প্রেরিত্ 2
2
শিচ্চ্যগুনোর পবিত্র আত্মা পানা
1ইয়েনর কয়েক দিন পরে পঞ্চাশত্তমী-পরবর্ দিনোত্ শিচ্চ্যগুনে এক্কান জাগাত্ থুবেলাক্। 2সেক্কে আদিক্ক্যেগুরি আগাজত্তুন্ জোড়ে বৈয়্যের আবাজ ধোক্ক্যেন্ এক্কো অাবাজ্ এলঅ আর যে ঘরানত্ তারা এলাক্ সেই আবাজ্সোলোই সে ঘরান্ পুরেল। 3শিচ্চ্যগুনে দেগিলাক্ আগুনো জিলো ধোক্ক্যেন্ কি যেন ছিদি গেলঅ আর সিয়েন তারার্ পত্তিজন উগুরে এইনে পড়িলো। 4সেক্কে তারা বেক্কুনে পবিত্র আত্মালোই ভর্পুনোং অলাক্ আর সেই আত্মাগানে যিবেরে যেধোক্ক্যেন কধা কবার্ খেমতা দিলো সে ধগে তারা নানান্ ভাষায় কধা কুয়ো ধুরিলাক্।
5সেক্কে পিত্থিমীর নানান্ দেজত্তুন্ গোজেন-ভক্ত যিহূদী মানুচ্চুনে এইনে যিরূশালেমত্ বজত্তি গত্তন্। 6তারা সেই আবাজ্সো শুনিলাক্ আর ভালোকজনে সিধু থুবেলাক্। যার্ যার্ ভাষায় শিচ্চ্যগুনোরে কধা কধে শুনিনে সেই মানুচ্চুনে যেন বেদমা ধোক্ক্যেন্ ওই গেলাক্। 7তারা অমকদ আমক্ ওইনে কলাক্, “এই যে মানুচ্চুনে কধা কদন্, ইগুনে কি বেক্কুনে গালীল মানুচ্ নয়? 8যুনি সিয়েন অয় সালে আমি পত্তিজনে কেধোক্ক্যেন গুরি নিজো নিজো দেজর্ ভাষায় তারা মুয়োত্তুন্ শুনোঙর্? 9পার্থীয়, মাদীয়, এলমীয় মানুচ্ আর মেসোপতেমিয়াত্ বজত্তি গুরিয়্যে মানুচ্চুন, যিহূদীয়া আর কাপ্পাদকিয়া, পন্ত আর এশিয়া রেজ্যত্, 10ফরুগিয়া আর পাম্ফুলিয়া, মিসর আর কুরীণীর কায়কুরে লিবিয়ার কয়েক্কান জাগার মানুচ্চুন, রোম শঅরত্তুন্ যে যিহূদীগুন আর যিহূদী ধর্ম বিশ্বেজি অযিহূদীগুন এচ্চ্যন্ তারা, 11ক্রীট দ্বীপ মানুচ্চুন আর আরবীয়গুন-আমি বেক্কুনে দঅ আমার নিজো নিজো ভাষায় গোজেনর মহৎ কামর্ কধা তারারে কধে শুন্ন্যেই।”
12তারা আমক্ আর বেদমা ওইনে একজন আরেক জনরে পুযোর্ গরা ধল্লাক্, “ইয়েনর মানেগান কি?”
