প্রেরিত্ 1
1
উৎসর্ব
1কোচ্পেইয়্যে থিয়ফিল, যীশুরে স্বর্গত্ তুলি নিবার্ আগেদি সং তে যিয়েনি গোজ্যে আর শিক্ষ্যে দিয়্যে সিয়েনি বেক্কানি মুই মর্ আগঅ বোইবোত্ লেক্ক্যং। 2যে শিচ্চ্যগুনোরে তে বেঈ লোইয়্যে, তারে তুলি নিবার্ আগেদি সেই শিচ্চ্যগুনোরে তে পবিত্র আত্মালোই উগুম দিয়্যে। 3তার দুঘ্ ভোগ্ গরানার্ পরেদি এ মানুচ্চুনো ইধু তে দেগা দিয়্যে আর তে যে জেদা আঘে সিয়েনর বোউত্ বিশ্বেজ্ গুরিবার প্রমাণ্ দিয়্যে। চল্লিশ দিন সং তে শিচ্চ্যগুনোরে দেগা দিইনে গোজেন রেজ্যর্ পৌইদ্যেনে কোইয়্যে। 4সেক্কে এক দিনোত্ যীশু যেক্কে শিচ্চ্যগুনো সমারে এলঅ সেক্কে তারারে এ উগুমান দিয়্যে “তুমি যিরূশালেমান ফেলেই ন-যেইয়ো, মাত্তর্ মঅ বাপ্পোর্ এগেম্ গোজ্যে যে দানর্ কধা তুমি মত্তুন্ শুন্ন্য সিয়েনত্যে বাজ্জেই থাগঅ। 5যোহনে পানিত্ বাপ্তিষ্ম দিদো, মাত্তর্ কয়েক দিনো ভিদিরে বাবর্ সেই এগেম্ মজিম পবিত্র আত্মালোই তমার্ বাপ্তিষ্ম অবঅ।”
6যেরেদি শিচ্চ্যগুনে এগত্তর্ ওইনে যীশুরে পুযোর্ গুরিলাক্, “প্রভু, এ সময়োত্ কি তুই ইস্রায়েলীয়গুনো আঢত্ রেজ্যগান ফিরেই দিবে?”
7যীশু তারারে কলঅ, “যেদিন্নো বা সময়বো বাবা নিজো আন্যামে রাগেয়্যে সিবে তমারে জানিবাত্তে দিয়্যে ন-অয়। 8মাত্তর্ পবিত্র আত্মা তমা উগুরে এলে পরেদি তুমি বল্ পেবা, আর যিরূশালেম, গোদা যিহূদীয়া আর শমরিয়া রেজ্যত্ আর পিত্থিমীর থুম দুযি সং তুমি মর্ সাক্ষী অবা।” 9এ কধানি কনার্ পরেদি শিচ্চ্যগুনো চোগো মুজুঙোত্ যীশুরে তুলি নেযা অলঅ আর তে এক্কান্ মেঘঅ আন্দলে গেলগোই। 10যীশু যেক্কে উগুরেদি উদি যার্ সেক্কে শিচ্চ্যগুনে চোগো পাদা ন-ফেল্ল্যে গুরি আগাজন্দি রিনি চেই এলাক্। থিক্ সেক্কে ধূব্ কাবর্ উজ্জ্যে দ্বিজন মানুচ্ শিচ্চ্যগুনো কায়কুরে থিয়্যেইনে কলাক্, 11“গালীলো মানুচ্চুন, ইধু থিয়্যেইনে আগাজ ইন্দি কিত্ত্যেই রিনি চেই আঘঅ? যিবেরে তমাত্তুন্ তুলি নেযা অলঅ সেই যীশুরে যেবাবোত্যে গুরি তুমি স্বর্গত্ যাদে দেগিলা সেবাবোত্যেগুরি তে ফিরি এবঅ।”
যিহূদা ইষ্কারিয়োত জাগাত্ মত্তথিয়
12সেক্কে শিচ্চ্যগুনে জৈতুন মুড়োবোত্তুন্ যিরূশালেমত্ ফিরি এলাক্। যিরূশালেম শঅরত্তুন্ এ মুড়োবো এক কিলোমিটার দূরোত্ এলঅ। 13শঅরত্ লুমিনে তারা উগুরে তলাত্ যে ঘরানত্ সেক্কে থেদাক্ সিয়েনত্ গেলাক্। এ শিচ্চ্যগুনো নাঙানি এলঅ-পিতর, যোহন, যাকোব আর আন্দ্রিয়, ফিলিপ আর থোমা, বর্থলময় আর মথি, আলফেয়র পুয়ো যাকোব আর একবুচ্চ্যে মানুচ্ শিমোন আর যাকোবর পুয়ো যিহূদা। 14তারা বেক্কুনে বিশ্বেজি মিলেগুনো সমারে আর যীশুর মা মরিয়ম আহ্ তার ভেইউনো সমারে নিত্য এগামনে তবনা গত্তাক্।
