Eyɔɔ 7

Yeso mane bwɔngwaanɔm mɔ

1Èndzobo chɛ abwa zɔnɔ à fɔɔ ngɛ, Yeso à na zhinni efwɔ abɛ a Galilii. Engɔ à ke doʼo é kwaʼ ngɔɔ abɛɛ abɛ Judeya bo mbɔʼnga bɔ Juu à na zɛʼ aghɛʼ é zhudu engɔ. 2Endzobo à sa zamma bwɛrɛ ene antara ankpɛʼ ghɔ Ngwe bɔ Juu. 3Bwɔngwaanɔm Yeso gâ ebe engɔ kpe, “Nyɛrɛ anɔ ngɔɔ a Judeya mbɔʼtye bɔ bɛɛrɛ abwa mbyɛ zɔ anɛ̂ abwa yɛ ngwo ma fwɛʼ ngɛ. 4Tsɛ̀ʼ gho deʼ wɛ è ma ke kpe é nɛɛ angbe ngɛ ma fwɛʼ abwa ene egeʼ bo. Mala ngwo ma fwɛʼ abwa zɔnɔ, le shi ese nɛɛ mbɔʼ ngwo.” 5Ka de mwɔ bwɔngwaanɔm ngɔ â ke me le ebɛrɛ ene engɔ bo. 6Éngɛ Yeso gâ ebe angɔ kpe, “Endzobo ke shi koʼo ena bo, bɛʼngɛ ka mwɔ endzobo tse e ye koʼo endɔn. 7Ese ke né gwe angɔn bo bɛʼngɛ e ba gwe angu mbɔʼnga mmɛ ma bɛ̀rɛ antsɛ kpe abwa yɛ angɔ ma le ngɛ ye bɔɔ. 8Mbɔn ngɔɔ ene antara. Mmɛ ke ma zeʼe bo mbɔʼnga endzobo ndza ke shi koʼo bo.” 9Aŋu engɔ à mɛɛrɛ gà ebwa wunɔ ngɛ, è nɔ a Galilii.

Yeso ngɔɔ ene antara ankpɛʼ ghɔ Ngwe

10Aŋu bwɔngwaanɔm Yeso â shi ngɔɔ ene antara ngɛ, engɔ gɛrɛ shi ngɔɔ mɔ ne mwɔ apɛpɛ bo me ene egeʼ. 11Eto ebe bɔ Juu â na zɛʼ Yeso ekama ma biiri kpe, “Engɔ wa awe ngà?” 12Bɔ akɛkɛ efwɔ ebaŋabɔ a na ga mbɔʼ engɔ. Abɔ deʼ ma wùmù à ga kpe, “Engɔ na gho nchwɔnchwɔ.” Abɔ gii kpe, “Keʼ engɔ na ndooro bɔ.” 13Bɛʼngɛ gho deʼ à ke ga ebwa deʼ mbɔʼ engɔ apɛpɛ bo mbɔʼnga â ma bumu eto ebe bɔ Juu.

