मत्ती 7
7
दोष ना लांव
(लूका 6:37-38,41-42)
1“कोसी का न्याय नी कौरौ, तौ पौरमेशवर बै तोंवारा न्याय ना कौरदा। 2जिथु जैशैखै तुऐं दोष लांव, तैशैखैई पौरमेशवर तुऔं पांदी दोष लांदा, औरौ जैशैखै तुऐं ओकी का न्याय कौरौ, तोंवारा बै न्याय हौंदा।”
3“तू काए आपणै भाई की नानड़ी-नानड़ी गौलती कै दैखै औरौ आपणी बौड़ी-बौड़ी गौलती कै काए ना दैखै। 4जोबै तैरी आपणी गौलती बैजाए औसौ तौ तू आपणै भाई खै कैशैखै बौल़ै सौकै कै हांव तैरी नानड़ी शी गौलती कै ठीक कौरे दियु। 5ओए रै कपटी, आगै आपणै खुद की बौड़ी गौलतियौ कै सुधारै पा, तोबै तू ठीक ढंग शै आपणै भाई की गौलतियौ कै ठीक कौरे सौकै।
6तिनु लोगौ कै पौरमेशवर का सौंदेश नी शुणांव जू शुणणा ना चांव। जै तुऐं ऐशै कौरलै तौ ऐजौ ऐशैकै हौंदौ जैशै कोसी पवित्र चीज़ौ कै कुते कै औगौड़ियौ फेरकाए दैंव, औरौ जैशै सुंगरों कै आगै मौती बेगाणै, जू सिरफ तिनुखै दबाए दैंदै, औरौ पाछु तुऔं पांदी हमला कौरदै।”
पौरमेशवर कैईंदु मांगणौ औरौ पाणौ
(लूका 11:9-13)
7“पौरमेशवर शै सैजौ मांगो जियौं चीज़ौ कै तुऔं जौरुरत औसौ औरौ सै तुऔं दैला; जौले तौ तुऐं पालै औरौ जै तुऐं खोट-खोटाल़े, तौ तुऔं कारिए दवार उंडु खोले जांदो। 8जिथुकै जू कुणिए मांगलै, तैसीखै दैय जांदो, औरौ जू कुणिए जौला, तैसीखै भैटी जांदो, औरौ जू कुणिए खोट-खोटाला तैसीखै दवार उंडु खोले जांदो।”
9“तुऔं मुंजीदा ऐशणा कुणजा आदमी औसौ, जै तैसका बैटा तैसी कैईंदी रोटी मांगल़ा, तौ सै तैसीखै पाथर दैला? 10ऐशैखैई जै तैसका बैटा तैसी कैईंदै माछी मांगो तौ तैसीखै शोंगोऊं दैंव? 11जोबै तुऐं बुरै हौयौ, आपणै नानड़िया कै आछी चीज़ौ दैंव, तौ तोंवारा स्वर्ग का पिता तुऔं सौदा दैणौ कारिए तैयार रौंव जू लोग तैसी कैईंदी आछी चीज़ौ मांगोए। 12इथकारिए जू किछै बै तुऐं चांव कै आदमी तुऔंआरी कौरौ, तुऐं बै तिनु आरी तैशणाई बर्ताव कौरौ; जिथुकै मूसा कै कानून औरौ पौरमेशवर कै बातौ बौताणौवाल़ै कै लेखो का मतलब ऐजाई औसौ।”
आसान औरौ चैईथै बाट
(लूका 13:24)
13“पौरमेशवर कै राज्य दै जाणौ कै बाट सांगड़ै दियोल़ बाटी हौयौ जांव, चौड़ै औसौ सैजी दियोल़, औरौ आसान औसौ, सैजी बाट जू बिनाश कै ढौबौ खै जांव, औरौ बौहितै लोग औसौ जू तिंदै हौयौ जांव। 14सांगड़ै औसौ सैजी दियोल़ औरौ चैईथी औसौ सैजी बाट जू सौदा कै जिन्दगी तौड़ी नियौ, औरौ ठिकै औसौ जू सौदा कै जिन्दगी पालै।”