15সেক্কে পিতরে একদিন খ্রীষ্ট উগুরে বিশ্বেজি প্রায় একশ কুড়িজন মান্জ্য মুজুঙোত্ থিয়্যেইনে কলঅ, 16“ভেইলগ্, পবিত্র আত্মা ভালোক্ দিন আগে রাজা দাযূদো মুয়োদি যিহূদা পৌইদ্যেনে যিয়েন কোইয়্যে পবিত্র বোইবোর সেই কধাগান পুরেবার্ দরকার এলঅ। যিগুনে যীশুরে ধোজ্যন্, এ যিহূদা তারারে পধ্ দেগেইনে নেযেয়্যে। 17তে আমাত্তুন্ একজন এলঅ আর আমা সমারে কাম্ গুরিবাত্যে তারে বেঈ নেযা ওইয়্যে।”
18ভান্ন্যেই কাম্বোই যিহূদা যে টেঙাগুন্ পেয়্যে সিগুনদোই তে এক্কেনা ভুই কিনিলো আর সিয়েনত্ পড়িনে তা পেট্তো ফাদি গেলঅ আর আদুড়ি নিগিলি গেলঅ। 19যিরূশালেমর বেক্কুনে সেই কধাগান শুন্ন্যন্। ইয়েনত্যে তারা কধাদি এ ভূইয়ানরে তারা আকেল্দামা বা লো জাগা কন্।
20যেরেদি পিতরে কলঅ, পবিত্র বোইবোর্ গীতসংহিতা নাঙে বোইবোত্ লেগা আঘে,
তা ঘরান্ খালি থোক্;
সিয়েনত্ কেঅ বজত্তি ন-গোরোক্। আরঅ লেগা আঘে,
তা দাঙর্ পোজিশনান্ অন্যজনে নেযাদোক্।
21-22“ইয়েনত্যে যীশু যে মরণত্তুন্ জেদা ওই উত্ত্যে সিয়েনর সাক্ষী ইজেবে অন্য আর একজনরে আমাত্তুন্, অত্তাৎ দিপাধেয়্যেগুনো দলত্ নেযা পড়িবো। যোহনে যেক্কে বাপ্তিষ্ম দিদো সেক্কেত্তুন্ ধুরি আরাম্ভ গুরিনে যীশুরে আমাত্তুন্ তুলি ন-নেযানা সং, প্রভু যীশু যেদ্ক্ দিন সং আমা সমারে আঢাউদো গোজ্যে সেদক্ দিন সং যে মানুচ্চুনে আমা দলত্ এলাক্, সেই মানুচ্চো যেন তারাত্তুন্ এক্কো অয়।”
23সেক্কে শিচ্চ্যগুনে যোষেফ, যিবেরে বর্শাব্বা আর যুষ্ট কুয়ো অদঅ, তার আর মত্তথিয়র, এই দ্বিজনর নাঙ্ কলঅ। 24-25সে পরেদি তারা ইয়েন কোইনে তবনা গুরিলাক্, “প্রভু, তুই বেক্কুনো মনানি কোই পারচ্। যিহূদা তার পাওনা সাজা পেবাত্যে দিপাধেয়্যেগুনো পদ কামান্ ইরি দিয়্যে। ইক্ক্যে এ দ্বিজনত্তুন্ সেই পদ্তানত্তে যিবেরে তুই বেঈ লোইয়োচ্ সিবেরে আমারে দেগেই দে।” 26তারা ভাগ্য পোরোক্ষ্যে গরানার্ পরেদি মত্তথিয় নাঙান্ উদিলো। ইয়েনত্যে মত্তথিয় সেই এগারজন দিপাধেয়্যেগুনো সামরে মিজেল।
നിലവിൽ തിരഞ്ഞെടുത്തിരിക്കുന്നു:
প্রেরিত্ 1: CBT
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Copyright © 2021 Bangladesh Bible Society
