Matiye 12

Tar gə ɔji dɔ ndɔ kuwa kɔr

Lug 6.1-5

1Dɔ kar-ɛ gə əng le, Jeju nday mə ndɔ gə gə ndɔ kuwa kɔr. Ɓo ɔr ngan njenendoje lə-a ɗaa ꞌcɛdə dɔ ko d-usa. 2Parijiyɛ̰je d-o ɗaa ꞌpa d-ar-ɛ na: O, ngan njenendoje lə-i ꞌɗa ne gə to kəm ɗa ndɔ kuwa kɔr gə ang. 3Ngaa Jeju ila-je kəne na: Ne gə mbay Dabidi ɗa le, ꞌturaje tar-ɛ mə mbede gə ang wa? Logə ɓo ɔr-ɛ, ꞌne je gə dəwje lə-a, 4ɗəw gə n-andə ne mə kəy gə lə Luba, n-usa mbəje gə ꞌpolo ne Luba gə ꞌne ang nəm, nje gə d-aw sə-a kara d-aw gə ɗəw mba kusa ang. Ngaa njekapoloje ja gə kar-je baa ɓa d-aw gə ɗəw mba kusa. 5Ose ꞌturaje tar-ɛ mə torondu gə lə Moyiji to gə, njekapoloje ꞌɗa kula mə kəy gə lə Luba ndɔ kuwa kɔr gə. D-alje dɔ torondu ja ngaa Luba gangə tar dɔ-je ang. 6Ngaa, m-pa m-ar-si to gə dəw gə to ɓəəl unda kəy lə Luba ja ar nee#12.6 Tar gə nee le Jeju pa uji dɔ darɔ-ɛ ose uji dɔ ɓeko̰ lə Luba gə to gə tar lə-a gə tuji dəwje.. 7To gə ɓo ꞌgərəje mə tar gə na: Ko kəmtondoo ɓa m-njigi ɓo nepolo ang, nama dəwje gə ꞌɗa ne kara ang ja a gangəje tar dɔ-je baa ang. 8Mba ꞌma gə Ngon lə dəw ja m-to nje ko̰ dɔ ndɔ kuwa kɔr.

9Jeju ɔdə lo-e gə əng aw andə mə kəy nendo gə lə-je. 10Ɗaa dəw gə ji-a uy ga̰ kəne, ɗaa ꞌdəji Jeju na: Ɗəw to kəm kaji dəw ndɔ kuwa kɔr gə wa? ꞌDəji be mba kinga ne ɗəw kila ne tar dɔ-ɛ gə. 11N-pa n-ar-je na: Na ja horo-si gə nee, to gə ɓo badəm lə-a kara baa ja oso buwa gə ndɔ kuwa kɔr gə ɗaa a kaw kuwa-a kɔr-ɛ ang wa? 12Ngaa gə nən le, dəw to ɓəəl unda badəm ang wa? Be ɓa ɗəw to kəm ɗa may ndɔ kuwa kɔr gə ja. 13Go-e gə gugu, n-pa n-ar dəw le na: ꞌNduji ji-i, dəw le n-nduji ji-a, ɗaa ji-a le təl to gə maj-ɛ to gə ꞌye gə kara.

14Parijiyɛ̰je ꞌce ɗaga, ngaɓa d-um njuma mə naa gə mba sangə ɗəw tɔl-ɛ. 15Ngaa Jeju o tar-ɛ ɗaa ɔdə lo-e gə gə ɗangə.

Dəwje bula ꞌndole go-e ɗaa n-aji-je tɔ̰y; 16cibi n-un ndu n-ar-je mba kar ꞌɗa d-ar dəw gər-e ang, 17be ɓa gə mba kar tar gə pajambərə Ejay pa le aw ne lo-e gə na:

18 Oje ngon njekula lə-m gə m-mbər-e,

ꞌNe gə m-njig-e gə maj-ɛ m-ar kəm lə-m inga rɔləl dɔ-ɛ gə.

M-a kum Njil-m dɔ-ɛ gə

Ɗaa n-a kila mbərə neɗa gə gadə-gadə kar gəl kuji dəwje

19 N-a sangə tar ang, n-a pa tar gə ndu-e gə boy ang

Ngaɓa dəw a ko ndu-e dan ɗəw booje gə ang.

20 N-a kuwa kɔb gə ɗugu cɛdə ang,

Ngaɓa n-a tɔl ɗuguru ta pər gə aw tu ang

Saar ja kar neɗa gə gadə-gadə a cɛdə ne ɗɔ.

