Zenez 11
11
Latour Babel
1Dans sa lepok la, tou dimoun lor later koz mem langaz. 2Zot sorti dan les e zot trouv enn gran laplenn dan Mezopotami. Zot desid pou res laba. 3Zot dir ant zotmem: “Anou fer blok e anou sof zot dan four.” Zot servi blok kouma ros, e koltar kouma mortie. 4Lerla zot dir: “Anou aranz enn lavil ek enn latour ki tous lesiel. Koumsa, nou pou vinn renome e nou pa pou disperse lor later.”
5Lerla, LESEGNER desann pou get lavil ek latour ki bann imin pe konstrir. 6LESEGNER dir: “Get enn kou! Zot form enn sel pep, e zot koz mem langaz. Si asterlamem zot pe fer koumsa, plitar zot pou kapav fer tou seki zot anvi. 7Anou desann pou met konfizion dan zot langaz. Koumsa personn pa pou konpran so kamarad.” 8Alor, LESEGNER dispers zot partou lor later, e zot aret batir zot lavil. 9Sa lavil la apel Babel, akoz labamem LESEGNER finn met konfizion dan langaz bann dimoun. LESEGNER finn dispers zot partou lor later.
Bann desandan Sem
10Ala lalis bann desandan Sem. Dezan apre deliz, Sem ena 100 an. Li gagn enn garson ki apel Arpaksad. 11Apre nesans Arpaksad, Sem viv ankor 500 an e li gagn ankor lezot zanfan.
12Arpaksad ena 35 an kan li gagn enn garson ki apel Sela. 13Apre nesans Sela, Arpaksad viv ankor 403 an e li gagn ankor lezot zanfan.
14Sela ena 30 an kan li gagn enn garson ki apel Eber. 15Apre nesans Eber, Sela viv ankor 403 an e li gagn ankor lezot zanfan.
16Eber ena 34 an kan li gagn enn garson ki apel Peleg. 17Apre nesans Peleg, Eber viv ankor 430 an e li gagn ankor lezot zanfan.
18Peleg ena 30 an kan li gagn enn garson ki apel Reou. 19Apre nesans Reou, Peleg viv ankor 209 an e li gagn ankor lezot zanfan.
20Reou ena 32 an kan li gagn enn garson ki apel Seroug. 21Apre nesans Seroug, Reou viv ankor 207 an. Li gagn ankor lezot zanfan.
22Seroug ena 30 an kan li gagn enn garson ki apel Nahor. 23Apre nesans Nahor, Seroug viv ankor 200 an e li gagn ankor lezot zanfan.
24Lor so 29 an, Nahor gagn enn garson ki apel Tera. 25Apre nesans Tera, Nahor viv ankor 119 an e li gagn ankor lezot zanfan.
26Tera ena 70 an e li deza ena trwa garson: Abram, Nahor, ek Arann.
Bann desandan Tera
27Ala lalis bann desandan Tera: Tera gagn Abram, Nahor ek Arann. Arann gagn Lot. 28Arann mor dan so pei natal, Our, kot bann Kaldeen. Kan Arann mor, so papa Tera ankor vivan. 29-30Abram marye avek Sarai. Me Sarai pa kapav gagn zanfan, parski li steril. Nahor marye avek Milka, tifi Arann. Milka ena enn ser ki apel Iska.
31Enn zour, Tera desid pou kit Our pou al res dan Kanaan. Li amenn avek li so garson Abram, so belfi Sarai, ek so tizanfan Lot. Me kan zot ariv Arann, zot desid pou res labamem. 32Tera mor dan Arann laz 205 an.
നിലവിൽ തിരഞ്ഞെടുത്തിരിക്കുന്നു:
Zenez 11: KMOTPOR
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Kreol Morisien OT Portions © Bible Society of Mauritius, 2020.
