Eyɔɔ 3
3
Yeso mane Nikɔdemɔs
1Gho ato deʼ à na abwaʼ bɔ Juu wɛ ekumu ngɔ à mwɔ Nikɔdemɔs ngɛ. Engɔ à ne efwɔ ǹtìmi bɔ Farisii. 2Ǹklì anji deʼ engɔ ngɔɔ abwaʼ Yeso, è ga ebe engɔ kpe, “Àtee abwa, mbyɛɛ be nɛɛ kpe na Ngwe a me saa awɛ é tee abwa ebe bɔ, mbɔʼnga tsɛʼ gho deʼ me né fwɛʼ abwa zodo zodo yɛ ngwo ma fwɛʼ ngɛ bo. À tye me engɔ wɛ Ngwe mwɔ nè engɔ ngɛ.” 3Yeso gíì kpe, “Mmɛ na ga éŋwaʼa engɛ̂ kpe gho deʼ ke né yà nyii efwɔ ebwa m̀fɔ̀ Ngwe wɛ e ne wu be engɔ ekyɛ tsɛrɛ bo ngɛ.” 4Nikɔdemɔs biiri kpe, “E na wu be gho tɛ̀bɛ deʼ ekyɛ tsɛrɛ ngɛ ene? Gho tɛ̀bɛ deʼ ke né wu nyii efwɔ ebûm áʼɔ̧̀ mɔ kpe e shi wu be engɔ ene ekyɛ nùrù fyee bo.” 5Yeso gíì kpe, “Mmɛ na ga éŋwaʼa engɛ̂ kpe gho deʼ ke né nyii efwɔ ebwa m̀fɔ̀ Ngwe wɛ e ne be engɔ ene ndim mane azhwɛɛrɛ ngɛ bo. 6Nyɛm ekwa na be ma nyɛm ekwa bɛʼngɛ azhwɛɛrɛ ma be azhwɛɛrɛ. 7Mbɔn ke sa kɔ̀n ene ega wɛ mmɛ ga kpe ‘E ba wu be angɔn ekyɛ tsɛrɛ’ ngɛ bo. 8Efɔɔ na fudu na aŋu e me doʼo ngɛ. Ngwo ma zɔ aŋu e ma fudu ngɛ, bɛʼngɛ ngwo ke né tòʼrò afwɔ yɛ e ma zeʼe kà e ma ngɔɔ ngɛ bo. Ne énde e mwɔ ebe abɔ byɛ e ma be angɔ ene azhwɛɛrɛ ngɛ.” 9Nikɔdemɔs biiri kpe, “Ewunɔ wa ngo mwɔ énde ngɛ ene?” 10Yeso gíì kpe, “Ka ngwo na àtee abwa ebe bɔ Israel, Ngwo mɔ gɛrɛ ke nɛɛ abwa zɔnɔ bo? 11Mmɛ na gà éŋwaʼa endɔn kpe mbyɛɛ na gà mbɔʼ abwa yɛ mbyɛɛ me nɛɛ ngɛ, mbɔn a dà ke bɛrɛ ene abwa yɛ mbyɛɛ ma gà ngɛ bo. 12Mbyɛɛ shi ga endɔn ma moŋoro ene ela efwɔ ese, mbɔn gɛrɛ ke bɛrɛ bo. Mbɔn ba da sa bɛ̀rɛ ene, mala mmɛ ga endɔn mbɔʼ ela ezob ngɛ? 13Tsɛ̀ʼ gho deʼ shi ngɔɔ ezob bo, à tye Ŋwɔ Gho wɛ è me zeʼe ezob ngɛ. 14Aŋu Mose à beʼ jwe ene azɔd ekere efwɔ akwâ ńked ngɛ, e gɛrɛ ba ngo beʼ Ŋwɔ Gho ekere, 15mbɔʼtye egho wɛ bɛrɛ ngɛ, è yà nde etyê wɛ me tye ekyɛ ŋwaʼ ngɛ. 16Ngwe à doʼo ese ghɛʼ wɛ à ndɛʼ ŋwɔanɔm chwɛ̀ʼ mɔ kpe egho wɛ è bɛ̀rɛ ene engɔ ngɛ, è yà ne ku bo, bɛʼngɛ è yà nde etyê wɛ me tye ekyɛ ŋwaʼ ngɛ. 17Ngwe à ke saa ŋwɔ mɔ efwɔ ese kpe é zeʼ nyɛ̀ è bɛ̀ʼrɛ̀ abwa bɔɔbɔɔ bo, bɛʼngɛ kpe è zeʼ mwɔ Àsaase. 18Egho wɛ è bɛ̀rɛ ene Yeso ngɛ, e yà ne nyii engɔ bo, bɛʼngɛ abɔ byɛ e ne bɛrɛ ene engɔ bo ngɛ, e ba ge enyii akwa angɔ mbɔʼnga angɔ ke bɛrɛ ene ekumu ŋwɔ chwɛ̀ʼ Ngwe bo. 19Ne énde Ngwe ma ngo tsɛrɛ esɛʼ bɔ mɔ mbɔʼnga ekɛʼ a shi zeʼe efwɔ ese, bɛʼngɛ bɔ me doʼo akwâ di fɔɔ akwâ pɛpɛ mbɔʼnga angɔ ma le ma abwa bɔɔbɔɔ. 20Gho ŋwàʼaŋwàʼ wɛ è ma le abwa bɔɔbɔɔ ngɛ wa gwe akwâ pɛpɛ gɛrɛ ne me doʼo zeʼe akwâ pɛpɛ bo, mbɔʼnga e ma bumu kpe abwa bɔɔbɔɔ ndze ya gli apɛpɛ. 21Bɛʼngɛ abɔ byɛ e ma tsɔmɔ ene éŋwaʼa ngɛ ba zeʼe akwâ pɛpɛ mbɔʼtye eleabwa angɔ gli apɛpɛ é tee kpe abwa yɛ angɔ shi fwɛʼ ngɛ, e ne fwɛʼ ma abwa yɛ Ngwe ma ke ngɛ.”