21 Ngaɓa gəl kuji dəwje d-a kunda mə-je dɔ ri-a gə.

Jeju aji nje kəm tɔ gə gɔdə

Lug 11.14-23

22Be ɓa dəwje ꞌɗe gə dəw gə njil gə kṵra̰y ɗa ɓe m-e gə ar təl nje kəm tɔ nəm, gɔdə nəm d-ar Jeju aji-ɛ. Ɗaa n-pa tar nəm, n-o lo nəm tɔ. 23Bula bo dəwje d-o dum dɔ-je ɗaa ꞌpa na: Dəw gə nee ɗaa a to ngon ka Dabidi ang ja wa? 24Parijiyɛ̰je d-o tar-ɛ ɗaa ꞌpa na: Dəw gə nee le, Bɛləjebul, mbay lə njilje gə kṵra̰y ɓa ar-ɛ singa n-tɔbə ne njilje gə kṵra̰y. 25Mba Jeju gərə kəji lə-je le ɗaa pa ar-je na: Ɓeko̰ gə ɗa-ɗa ɓa ɓo kay rɔ-ɛ dana cila kəm naa nama a tuji. Ngaɓa ɓebo ose kəy gə kay naa to kəne ɓa ꞌtəl cila kəm naa nama a tuji tɔ. 26To gə ɓo ꞌSu tɔbə ꞌSu nama təl kay rɔ-ɛ cila kəm darɔ-ɛ ye ja, bənəng ɗaa ɓeko̰ lə-a a to gə maj-ɛ to gə ban wa? 27Ngaɓa to gə ɓo ꞌma, m-tɔbə njilje gə kṵra̰y gə singa Bɛləjebul ɗaa, ngan sisəy le ꞌtɔbə njilje gə singa na ngaa wa? Gəl-e gə ne ɓa d-a to nje gangə tarje dɔ sisəy gə ja. 28Ngaa, to gə ɓo ɗəw gə lə Njil Luba ɓa ꞌma m-tɔbə ne njilje gə kṵra̰y nama, ɓeko̰ lə Luba ce ɓə lə-si nam ngaa. 29Ose dəw asə kandə kəy lə dəw gə njesinga, kodo nemayje lə-a lal kuwa-a tɔ-ɛ kede wa? N-tɔ-ɛ kede ɓa n-a kodo nemayje lə-a gə mə kəy gə ɓi. 30Dəw gə oso gəl-m ang nama to nje kəm tar lə-m. Ngaɓa, dəw gə la sə-m ar-m m-uwa neje dɔ naa gə ang nama, to dəw gə nje ja̰rɛ̰ neje.

Ɗa neɗa gə kṵra̰y gə Njil Njerɔsangə

Mrk 3.28-29; Lug 12.10

31Gəl-e gə nee ɓa m-pa m-ar-si na: Neɗa gə kṵra̰y gə ɗa-ɗa ngaɓa dəw gə ɗa-ɗa gə taji Luba le, Luba a kɔr tar-ɛ dɔ-ɛ gə, ngaa dəw gə taji Njil Njerɔsangə nama Luba a kɔr tar-ɛ dɔ-ɛ gə ang ja saar. 32Dəw gə ɗa-ɗa gə pa tar gə kṵra̰y dɔ ꞌma gə Ngon lə dəw nama, d-a kɔr tar-ɛ dɔ-ɛ gə, ngaa dəw gə pa tar gə kṵra̰y dɔ Njil Njerɔsangə gə le, Luba a kɔr tar-ɛ dɔ-ɛ gə dɔ ndɔje gə ɓisine ang nəm ɓa dɔ ndɔje gə aw ɗe kede ang nəm. 33Jeju un tar to gə ɗangə pa na: Kagə gə may le kand-e a may tɔ, a ɓo kagə gə kṵra̰y nama kand-e a kṵra̰y tɔ, mba kandə kagə ɓa d-a gərə ne kagə. 34Sisəy gə mə-si kṵra̰y nee le, ꞌto to-je gə kondɔtɔl be, tar gə may a ce ta-si gə to gə ban wa? Ye gə ɗusu mə-si ja ɓa ce ta-si gə. 35Dəw gə may nama ne gə may ja tɔ ɓa a kḭ m-e gə, ngaa ɓo dəw gə kṵra̰y nama ne gə kṵra̰y ja tɔ ɓa a kḭ m-e gə tɔ. 36M-pa m-ar-si to gə ndɔ gangə tar nama tarje gə pasəra gə dəwje d-aw pa le, d-a tura go-e. 37Mba gə go tar gə ꞌpa ja ɓa a kɔr tar dɔ-i gə ngaɓa tar gə ꞌpa ja tɔ ɓa tar a kuwa ne dɔ-i.

