Eyɔɔ 2
2
Antara nu-aye abɛɛ abɛ Kana
1Enji à sa fɔɔ fyee nɔ, â ne le antara nu-aye deʼ abɛɛ abɛ Kana efwɔ abɛ Galilii. Áʼɔ̧̀ Yeso à gɛrɛ na aŋu. 2Yeso mane bɔ bɛɛrɛ abwa mɔ à gɛrɛ ne ene antara nu-aye wunɔ. 3Èndzobo chɛ amɔm myɛ angɔ à ma ŋwɔ à myɛ ngɛ, áʼɔ̧̀ Yeso ngɔɔ gà ebe Yeso kpe, “Mɔm shi myɛ anɔ.” 4Yeso gíì ebe engɔ kpe, “Aye, ngwo ke ma ngo tòʼrò ebwa wɛ mmɛ ma ngo fwɛʼ ngɛ ena bo. Endzobo ndza ke shi koʼo bo.” 5Éngɛ áʼɔ̧̀ ngɔ ngɔ̀ɔ gà ebe bɔ afwɛʼ kpe, “Mbɔn le aŋu engɔ ma ngo gà ngɛ.” 6Èngwara akɔ kɛkɛ mfo chɛ â me ndeere ene chwâ ngɛ à ne ebara aŋu, m̀pèrè chɛ bɔ Juu à ma gli ma sò akwa amɔ é me pɛ efàarà Ngwe ngɛ. Ekɔ ŋwaʼ à na nu ne egla mɔm tan nɔ. 7Éngɛ Yeso gà ebe bɔ afwɛʼ kpe, “Mbɔn shweere akɔ zɔnɔ ene ndim.” Éngɛ angɔ shweere akɔ yɛ gimkpaʼ ene ndim. 8Èndzobo chɛ angɔ à le éngɛ ngɛ, ato gà ebe angɔ kpe, “Mbɔn dɔɔrɔ adeʼ ngɔɔ ndɛ̀ʼ ebe egho wɛ è me tam ato ene antara wunɔ ngɛ.” Angɔ le engɛ̂. 9Egho kɛ̀ wɛ zhweʼre ndim, e shi firi shi mɔm. Engɔ à ke nɛɛ afwɔ yɛ a nu mɔm zeʼe ngɛ bo, bɛʼngɛ abɔ afwɛʼ byɛ à ne nɛɛ. Éngɛ engɔ zɔʼ anɔmaye wunɔ ebara mɔ 10gà ebe ngɔ kpe, “Bɔ gimkpaʼ na dye à ndɛ̀ʼ ma mɔm myɛ è me nara ngɛ ebe bɔ é ŋwɔ. Endzobo bɔ shi ŋwɔ mɔm myɛ ngɛ, è shi sa ndɛʼ atwa mɔm. Ngwo shi ngùdu ene angɔ myɛ è me nara ngɛ? Ayɛ me le kpe ngwo sa zeʼe nè amɔm mɔnɔ me enjitsɔ?” 11Ewunɔ ne ebwa zodo zodo mbèmbè wɛ Yeso à le abɛ Kanan efwɔ abɛɛ abɛ Galilii é tee ekama mɔ. Éngɛ bɔ bɛɛrɛ abwa ngɔ à bɛrɛ kpe na Ǹtɔmzhwaʼa. 12Aŋu ebwa wunɔ à fɔɔ ngɛ, Yeso, áʼɔ̧̀, bwɔngwa mane bɔ bɛɛrɛ abwa mɔ à kla ngɔɔ a Kapɛnaum. Angɔ à tsɔmɔ aŋu efwɔ enji deʼ.
Yeso chwee bɔ a ndɔngwe kɛ̀
13Aŋu endzobo à sa koʼo ene antara fɔɔ ekere bɔ Juu ngɛ, Yeso ngɔɔ a Jerusalɛm. 14Engɔ à kla bɔ e ma fɛ̀nnɛ m̀pwɔ̀rɔ̀, ǹglɔ̀rɔ̀, mane mblɔ̂m efwɔ ndɔngwe kɛ̀. Adeʼ à ne tsɔmɔ edɔm echud ma kobo akɛb. 15Yeso ke akanda sa chwee à wuru bɔ gimkpaʼ, ǹglɔ̀rɔ̀ mane m̀pwɔ̀rɔ̀ efwɔ ndɔ aŋu, è sàama abɔ byɛ â ma kobo akɛb ngɛ, è ghɛ̀ɛbɛ achud ekara kubu a chwâ. 16Engɔ gà ebe abɔ byɛ â ma fɛ̀nnɛ mblɔ̂m ngɛ kpe, “Mbɔn bwɛ ela bɔnɔ ngɔɔ ese, mbɔn ke le ndɔ àtɛ ngu firi shi ewu̧ bo” 17Bɔ bɛɛrɛ abwa ngɔ zhuŋu ebwa wɛ e me ŋwɛʼrɛ efwɔ aŋwɛʼrɛ Ngwe kpe, “Andɔŋɔ ndza mbɔʼ ndɔngwe njɛ ya zhu angu.” 18Éngɛ bɔ Juu biiri ebe Yeso kpe, “Anɛ̂ ebwa ze a me né tee kpe ngwo we le akama é fwɛʼ ebwa wunɔ?” 19Yeso gíì ebe angɔ kpe, “Mbɔn sɛʼɛ ndɔngwe kɛ̀ zɔnɔ sàa a chwâ, enji tɛd mmɛ wa wu byɛ e saa ekere.” 20Angɔ gii kpe, “Â nu enɔ̂m èsama fyee tɛʼ mfo é byɛ e ndɔngwe kɛ̀ zɔnɔ. Éngɛ ngwo ga kpe ngwo we né byɛ efwɔ enji tɛd?” 21Bɛʼngɛ e ndɔngwe kɛ̀ yɛ engɔ à ma gà ngɛ à ne ekwa mɔ. 22Èndzobo chɛ engɔ à zhwɛm ene ewu ngɛ, bɔ bɛɛrɛ abwa ngɔ zhuŋu ebwa wɛ engɔ à shi ga ngɛ. Éngɛ angɔ à bɛrɛ etɛʼɛ Ngwe mane aga yɛ Yeso à ma gà ngɛ. 23Aŋu Yeso à mwɔ a Jerusalɛm endzobo antara fɔɔ ekere ngɛ, bɔ akɛkɛ à zɔ anɛ̂ abwa yɛ engɔ à ma le ngɛ, gɛ̀rɛ̀ bɛ̀rɛ ene ekumu ngɔ kpe engɔ na Ǹtɔmzhwaʼa. 24Bɛʼngɛ Yeso à ke shi etaa mɔ ene angɔ bo, mbɔʼnga engɔ à ne nɛɛ ńtara bɔ gimkpaʼ. 25Engɔ à ke ke antsɛ deʼ kpe è ga ebwa deʼ mbɔʼ bɔ bo. Engɔ à ne nɛɛ ebwa wɛ à me mwɔ efwɔ etaa gho ŋwàʼaŋwàʼ ngɛ.
നിലവിൽ തിരഞ്ഞെടുത്തിരിക്കുന്നു:
Eyɔɔ 2: nbt
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2022, CABTAL
