Matiye 13
13
GUSUTAR GƏ ƆJI DƆ ƁEKO̰ GƏ DARA
Gusutar gə ɔji dɔ njendɔ gə aw ila kər
Mrk 4.1-20; Lug 8.4-15
1Dɔ ndɔ-ɛ gə əng le, Jeju ɔsə lo kəy ce, aw isi ta babo gə. 2Bula dəwje ꞌɗe ꞌmbo̰ naa mbɔr-ɛ gə ar n-al n-isi mə to gə. Bula dəwje tɔ̰y d-ar dɔ ꞌnangəra̰ gə. 3Jeju pa gə je tar kur-e əw ya̰ gə gusutarje, na:
4Dəw gə njendɔ ce aw mba kaw kila kər. Logə n-aw n-ila kər le ɗaa kand-e gə kɛm um mbɔr ɗəw boo njal-njal, əlje ꞌɗe d-o̰. 5Kandə kər gə kɛm um dɔ ranga gə nangə ndər kəne ang ɗaa ce gə tɔg-ɛ baa ngira inga lo kandə nangə ya̰ ang baa, 6ngaa logə kar ɔsə ngaɓa tunga ɗaa ɗa kər gə ce le ar-ɛ tudu mba ngira-a andə nangə ang. 7Kandə kər gə kɛm um horo kunje gə, logə kunje ḭ ɗaa udu dɔ-ɛ. 8Mar-ɛje gə kɛm um dɔ nangə gə may gə, ɔr dɔ, ɗaa dɔ-ɛ gə kara unda kand-e tɔl, ye gə nee unda dɔg misa̰, ye gə ɗangə unda dɔg munda. 9May kar dəw gə mbi-a ga̰ nama o ne.
10 Ngan njenendoje lə Jeju ꞌɗe mbɔr-ɛ gə ngaɓa ꞌdəji-e na: Mba ɗi ɓa ꞌpa ne gə je tar gə gusutar wa? 11Jeju ila-je kəne na: Luba ar-sisəy ꞌgərəje tar ɓeko̰ gə dara gə to lokiya gə, ngaa n-ar ꞌjeje ꞌgərə ang, 12mba dəw gə ne ga̰ ji-a gə ɓa d-a kar-ɛ mar-ɛ ɗaa a ɗusu ji-a, ngaa dəw gə ne godo ji-a gə le, ye gə ga̰ ji-a gə njɛ̰ ja kara d-a ta ɗɔdə. 13Gəl-e gə nee ɓa, m-pa ne gə je tar gə gusutar, mba d-a ne nda̰a̰ kara d-o ang ngaɓa ꞌtuga mbi-je d-o ne tar kara tar le andə mbi-je ang nəm, ɓa gərə gəl-e ang nəm tɔ. 14Mba tar lə-jeje ja ɓa tar gə pajambərə Ejay pa kede nam le aw ne lo-e gə na:
A koje tar gə maj-ɛ ngaa a gərəje gəl-e ang magə
A kaje lo gə maj-ɛ ngaa a koje lo ang
15 Mba mə dəw mə ɓeje nee le təl kədərə
D-udu mbi-je jigi, ngaɓa ꞌɓiri kəmje mbḭ,
Na d-a kḭ ko gə kəm-je ngaɓa gə mbi-je,
Mba gərə gəl-e dɔ ɓəngərə-je gə,
Ɗaa d-a mbəl kəji lə-je mba kar m-aji-je ne # 13.15 Oje Eja 6.9-10 .
16Ngaa sisəy le nokarə to kar-si mba oje gə kəm-si, mba tuga-je mbi-si oje ne. 17Tɔgərɔ, m-pa m-ar-si, pajambərəje bula, gə dəwje gə gadə-gadə ꞌnjigi mba ko ne oje nee gə kəm-je ngaa d-o ang baa, ꞌnjigi ko tar neje nee gə mbi-je ngaa d-o tar-ɛ ang baa.
