Eyɔɔ 8

Aye wɛ â bere engɔ ene andɔb ngɛ

1Bɔ gimkpaʼ à klo, Yeso kwaʼ ngɔ̀ɔ edɔm egu Olifs. 2À shi enchwenchwe ntwɛn, engɔ wu ngɔ̀ɔ efwɔ ndɔngwe kɛ̀. Ebaŋabɔ à sɔŋɔ klaba Yeso ge aghɛɛghɛɛ. Engɔ tsɔmɔ a chwâ gɛrɛ klada sa tee angɔ. 3E sa zɔzɔ bàtee atsɛrɛ mane bɔ Farisii nyii nè ayeanɔm deʼ wɛ â me bere engɔ nè anɔm tsɛrɛ ngɛ. E too aye wunɔ efàarà angɔ bɔ gimkpaʼ. 4Angɔ ga ebe Yeso kpe, “Àtee abwa, mbyɛɛ a bere aye wunɔ apɛpɛ nè anɔm. 5Mose à ndɛʼ etsɛrɛ mɔ endyɛɛ kpe e we koʼro é timmi m̀pè gho zɔnɔ ene atye zhùdu. Enjitsɔ ngwo ga ngwo kpe ayɛ?” 6Angɔ à na le énde é kpèrè Yeso gɛrɛ ma zɛʼ aghɛʼ é ge ebwa deʼ enji ngɔ. Bɛʼngɛ Yeso à le na à ne zo bo nɔ. Engɔ gunu amɔ sa ŋwɛ̀ʼrɛ̀ abwa a chwâ ene etoobwo mɔ. 7Aŋu angɔ à fɔɔ embè é biiri abwa ebe engɔ ngɛ, engɔ tam ekere ndɛdɛ amɔ ga ebe angɔ kpe, “Gho ŋwaʼ deʼ abwaʼ ndzɔn wɛ è me nɛɛ kpe mbè ke shi le ebwa bɔɔbɔɔ deʼ bo ngɛ, è dye ndwa etye ekwa ngɔ.” 8Engɔ gɛrɛ wu gunu amɔ a chwâ sa wa ŋwɛ̀ʼrɛ̀ abwa. 9Aŋu angɔ à zo ebwa wɛ Yeso à ga ngɛ, angɔ klada sa nyɔɔrɔ à ngɔ̀ɔ gho ŋwàʼaŋwàʼ, e klada ene bɔ tɛbɛ. Yeso à tye aŋu gho zhiʼ, aye wɛ a da me tam efàarà engɔ. 10Yeso beʼ ato mɔ ekere biiri kpe, “Aye! Angɔ e be, tsɛʼ gho deʼ ŋwaʼ a timi awɛ bo?” 11Aye wɛ kpe, “Keʼ Masa.” Yeso gâ ebe engɔ kpe, “Mmɛ gɛrɛ ke ma timi awɛ bo. Ngɔɔ, enjitsɔ shi ne wu le ebwa bɔɔbɔɔ bo.”