14Èndzobo chɛ antara à shi mla ngɛ, Yeso kwaʼ ngɔɔ emwɔ ndɔngwe kɛ̀ klada sa tee abwa. 15Eto ebe bɔ Juu byɛ â mwɔ aŋu ngɛ â kɔ̂n klada sa biiri kpe, “Egho wunɔ a da nɛɛ abwa zɔnɔ ngɛ ene, wɛ e ne tee ebe engɔ bo ngɛ?” 16Yeso gíì kpe, “Abwa yɛ mmɛ ma tee ngɛ ke ma andza bo, a ne zeʼe ebe egho wɛ me saa angu ngɛ. 17Egho wɛ ma ke é fwɛʼ aŋu Ngwe ma ke ngɛ wa ngo zɔ nɛɛ kpe ka abwa yɛ mmɛ ma tee ngɛ ne zeʼe ebe Ngwe kà ena ngà. 18Egho wɛ è ma ga ene ekama mɔ ngɛ, na zɛʼ eghɔ ekwa mɔ, bɛʼngɛ egho wɛ è ma zɛʼ eghɔ ebe egho wɛ à saa engɔ ngɛ, na gho éŋwaʼa me tsɛʼ ebwa andɔɔ deʼ ene engɔ bo. 19Mose à ke ndɛʼ etsɛrɛ endɔn bo? Bɛʼngɛ ne tsɛʼ gho deʼ abwaʼ ndzɔn ma shi etsɛrɛ bo. Mbɔn na ke é zhudu angu ene yɛ?” 20Ebaŋabɔ gíì kpe, “Ezhwɛɛrɛ bɔɔbɔɔ be ebûm njɛ. Awɛ ma ke é zhudu awɛ?” 21Yeso gíì kpe, “Mmɛ à le ebwa zodo zodo ŋwaʼ mbɔn di kɔ̀n. 22Mose à ndɛ̀ʼ etsɛrɛ é ndee bɔ endɔn, bɛʼngɛ à ke zeʼe ebe Mose bo à zeʼe ebe ètɛ sam mbɔn. Mbɔn ba ndèe bwɔ mbɔn anji ku̧ru bɔ Juu. 23Mala e me né ndee ŋwɔ anji ku̧ru bɔ Juu é le kpe etsɛrɛ Mose ke bɔɔ bo, éngɛ mbɔn sa bɔɔ etaa ekwa ngu kpe mmɛ à gli aŋwan ekwa gho anji ku̧ru bɔ Juu kpe ayɛ ngà? 24Mbɔn ke sa sɛ̀ʼɛ bɔ aŋu mbɔn ma zɔ angɔ ngɛ bo, mbɔn sa sɛ̀ʼɛ bɔ ene aghɛʼnji yɛ a me koʼro ngɛ.”

Yeso na Ǹtɔmzhwaʼa yɛ ntsɔ ma kɔʼ ngɛ?

25Éngɛ bɔ Jerusalɛm deʼ klada sa biiri kpe, “Ke mwɔ egho wɛ angɔ ma ke é zhudu ngɛ ewùnɔ bo? 26Kɔʼ engɔ wu è ma ga amɔ apɛpɛ, angɔ ne ma ga ebwa deʼ ebe engɔ bo. Ngadeʼ eto be nɛɛ éŋwaʼa kpe na Ǹtɔmzhwaʼa ba? 27Keʼ! Ntsɔ be nɛɛ afwɔ yɛ egho wunɔ me zeʼe ngɛ, èndzobo chɛ Ǹtɔmzhwaʼa ma zeʼe ngɛ gho deʼ ke ma ngo nɛɛ afwɔ yɛ engɔ me zeʼe aŋu ngɛ bo.” 28Aŋu Yeso à ma bli à tee abwa emwɔ ndɔngwe kɛ̀ ngɛ, è flaba ga eghɛʼ kpe, “Mbɔn be nɛɛ angu gɛ̀rɛ̀ nɛɛ afwɔ yɛ mmɛ me zeʼe aŋu ngɛ? Mmɛ ke mwɔ anɔ ene egha ndza bo, ne éŋwaʼa kpe mbɔn ke nɛɛ egho wɛ à tɔm angu ngɛ bo. 29Bɛʼngɛ mmɛ we nɛɛ engɔ mbɔʼnga mmɛ ne zeʼe ebe engɔ gɛ̀rɛ̀ mwɔ engɔ à tɔm angu.” 30Enyɛrɛ éngɛ, angɔ sa zɛʼ aghɛʼ é bere engɔ, bɛʼngɛ gho deʼ a shi ke tɛʼɛ abwo deʼ ekwa ngɔ bo, mbɔʼnga endzobo ngo à ke shi koʼo bo. 31Bɛʼngɛ bɔ akɛkɛ efwɔ ebaŋabɔ wɛ à le ebɛrɛ ene engɔ. Angɔ ga kpe, “Mala Ǹtɔmzhwaʼa tsɛrɛ ma ngo zeʼe, shi è wa ngo le enɛ̂ abwa fɔɔ angɔ yɛ egho wunɔ ma le ngɛ.”

