Yohane 6
6
1Numa Yesu kakwimboo kaenda kwa kulya ya nruva ya Galilaya ya kulya Tiberia. 2Na isyamu iingi likansoṛa, fulya veelloliaa myorusie ilya minini andetana ya ikiṛa vandu valole. 3Yesu kaaṛukia uron kakaa-fo rembo andu emwi na vaseṛo vamwi. 4Na nkonu ulya nnini wa Vayuda ulya wa Pasaka wikee kufui. 5Yesu kaimboo miso kalolia isyamu iingi lya vandu liinsheaa. Kaia Filipo: Nkwi tuuṛaa mikate vandu va woose valye? 6Ikyo anderera kya imwelelia. Amu ye muni eeshi kilya atanaa. 7Filipo kamwaṛua: Mikate ya shilingi mayana avili ivafilaa na akwaa nndu awaria kibeṛeshu tubu ndi. 8Na umwi wa vanalosho vamwi yye Anderera mwanamae wa Simon Petiro kamwia: 9Ayo mwana umwi wa woomi awore mikate iraanu ya ngano shuu na makunga avili. Kake ifi fitanaa ki na vandu va vafile kuri? 10Kanumbua: Songosień vandu wo rembo! Na io vakaa eeworee mooṛo mwiingi wa maṛe. Na va-seṛo wo veeyoo veekee sha fiku firaanu. 11Yesu kawaria mikate ilya iraanu kaana Iṛuva kaavia vandu valya veekee rembo. Na makunga alya mfo kuro da kavaavia sheeli vafurie. 12Neeli vandu vandewuura, kaia vaseṛo vamwi: Saṅiṛień fibeṛeshu filya foose fasaa, manya mutaree-wo nta kimwi! 13Vakasaṅiṛia vakaishuṛa mikusha ikumi na ivili fibeṛeshu fa mikate ilya iraanu, mfilya findesaa ili vallya. 14Kyasia ili vandu vandelolia myorusie ilya Yesu andetana, vakanumbua: Nkya dede uu yye mwauya fisuku ulya ashaa isangeń. 15Kyasia ili Yesu andemanya sheeli vafurie isha vawware na finya vamwaṛue mangi, kauka kari kawo kaenda na kulya uroń ye muni.
16Neeli kundeila vanalosho vamwi vakaoloka na kulya mbaambaa ya nruva. 17Vakaaṛukia ngalaveń vakabooka iṛuka nruva vafike Kaperinaumu. Llema ukawara kitaare Yesu awafikia. 18Na nruva ikabooka ikoola iivititwaa mmburaato nini. 19Ili vandeenda kyeenga kya saa na mmwasi kinnya, vakalolia Yesu eendaa eeiraa kwa ule ya nruva na iserikia ngalava. Nawo vakaeṛea. 20Nae kavaia: Nniń, manya muteeṛee! 21Nawo vakafura insaamisa ngalaveń. Lia eni vakakooya ngalava yamfika mbaai ya uruka lua veekee yenda.
22Neeli lya ndesi syamu ilya iiselelee kwa kulya ya nruva ikalolia sheeli kitaare iifo ngalava ingi kulya kita ilya imwi iifoo. Na Yesu nta andeaṛukia andu emwi na vanalosho vamwi ngalaveń ilya ndi. Vvanalosho vamwi vandeenda wo veni. 23Kyasia tikasha ngalava tingi tuuka kulya Tiberia tikafika kufui na alya valiya mikate, ili Nndumi ammaa yaana Iṛuva. 24Kyasia ili isyamu lia lindelolia, sheeli Yesu atakiiyo ana nta vanalosho vamwi, vakasaama ngalaveń wo veni. Vakafika Kaperinaumu veeṛuyaa Yesu. 25Vakankooya ammaa iṛuka kafika taari ilya ingi ya nruva. Vakamwia: Llosha, iwe kwafika iri ki kunu? 26Yesu kavaaṛua kanumbua: Nkue nkue namuia: Ini nta mukee ishiṛuya kiimba kya myorusie ilya mundelolia ndi, nkiimba kya mikate ilya mundelya mukawuura. 27Manya mutakwatarie mashoṛa a shoonga ikashaa, kwatarień shoonga yo ikaa kumande muu wa miṛeṛe. Nayo yyo Mwana wa nndu amuniingaa, amu ito yye anderwaywa kiringisio nNdee yye Iṛuva. 28Kyasia vakamwia: Titanaań are amu timakii iṛunda mashoṛa wo a Iṛuva? 29Yesu kaaṛua kavaia: Iva wwo mashoṛa a Iṛuva ni ikusura ito anderumwa yye. 30Vakamwuṛa lingi: Mmyorusie ingai kutanaa amu tilolie tikukusure? A nkiki iwe kumuni kukee ikurambua nakyo? 31Vaande yeru valye Manna kulya bateń, sheeli kyatisiṛwa: ”Andevaniinga nkate uuka iṛuvewu valye.“ 32Yesu kavaia: Nkue nkue namuia: Mmose amuniingie nkate to uukie iṛuvewu ndi. Kake nNde yakwa yye amuniinga nkate to uukie iṛuvewu ukee wa dede. 33Amu nkate wa Iṛuva ni ulya aoloka auka iṛuvewu kaniinga va isangeń muu. 34Vakamwia: Nndumi, tiniinge nkate to mikonu yoose. 35Yesu kavaia: Niń nniń nkate to wa muu! Nndu kasha kwakwa akiliwaa lingi nsoto ndi. Na ulya ashikusuraa niń akiwarwaa nnyura nta nkonu umwi ndi. 36Kake neemmuiaa: Ilolia mwanshilolia nta mutautie-wo ishikusura. 37Woose Nde anshiniinga wwo vashaa kwakwa. Na ulya ashaa na kwakwa mmuumbutaa na wooṛo ndi. 38Amu kishinnde nuuka iṛuvewu ni ishetana kilya nkundie niń ndi, nkilya kikundio̱ ni ito ashirumie. 39Na kilya kikundio̱ ni ito ashirumie nkyo iki: Nkindo kyoose ankishiniinga, kaaṛa ntarete-wo nta kimwi. Kake nkiṛute nkonu wa ifurumia. 40Amu ii yyo mifurie ya Nde yakwa: Ulya woose allaa Mwana na inkusura ave na muu wa miṛeṛe na miṛeṛe, nań nindutaa nkonu wa ifurumia.