Eyɔɔ gà ekyɛ tsɛrɛ mbɔʼ Yeso
22Afwɔ à sa ndada, Yeso mane bɔ bɛɛrɛ abwa mɔ nyɛnnɛ ngɔɔ abɛɛ abɛ Judeya. Engɔ tsɔmɔ aŋu mane bɔ bɛɛrɛ abwa mɔ ene antiri endzobo deʼ gɛrɛ ma ndɛʼ ndim ebe bɔ. 23Enjitsɔ Eyɔɔ à gɛrɛ na ndɛ̀ʼ ndim ebe bɔ abɛ Aynon yɛ à mwɔ ebara abɛ Salim ngɛ, mbɔʼnga ndim à ne ghɛʼ afwɔ yɛ. Bɔ akɛkɛ à gɛrɛ na ngɔ̀ɔ engɔ ma ndɛʼ ndim ebe angɔ. 24Ebwa wunɔ à gli dye e sa ge Eyɔɔ a ndɔdzɔm. 25Bɔ bɛɛrɛ abwa Eyɔɔ adeʼ sa fɛ̀ɛrɛ nè gho Juu deʼ mbɔʼ ebwa é sò akwa amɔ kpe a me pɛ efàarà Ngwe. 26Éngɛ angɔ ngɔɔ efàarà Eyɔɔ è gà kpe, “Àtee abwa, ngwo we zhuŋu egho wɛ à mwɔ nè ngwo abɛɛ eji ze a Joodan ngɛ? Egho wɛ ngwo à ma ga mbɔʼ engɔ ngɛ? Engɔ wa ndɛʼ ndim, bɔ akɛkɛ gɛrɛ ma ngɔ̀ɔ ebe engɔ.” 27Éngɛ Eyɔɔ gii kpe, “Gho deʼ ke né fwɛʼ ebwa deʼ bo, à tye Ngwe ma ndɛʼ ekama ebe engɔ é fwɛʼ ebwa wɛ. 28Mbɔn mɔmbwo be né mwɔ entsɛ mbu kpe mmɛ à ga kpe ‘Mmɛ ke ma Ǹtɔmzhwaʼa bo, bɛʼngɛ Ngwe à tɔm angu embè engɔ é ndèerè aghɛʼ ngɔ.’ 29Aye fe ne mwɔ egha anɔm wɛ è me le ebwa nu-aye ngɛ. Bɛʼngɛ esɔrɔ egho wɛ ma ke nu aye ngɛ na tama ebara engɔ gɛ̀rɛ̀ ma zhuru ebe ngɔ. Egɛnɛ me shwe ekwa engɔ èndzobo chɛ engɔ ma zo etsoʼ egho wɛ è me le ebwa nu-aye ngɛ. E yɛngɛ ne egɛnɛ ndza, endzobo egɛnɛ ndza shi shwe mɛ̀ɛrɛ̀. 30Eghɔ ngɔ yà sa ngɔ̀ɔ embè embè, engɔ endza sa ngɔ̀ɔ a chwachwa.”
Engɔ wɛ è me zeʼe ezob ngɛ
31Engɔ wɛ è me zeʼe ezob ngɛ we fɔɔ bɔ gimkpaʼ. Engɔ wɛ me zeʼe efwɔ ese ngɛ na gho efwɔ ese. Ne ǹji yɛ è ma ga ma abwa efwɔ ese ngɛ. Engɔ wɛ è me zeʼe ezob ngɛ we fɔɔ bɔ gimkpaʼ. 32Engɔ na gà abwa yɛ è shi zɔ gɛ̀rɛ̀ zo ngɛ, bɛʼngɛ tsɛʼ gho deʼ ma bɛ̀rɛ ebwa wɛ engɔ ma gà ngɛ bo. 33Bɛʼngɛ egho wɛ è ma bɛ̀rɛ ebwa wɛ engɔ ma ga ngɛ, è shi bɛrɛ kpe Ngwe ya gà abwa gimkpaʼ me éŋwaʼa. 34Engɔ wɛ Ngwe me saa ngɛ na gà ega Ngwe, mbɔʼnga Ngwe me ndɛʼ azhwɛɛrɛ ebe engɔ mɛ̀ɛrɛ̀. 35Àtɛ we doʼo ŋwɔ gɛrɛ shi ndɛʼ ekama gimkpaʼ é klini ela gimkpaʼ efwɔ ese. 36Abɔ byɛ e me bɛrɛ ene ŋwɔ ngɛ ba nde etyê kengudu, bɛʼngɛ angɔ byɛ e tɔn ŋwɔ ngɛ yà ne me nde etyê bo. Epan Ngwe ya nɔ ekwa angɔ.
നിലവിൽ തിരഞ്ഞെടുത്തിരിക്കുന്നു:
Eyɔɔ 3: nbt
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2022, CABTAL
