŋ. 18Kwiji gwati gweda gwuthi ŋoma gwinyapa no, abi nyi gwuminyu dai gwiren. Nyi gwuthi ŋoma gwai gwiren, a nyi gwuthi ŋoma gwamidhe gwiren manaŋ. Amr ibigwa gwapiny di Babo gwiny. 19A Yahuud lagaje ganu gi dhuŋun ibidhe. 20A loinyadho degen arnu, Gwuthi ŋurinya, a gwirero; kworaŋ nyabi deŋinaijo? 21A liter arnu, Dhuŋun ibidhe dhati dhirui dha kwiji gwina gwuthi ŋurinya no. Ŋuriny ŋuthi ŋoma ŋuriye ŋwudhibaŋa gi je a?
Yasuuⓐ gwijo gi ŋidwa ŋadhi Jarimani gi Urushaliim
22A ŋidwa je Urushaliim ŋadhi Jarimani, a lamun liro kwogai. 23A Yasuuⓐ elila galo gi hekal kwereny ganu gwa Sulemaan. 24A Yahuud urejo galo keligeny ganu, alabiŋaijo, alaici, Ŋa gwimunudhije ganu ro caun di a ŋinena? Ada ŋa gwimaro al Masiiẖ, abiŋaijije momaŋ. 25Al Yasuuⓐ aicinu, Nyi gwabiŋaijaje, athanya buminyu no. Ŋiro ŋina ŋathinyilapai gi jiriny ja Babo gwiny ŋiro shaahid gwiny. 26Abi nyaŋa lati luminyu no, ŋinena athanya rui jaŋal jiny no, gwiro ŋinena nyi gwabiŋaijaje. 27Jaŋal jiny jathidiŋini gwula gwiny, nyilliŋa, nyilgwuje. 28Nyildhedha midhuŋw gwortal; a jati jai gatur no, a kwiji gweda gwati gwuthi ŋoma jinyil wala ŋarthan gi dhoi ganu dhiny no. 29Babo gwiny gwina gwidhedhinyilo gwinunu peth; a kwiji gweda gwati gwuthi ŋoma juŋwul wala Babuŋw gwiny dhoi ganu dhuŋun gatur no. 30Nyi a Babo gwiny liro letipo.
Kadugore gwa Yahuud
31A Yahuud uthe nyolya alari nyalnyaice. 32Al Yasuuⓐ aicinu, Nyi gwimajaŋajo ŋiro ŋoinyadho ŋina ŋiŋir di Babo gwiny; abi ŋiro ŋirau ŋina ŋari ŋinyin aicaije? 33A Yahuud abiŋaijo, alaici, Anaŋa lati laŋaice gi ŋiro ŋina ŋiŋir no; abi ŋinena luiŋa Kaloŋa, ŋinena raŋa kwiji, ŋabari gwaruini Kalo gwiren. 34Al Yasuuⓐ aicinu, Dhati dhulinu gi naamuus gwalo darnu, A nyi gwarnu nyaŋa liro kalo na? 35Ada limuŋwulaici kalo di ŋediŋa lina liladhina dhuŋun dha Kalo, a dhuŋun dha kitham dhati dhuthi ŋoma dhaka gatur no. 36Nyabari ŋeda gwina gwijurio Babo, ŋwukeja kidhila, nyabarnu ŋeda gwilui Kaloŋa; ŋinena arinyinu, Nyi gwiro Ŋari ŋa Kalo a? 37Ada nyi gwati gwirii gweta gwina gwimapai ŋiro ŋa Babo gwiny, athinyilbi uminyu no. 38Abi ada ŋiminyilapai, athinyilbi uminyu no, uminyul bai ŋiro ŋai; danyaliŋa, nyuminyi darnu Babo gwo diginy, nyije dugun. 39Albupe alari gwalmutha manaŋ; ŋwutuya gi doi ganu degen. 40Ŋwela manaŋ ŋwujadha Urdun kwereny, kalo gina gathin Yuuẖanna ⓐamidhe kwerkwereny; ŋwujalo mine. 41A loinyadho eladha dugun, alarnu, Yuuẖanna gwati gwapo ŋiro ŋipiŋipa ŋetipo no; abi dhuŋun peth dhina dhabiŋudhi Yuuẖanna kwiji ibigwa dhiro titiganu. 42A loinyadho uminyi mine.
നിലവിൽ തിരഞ്ഞെടുത്തിരിക്കുന്നു:
Yuuẖanna 10: HBN
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
First published by the British and Foreign Bible Society in 1966.