फोल़ो लैई डाल़ो कै पौछेयाण
(लूका 6:43-44; 13:25-27)
15“झूठै पौरमेशवर कै बातौ बौताणौवाल़ै कैईंदै चौकश रौया, जू भेड़ो कै भैषो दै तोंवारै धोरे आंव, पौरौ भीतरो दै सै उपाड़ैयो खाए दैणौवाल़ै भेड़िए औसौ। 16तिनकै काम दैखैयो तुऐं तिनुखै पोछैयाणै पांदै, का झाड़ी पौरैशै अंगूर औरौ कांडे वाल़ै झालो पौरैशै अंजीर तौड़ौ? 17ऐशैखैई हरेक आछा डाल़ आछा फल़ लांव, औरौ बुरा डाल़ बुरा ही फल़ लांव। 18आछा डाल़ कौलोंई बै बुरा फल़ ना लांदा, औरौ ना बुरा डाल़ कौलोंई आछा फल़ लांदा। 19जू-जू डाल़ आछा फल़ ना लांव तैसीखै काटैयौ आगै मुंजी बैगाए दैंदै, ऐशैखैई झूठै पौरमेशवर कै बातौ बौताणौवाल़ै कै बै ऐशैखैई सौजा भैटदी। 20इथकारिए तुऐं तिनुखै तिनकै काम दैखैयो पोछैयाणै पांदै।”
21“जू मुखै, ‘ओए रै प्रभु, ओए रै प्रभु’ बौल़ौ, तिनुमुंजी दै हरेक स्वर्ग कै राज्य दै ना जाए पान्दै, पौरौ सैजाई जू मैरै स्वर्गीय पिता की इछा पांदी हांडलै। 22न्याय कै दूसै मुखै बैजाए लोग बौलदै, ‘ओए रै प्रभु, ओए रै प्रभु, का आमुए तैरै नांव शै पौरमेशवर की ढौबौशी बातौ ना बोताई, औरौ तैरै नांव शै दुष्टआत्मा खै ना निकाल़ी औरौ तैरै नांव शै बौहितै चौमत्कार कै काम ना कौरी?’ 23तोबै हांव तिनुखै निशोंक हौयौ बौल़ै दैंदा, ‘मोऐं तुऔं खै ना जाणी, ओए रै कुकर्म कौरणौवाल़ै, मैरै धोरे दै आगु जाव।’”
बुध्दिमान औरौ मूर्ख आदमी
(लूका 6:47-49)
24“इथकारिए जू कुणिए मैरी ऐजी बातौ शौणैबा तिनुखै मानला, सै तैसी बुध्दिमान आदमी कै जैशणा औसौ, जैणै आपणौ घोर चट्टानो कै नियुं पांदी बाणौ। 25औरौ बोरखा लागै, औरौ खाल़ै-नाल़ै आए, औरौ ढौंड बौऊं, औरौ तिथु घोरो दै फशाटे लागै, पौरौ सै ढौल़ी ना, जिथुकै तिथकी नीयुं चट्टान पांदी पाए राए थी। 26पौरौ जू कुणिए मैरी ऐजी बातौ शुणल़ा औरौ तिनु पांदी ना हांडला, सै तैसी मूर्ख आदमी कै जैशणा औसौ, जैणै आपणौ घोर रैतौ पांदी बाणौ। 27औरौ बोरखा लागै, औरौ खाल़ै-नाल़ै आए, औरौ ढौंड बौऊं, औरौ तिथु घोरो पांडे फशाटे लागै औरौ सै उदु ढोल़ैबा चकनाचूर हौए गौ।”
28जोबै यीशुए ऐजी बातौ बौल़ै पैई, तोबै ऐशैखै हौं कै भीड़ तैसकै उपदैश लैई हैरान हौए गौए। 29जिथु सै तिनु यहूदी शास्त्री कै जैशणै नै, पौरौ औधिकारी कै जैशणै तिनुखै उपदैश दैंव थिया।
നിലവിൽ തിരഞ്ഞെടുത്തിരിക്കുന്നു:
मत्ती 7: SRXNT
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