Yeso ne ekɛʼ ebe bɔ efwɔ ese

12Yeso wu ga ebe angɔ kpe, “Mmɛ ne ekɛʼ efwɔ ese. Abɔ byɛ e kiri angu ngɛ ke ma ngo zhiri efwɔ akwâ di bo, bɛʼngɛ e ba ngo le ekɛʼ etyê.” 13Bɔ Farisii gâ ebe engɔ kpe, “Enjitsɔ ngwo na bɛ̀rɛ antsɛ ngwɛ ngwo mɔmbwo, éngɛ ga kpe ebwa wɛ ngwo ma ga ngɛ na andɔɔ.” 14Yeso gíì kpe, “Ka mmɛ bɛrɛ antsɛ ngwo mmɛ mɔmbwo ebwa wɛ mmɛ ma ga ngɛ ne éŋwaʼa mbɔʼnga mmɛ we nɛɛ afwɔ yɛ mmɛ me zeʼe ngɛ gɛ̀rɛ̀ nɛɛ afwɔ yɛ mmɛ ma ngɔɔ aŋu ngɛ. Bɛʼngɛ mbɔn de ke nɛɛ afwɔ yɛ mmɛ me zeʼe kà mmɛ ma ngɔɔ aŋu ngɛ bo. 15Mbɔn na sɛ̀ʼɛ me ene ezɔɔrɔ gho. Mmɛ ke ma sɛ̀ʼɛ gho deʼ bo. 16Bɛʼngɛ ka mmɛ de ma sɛʼɛ, etsɛrɛ yɛ mmɛ ma nu ngɛ ne éŋwaʼa, mbɔʼnga mmɛ ke tye zhiʼ bo. Mmɛ ne tama nè àtɛ wɛ à tɔmɔ angu ngɛ. 17E be ŋwɛʼrɛ efwɔ etsɛrɛ ndzɔn kpe bɔ fyee bɛrɛ antsɛ ene ebwa deʼ ne éŋwaʼa. 18Mmɛ na bɛ̀rɛ antsɛ ngu egha ndza, àtɛ ngu wɛ me saa ngu ngɛ gɛrɛ ma bɛ̀rɛ antsɛ egha ndza.” 19Éngɛ angɔ biiri ebe Yeso kpe, “Àtɛ ngwɛ wa awe?” Engɔ gíì kpe, “Mbɔn ke nɛɛ angu kà àtɛ ngu bo. Mala mbɔn à me nɛɛ angu shi mbɔn à gɛrɛ ne nɛɛ àtɛ ngu.” 20Yeso à na ga abwa zɔnɔ aŋu engɔ à ma tee abwa efwɔ ndɔngwe kɛ̀ ebara afwɔ yɛ â ma ge etɔ̧ɔrɔ ngɛ. Bɛʼngɛ gho deʼ à ke bere engɔ bo mbɔʼnga endzobo yɛ â ma ngo bere engɔ ngɛ à ke shi koʼo bo.

Yeso toʼro aŋu e ma ngo zhudu engɔ ngɛ

21Yeso wu ga ebe angɔ kpe, “Mmɛ wa nyɛn, mbɔn ba ngo zɛʼ angu tsɛ̀ʼ. Éngɛ mbɔn ba kudu efwɔ abwa bɔɔbɔɔ ndzɔn. Afwɔ yɛ mmɛ ma ngɔɔ ngɛ mbɔn ke né zeʼ aŋu bo.” 22Bɔ Juu sa biiri kpe, “È wa ngo zhudu amɔ mɔmbwo? Kà ǹji yɛ è ma ga kpe afwɔ yɛ mbè ma ngɔɔ ngɛ mbɔn ke né zeʼ aŋu bo ngɛ ne ga kpe ayɛ?” 23Yeso fɔɔ embè gâ kpe, “Mbɔn na bɔ efwɔ ese, bɛʼngɛ mmɛ ne zeʼe ekere. Mbɔn na egha ese zɔnɔ, mmɛ ke mwɔ egha ese zɔnɔ bo. 24Ne ǹji yɛ mmɛ à ga endɔn kpe mbɔn ba kudu efwɔ abwa bɔɔbɔɔ ndzɔn ngɛ. Mala mbɔn ne bɛrɛ kpe mmɛ ne engɔ wɛ è mwɔ ngɛ bo, shi mbɔn ba kudu efwɔ abwa bɔɔbɔɔ ndzɔn.” 25Angɔ biiri kpe, “Ngwo na awɛ?” Yeso gíì kpe, “Mmɛ ne engɔ wɛ mmɛ à shi tsoro gà endɔn kpe mmɛ ne engɔ ngɛ. 26Mmɛ we le abwa akɛkɛ é ga mbɔʼ mbɔn gɛ̀rɛ̀ sɛʼ angɔn anyi, bɛʼngɛ egho wɛ me saa angu ngɛ wa ga éŋwaʼa. Mmɛ gɛrɛ ma ga ebe bɔ efwɔ ese ma abwa yɛ mmɛ à zo ebe engɔ ngɛ.” 27Angɔ à ke nɛɛ kpe Yeso à na ga endɔɔ mbɔʼ àtɛ mɔ wɛ è mwɔ ezob ngɛ bo. 28Éngɛ Yeso gâ ebe angɔ kpe, “Èndzobo chɛ mbɔn shi beʼre Ŋwɔ Gho ekere ngɛ, mbɔn ba shi nɛɛ kpe mmɛ ne engɔ wɛ mmɛ à ga kpe mmɛ ne engɔ ngɛ. Mbɔn gɛrɛ ba ngo nɛɛ kpe mmɛ ke ma le ebwa deʼ egha ndza bo, bɛʼngɛ mmɛ na ga tye ebwa wɛ àtɛ à tee ena ngɛ. 29Engɔ wɛ à tɔmɔ angu ngɛ we mwɔ nè mmɛ. Engɔ ke saara angu gho zhiʼ bo mbɔʼnga mmɛ wa fwɛʼ abwa yɛ a ma le engɔ ma gɛ̀nɛ̀ amɔ ngɛ.” 30Aŋu Yeso à ga éngɛ ngɛ, bɔ akɛkɛ â le ebɛrɛ ene engɔ.