Bɔ Farisii saa bɔ kpe e bere Yeso

32Bɔ Farisii à zo aŋu bɔ â ma nde ǹtsèbè zɔnɔ mbɔʼ engɔ ngɛ, éngɛ m̀fɔ̀rɔ̀ zhiri mane bɔ Farisii saa abɔ byɛ â ma kɔʼ ndɔngwe kɛ̀ ngɛ kpe e bere engɔ. 33Yeso ga ebe angɔ kpe, “Mmɛ wa ngo mwɔ nè mbɔn efwɔ antiri endzobo gɛrɛ shi ngɔɔ ebe engɔ wɛ à saa angu ngɛ. 34Mbɔn ba ngo zɛʼ angu bɛʼngɛ mbɔn ba ka angu zɔ mbɔʼnga afwɔ yɛ mmɛ mwɔ ngɛ mbɔn ke né zeʼe aŋu bo.” 35Bɔ Juu ga àmɔ̀ àmɔ̀ kpe, “Egho wunɔ ne zhuŋu ngɛ é ngɔ̀ɔ awe wɛ ntsɔ ne me né zɔ engɔ bo ngɛ ngà? Engɔ wa ngɔɔ abɛ Grik wɛ bɔ bɔ adeʼ mwɔ aŋu ngɛ gɛ̀rɛ̀ sa tee abwa ebe angɔ ngà? 36Enji yɛ engɔ à ga kpe ‘Mbɔn ba ngo zɛʼ angu shi na angu zɔ, afwɔ yɛ mmɛ mwɔ ngɛ mbɔn ke né zeʼe aŋu bo’ ngɛ ne ga kpe ayɛ?”

Ndim myɛ ma ndɛ̀ʼ etyê kengudu ngɛ

37À na anji antara à ma ngùdù gɛ̀rɛ̀ mwɔ anji yɛ antara à me fanna ngɛ, Yeso tam ekere gɛ̀rɛ̀ gâ ekama kpe, “Gho deʼ wɛ fi̧ri ngɔ ma fe ngɛ, e zeʼe ena gɛ̀rɛ̀ jùuru etaa mɔ. 38Egho wɛ me le ebɛrɛ ene mmɛ ngɛ ŋwɔ aŋu aŋwɛʼrɛ Ngwe me ga kpe ‘Ndim etyê ma sa kwaʼ gli ekwa ngɔ.’ ” 39Engɔ à na two ma azhwɛɛrɛ pɛ yɛ abɔ byɛ e ma le ebɛrɛ ene engɔ e ma ngo le ngɛ. À ne èndzobo chɛ â ke shi ndɛʼ azhwɛɛrɛ bo, mbɔʼnga Ngwe à ke shi tee enɛŋɛrɛkɛ Yeso ebe bɔ bo.