13আরঅ অন্যগুনে শিচ্চ্যগুনোরে থেঝেরা মারিনে কলাক্, “উগুনে মদ হেইনে মাত্তল্ ওইয়োন।”
মানুচ্চুনো ইধু পিতরর্ কধা
14সেক্কে পিতরে সেই এগারজন শিচ্চ্য সমারে থিয়্যেইনে দাঙর্ রঅ গুরিনে সিয়েনি বেক্কানি মানুচ্চুনোরে কলঅ, যিহূদীগুন আর যিগুনে তুমি যিরূশালেমত্ বজত্তি গরর্, তুমি জানি রাগঅ আর মন দিইনে মঅ কধাগান শুনো। 15তুমি মনে গরর্ ইগুনে মাত্তল্ ওইয়োন, মাত্তর্ সিয়েন নয়; কিয়া ইক্কে দঅ বানা বেন্যেমাদান্ নয়টা। 16ইয়েন সে ঘটনাগান ধোক্ক্যেন্ যিয়েন কধা ভাববাদী যোয়েলে কোইয়্যে, গোজেনে কোইয়্যেদে, 17শেচ্ কালত বেক্ মানুচ্চুনো উগুরে মুই মঅ আত্মাগান ঢালি দিম্; সেক্কে তমা পুয়োগুনে আর ঝিগুনে ভাববাদী ইজেবে গোজেন কধা কবাক্, তমা গাবুজ্যেগুনে দর্শন পেবাক্, তমা বুড়ো মানুচ্চুনে স্ববন্ দেগিবাক্। 18এমন্ কি, সে অক্তত্ মর্ চাগর্ আর চাগরানিগুনো উগুরে মুই মঅ আত্মাগান ঢালি দিম্, আর তারা ভাববাদী ইজেবে গোজেনর কধা কবাক্। 19মুই উগুরে আগাজত্ আমক্ আমক্ ঘটনা দেগেম্, আর তলেদি পিত্থিমীত নানান্ বাবোত্যে চিহ্নো দেগেম্, অত্তাৎ লো, আগুন আর বোউত্ ধূমো দেগেম্। 20প্রভুর সেই মহৎ আর মহিমাভরা দিন এবার্ আগেদি বেলান্ আন্ধার্ ওই যেবঅ আর চানান্ লো ধোক্ক্যেন্ অবঅ। 21রোক্ষ্যে পেবাত্তে যে কনজনে প্রভুরে ডাগিবো তে রোক্ষ্যে পেবঅ।
22ইস্রায়েলীয়গুন, এ কধাগান শুনো। নাসরত যীশুর মাধ্যমে গোজেনে তমা ইধু মহৎ আর আমক্ আমক্ কাম গুরিনে তমা ইধু প্রমাণ গোজ্যেদে, তে যীশুরে দিপাধেয়্যে; আর এ কধাগান দঅ তুমি কোই পারঅ। 23গোজেন, যিবে আগে-বাগে বেক্কানি কোই পারে, যীশুরে তমা আঢত্ দিয়্যে অবঅ। আর তুমিয়ো দঅ পাজি মানুচ্চুনোরে দিইনে তারে ক্রুশোত্ দিইনে মারে ফেলেয়ো। 24মাত্তর্ গোজেনে মরণ যন্ত্রণাত্তুন্ উদ্ধোর্ গুরিনে তারে জেদা গুরি তুল্ল্যে, কিয়া তারে ধুরি থবার্ সাধ্য মরণানর্ ন-এলঅ। 25দায়ূদে তা পৌইদ্যেনে কোইয়্যে,
মঅ চোগ্কুন্ নিত্য প্রভু ইন্দি আঘে;
তে মর্ ডেন্ ধাগেদি আঘে বিলিনে মুই থির্ থেইম্।
26ইয়েনত্যে মঅ মনান্ হুজিয়্যে ভরা,
মঅ জিলানে হুজির্ কধা কয়,
মঅ কিয়্যেগান্অ আজা নিইনে বাঁজিবো;
27কিত্যে তুই মরে মরণর্ জাগাত্ ফেলেই ন-থবে,
তর্ ভক্তর্ কিয়্যেগানরে তুই বর্বাদ্ অবাত্তে ন-দিবে।
28জিংকানির পথ্তান্ তুই মরে জানেয়োচ্;
তইধু থানা মানে হুজিয়্যে ভরা।
29ভেইলগ, এ কধাগান মুই ঘেচ্চ্যেক গুরি কোই পারং যে, রাজবংশর বাপ্ দায়ূদে মুরি যেইয়্যে, তারে গোর্ দিয়্যে ওইয়্যে আর তার গোরান্ এজঅ ইধু আঘে। 30তে এক্কো ভাববাদী এলঅ আর তে কোই পাত্ত গোজেনে শমক্ হেইনে এ এগেমান্ গোজ্যেদে যে, তা সিংহাসনত্ তার এক্কো গুট্টিরে তে বোজেব। 31পরেদি কি অবঅ সিয়েন দায়ুদে দেক্ক্যে বিলি মরণত্তুন্ মশীহর্ আরঅ জেদা ওই উদোনা পৌইদ্যেনে কোইয়্যে, গোরত্ মশীহরে থুয়ো ন-অয় আর তার্ কিয়্যেগান্অ বর্বাদ ন-অয়। 32গোজেনে সেই যীশুরে জেদা গোজ্যে, আর আমি বেক্কুনে সিয়েনর সাক্ষী। 33গোজেনর ডেনেদি বঝিবার বাঈনী তারে দান গরা ওইয়্যে আর এগেম্ গোজ্যে পবিত্র আত্মারে তেয়ই গোজেনত্তুন্ পেয়্যে; আর ইক্কিনে তুমি যিয়েন দেগর্ আর শুনোর্ সিয়েন যীশু নিজে দিয়্যে। 34-35দায়ুদে নিজে স্বর্গত্ ন-যায়; মাত্তর্ তে কোইয়্যেদে,
প্রভু মঅ প্রভুরে কলঅ,
যেদক্কন্ সং মুই তঅ শত্রুগুনোরে তঅ টেঙত্ তলে ন-থং সেদক্কন্ সং তুই মঅ ডেন্ ধাগেদি বচ্।
36“ইয়েনত্যে গোদা ইস্রায়েল জাদ্তো এ কধাগান ঘেচ্চ্যেকগুরি জানদোক্ যে, যিবেরে তুমি ক্রুশোত্ দুয়ো গোজেনে সেই যীশুরে প্রভু আর মশীহ এ দ্বিয়েন পোজিশনত্ নেযেয়্যে।”
37এ কধাগান শুনিনে মানুচ্চুনে মনত্ আঘাত্ পেলাক্। তারা পিতর আর অন্য দিপাধেয়্যেগুনোরে পুযোর্ গুরিলাক্, “ভেইলগ, আমি কি গুরিবোং?”