41Kyasia Vayuda vakaṅṅuṅuria, fulya anumbua: Nniń nkate waoloka uuka iṛuvewu. 42Vakanumbua: Uu yye Yesu mwana wa Yosefu se? A ise tiishi ndee na mae se? A alli naare akee inumbua: Namooloka nuuka iṛuvewu? 43Yesu kaaṛua kavaia: Manya mutaṅuṅure ini mu veni na mu veni! 44Eefo nndu amakii isha kwakwa kitaare aitikwa Vvaava uu ashirumie ndi, nań nindutaa nkonu wa ifurumia. 45Nkitisiṛe vvaauya fisuku sheeli: Nawo woose vavaa valoshe ni Iṛuva. Kyasia ulya woose aaranyaa na ikulosha kwa Nde, ashaa kwakwa. 46Nta eefo nndu allolia Nde kitaare ni ito aukie kwa Iṛuva, yye allolia Nde. 47Nkue namuia kya dede: Ulya akusurie awwaria muu wa miṛeṛe na miṛeṛe. 48Niń nniń nkate wa muu. 49Vakuuku vanu wo valye Manna kulya bateń na ifwa vakafwa. 50Kake nkate uu nausenda to uukie iṛuvewu, na nndu aulyaa akifwaa kutu ndi. 51Niń nniń nkate to uukie iṛuvewu uwore muu. Na nkate to nndu kaulya alunganaa na muu. Na nkate uu nuuniingaa ni vvili wakwa uniingio̱o̱ amu va isangeń vakooye ikia muu.
52Kyasia Vayuda vakavingana wo veni na veni veenumbuaa: Nndu uu amakii itiniinga are vvili wamwi tiule? 53Kyasia Yesu kavaia: Nkue nkue namuia: Mutallya vvili wa Mwana wa nndu na inwa usao lwamwi mukooyaa muu kari kanu ndi. 54Ulya alyaa vvili wakwa na inwa usao lwakwa awore muu wa miṛeṛe. Nań nindutaa nkonu wa ifurumia. 55Amu vvili wakwa nshoonga ya dede na usao lwakwa nkya inwa kya dede. 56Na ulya alyaa vvili wakwa na inwa usao lwakwa akaa akuvavie nań, nań nkaa nkuvavie nae. 57Na sheeli Nde ito ashirumie akee muni muu, nań nakaa na muu kiimba kya Nde, mfo kuro na ulya ashilyaa niń akaa na muu kiimba kyakwa. 58Uu nto nkate wolokie uuka iṛuvewu, nsha ulya vaande yanu vandelya vakafwa ndi. Kake nkate to nndu kaulya ito akaa na muu miṛeṛe. 59Firero fo afireria numba ya iterevia, ili eeloshaa ifo Kaperinaumu.
60Kyasia veengi va vanalosho vamwi ili vandeita kuri, vakanumbua: Firero fi mfuumu. A nndu amakii ifiaranya yye i? 61Na Yesu kamanya ye muni ifo nrimiń sheeli vanalosho vamwi vakee iṅuṅuria kirero kyo. Kavaia: A kirero kyo kyamuvia nsindaṛa? 62A kivaań are ili mukaa mulolie Mwana wa nndu eerwaa na ule ifo eekee ilyo mbele? 63Mumuyo nto aniingiaa muu, vvili ufile kindo ndi. Na firero fo namuia mfo fa mikae ya Mumuyo, lingi mfa muu. 64Kake veefo kiindi kari kanu vatakusurie. Amu Yesu eeishii kuuka mbele wangava vatankusurie, na nndu andiingaa ni ungau. 65Kanumbua: Nkyo kiteveto namuia: Eefo nndu amakii ifika kwakwa kitaare aelekio̱ nNde yakwa ndi.
66Kuuka io veengi va vanalosho vamwi vakauya numa nta ikinsoṛa lingi. 67Yesu kaia valya ikumi na vavili: Neeni da mufurie ikwendia? 68Simon Petiro kamwaṛua: Nndumi, teende kwa i? Iwe kuwore firero finnde muu wa miṛeṛe. 69Neese tankukusura tikammanya sheeli iwe ni iwe Nsongori uu wa Iṛuva. 70Yesu kavaaṛua: A nniń shi muni se nndemusaua ini ikumi na vavili? Na umwi wanu nSatana. 71Arera kura kiimba kya Yuda Isikariote akee mwana wa Simon. Amu ito yye andendiinga numa. Nae ni umwi wa iwo ikumi na vavili.
നിലവിൽ തിരഞ്ഞെടുത്തിരിക്കുന്നു:
Yohane 6: RWK72
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