Jeju mbadə ɗa nemisi

Lug 11.29-30

38Be ɓa njekɔr gəl toronduje gə kɛm gə Parijiyɛ̰je gə kɛm d-un tar ꞌpa na: Njenetɔji, j-a njigi kar-i ꞌɗa netɔji kara ar-si j-o. 39N-ila-je kəne na: Gəl kuji gə kṵra̰y gə nje ɓogo lo to mba turu gir-e kar Luba, dəji netɔji, nama d-a kar-ɛ netɔji gə ɗangə kara unda dɔ kar pajambərə gə lə Luba, gə ri-a na Jonas ang. 40Mba ɗəw kara baa to gə Jonas ɗa ndɔ munda gə cil munda mə kənji bo gə le, ꞌma gə Ngon lə dəw kara m-a ɗa ndɔ munda mə nangə gə tɔ. 41Ndɔ gangə tar nama, dəw mə ɓeje gə Ninibə d-a kuba nangə kḭ naa gə kara baa gə gəl kuji nee, ngaɓa tar a təl kuwa dɔ gəl kuji gə nee le, mba dəwje gə Ninibə ꞌturu kəji lə-je gə go tar lə Luba gə Jonas pa ar-je, ngaɓa oje, dəw gə nday Jonas ja ar nee. 42Mbay jene gə go ɓe gə dɔ kɔl a kuba nangə kḭ ndɔ gangə tar gə naa gə gə gəl kuji gə nee ngaɓa a kila tar dɔ-ɛ gə, mba n-ḭ ko̰ nangə gə ja n-ɗe mba ko kəm karə lə mbay Salomo, ngaa oje dəw gə to ɓəəl unda Salomo ja ar nee.

43Logə njil gə kṵra̰y ce mə dəw gə ɗaa n-aw ndag lo gə, n-sangə lo kuwa kɔr pḭ n-inga ang. 44Ɗaa n-pa na: M-a təl kaw mə kəy gə m-ce kəne le. Logə n-təl n-ɗe ɗaa, mə kəy le to baa, d-odo m-e, ngaɓa ꞌgɔl gə maj-ɛ nəm tɔ. 45N-təl n-aw ɓar njilje gə ɗangə siri gə kṵra̰y d-unda-a n-um-je go-e gə; ngaɓa d-andə mə kəy gə le ꞌɗa ɓe kəne ɗaa dəw nee le təl kṵra̰y unda kisi lə-a gə kede. Kar gəl kuji gə nee kara a to to gə be ja tɔ.

Jeju je gə ko̰-ɛje gə ngan ko̰-ɛ

Mrk 3.31-35; Lug 8.19-21

46Logə Jeju ar aw pa tar ar bula dəwje baa ɓi ɗaa, ko̰-ɛje, gə ngan ko̰-ɛje ꞌɗe d-ar ɗaga d-aw sangə mba pa sə-a tar. 47Dəw kara pa ar-ɛ na: Ko̰-ije je gə ngan ko̰-ije d-ar ɗaga, d-aw sangə ɗəw mba pa sə-i tar, 48ngaa Jeju təl ila dəw gə nje pa kar-ɛ le kəne na: Na ɓa to ko̰-mje, ngaɓa nje gə ɗa ɓa ꞌto ngan ko̰-mje wa? 49Cibi n-təl n-ula ji-a gə dɔ ngan njenendoje gə lə-a ngaɓa n-pa na: Oje ko̰-mje gə ngan ko̰-mje ɓa d-isi nee. 50Mba, dəw gə ɗa-ɗa gə ɗa mə njigi lə Bɔ-mje gə isi mə dara gə nama, nj-ɛ nee ɓa to ngon ko̰-m, ko̰ nan-m gə ko̰-mje.

നിലവിൽ തിരഞ്ഞെടുത്തിരിക്കുന്നു:

Matiye 12: lap

ഹൈലൈറ്റ് ചെയ്യുക

പങ്ക് വെക്കു

പകർത്തുക