मत्ती 6
6
दान कै बारै मुंजी शिक्षा
(लूका 11:2-4)
1“चौकश रौया! तुऐं आदमी खै दिखाणौ कारिए भोल़ै काम नै कौरेया, ना तौ तुऐं आपणै स्वर्गीय पिता कैईंदा किछै बै इनाम ना पांदै।
2इथकारिए जौल़ौ तू दान कौरे, तौ बौड़ा दिखावा नै कौरेया, जैशैखै कपटै लोग, यहूदी सभा-घोरो औरौ बाटो पुंडा कौरौ, ताकि लोग तिनकै बौड़ाए कौरौ। हांव तुऔं खै साचौ बुलू कै तिनुऐ आपणा इनाम पाए पा। 3पौरौ जौल़ौ तू दान कौरे, तोबै लोगौ मुंजी कोसी कै बै तिथका पौता नै चालौ। 4ताकि तैरा दान गुप्त रौंव, तोबै तैरा पिता ताखै गुप्त दा दैखला, औरौ ताखै इनाम दैला।”
प्रार्थना कै शिक्षा
(लूका 11:1-4)
5“जौल़ौ तू प्रार्थना कौरला, तौ कपटी कै जैशणै नै बोणिया जिथुकै लोग तिनु दैखैयो तिनकै तारीफ कौरौ, जिथुखै तिनु यहूदी सभा-घोरो औरौ शोड़कै कै मोड़ो दै खौड़ै हौयौ प्रार्थना कौरणै आछै लागौ। हांव तुऔं खै साचौ बुलू कै तिनुऐ आपणा इनाम पाए पोवा। 6पौरौ जौल़ौ तू प्रार्थना कौरे तौ आपणै कोठरी दा जा औरौ दवार बन्द कौरेयौ आपणै पिता शै प्रार्थना कौर; ताकि तैरै प्रार्थना गुप्त रौंव; औरौ तोबै तैरा पिता जू ताखै मेसो दैखौए सै ताखै इनाम दैला।
7प्रार्थना कौरदै बैई बैगानै यहूदी लोगौ कै जैशणै बैकार कै शोब्दो कै बार बार नै बौलेया सै ऐशैखै सौमझौ कै अमारै बौहितै बौल़ाणौ लैई शौणै जांदै। 8इथकारिए तुऐं तिनकै जैशणै नै बौणैया, जिथु तोंवारा पिता तोंवारै मांगणौ दो आगै जाणौ कै तुऔं का-का जौरुरत औसौ।” 9“तुऔं ऐशैखै प्रार्थना कौरणै चैंई:
‘ओए रै अमारै पिता, तू जू स्वर्ग दा औसौ; तैरौ नांव पवित्र राखौ जांव।’
10‘तैरा राज्य आंव। तैरै इछा जैशणै स्वर्ग दै पूरी हौंव, तैशैखैई धोरती पांदी बै पूरी हौंव।’
11‘आमु कै रौज सैजौ खाणौ कै दै जू आमु रौज कै दूसौ कारिए चैंई।’
12‘औरौ जैशैखै आमै आपणै अपराधियों कै माफ कौरे राए, तैशैखैई तू बै अमारै पापौ खै माफ कौर।’
13‘औरौ आमुखै परीक्षा दै नै पोड़णो दैया, पौरौ दुष्ट शैतान कैईंदै बौचा; (जिथुखै राज्य औरौ शौकतै औरौ महिमा सौदा तैरै औसौ।’” आमीन)
14“इथकारिए जै तुऐं आदमी कै पाप माफ कौरलै, तौ पौरमेशवर जू तोंवारा स्वर्ग का पिता औसौ सै बै तोंवारै पाप माफ कौरदा। 15औरौ जै तुऐं ओकी कै पाप माफ ना कौरलै, तौ तोंवारा पिता बै तोंवारै पाप माफ ना कौरदा।
उपवास कै शिक्षा
16जौल़ौ तुऐं उपवास कौरौ, तौ कपटी कै जैशणै तोंवारै मुं पांदी उदासी नै हौणै चैंई, जिथुखै सैजै लोगौ शै तारीफ पाणौ कारिए उदास बौणैयौंदे रौंव, ताकि लोग तिनुखै उपवासी जाणौ हांव तुऔं खै साचौ बुलू, तिनुऐ आपणा इनाम पाए पोवा। 17पौरौ जौल़ौ तुऐं उपवास कौरौ तौ आपणै मुंडो पांदी तेल मोल़ेया औरौ मुं धोया। 18ताकि लोग नै पौरौ तैरा पिता जू गुप्त दा औसौ, ताखै उपवासी जाणौ। औरौ तोबै तैरा पिता जू गुप्त दा दैखौए सै ताखै इनाम दैला।
स्वर्ग दा धन कौठा कौरौ