18ꞌTugaje mbi-si oje ne gəl gusutar gə ɔji dɔ njekila kər le. 19Kandə kər gə um mbɔr ɗəw boo njal-njal le, to dəwje gə ꞌtuga mbi-je d-o ne tar gə ɔji dɔ ɓeko̰ ɗaa ꞌgərə gəl-e ang. Njeməkṵra̰y ɗe ɔr tar gə ꞌdubu mə-je gə le ɗɔdə. 20Dɔ ranga to asə naa gə dəw gə o tar ɗaa ta gə tɔg-ɛ baa gə rɔləl, 21ngaa tar le ula ngira-a m-e gə gə maj-ɛ ang, to dəw gə m-e to dɔ tar waga baa, a ɓo lo gə kula kəm naa ndoo ose nekəmandoo gə ɔji dɔ tar lə Luba ce dɔ-ɛ gə nama ꞌmbadə takagə lə-a. 22Kandə kər gə um mə kunje gə le nay ɗəw kara baa gə dəw gə tuga mbi-a o ne tar lə Luba, ngaa no rɔ gə ɔji dɔ kəji neje gə nangə nee, gə ɓo nekingaje, ɗe udu dɔ tar lə Luba gə n-o le ngaɓa ɗa ar kand-e godo. 23Kandə kər gə um dɔ nangə gə may gə le to dəw gə tuga mbi-a o ne tar lə Luba ngaɓa gərə gəl-e. Kand-ɛ gə kara andə tɔl, ye gə ɗangə dɔg misa̰, ngaɓa ye gə ɗangə andə dɔg munda.
Gusutar gə ɔji dɔ waa da̰w
24Jeju təl un gusutar gə ɗangə pa ar-je na: Ɓeko̰ gə dara to asə naa gə dəw gə aw dubu ko wa gə may mə ndɔ gə lə-a. 25Ngaa logə dəwje tɔ̰y d-aw cibi ɗaa, njeba̰a̰ lə-a ɗe dubu waa da̰w horo wa gə le ɗaa ɔdə aw lo lə-a 26Logə waa ce gə unda ɗaa, waa da̰w to hor-e gə tɔ. 27Ngan njekulaje ꞌɗe ꞌpa d-ar njendɔ le na: ꞌƁəə-sijee, se ꞌi dubu ko gə may ɓa mə ndɔ gə ang wa? Waa da̰w ḭ ɗa cibi ɓa ɗe to mə ndɔ gə ne wa? 28N-ila-je kəne na: To njeba̰a̰ ɓa ɗe ɗa kula kən. Ngan njekulaje ꞌtəl ꞌpa d-ar-ɛ na: ꞋI njigi kar-si j-aw tɔr wa? 29Njendɔ le təl pa na: Əw-je rɔ-si mba logə aw tɔr-je waa da̰w nama a kḭ tɔr-je ne gə wa naa gə. 30Iya̰-je ar-je tɔgə naa gə kara baa ɗaa, ndɔ kunja ko ɓa m-a pa kar njekunjaje d-ɔr waa da̰w le ꞌtɔ mba ro nam ngaɓa, go-e gə ɗaa d-a kiya̰ wa gə may kum mə dam gə lə-m.
Gusutar gə ɔji dɔ kandə mutarədə
Mrk 4.30-32
31Jeju pa gusutar gə ɗangə ar-je na: Ɓeko̰ lə Luba ta naa gə kandə kam nay gə ri-a na mutarədə gə dəw un aw dubu mə ndɔ gə lə-a. 32To kandə ko gə na ya̰ unda kandə kam nayje gə kɛm tɔ̰y, ngaa logə tɔgə ɗaa təl to kagə kam nay gə bo, mba kar əlje gə dara ɗa kəy ba-ɛ̰je gə#13.32 Oje Dan 4.20-22; Eje 17.23.
33Jeju pa gusutar gə ɗangə ja cibi ar-je na: Ɓeko̰ gə dara ta naa gə guway kodo gə jene un um mə nduji gə d-ɔji ngo munda mba mbo̰y ne saar kar ḭ tɔ̰y.
34Jeju pa tarje nee tɔ̰y ar bula dəwje gə gusutar, ngaɓa n-pa gə je tar lal gusutar ang. 35Mba kar tar gə pajambərə ila mbər-e le to ne lo-e gə:
M-a pa gə je tar gə gusutar,
M-a kila mbərə neje gə to lokiya gə logə Luba ɗa ne dara gə dɔ nangə # 13.35
Paj 78.1-2
.