Azhuŋu bɔ mbɔʼ Yeso

40Aŋu angɔ à zo abwa yɛ engɔ à ga ngɛ, abɔ deʼ ga kpe, “Éŋwaʼaŋwâʼ egho wunɔ na Àmɛnɛkɔn Ngwe” 41Abɔ tsɛrɛ kpe, “Engɔ na Ǹtɔmzhwaʼa wɛ ma ngo zeʼe ngɛ.” É ngɔɔ embè, abɔ tsɛrɛ biiri kpe, “Ǹtɔmzhwaʼa yà ne gli efwɔ abɛ Galilii bo? 42Aŋwɛʼrɛ Ngwe ke me ga kpe Ǹtɔmzhwaʼa wa ngo gli efwɔ ekla m̀fɔ̀ Devid è zeʼe a Bɛtlɛhɛm efwɔ abɛ yɛ Devid à ma tsɔmɔ ngɛ bo?” 43Éngɛ egɛbɛ à nyii abwe angɔ mbɔʼ Yeso. 44Abɔ deʼ â kpe mbɔɔ bere engɔ bɛʼngɛ gho deʼ a shi ke tɛʼɛ abwo mɔ ekwa ngɔ bo. Eto bɔ Juu à ke le ebɛrɛ ene Yeso bo 45Èndzobo chɛ bàkɔ̀ʼ akwâ à ngɔɔ achim ngɛ, m̀fɔ̀rɔ̀ zhiri mane bɔ Farisii biiri ebe angɔ kpe, “Ayɛ le mbɔn tɔn engɔ é nu zeʼe?” 46Bàkɔ̀ʼ akwâ byɛ gíì kpe, “Tsɛ̀ʼ gho deʼ à shi ga na egho wunɔ nɔ bo.” 47Bɔ Farisii biiri ebe angɔ kpe, “Engɔ à gɛrɛ ndooro angɔn?” 48“Mbɔn be nɛɛ ato kà gho Farisii deʼ wɛ à shi bɛrɛ ene engɔ ngɛ? 49Keʼ! Atye abɔ atii bɔnɔ byɛ e ne me nɛɛ etsɛrɛ Mose bo ngɛ, epan we akwa angɔ.” 50Nikɔdemɔs wɛ à mwɔ egho bi abwaʼ angɔ wɛ à shi dye ngɔɔ kla Yeso ngɛ biiri ebwa ebe angɔ 51kpe, “Etsɛrɛ bɔ ye ga kpe e kwɔnɔ gho deʼ wɛ e ne sɛʼɛ engɔ bo ngɛ?” 52Angɔ gii kpe, “Ngwo gɛrɛ ne zeʼe a Galilii, zɔʼrɔ anchwɔnchwɔ ngwo wa ngo zɔ kpe Àmɛnɛkɔn Ngwe deʼ ke shi zeʼe a Galilii bo.”

53Éngɛ angɔ bɔ gimkpaʼ â klo ngɔɔ a ndɔrɔ amɔ.

നിലവിൽ തിരഞ്ഞെടുത്തിരിക്കുന്നു:

Eyɔɔ 7: nbt

ഹൈലൈറ്റ് ചെയ്യുക

പങ്ക് വെക്കു

പകർത്തുക

നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക

Aŋwɛʼrɛ Ebuumu Fe Nè Ngwe നെക്കുറിച്ച് കൂടുതലറിയുക

Eyɔɔ 7
-ൽ നിന്നുള്ള പ്രശസ്ത ബൈബിൾ വചനങ്ങൾ

Eyɔɔ 7 - നുള്ള വീഡിയോകൾ

അവലോകനം: യോഹന്നാൻ ൧-൧൨

BibleProject

യോഹന്നാന്‍ ൭:൧-൨൪

Lumo Project

യോഹന്നാന്‍ ൭:൨൫-൫൩

Lumo Project

Eyɔɔ 7

Eyɔɔ 7
-ൽ നിന്നുള്ള പ്രശസ്ത ബൈബിൾ വചനങ്ങൾ

Eyɔɔ 7 - നുള്ള വീഡിയോകൾ

അവലോകനം: യോഹന്നാൻ ൧-൧൨

യോഹന്നാന്‍ ൭:൧-൨൪

യോഹന്നാന്‍ ൭:൨൫-൫൩

വേദപുസ്തകം:

Ngwo

പതിപ്പ്: Aŋwɛʼrɛ Ebuumu Fe Nè Ngwe - nbt

Eyɔɔ 7

Eyɔɔ 7

Eyɔɔ 7-ൽ നിന്നുള്ള പ്രശസ്ത ബൈബിൾ വചനങ്ങൾ

Eyɔɔ 7 - നുള്ള വീഡിയോകൾ

അവലോകനം: യോഹന്നാൻ ൧-൧൨

യോഹന്നാന്‍ ൭:൧-൨൪

യോഹന്നാന്‍ ൭:൨൫-൫൩

വേദപുസ്തകം:

Ngwo

പതിപ്പ്: Aŋwɛʼrɛ Ebuumu Fe Nè Ngwe - nbt

Eyɔɔ 7

Eyɔɔ 7
-ൽ നിന്നുള്ള പ്രശസ്ത ബൈബിൾ വചനങ്ങൾ