Matiye 14
14
Nemisije gə tar pa lə Parijiyɛ̰je
Mrk 6.14-29
1Dɔ kar-ɛ gə əng le, Erɔdə Antipas gə to njeko̰ ɓe gə Galile, o tar gə ɔji dɔ Jeju 2ɗaa pa ar njeka̰ykulaje lə-a na: To Ja̰ Njeɗabatɛm gə uy le ɓa təl ndol ɗaa ye ɓa inga ne singa ɗa ne nemisije.
3Erɔdə pa to gə be mba ꞌne ja n-ar-je d-uwa Ja̰ ꞌtɔ-ɛ gə kula lar, d-ila-a kəy kula gə mba tar lə Erɔdiyadə gə to jene lə ngon ko̰-ɛ Pilibi. 4Mba Ja̰ pa ar Erɔdə na: D-un ɗəw d-ar-i kar ꞌta jene lə ngon ko̰-i ang baa. 5Be ɓa Erɔdə sangə ɗəw mba kar ꞌtɔl-ɛ, ngaa ɓəəl bula dəwje mba d-o Ja̰ gə pajambərə gə tɔgərɔ ja. 6Logə ndɔ ɗa nay kuji Erɔdə asə ɗaa, ngon lə Erɔdiyadə gə jene uru dana gə la ɗaa la le ləl Erɔdə ya̰, 7ar n-un ndu-a n-ar ngon mandə le na: Ne gə ꞌdəji ja nama m-a kar-i. 8Gə go sula gə ko̰-ɛje sula-a le ɗaa ngon mandə le pa na: Ila dɔ Ja̰ Njeɗabatɛm ja mə ka gə gə tɔg-ɛ ar-m. 9Rɔ mbay ləl-e ang, ngaa mba n-un ndu-a ɗɔdə no bula dəwje gə ꞌɓar-je nəm tɔ ɗaa, n-un ɗəw kar d-ar ne gə ngon mandə dəji le. 10Be ɓa n-ula-je n-ar-je d-aw gangə dɔ Ja̰ le mə kəy kula gə; 11ɗaa d-ila mə ka gə ꞌɗe nee d-ar ngon mandə le ta aw ne ar ko̰-ɛje. 12Ngan njenendoje lə Ja̰ ꞌɗe d-un nin-e ꞌdubu, ngaɓa d-aw ꞌpa tar-ɛ d-ar Jeju.
Jeju ar nekusa dəwje tɔl-tɔl dɔg lo mi
Mrk 6.30-44; Lug 9.10-17; Ja̰ 6.1-14
13Logə Jeju o tar yo Ja̰ Njeɗabatɛm le ɗaa ɔdə lo-e gə, al to aw ər gə ndag lo gə ngərəng. Logə bula dəwje d-o tar-ɛ ɗaa d-ɔdə mə ɓebo gə, ꞌndole go Jeju gə gɔl-je. 14Logə Jeju ḭ mə to gə uru nangə ɗaa, o bula dəwje, ɗaa o kəmtondoo lə-je, ngaɓa aji njeməndəje gə d-ar kəne.
15Kar kumatagə ɗaa ngan njenendoje ꞌɗəm gə rɔ-ɛ gə ꞌpa d-ar-ɛ na: Lo gə nee le to ndag lo, ngaɓa kar kara nday ya̰ nəm tɔ ɗaa, ꞌtɔbə bula dəwje le ar-je d-aw mə ɓeje gə d-aw ꞌndogo neje d-usa. 16Jeju ila-je kəne na: Kəm kar d-aw ang; sisəy ja ar-jeje ne d-usa. 17Ngaa ꞌpa d-ar-ɛ na: Mbə mi gə kənji joo ja baa ɓa to ji-si gə nee. 18Jeju pa na: ꞌƊe-je ne ar-mje. 19N-un ndu n-ar dəwje kar d-isi nangə dɔ mu gə, ɗaa n-odo mbə gə mi gə kənji gə joo le, ɗaa n-un kəm-e gə dara, n-tɔr ndu-e kəne, cibi n-cɛdə n-ar ngan njenendoje ꞌkay bula dəwje le. 20Dəwje tɔ̰y d-usa d-ar mə-je ci, ɗaa d-odo dɔ dum-e gə nay karɛ dɔg gə gir-e gə joo. 21Dəwje tɔ̰y gə d-usa ne le d-asə tɔl dɔg lo mi, lal tura jeneje gə nganje.
Jeju nja dɔ man bo gə
Mrk 6.45-56
22Go-e gə ɗaa, Jeju ɔsə ngan njenendoje ar d-al to mba kar d-aw tura əər kara gə kede, logə n-a nay mba tɔbə bula dəwje kar-je d-aw. 23Logə Jeju tɔbə dəwje ɗaa, uba dɔ ər gə mba kaw kisi ngərəng, dəji Luba. Kar kumatagə ɗaa, Jeju ar gə kar-ɛ baa.
24To le aw əw ya̰ gə kar mbal, ləl ula tila kəm-e ɗaa ꞌpagəm tuga ar to ləngə. 25Aw gə ji dɔɔɓe gə ɗaa, Jeju nja dɔ man gə, aw dɔ-ɛ gə ɓə lə-je. 26Logə ngan njenendoje d-o-e n-aw n-nja dɔ man gə ɗaa, kəji lə-je turu buguju ar ꞌtəl ꞌpa na: To uma! Ɓəəl unda-je badə gangə-je ar d-uru ꞌkuwi. 27Jeju pa ar-je gə tɔg-ɛ baa na: Isije ɗɛgɛgɛ, to ꞌma ja, ꞌɓəəlje ang! 28Piyɛr təl ila-a kəne na: Mbayɓe, ɓo to ꞌi ja nama un ndu-i ar-m m-nja dɔ man gə m-aw m-inga-i. 29Jeju pa ar-ɛ na: Ḭ ꞌɗe. Piyɛr ḭ mə to gə, nja dɔ man gə, aw gə rɔ Jeju gə. 30Ngaa Piyɛr ɓəəl mba ləl gə ula gə singa ya̰ ɗaa n-un kudu njuyi man, ngaɓa n-uru ꞌkuwi na: Mbayɓe, ꞌta-m ɓo. 31Jeju ula ji-a gə tɔg-ɛ baa uwa ne Piyɛr ngaɓa təl pa ar-ɛ na: ꞋI ꞌto dəw gə takagə lə-i əngə, ꞌma̰y tar mba ɗi wa? 32Logə d-al to ɗaa, ləl gangə njɛd. 33Be ɓa ngan njenendoje tɔ̰y gə d-isi mə to gə le d-unda ꞌburamba no Jeju gə ngaɓa ꞌpa na: ꞋI to Ngon lə Luba to gə tɔgərɔ ja.
34Logə ꞌgangə man tɔ̰y ɗaa, ꞌce dɔ nangə gə Jenejarɛd. 35Dəwje gə njeɓeje ꞌgərə Jeju, ɗaa d-ula kula d-ar ɓeje gə gugu dɔ-je ɗaa ꞌɗe gə njerɔko̰je tɔ̰y d-ar-ɛ. 36ꞌƊa Jeju kɔgərɔ kar iya̰ ɗəw ar d-uwa ta kubu lə-a ja baa. Be ɓa dəwje tɔ̰y gə d-ɔr rɔ-ɛ le, d-aji kəbərə ja tɔ.
നിലവിൽ തിരഞ്ഞെടുത്തിരിക്കുന്നു:
Matiye 14: lap
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2020, ATALTRAB. All rights reserved