Jeju ɔr gəl gusutar gə ɔji dɔ waa da̰w
36Jeju iya̰ bula dəwje ngaɓa ɔdə aw andə kəy. Ngan njenendoje ꞌɗe ꞌdəji-e na: Ɔr gəl gusutar gə ɔji dɔ waa da̰w gə to mə ndɔ gə le ar-si j-o. 37Jeju ila-je kəne na: Dəw gə dubu ko gə may le to ꞌMa gə Ngon lə dəw; 38ndɔ le to dɔ nangə, kandə ko gə may to nganje gə ɓeko̰ to ɔji dɔ-je; waa da̰w to ngan lə njekundagusu; 39njeba̰a̰ gə dubu waa da̰w lə to ꞌSɛ̰ngərɛ̰; nay kunja ko le to ɗudu ndɔ gə dɔ nangə nee; njekunja koje le to anjije. 40Ɗəw kara baa to gə d-a mbo̰ ne waa da̰w dɔ nangə mba ro le, a to to gə be ja tɔ a dɔ ɗudu ndɔ gə. 41ꞌMa gə Ngon lə dəw m-a kula anjije lə-m kar ꞌtɔr nje gə to jigi tuga gɔl marəje-je gə nje ɗa ne dɔ buguruje mə ɓeko̰ gə lə-m 42mba kum-je dan pər gə a ko̰ bilim-bilim; lo gə d-a kusa ngangəje kəne mɔr-mɔr gə man no kəm-je gə. 43Be ɓa njeneɗaje gə gadə-gadə d-a ndogo to gə kar be mə ɓeko̰ gə le Bɔ-jeje. May kar dəw gə mbi-a ga̰ nama o ne.
Gusutar gə ɔji dɔ nekinga gə to lo kiya gə
44Ɓeko̰ gə dara le to asə naa gə nekinga gə iya rɔ-ɛ mə ndɔ gə. Dəw gə inga ne le ɗaa un iya to gə ɗangə, rɔ-ɛ ləl-e ya̰ ar n-ɔdə n-aw n-uwa neje lə-a tɔ̰y n-ndogo ngaɓa n-ta lar-ɛ n-aw n-ndogo ne ndɔ nee le.
45Ɓeko̰ gə dara gɔl kara ɓi to asə naa gə dəw gə nje ɗabə ne ndogo gə aw sangə mərje gə mandə ya̰. 46Logə n-inga mər gə lar-ɛ to ɓəəl ya̰ ɗaa n-ɔdə n-aw n-ɗabə neje lə-a tɔ̰y ngaɓa n-təl n-aw n-ndogo ne mər nee le.
47Ɓeko̰ gə dara to to gə bura gə d-ila baa ɗaa ɔr kəm kənjije ang. 48Logə kənjije le ɗusu mə bura ɗaa, mbawje ꞌndɔr d-aw ne kar mbalaa, d-isi nangə ꞌmbərə kənji gə may d-um mə karɛ gə, nje gə may ang ɗaa d-um kɔrɔ. 49Dɔbo̰ ndɔ a to to gə be: anjije d-a ɗe kɔr kəm njeməngo̰yje horo nje ɗa neje gə gadə-gadə gə 50mba kum-je dan pər gə a ko̰ bilim-bilim; lo gə d-a kusa ngangəje kəne mɔr-mɔr gə man no kəm-je gə.
51Se ꞌgərəje neje ne tɔ̰y ja wa? D-ila kəne na: Oyo.
52Jeju pa ar-je na: Ye ɓa, njekɔr gəl torondu gə ɗa-ɗa gə ndo ne gə ɔji dɔ ɓeko̰ gə dara to to gə njekəy gə ɔr kəm ne gə sigi, gə ne gə ləw mə nekinga gə lə-a be.
JEJU UNDA NGANGƏ KULA LƏ-A DƆ NANGƏ GƏ GALILE
Jeju aw mə ɓe gə Najarɛd
Mrk 6.1-6; Lug 4.16-30
53Logə Jeju ɗunga gusutarje ɗaa ɔdə lo-e gə nee, 54aw ɓe gə tɔgə kəne. N-tɔji dəwje ne mə kəy nendo n-ar lo tar igi-je sɛl, ngaɓa ꞌpa na: Kəmkarə gə nemisije nee le n-ḭ neɗa wa? 55N-to ngon lə njekunja kagə nee ang wa? Ri ko̰-ɛje na Məri ang wa? Ngaɓa, Jagə gə Jəjəb gə Simo gə Jude ꞌto ngan ko̰-ɛ ang wa? 56Ko̰ nan-ɛje tɔ̰y ꞌga̰ horo-si gə nee ang wa? Na ɓa ar-ɛ singamongə gə kəm karə nee wa? 57Ɗaa n-təl n-to jigi tuga koso no-je gə.
Jeju pa ar-je na: Pajambərə lə Luba le mə ɓe kuj-e gə mə kəy gə lə-a ja ɓa ꞌdab-ɛ kəne dasəra. 58Ngaɓa Jeju ɗa nemisije ang mba məkədərə lə-je.
നിലവിൽ തിരഞ്ഞെടുത്തിരിക്കുന്നു:
Matiye 13: lap
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2020, ATALTRAB. All rights reserved