Awɛ mwɔ àtɛ ebe bɔ Israel?

31Éngɛ Yeso gâ ebe abɔ Juu byɛ â shi le ebɛrɛ ene engɔ ngɛ kpe, “Mala mbɔn klini abwa yɛ mmɛ ma tee ngɛ, shi mbɔn na bɔ bɛɛrɛ abwa mbu éŋwaʼaŋwâʼ. 32Mbɔn ba ngo nɛɛ éŋwaʼa, éŋwaʼa gɛrɛ chi angɔn efwɔ ǹgoʼ.” 33Angɔ gíì kpe, “Mbyɛɛ na bɔ ekla Abraham, ne shi mwɔ àdzob ebe gho deʼ bo, ngwo à dà ga endyɛɛ kpe ‘E ba pwèerè angɔn efwɔ ngo’ ngɛ ene?” 34Yeso gíì kpe, “Éŋwaʼaŋwâʼ, mmɛ na ga endɔn kpe egho wɛ è ma le ebwa bɔɔbɔɔ ngɛ na èdzob ebe ebwa bɔɔbɔɔ. 35Enjitsɔ mmɛ ga endɔn kpe èdzob ke ma tye a ndɔ ekyɛ ŋwaʼ bo bɛʼngɛ Ŋwɔ Gho wa nɔ̀ a ndɔ ekyɛ ŋwaʼ. 36Éngɛ mala ŋwɔ chi awɛ efwɔ ǹgoʼ éngɛ ga kpe ǹgoʼ njɛ shi myɛ éŋwaʼa. 37Mmɛ we nɛɛ kpe mbɔn na bɔ ekla Abraham. Mbɔn à da mà ke é zhudu angu mbɔʼnga ega ngu ke le afwɔ deʼ efwɔ ńtara ntsɔn bo. 38Mmɛ a na ga endɔn me ebwa wɛ mmɛ shi zɔ efàarà àtɛ ngu ngɛ, mbɔn gɛrɛ le me engɔ wɛ mbɔn shi zo ebe àtɛ ngɔn ngɛ.” 39Angɔ gíì ebe engɔ kpe, “Abraham na àtɛ ngbɛɛ.” Yeso ga kpe, “Mala mbɔn à mwɔ bwɔ Abraham éŋwaʼaŋwâʼ shi mbɔn a na le ebwa wɛ Abraham à ma le ngɛ. 40Abwa gimkpaʼ yɛ mmɛ me ga endɔn ngɛ na abwa éŋwaʼa yɛ mmɛ me zo ebe Ngwe ngɛ. Mbɔn à dà mà ke é zhudu angu. Abraham à ke le énde bo. 41Mbɔn na le abwa yɛ àtɛ ngɔn à ma le ngɛ.” Angɔ ga ebe Yeso kpe “Mbyɛɛ ke ma bwɔ mbì bo, mbyɛɛ be le àtɛ ŋwaʼ ma Ngwe.” 42Éngɛ Yeso gâ ebe angɔ kpe, “Mala Ngwe à mwɔ àtɛ ngɔn éŋwaʼaŋwâʼ, shi mbɔn à ne doʼo angu mbɔʼnga mmɛ à zeʼe ebe Ngwe, gɛ̀rɛ̀ mwɔ anɔ enjitsɔ. Mmɛ à ke zeʼe egha ndza bo ne engɔ à saa angu. 43Ayɛ me le mbɔn ne ma nɛ̀ɛ ǹji ene ebwa wɛ mmɛ ma ga ngɛ bo? Na mbɔʼnga mbɔn ne me doʼo é zo ebwa wɛ mmɛ ma ga ngɛ bo. 44Mbɔn ne zeʼe ebe àtɛ ngɔn dɛbli. Mbɔn gɛrɛ ma ke é fwɛʼ ma abwa yɛ engɔ me doʼo ngɛ. Engɔ à na zhudu bɔ nyɛ̀rɛ̀ zèʼe ene eklada ese, gɛ̀rɛ̀ ne me le ebwa deʼ ene éŋwaʼa bo. Éŋwaʼa deʼ ne tsɛʼ ekwa ngɔ bo. Èndzobo chɛ è ma gà andɔɔ ngɛ, è na fwɛʼ ma ato afwɛʼ mɔ mbɔʼnga engɔ na àtɛ àndɔɔ. 