Zenez 12
12
Bondie apel Abram
1LESEGNER dir Abram:
“Kit to pei, to fami ek lakaz to papa.
Al dan enn pei ki mo pou montre twa.
2Mo pou fer twa vinn papa enn gran nasion,
e mo pou beni twa.
To nom pou respekte partou.
E to pou enn benediksion pou lezot.
3Mo pou beni dimoun ki pou beni twa,
me mo pou modi dimoun ki pou modi twa.
Atraver twa, mo pou beni tou bann fami lor later.”#12:3 Kapav dir osi: “Tou bann nasion lor later pou dimann mwa beni zot kouma mo finn beni twa.”
4-5Abram kit Arann, parey kouma LESEGNER finn komann li. Sa lepok la, Abram ena 75 an. Li amenn so fam Sarai ek so neve Lot avek li. Li amenn osi tou so dibien, ek tou esklav ki li posede. Zot al dan direksion Kanaan. Kan zot ariv dan Kanaan, 6Abram kontign travers pei la ziska ki li ariv kot gran pie More, dan Sikem. Sa lepok la, bann Kananeen ankor pe res laba.
7Enn zour, LESEGNER aparet avek Abram, e dir li: “Mo pou donn to bann desandan sa pei la.” Abram aranz enn lotel pou LESEGNER dan sa landrwa la, parski labamem LESEGNER finn aparet avek li. 8Lerla li al dan direksion bann montagn ki trouv dan les Betel. Li dres so latant ant Betel ek Ai. Laba, li aranz enn lotel pou LESEGNER. Li invok LESEGNER par so nom. 9Apre sa, letap par letap, Abram pran direksion Negev.
Abram ek Sarai dan Lezip
10Sa lepok la, enn lafaminn fer ravaz dan Kanaan. Telman lafaminn la dir, Abram ek Sarai bizin al res Lezip pou inpe letan. 11Kan zot pre pou ariv Lezip, Abram dir so fam, Sarai: “Mo kone ki to bien zoli. 12Kan bann Ezipsien pou trouv to bote, zot pou touy mwa akoz mo to mari. Me zot pou les twa vivan. 13Dir zot ki to mo ser. Lerla zot pou tret mwa bien akoz twa, e mo lavi pou sov.”
14Kan zot ariv Lezip, bann Ezipsien trouv Sarai extra zoli. 15Letan bann ofisie Faraon trouv li, zot al koz li avek Faraon. Lerla, zot amenn li viv dan sato Faraon. 16Faraon tret Abram bien akoz Sarai. Li donn li mouton, kabri, bef, serviter ek servant, bourik ek samo. 17Me akoz Sarai, fam Abram, LESEGNER avoy bann gran maler lor Faraon ek so lantouraz. 18Lerla, Faraon fer apel Abram e dir li: “Kifer to finn fer sa ar mwa? Kifer to pa ti dir mwa ki Sarai to fam? 19Kifer to finn fer mwa krwar ki li to ser? Akoz sa mo finn pran li pou mo fam. Ala to fam, pran li ale!” 20Faraon donn lord so bann serviter pou kondir Abram ek Sarai andeor pei avek tou seki zot posede.
നിലവിൽ തിരഞ്ഞെടുത്തിരിക്കുന്നു:
Zenez 12: KMOTPOR
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Kreol Morisien OT Portions © Bible Society of Mauritius, 2020.