(लूका 12:33-34; 11:34-36; 16:13)
19आपी कारिए धोरती पांदी धन कौठौ नै कौरेया, जिथै कीड़ा औरौ काई बिगाड़ौ, औरौ जिथै चोर डाका पांव औरौ चुरांव। 20पौरौ भोलाए कौरेयौ आपी कारिए स्वर्ग दा इनाम कौठा कौरौ, जिथै ना तौ कीड़ा औरौ ना काई बिगाड़ौ, औरौ जिथै ना चोर डाका पांव औरौ ना ही चोरो। 21जिथु तोंवारा मन सौदा तिथै ही लागैयौंदा रौंदा जिथै तोंवारा धन-दौलत औसौ।
शोरीर का दिवा
22आखी शोरीरो कारिए दिवे कै जैशणी औसौ, इथकारिए तैरै आख साफ हौंव, तौ तैरा सारा शोरीर बै पेयाशला हौंदा। 23पौरौ जै तैरै आख बोरै हौलै, तौ तैरा सारा शोरीर बै इन्यारा हौंदा, इथकारिए सैजौ पेयाशो जू तांव दो औसौ औरौ सै इनारौ हौंव तौ सैजौ इनारौ केतरो बौड़ौ हौंदौ।”
कियौंई बातौ कै फिकर नै कौरेया
(लूका 12:22-34)
24“कुणिए बै आदमी दौ स्वामियो कै सेवा ना कौर सौकौ जिथुकै सै ऐकी आरी दुशमनी औरौ ओकी आरी प्यार कौरदा या ऐकी का आदर कौरला औरौ दूजै कै सै बैकार जाणदा: ऐशैखैई तुऐं ऐकी सौमय पांदी पौरमेशवर औरौ धन दु कै सेवा ना कौर सौकौ।
25इथकारिए हांव तुऔं खै साचौ बुलू, कै आपणै जिन्दगी कारिए चिन्ता नै कौरेया, कै आमै का खांदै औरौ का पींदै; औरौ ना आपणै शोरीर कारिए कै का बाम्बदै, का जिन्दगी खाणै शै, औरौ शोरीर खोटणो शै बौड़ैबा ना आथी। 26गौयण कै चुड़कुल़ै खै दैखौ, सै ना तौ बौंव, ना ही काटो, औरौ ना ही कोठारो दै कौठै कौरौ, तौ बै तोंवारा स्वर्गीय पिता तिनुखै खियांव, पौरौ तुऐं तिनुदै बै जादा कीमती औसौ। 27तुऔं मुंजीदा कुण औसौ, जू चिन्ता कौरेयौ दैणिक लम्बे सौमय तौड़ी जियुंदै रौए सौकौ?
28औरौ खोटणो कारिए काए चिन्ता कौरौ? मैदानो कै फूलो पांदी ध्यान कौरौ कै सै कैशैखै बौढ़ौ, सै ना तौ मैहनत कौरौ औरौ ना ही खोटणो बाणौ। 29तोबै बै हांव तुऔं खै बुलू, कै राजा सुलैमान बै आपणै सौबै ठाट-बाट मुंजी तिनु मुंजीदा कोसी कै जैशणा खोटणो बाम्बेयोंदा नै थी। 30इथकारिए जोबै पौरमेशवर मैदानो कै घास खै, जू ऐलो औसौ, औरौ दोतियो आगी मुंजी पाए जांदै, ऐशणी शोभा दैंव, तौ ओए रै कम बिशवाश कौरणौवाल़ै लोगौ पौरमेशवर जौरुर तोंवारै दैखभाल कौरदा।
31इथकारिए तुऐं चिन्ता कौरेयौ ऐजौ नै बौलेया कै आमै का खांदै, या पींदै, या का बाम्बदै। 32जिथुखै बैगानै जाति कै लोग बै इनु सौबी चीज़ौ की खोज़ दै लागैयौंदे रौंव इथकारिए चिन्ता नै कौरेया, जिथु तोंवारा स्वर्गीय पिता जाणौए कै तुऔं इनु सौबी चीज़ौ कै जौरुरत औसौ। 33इथकारिए सौब दौ जादा जौरुरी ऐजौ औसौ कै तुऐं पौरमेशवर कै राज्य औरौ धार्मिकता शै जीवन जिणौ कै कौचिश कौरौ, तौ ऐजी सौबै चीज़ौ तुऔं खै भैट जांदी। 34इथकारिए दोतियो कै बारै मुंजी परवाह नै कौरेया, जिथु दोतियो आपणै परवाह आपी कौरदा, ऐलो कारिए ऐलो कै दुख लैखा औसौ।”
നിലവിൽ തിരഞ്ഞെടുത്തിരിക്കുന്നു:
मत्ती 6: SRXNT
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