38জোবত্ পিতরে কলঅ, “তুমি বেক্কুনে পাপর্ ক্ষেমা পেবাত্যে পাপত্তুন্ মনানি ফিরো আর যীশু খ্রীষ্টর্ নাঙে বাপ্তিষ্ম লঅ। তুমি দান ইজেবে পবিত্র আত্মারে পেবা। 39তমাত্যে, তমা পুয়ো-ছাগুনোত্যে আর যিগুনে দূরোত্ আঘন্, এক কধায় আমা প্রভু গোজেনে তা নিজোর্ মানুচ্ অবাত্যে যিগুনোরে ডাগিবো, তারা বেক্কুনোত্ত্যে এ উগুমান গরা ওইয়্যে।”
40ইয়েন বাদে আরঅ ভালোক্কানি কধা কোইনে পিতরে সাক্ষি দিয়্যে ধোল্ল্য। তে তারারে ইয়েন কোইনে বুঝেবার চেষ্টা গল্ল, “এ যুগোর বিবেক্ নেইয়্যে মানুচ্চুনোত্তুন্ নিজোরে রোক্ষ্যে গরঅ।”
41যিগুনে তা কধা বিশ্বেজ্ গুরিলাক্ তারা বাপ্তিষ্ম ললাক্ আর শিচ্চ্যগুনো দল সমারে সেদিন্ন্যে গোজেনে কমেদি তিন আজার্ মান্জ্যরে এগত্তর্ গুরিলাক্।
বিশ্বেজিগুনোর্ চাল্চলন
42সেই মানুচ্চুনে দিপাধেয়্যেগুনোর শিক্ষ্যেনি শুনিদাক্, তারা সমারে এক ওইনে প্রভুর হানা লদাক্ আর তবনা গুরিনে সময় কাদেদাক্। 43বেক্কুনে ভোক্তি গুরিনে দোরেলাক্, আর প্রচারক্কুনে ভালোক্কানি আমক্ কাম আর চিহ্নো কাম গরা ধুরিলাক্। 44বেক্ বিশ্বেজিগুনে একসমারে থেদাক্ আর বেক্কানি যার্ যার্ দরকার মজিম্ বেবহার গুরিদাক্। 45তারা নিজো সোম্বোত্তিগানি বেজিনে যার্ যিদুক্কুন দরকার্ সে ধগে তারে দিদাক্। 46তারা পত্তিদিন উবোসনা ঘরত্ একসমারে থুবেদাক্, আর যুদো যুদো ঘরত্ হুজিয়্যে আর সরল মনে একসমারে হানা-দানা গুরিদাক্। 47তারা নিত্য গোজেনরে বাঈনী গুরিদাক্ আর বেক্ মানুচ্চুনে তারারে সর্মান গুরিদাক্। যিগুনে পাপত্তুন্ উদ্ধোর্ পাদন্ প্রভু বিশ্বেজি দল সমারে পত্তিদিন তারারে যোগ গরা ধোল্ল্য।
നിലവിൽ തിരഞ്ഞെടുത്തിരിക്കുന്നു:
প্রেরিত্ 2: CBT
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Copyright © 2021 Bangladesh Bible Society