45Mbɔn ke doʼo é bɛrɛ nè mmɛ bo mbɔʼnga mmɛ ma ga éŋwaʼa endɔn. 46Awɛ abwaʼ ndzɔn me né tee kpe mmɛ we le ebwa bɔɔbɔɔ deʼ? Mala mmɛ ga éŋwaʼa endɔn ayɛ le mbɔn ne le ebɛrɛ ene mmɛ bo? 47Egho wɛ ma gho Ngwe ngɛ na zo abwa yɛ Ngwe ma ga ngɛ. Enji yɛ mbɔn ne ma zo bo ngɛ na mbɔʼnga mbɔn ne ma bwɔ Ngwe bo.” 48Bɔ Juu gii ebe Yeso kpe, “Mbyɛɛ ke ma ga éŋwaʼa kpe ngwo na gho Samariya gɛ̀rɛ̀ me le azhwɛɛrɛ bɔɔbɔɔ ekwa ngwɛ bo?” 49Yeso gíì kpe, “Mmɛ ke le azhwɛɛrɛ bɔɔbɔɔ ekwa ngu bo, bɛʼngɛ mmɛ wa ghɔ àtɛ ngu mbɔn shi ne ma ghɔ angu bo. 50Mmɛ ke ma ke eghɔ egha ndza bo, bɛʼngɛ gho deʼ wa aŋu ma ke kpe e ndɛʼ eghɔ ena. Egho wɛ ne engɔ wɛ mwɔ àsɛʼasɛʼɛ nchwɔnchwɔ ngɛ. 51Éŋwaʼaŋwâʼ mmɛ ga endɔn kpe mala gho deʼ zo gɛ̀rɛ̀ shi ega ngu engɔ yà ne ewu zɔ.” 52Abɔ Juu byɛ â ga ebe engɔ kpe, “Ɔ̧̀ɔɔ, mbyɛɛ shi nɛɛ enjitsɔ kpe ngwo we le azhwɛɛrɛ bɔɔbɔɔ. Abraham à ku, bàmɛnɛkɔn Ngwe kudu, éngɛ ngwo a dà mà ga kpe mala gho deʼ zo ega ngwɛ e yà ne ewu zhweʼre. 53Ngwo we fɔɔ àtɛ ngbɛɛ Abraham? Engɔ à ku, bàmɛnɛkɔn Ngwe gɛrɛ kudu, ngwo we zhuŋu kpe ngwo na awɛ?” 54Yeso gíì kpe, “Mala mmɛ ghɔ angu mmɛ mɔmbwo shi eghɔ ndza na ala bli. Na àtɛ ngu wɛ mbɔn kpe ‘Na Ngwe bɔ’ ngɛ a ma ghɔ angu. 55Bɛʼngɛ mbɔn ke shi nɛɛ engɔ bo. Mmɛ we nɛɛ engɔ. Mala mmɛ ga kpe mmɛ ke nɛɛ engɔ bo shi mmɛ na gho àndɔɔ na mbɔn nɔ, bɛʼngɛ mmɛ we nɛɛ engɔ gɛ̀rɛ̀ ma zo ega ngɔ. 56Àtɛ ngɔn Abraham à na gɛ̀nɛ̀ amɔ é zɔ anji ndza. Engɔ à zɔ gɛ̀rɛ̀ gɛnɛ amɔ.” 57Éngɛ bɔ Juu ga ebe Yeso kpe, “Ngwo de ke shi bwɛrɛ enɔ̂m èsama fyee tɛʼ wum nɔ bo, ngwo shi kpe ngwo à shi zɔ Abraham?” 58Yeso gâ ebe angɔ kpe, “Éŋwaʼaŋwâʼ mmɛ ga endɔn kpe à sa ye be Abraham nɔ mmɛ shi aŋu.” 59Éngɛ angɔ à bwɛ atye kpe mbɔɔ timi engɔ anyi, bɛʼngɛ Yeso bum nyii amɔ akɛʼɛ bɔ, gli nyɛn amɔ efwɔ ndɔngwe kɛ̀.

നിലവിൽ തിരഞ്ഞെടുത്തിരിക്കുന്നു:

Eyɔɔ 8: nbt

ഹൈലൈറ്റ് ചെയ്യുക

പങ്ക് വെക്കു

പകർത്തുക